LOS HECHOS 3

Mactamilquisquiyam enlhit apyateyaycam

1Apmiyaclhec alhta Pedro najan Juan tingma apponquinomap. A las tres alhta intomjac. Apquiltemaclha alhta mataa apquililmalhnancama. 2Yejemoc alhta apquilvita enlhit apyateyaycam ayenmo aptemaclha apquitcoc. Appiquenacpec alhta mataa aclhamoclhojo acnim nicja apatong tingma apponquinomap acvisay Actamalma. Apquilanjam alhta mataa solyayem aptomja apquilantalhningvoycta mataa tingma apponquinomap. 3Lhama alhta apvita Pedro najan Juan yoyam elantilhic tingma apponquinomap. Apquilmalhnam alhta eyca solyayem. 4Yejemoc alhta apquilanoc Pedro najan Juan. Aptomjac alhta apcanya Pedro:

—Quip, jingilanojo nincoo —alhta aptomjac.

5Yejemoc alhta apsicjaclho. Apquiltamjoc alhta elhcac asoc. 6Aptomjac alhta apcanya Pedro:

—Am coyitnac coo solyayem. Moc asoc eyca inyitnac, sat omquesic lhip. Ayinyema actemaclha apmopvan Jesucristo co Nazaret. Itnimiclha netin, ityisam —alhta aptomjac.

7Yejemoc alhta apma Pedro apmic apquinimsaclho netin. Yejemoc alhta alyimnaclho apmancoc najan alyiptetaclha apmancoc. 8Yejemoc alhta apnilhtinga apquinmaclho netin. Inyicpintangvocmoc alhta aplhingam. Aptalhningvocmoc alhta lhama tingma apponquinomap. Intamilaclhec aplhingam. Apnilhtingamquic netin. Apcacoc alhta Dios Ingyapam. 9Apquilvitac alhta aplhamoclhojo enlhitaoc aplhinga najan apcayo Dios Ingyapam. 10Apyicpilcacpoc alhta enlhit apquilanjeycam mataa solyayem. Apnec alhta mataa nicja apatong tingma apponquinomap acvisay Actamalma. Pilapcasquic alhta apvitacpo actemaclha aptamalviyam.

Apquiltimnaycam Pedro congne tingma apvisay Salomón

11Am alhta eyinyavac mataa Pedro najan Juan enlhit aptamalviyam. Apnatemamquic alhta apquiltiyaningvaycmo napocja tingma apponquinomap, congne tingma apvisay Salomón. 12Lhama alhta apvita Pedro. Aptomjac alhta apquilanya enlhitaoc:

—Enlhitaoc Israel. ¿Soctomja alpilapsa nac apquilvita? ¿Soctomja singilano nac nincoo? ¿Apquilanayqui ya quellhip ayinyema ningmovan inganco najan ningiltamila ningilancam napato Dios? ¿Apquilanayqui ya nintamilquisquiyam nincoo as enlhit? 13Quip elanojo. Dios Ingyapam aptomja ilhnic nat apvisqui apancaoc Abraham najan Isaac najan Jacob.#Ex 3.15. Aptimesquiscama apyimtalhnamo Apquitca apvisay Jesús.#Is 52.13—53.12; Fil 2.7-9. Apquilanem alhta quellhip emacpoc Jesús najan colhic acyantamo apnaclha Pilato. Apquiltamjoc alhta inyicje eyamyiclha Pilato. Quellhip alhta eyca ayinyemaclha apquiltovascama. 14Quellhip alhta apquilmasma, yoyam colhic acyamyeclho aptomja Apponquinomap najan Appeyvomo. Apquililtamjoc alhta elyamyiclha quellhip enlhit aptomja ticyovam inyap.#Mt 27.15-23; Mr 15.6-14; Lc 23.13-23; Jn 19.12-15. 15Apquilajac alhta quellhip aptomja singmescama acyimnatem ingnenyic. Eyca Dios aptomja aplhaticjasquiyam nipyesicsa apquilmasquingvaycmo. Ningiltomja ningilvitaycamco nincoo. 16Eyca apvisay Jesús ayinyema meyasquiyam as enlhit. Apyimnavocmec alhta. Apquilvitac quellhip najan apquilyicpilcoc as enlhit. Meyasquiyam Jesús intamilquiscacmoc as enlhit napatavo quellhip.

17Elyalhinga, quip elanojo. Acyasamcoc coo, am alhta elyasamcoc quellhip apquiltomjaclha apquilaja Jesús. Am alhta elyasamcoc apquiltomjaclha apquilviscaa. 18Invocmec nelha Dios appayvam apquillhanma ilhnic nat profetas Dios apquillingascama. Aplhenacpec nic nat Cristo, am copvanac metac acmasca. 19Elyanmonquis apquilvalhoc quellhip, yoyam colmascosalhca melyascalhma. Comoc sat acnim, yoyam colhic actamilquiscacmo apquilvalhoc ayinyema Visqui ingac. 20Ingyapajacsic sat aplhenomacpo nano Cristo apvisay Jesús. Aplhanma ilhnic nat yoyam elvitac quellhip. 21Apnec siclhoc maa netin acvocmo acnim, yoyam elaniclhac aclhamoclhojo asoc aplhena ilhnic nat Dios Ingyapam. Acno apquillhanma ilhnic nat mataa profetas Dios apquillingascama apquilponquinomap apquilictingam apmamyi. 22Aptomjac nic nat Moisés apquilanya ningilyeyjamcaa: “Nipyesicsa apnaymacoc sat ingyinyema profeta Dios aplingascama. Colhojoc sat setnesquiscama coo Dios Visqui ingac. Elaylhojo sat mataa actemaclha appayvam. 23Am sat ancoc elyajaclho enlhit profeta Dios aplingascama appayvam, etvasacpoc sat nipyesicsa apnaymacoc Israel.”#Dt 18.15-19; 34.10.

24Aplhamoclhojo ilhnic nat profetas Dios apquillingascama apquillhanma as ningvamlha nac jay. Siclhoc nic nat Samuel najan aptomja apteteycaoc. 25Quellhip apquiltomja profetas Dios apquillingascama apquitquic. Apquilmaycam quellhip pacto (aplhanmaclha nasoc anco) ayinyema Dios Ingyapam. Apquilmasquic nic nat ningilyeyjamcaa Dios Ingyapam. Aptomjac nic nat apcanyacpo Abraham: “Ellhovac sat altamila asoc aplhamoclhojo enlhitaoc lhalhma anco ayinyema lhip aptovana niptamin.”#Gn 12.3; 22.18. 26Aplhaticjascacmec alhta Apquitca Dios Ingyapam. Apcapajascama alhta siclho nipyesicsa quellhip, yoyam epasmoc quellhip. Yoyam etlhamcoc quellhip apquiltemaclha acmasom.

Sélection en cours:

LOS HECHOS 3: ENHL

Surbrillance

Copier