Luk 17

Ulemwa

(Mat 18:6-7, 21-22; Mak 9:42)

1Yesu* ŵasalile ŵakulijiganya* ŵakwe kuti, “Yakumlemwekasya mundu ngasiyilepela kuwoneka, nambo likungu lili kwa mundu jwakwisa nayo. 2Kukaliji kwambone kumkoleka jwalakwejo liganga lyekulungwa mu lukosi mwakwe ni kumponya m'nyasa, kulekangana ni kuti alemwekasye jumo jwa ŵanace ŵanandiŵa. 3Myoyo mkalamuce pa yele yimkutenda!#Mat 18:15

“Mlongo mjenu naga alemwisye, mumjamuceje, naga akupitikuka mtima ni kuleka ulemwa* mumkululucileje. 4Naga akumlemwecesya kasano ni kaŵili pa lisiku limpepe, ni jwalakwejo akwisa kwenumwe kukumsalila kuti ‘Pepani nimlemwecesye,’ mumkululucileje.”

Ya cikulupi

5Ŵandumetume ŵaŵendile Ambuje kuti, “Acitende cikulupi cetu kuti ciŵe cakulimbangana!”

6Yesu ŵajanjile kuti, “Jemanja mkakole cikulupi atamose camwana mpela lusongolo lwa mbeju ja citela ca mkuju, mkakombolece kucisalila citela cekulungwaci kuti, ‘Mtupuce ni mkalipandicile m'nyasa!’ celeco cikampikanile.”

Masengo ga jwakutumicila

7“Yesu ŵatite soni kuti, tuwanicisye kuti jwine jwa jemanja akwete jwamasengo jwakulima ku migunda kapena jwakulanga ngondolo. Jwalakwejo pawusile ku migunda, ana timumsalile kuti, ‘Myice mtame apa kuti mlye?’ 8Ngaŵa myoyo, nambo timumsalile kuti, ‘Mungolocesye yakulya. Mliŵicile cile kundumicila mpaka patimale kulya ni kumwa, nipo m'mwejo timlye ni kumwa panyuma pakwe.’ 9Ana mpaka mumtogolele jwamasengo ligongo lyakuti atesile yele yimwamlamwile kuti atende? 10Myoyo soni jemanja, mli nimsalile kutenda yosope yimwalamulidwe kuti myitende, mjileje kuti, ‘Uwe tuli ŵamasengo ŵangajenela kupocela kandu. Uwe tugambile kutenda yele yitwaŵajile kuyitenda.’ ”

Yesu ŵaposisye ŵamatana likumi

11Pa ulendo wakwe wakwawula ku Yelusalemu, Yesu ŵapitile sikati ja malile ga cilambo ca Samaliya ni Galileya. 12Piŵajinjilaga m'musi wine, ŵasimene ni ŵandu likumi ŵiŵaliji mkulwala ulwele wa matana. Jemanjajo ŵajimi pakutalicila pamti myoyo, 13nipo ŵaliji mkuŵeceta mwakwesya maloŵe acitiji, “Ambuje Yesu atutendele uwe canasa.”

14Yesu piŵaweni jemanjajo ŵasalile kuti, “Mjawule ni mkalilosye kwa ŵakutaga mbopesi.”

Jemanjajo piŵaliji mkwawula ŵasimanikwe kuti aposile.#Lef 14:1-32 15Jumo jwa ŵa matana ŵala piŵaweni kuti aposile, ŵawujilile acimlumbaga Mlungu mwakwesya maloŵe, 16kaneko jwatindiŵele ni kwinamila pasi pameso pa Yesu, acimtogolelaga. Munduju jwaliji jwakutyocela ku cilambo ca Samaliya.

17Yesu ŵawusisye kuti, “Ana ŵandu ŵaposile ŵala eti ŵaliji likumi? Nambi ŵane msano ni mcece ŵala apite kwapi? 18Ana pangali jwawusile kuti amtogolele Mlungu akaŵe mlendo peju?” 19Kaneko Yesu ŵamsalile mundu jula kuti, “Jimukani mjawuleje, cikulupi cenu cimposisye.”

