Luk 16

Citagu ca kapitawo jwangakulupicika

1Yesu* ŵasalile ŵakulijiganya* ŵakwe kuti, “Jwapali mundu jwakusicila juŵakwete kapitawo. Ŵandu ŵajinji ŵaliji mkwika kwa jwalakwejo kukumsalila kuti kapitawojo akonanga cipanje ca mbujegwejo. 2Myoyo mundu jwakusicila jula ŵamŵilasile kapitawojo ni kumwusya kuti, ‘Ana ngani singupikanasi syakwamba m'mwejo syamtuli?’ Sambano ngusaka kuti mulondecesye une ya ukapitawo wenu, ligongo m'mwejo ngaŵa mkukomboleka kuti mŵe soni kapitawo. 3Pelepo kapitawojo jwatandite kuganisya mu mtima mwakwe kuti, ‘Ana ndende cici pakuti ambuje ŵangu akundyosya ukapitawo? Une jwangali macili gakuti ngalimeje mu mgunda soni kuŵendaŵenda kukundesya soni. 4Sambano nayimanyi yitindende, kuti ŵandu akapakombole kumbocela soni une m'majumba mwawo pa ndaŵi jitiwumale ukapitawo wangu.’ ”

5“Jwalakwejo ŵaŵilasile ŵandu ŵaŵakwete ngongole ni mbujegwe jula. Ŵamwusisye mundu jwandanda kuti, ‘Ana mkwete ngongole jamtuli kwa ambuje ŵangu?’ 6Jwalakwejo jwajanjile kuti, ‘Mawuta gakwanila yiŵiga 100.’ Kapitawojo ŵamsalile mundu jula kuti, ‘Mjigale cikalata aci ca ngongole jenu ni mtame pasi mwacitema, ni mgambe kulembapo yiŵiga 50 ya mawuta.’ 7Kaneko ŵamwusisye soni mundu jwaŵili kuti, ‘Nambi m'mwe, mkwete ngongole jamtuli kwa ambuje ŵangu?’ Jwalakwejo jwajanjile kuti, ‘Misaku 1,000 ja tiligu.’ Kapitawojo ŵamsalile mundu jula kuti, ‘Mjigale cikalata cenu ca ngongole, ni mgambe kulembapo misaku 800 ja tiligu.’ ”

8“M'malo mwakwe mbujegwe jula ŵamlapilile kapitawojo ligongo lya kukalamuka kwakwe, ali ni ligongo lyakwe ŵandu ŵakusagamba kunonyela yindu ya pa cilambo capasi pano ali ŵakalamuka kwapunda ŵandu ŵakusatama mu lilanguka lya Mlungu.”

9Yesu ŵapitilisye kuŵeceta kuti, “Ngumsalila kuti, mtende ma uganja pakukamulisya masengo yipanje yamkupata m'matala gangalumbanayi. Yipanjeyi pitiyicim'malila Mlungu tacimpocela ku musi wa yaka yosope. 10Mundu jwakulupicika pa yindu yamnono, taciŵa jwakulupicika pa yindu yekulungwa. Soni mundu jwali jwangakulupicika pa yindu yamnono, taciŵa jwangakulupicika soni mu yindu yejinji. 11Nambi naga jemanja mŵele ŵangakulupicika pa yipanje yakupata m'matala gangalumbanayi, ana ŵani mpaka ampe jemanja yipanje kuti myiloleleje? 12Naga ngamkukulupicika pa yindu ya mundu jwine, ana ŵani ŵitampe yindu yine kuti yiŵe yenu yenupe?”

13“Pangali jwamasengo jwa mpaka apakombole kwatumicila acambujegwe ŵaŵili, ligongo komboleka kumŵenga jumo ni kumnonyela jwinejo, kapena kumpikanila jumo ni kumnyosya jwinejo. Ngaŵa mkupakombola kumtumicila Mlungu ni cipanje ndaŵi jimpepe.”#Mat 6:24

Yine yiŵaŵecete Yesu

(Mat 11:12-13; 5:31-32; Mak 10:11-12)

14Afalisi* piŵapikene yeleyi ŵamsecile Yesu ligongo lyakuti jemanjajo ŵaliji ŵakunonyela mbiya. 15Yesu ŵasalile jemanjajo kuti, “Jemanja mkusalilosya mpela ŵakulungama pameso pa ŵandu, nambo Mlungu akusajimanyilila mitima jenu. Pakuti yindu yejinji yele ŵandu yakusaganisyaga yili yambone yikusaŵa yangali mate pameso pa Mlungu.”

