LOS HECHOS 2

Apvayveyquintamlha Espíritu Santo

1Lhama alhta acvocmo acnim acvisay Pentecostés.#Lv 23.15-21; Dt 16.9-11. Apnam alhta apquilanomacpo apóstoles. Am alhta coyeycajalhcac apquilvalhoc. 2Pilapcasquic alhta anco aclingalhco ayilhtingyovam netin. Malha piyam apquilhcajayam alhta intomjac. Inlanoc alhta tingma apnaycamcaclha. 3Invitalhquic alhta alhcaoc, malha talha alayvom alhta intomjac aclhingacmo. Inquilticlhicvocmec alhta apyitsicsaoc enlhitaoc. 4Inquillanamcoc alhta apquilvalhoc enlhit Espíritu Santo. Apquilpametam alhta cotnaja apquilpayvam, ayinyema Espíritu Santo aptimesquiscama.

5Apnaycam alhta tingma Jerusalén judíos. Enlhit apquilpeyvomo apquilinyema lhalhma anco. 6Lhama alhta aclingalhco ayilhtingyovam. Apquicjingvoctac alhta enlhitaoc. Pilapcasquic alhta apquillinga apquilpameteycam appayvamo lhama moclhama enlhit. 7Pilapcasquic alhta enlhitaoc. Apquilpamejitsacpec alhta:

—¿Am ya elanacpo co Galilea actomja nac apquilpamesma? —alhta intomjac amyaa. 8Am lha ongilanalhco nincoo. ¿Soctomja ninlinga nac ninpayvamo lhama, malha nintemaclha inquitcoc? 9Apnam asi enlhitaoc co Partia najan co Media najan co Elam najan co Mesopotamia najan co Judea najan co Capadocia najan co Ponto najan co Asia. 10Najan co Frigia najan co Panfilia najan co Egipto najan co Africa tap yoclhilhma Cirene. Najan maycaa apquilinyema tingma Roma apquiltomja judíos apanco najan poc quilhva apquiltimem judíos. 11Najan co Creta najan co Arabia. Ninpayvamo lhama enlhitaoc nac maa. Ninlingac aclhenomalhca mataa apmopvan aptamjaycam Dios Ingyapam —alhta apquiltomjac.

12Pilapcasquic alhta anco aclingalhco. Apquilpamejitsacpec alhta:

—¿Soc laa pa incotnejic qui? —alhta apquiltomjac apquilpamesma.

13Apquilasmasquic alhta apnaymacoc:

—Intajapo uva yingmenic inquilnapac as enlhitaoc —alhta apquiltomjac.

Apquiltimnaycam Pedro

14Yejemoc alhta apquinmaclho netin Pedro. Apquillhalhmaa alhta once apóstoles apquilapajasomap. Apyimnatasquic alhta appayvam:

—Quellhip co Judea najan co Jerusalén. Elyasamcojo quellhip, elaylhojo siltimnaycam. 15Am lhac colnapac anmin as enlhitaoc. Alhtooc mocjam, las nueve intomjac. 16Eycaso actomja aplhanma ilhnic nat Dios Ingyapam. Aplingasquic nic nat Joel profeta Dios aplingascama:

17Otnejic sat yicpintama actamongvomlha nelha acnim —nic nat aptomjac Dios Ingyapam.

Oyanquincajac sat Espíritu ajanco tacjaplhit enlhitaoc.

Ellingacsic sat sicvisay quellhip apquitquic apquilinava najan quilvanaa.

Malha ningvitayo ningaat sat cotnejic enlhitaoc apquitcaoc.

Colhic sat apquilvanmoncama enlhit apquilvanyam.

18Oyanquincajac sat Espíritu ajanco tacjaplhit selancam apquilinava najan quilvanaa.

Ellingacsic sat sicvisay.

19Otnesquisic sat asoc sinpilapquiscama netin. Najan asoc monquinatquiscama as nalhpop: ema najan talha najan acpanma etin.

20Coyinaticsic sat olhma acnim. Eyilhvesic sat piltin, malha ema sat etnejic. Natamin covac sat Visqui ingac acnim apác acvanyam najan actamila.

21Moclhama aptomja aplhanma apvisay Visqui ingac, evomsacpoc sat tap#Jl 2.28-32.

—nic nat aptomjac profeta.

22“Quellhip enlhitaoc Israel, elaylhojo sicpayvam. Pac olhenic Jesús co Nazaret. Apcasinaquic alhta Dios Ingyapam. Apquiltamjoc alhta etnejic apmopvan aptamjaycam najan aptamjaycam sinpilapquiscama najan asoc monquinatquiscama nipyesicsa quellhip. Eycaso apquilyasamcoc quellhip aptomjaclha Dios Ingyapam. 23Apmacpec alhta Jesús. Actemaclha ilhnic nat aclhanma apvalhoc Dios Ingyapam najan actemaclha apmayjayoclha.#Lc 24.26. Apyasamcoc nic nat yoyam cotnejic. Apquilmec alhta quellhip. Apquilanayquic alhta quellhip metnaja judíos apquilmapsomcaa, yoyam elyipitsic asoc timyescama, yoyam najan elajic.#Mt 27.35; Mr 15.24; Lc 23.33; Jn 19.18. 24Eyca Dios Ingyapam alhta aplhaticjascacmoc.#Mt 28.5-6; Mr 16.6; Lc 24.5. Apvomcasac tap apquitsepma. Covanquejec comyoc actemaclha ningitsepma. 25Aplhenacpec nic nat Jesús. Apvisqui David nic nat aplhanma:

Alanoc coo mataa najato Visqui ingac.

Apnec mataa selyascamaclha,

yoyam cotyemejec evalhoc.

26Payjeclhec evalhoc.