Ya mwele Mlungu mutaciwutamilisya Ucimwene wakwe

(Mat 24:23-28, 37-41)

20Afalisi* ŵane ŵamwusisye Yesu kuti, “Ana Mlungu taciwutamilisya cakaci Ucimwene wakwe pa cilambo capasi pano?” Yesu ŵajanjile kuti, “Mlungu jwangatamilisya Ucimwene wakwe mcilolaga ni meso. 21Pangali mundu jutacijila kuti, ‘Mlole uli apano,’ kapena ‘Awo uli akowo!’ Pakuti Ucimwene wa Mlungu* uli mwa jemanja m'mitima mwenu.”

22Kaneko Yesu ŵasalile ŵakulijiganya ŵakwe kuti, “Jikwisa ndaŵi jitimcisosa kujiwona ndaŵi jakwisa kwa Mwanace jwa Mundu,* nambo ngasimjiwona. 23Ŵandu tacimsalilaga kuti, ‘Mlole awo uli akowo,’ kapena ‘Awu uli apanowu,’ mkasimjawula kweleko kapena kwakuya jemanjajo. 24Mpela njasi jikusamesya ni kuŵala kwinani kutyocela mbali jine kuja ku mbali jine, myoyo soni Mwanace jwa Mundu tiyiciŵa myoyo pa lisiku litaciyikaga. 25Nambo jwalakwejo akwenela kuti awone yisawusyo yakogoya ni kukanidwa ni ŵandu ŵa mpago awuno. 26Lisiku lyakwisa kwa Mwanace jwa Mundu tiliciŵa mpela muyatendekwele yindu mu ndaŵi ja Nowa.#Gen 6:5-8 27Mu gele masikugo, ŵandu ŵagambaga kulya ni kumwa, ŵaliji mkulombela ni kulombedwa mpaka pa lisiku liŵajinjile Nowa mcombo mula. Kaneko cayice cikumba ca mesi ni cajonasile wosopewo.#Gen 7:6-24 28Mu ndaŵi ja Loti, ŵandu ŵalyaga ni kumwa, soni ŵaliji mkusumisya malonda, kupanda mbeju ni kutaŵa majumba.#Gen 18:20—19:25 29Nambo lisiku liŵakopwece Loti mu msinda wa Sodomu, Mlungu ŵagwisisye moto wa maganga ga sulufule* gakutyocela kwinani nipo ŵawuleje ŵandu wosope. 30Tiyiciŵa soni myoyo pitaciyika Mwanace jwa Mundu.

31“Pa lyele lisikulyo jutaciŵa pa msakasa wa nyumba, katundu jwakwe ali m'nyumbamo, akatuluka kuja kujigala katundujo, yalumo soni ni jutaciŵa ku migunda nombe najo akawujila ku nyumba.#Mat 24:17-18; Mak 13:15-16 32Mkumbucile yiyatendekwe kwa ŵamkwakwe Loti.#Gen 19:26 33Jwalijose jwakulinga kuwukulupusya umi wakwe taciwujasa, nambo jwalijose jwa kuwujasa acatumicilaga Ambuje taciwukulupusya.#Mat 10:39; 16:25; Mak 8:35; Luk 9:24; Yoh 12:25 34Ngumsalila kuti cele ciloco ŵandu ŵaŵili tacigonaga cindanda cimpepe, nambo jumo tacijigalidwa nipo jwinejo tacimleka. 35Acakongwe ŵaŵili taciŵa ali mkutwa, jumojo tacimjigala, jwinejo tacimleka. 36Ŵandu ŵaŵili taciŵa ali mu mgunda, jumo tacijigalidwa nipo jwinejo tacimleka.”

37Kaneko ŵakulijiganya ŵa Yesu ŵawusisye kuti, “Ambuje, ana yeleyi tiyicitendekwa kwapi?”

Yesu ŵajanjile kuti, “Kulikose kuciwilile cindu, matumbusi gakusasongana kweleko.”

Sélection en cours:

Luk 17: YAWO

Surbrillance

Copier