16Malamusi giŵalembile Mose* ni mabuku ga ŵakulocesya galiji mkukamulape masengo mpaka pa ndaŵi ja Yohane* M'batisi. Kutyocela ndaŵi jelejo Ngani Syambone* sya Yesu Klistu* syakwamba Ucimwene wa Mlungu sikulalicidwa, soni jwalijose akulinjilila ni macili gakwe kuti akajinjilemo.#Mat 11:12-13 17Cili cindu cangasawusya kuti kwinani ni cilambo capasi yimale kupunda kuti lilemba lyamnono lya malamusi lisimasice.#Mat 5:18

18“Jwamlume jwalijose jwakwaleka ŵamkwakwe ni kuja kulombela ŵakongwe ŵane, jwalakwejo atesile cikululu. Soni jwamlume jutalombele ŵakongwewo, nombe najo akutenda cikululu.”#Mat 5:32; 1 Akoli 7:10-11

Ya mundu jwakusicila ni Lasalo

19“Jwapali mundu jwine jwakusicila juŵawalaga yakuwala yakusalala ni ya mtengo wapenani, jwalakweju jwaliji mkusangalala pa kulya yakunong'a ndaŵi syosope. 20Jwapali soni mundu jwine, lina lyakwe Lasalo jwele ŵandu ŵane ŵajaga kukumyika pa mlango wa mundu jwakusicila jula kuti aŵendeje. Jwele munduju jwakwete yilonda pa cilu cakwe cosope. 21Jwalakweju jwaliji mkulamila pa mbakatika sisyaliji mkugwa kutyocela pa tebulo ja mundu jwakusicila jula. Nombe nasyo m'mbwa syayikaga ni kulapitaga m'maŵanga ga mundu jula.”

22“Mundu jwakulaga jula jwawile, malayika* gamnyakwile ni kuja kukumŵika ciŵandika ni Abulahamu.* Nombe najo mundu jwakusicila jula jwawile ni ŵajile kukumsika mwilembe. 23Piŵaliji mkulaga ku malo ga ŵandu ŵawe* kula, jwalakwejo jwanyakwile meso gakwe ŵam'weni Abulahamu ali kutali kwamti myoyo nipo Lasalo ali pambali pa Abulahamuwo. 24Papopo ŵaŵilasile mwakwesya maloŵe acitiji, ‘Atati Abulahamu mundendele canasa. Mumtume Lasalojo aloŵece lusonga lwa cala cakwe m'mesi kuti agambe kusisimisya lulumi lwangu ligongo ngulaga mnope mwilamba lya moto muno!’ ”

25“Nambo Abulahamu ŵatite, ‘Mwanangu, mkumbucile kuti mwapocele cile yakusangalasya umi wenu pimwaliji cijumi, pa ndaŵi jele Lasalo jiŵapocelaga yisawusyo. Nambo sambano Lasalojo akusangalala akuno, nipo m'mwejo mli myipwetesi sambano. 26Soni sikati jetu ni m'mwejo pana licenje lyakusokoka mnope, mwakuti ŵakutyocela akuno ngaŵa mkupakombola kombocela kumli m'mwejoko.’

27“Mundu jwakusicila jula jwatite, ‘Ngwacondelela wawo Atati, kuti ŵatume Lasalo ku nyumba ja baba ŵangu. 28Kweleko ngwete acalongo acimjangu msano ni akakalamusye jemanjajo, kogopela kuti nombe nawo atakwika ku malo ga yisawusyo kuno.’

29“Nambo Abulahamu ŵajanjile kuti, ‘Acalongo acimjenuwo akwete mabuku giŵalembile Mose ni gane ga ŵakulocesya. Akwenela kuti agapikanicisye maloŵe ga m'mabuku gelega.’ 30Mundu jwakusicila jula jwatite, ‘Iyayi, Atati Abulahamu! Yeleyo nganiyiŵa yakwanila, nambo naga jwine akwimuka ku ŵawe ni kwawula kwa jemanjajo, takakombolece kupitikuka mitima.’ 31Nambo Abulahamu ŵatite kuti, ‘Naga ngakwapikanila Mose ni ŵakulocesya ŵakwe, nikuti ngasiyikomboleka soni atamose jwine ajimuce ku ŵawe.’ ”

Sélection en cours:

Luk 16: YAWO

Surbrillance

Copier