Intipquic sicpayvam actemaclha siyitsovascama.

Inyiplovcoc siljalhanma sicyitna sicyovoclhojo congne tacjalhop.

27Meyinyovejec sat lhip ejangaoc nipyesicsa apquilmasquingvaycmo.

Sictomja lhip apquilancam.

Lhip alhta seponcanma.

Mejeyinyovejec sat coo.

Mengyojoyc sat otjapoc sicyovoclhojo.

28Elhicmosquic lhip amay acyimnatem ingnenyic.

Lhip sat jimquesic acpayjayclha evalhoc napato lhip#Sal 16.8-11.

—nic nat aptomjac David.

29“Elyalhing, mejelnovqueje coo olhenic ningilyeyjamcaa David. Apquitsepmec nic nat. Apcatongnacpec nic nat. Yitnec mocjam aso tacjalhop apác. 30David aptomjac nic nat profeta Dios aplingascama. Apyasamcoc nic nat aplhanmaclha Dios Ingyapam. Nasoc anco sat etnesquisic appayvam. Apquiltamjoc nic nat etnescasiclha apvisqui, yoyam elhic aptavin niptamin David. Yoyam eyanmongsic sat aptavin niptamin apvisay Cristo.#Sal 132.11; 2 S 7.12-13. 31Lhama ilhnic nat aplhena David as appayvam. Am alhta coyinyovalhcac apjangaoc nipyesicsa apquilmasquingvaycmo. Am alhta ingyavo etjapoc apyovoclhojo. Apyasamcoc nic nat David asoc yoyam cotnejic nanoc sat. Cristo yoyam elhaticjangvomoc nic nat aplhenac. 32Dios Ingyapam aptomja aplhaticjasquiyam as Jesús. Ninlhamoclhojo nincoo ningiltomja ningvitayo. 33Apyasacpec alhta netin. Apnesacpec alhta apyimnatamaclha Dios Ingyapam. Apmesquic Apyap Espíritu Santo aplhanma alhta yoyam emquesic. Eyca as asoc apquilvitay najan apquillingay quellhip alvaa ayinyema Espíritu Santo. 34Am nic nat eyasac netin David. Eycaso actomja aplhanma ilhnic nat David:

Aptomjac Ingyapam apcanya Visqui ajac:

Ilha sat nejicja selyascamaclha.

35Motvasaclha mocjam cotnaja apnaymacoc.

Apquiltoyam sat etnejic lhip#Sal 110.1.

—nic nat aptomjac.

36Eyca as Jesús apquilyipitquiscama alhta quellhip asoc timyescama. Elyasamcojo quellhip enlhitaoc Israel. Noelyasquim nasa amyaa. Apvisqui Apponquinomap aptimescasac Dios Ingyapam —alhta aptomjac Pedro.

37Alpilapacmo alhta apquilvalhoc apquillinga apquiltimnaycam. Apquilmalhnacpec alhta Pedro najan apnaymacoc apóstoles apquilapajasomap:

—Elyipmaa, ¿co sat ontimjic nincoo? —alhta apquiltomjac.

38Apcatingmavoc alhta Pedro:

—Elyanmonquis apquilvalhoc napato Dios Ingyapam. Eltingya macyapascaseycaoc yingmin actema apquillhanma apvisay Jesucristo. Colmascosalhcac sat melyascalhma quellhip. Ellhovac sat Espíritu Santo Dios apmescama. 39Eycaso aptomja aplhanmaclha Dios Ingyapam. Quellhip alhta apquillhenacpoc yoyam ellhovac najan apquitquic najan apnaycam mocjay. Najan aplhamoclhojo aptomja apquilanyomap, aptomja apquilanem Dios Visqui ingac —alhta aptomjac.

40Aplhamasoc alhta apquiltimnaycam Pedro. Aptomjac alhta apquilanya:

—Elvomsap tap quellhip nipyesicsa as enlhitaoc melpeyvomo —alhta aptomjac.

41Inquilmec alhta apquilvalhoc Dios appayvam. Yejemoc alhta aptingyamco yapasquiscama yingmin. Malha tres mil alhta apquilpalhacsomap enlhitaoc apquilyanmonquiscama apquilvalhoc. 42Apquilinlhanacmec alhta apquilvajaneycaoc apquillhicmoscama apóstoles najan apquilpasmom najan apquilyaptama quilpasmongam najan apquilmalhnancama.

Apquiltemaclha cristianos apquilmamyi

43Apquilangvocmec alhta aplhamoclhojo enlhit. Apquillhamasoc alhta apquiltamjaycam sinpilapquiscama najan asoc monquinatquiscama apóstoles apquilapajasomap. 44Apnaycamoc alhta lhama apquiltimem melyasquiyam. Apquilpasmec alhta mataa aclhamoclhojo asoc.#Hch 4.32-35. 45Apquilhaquic alhta aclhamoclhojo apquilnatam najan asoc apancaoc. Apquilmilasquic alhta mataa acyanmongam solyayem actomja ayaymalhquilha inlhojo asoc. 46Am alhta coyeycajalhca moc apquiltemaclha. Apquilinlhanacmec alhta aclhamoclhojo acnim apquilyoyquiclha tingma apponquinomap. Apquilyaptama quilpasmongam alhta aptomjac moclhama tingma. Inquilpayjeclhec alhta mataa apquilvalhoc naysicsa aptoycaoc apquilpasmeyquiclha. 47Apquilacoc alhta mataa Dios Ingyapam. Apquilasicjacpec alhta apquiltomja melyasquiyam tasic amyaa. Apquilpalhacasquic alhta apmolhama Jesucristo aclhamoclhojo acnim apquiltomja apquilvomsomap tap.

Sélection en cours:

LOS HECHOS 2: ENHL

Surbrillance

Copier