Luk 15

Citagu ca ngondolo jakusokonecela

(Mat 18:12-14)

1Ŵandu wosope ŵakomesya msongo, Ayuda ni ŵandu ŵane ŵa ulemwa* ŵaliji mkwika kwa Yesu* kukupikanila maloŵe gakwe.#Luk 5:29-30 2Sambano Afalisi* ni aciŵalimu ŵa Malamusi* ŵatandite kunyinyita acitiji kuti, “Munduju ali jwakusyoŵekana ni ŵandu ŵa ulemwa, soni akusalyaga nawo pamo.”

3Myoyo Yesu ŵasalile jemanjajo citagu* aci:

4“Tuwanicisye kuti jwine mwa jemanja akwete ngondolo 100, nipo jimo jikusokonecela, ana mpaka atende cici? Ana ngasileka ngondolo 99 syakusigala sila ni kuja kujisosa jisokonecele jila mpaka ali ajisimene? 5Ali ajisimene akusaŵaga ŵakusangalala nipo akusajitwicila pa makoyo. 6Pandaŵi jakwika kumangwakwe akusiŵasonganya acimjakwe ni acanasi ŵaŵandikene nawo nipo akusiŵasalila kuti, ‘Une ngusangalala ligongo najisimene ngondolo jangu jijasokonecele jila. Kwende tusangalale pamo!’ 7Yesu ŵapitilisye kuŵeceta kuti, kwinani tikuciŵa lukondwa ligongo lya mundu jumo jwa ulemwa jwapitikwice mtima, kwapunda ŵandu ŵakulungama 99 ŵele ŵangakusaka kupitikuka mtima.”

Citagu ca mbiya jakwasika

8Yesu ŵasalile ŵanduwo ngani jine acitiji kuti, “Tuwanicisye kuti jwamkongwe jwine akwete mbiya likumi, myoyo ni yikusimanikwa kuti mbiya jimo jijasice, ana mpaka atende cici? Ana ngapamba nyali, ni kupyajila m'nyumbamo aku alimkusosasosa mbiyajo mpaka ali ajisimene? 9Naga ali ajisimene akusiŵaŵilanga acimjakwe ni acalongo acimjakwe ni kwasalila kuti, ‘Une ngusangalala ligongo mbiya jijanjasice jila nijipatile. Kwende tusangalale pamo!’ 10Yesu ŵapitilisye soni kuŵeceta acitiji kuti, malayika* gakutyocela kwa Mlungu nombe nago gakusasangalala ligongo lya mundu jumo jwa ulemwa jwapitikwice mtima wakwe.”

Citagu ca mwanace jwakonanga

11Yesu ŵasalile soni ŵanduwo ngani jine acitiji kuti, “Jwapali mundu jwine juŵakwete ŵanace ŵaŵili ŵacalume. 12Mwanace jwamnondi jula ŵaŵendile babagwe kuti, ‘Baba, mumbe mbali jine ja yipanje yenu kuti yiŵe yangu.’ Myoyo babagwe ŵala ŵagaŵenye yipanje yakwe sikati ja ŵanace ŵaŵiliwo. 13Gali gamasile masiku panandi, mwanace jwamnondi jula ŵasumisye yindu yosope yiŵakwete nipo ŵawutandite ulendo wakuja ku cilambo ca cilendo, kwele kuŵajonasile mbiya syakwe syosope pakusitumicila m'matala gakusakala. 14Pisyamasile mbiya syosope siŵakwete sila, jayice sala mcilambomo mwakuti jwalakwejo jwatandite kulaga mnope. 15Myoyo jwalakwejo jwajile kukamula masengo kwa mlukosyo jwine jwa mcilambomo, kwele kuŵampele masengo gakulanga maguluŵe. 16Jwalakwejo jwasosaga kumasya sala pakulya makoŵa gigaliji mkulilidwa ni maguluŵego, nambo nganapagwa mundu jwalijose jwakumpa jwalakwejo cikamucisyo cilicose ca pa umi wakwe. 17Piŵamanyilile kuti atesile yindu yangalumbana jwalakwejo jwatite kuti, ‘Ŵamasengo ŵa baba ŵangu akwete yakulya yejinji, nambo une akuno nguwa ni sala. 18Tinjawule kwa baba ŵanguwo nipo tingasalile kuti, Baba, une namlemwecesye Mlungu nambo soni ŵalakwe. 19Une nganguŵajilwa kukolanjidwa kuti mwanagwenu, nambo munjigale une mpela jumo jwa ŵamasengo ŵenu.’ 20Myoyo jwajimwice nipo ŵawutandite ulendo wakwawula kwa babagwe.

“Nambo piŵajendaga pakutalicila ni kumangwakwe, babagwe ŵam'weni jwalakwejo ni ŵamtendele canasa. Babagwewo ŵamwutucile jwalakwejo ni kumkumbatila ni kumpocela. 21Mwanacejo jwatite, ‘Baba, namlemwecesye Mlungu ni wawo ŵakwe. Nganguŵajilwa kukolanjidwa kuti mwanagwenu.’ 22Nambo babagwe ŵala ŵamsalile jwamasengo kuti, ‘Mwutuce mkajigale malaja gakusalala gala, mum'wece jwalakweju, soni mum'wece mbete mcala cakwe ni sapato ku sajo syakwe. 23Mkajigale mwanace jwa ng'ombe jwakwimbala jula ni mumwulaje kuti tulye ni kusangalala. 24Mwananguju jwaliji jwam'we, nambo sambano akwete soni umi, jwasokonecele, nambo sambano asimanikwe.’ Kaneko cindimba catandite.

25“Pandaŵi jeleji mwanace jwamkulungwa jula jwaliji ku migunda. Piŵawujaga ku migundako, ŵayice ciŵandika ni nyumba nipo ŵapikene ŵandu ali mkwimba ni kuŵina kwakwe. 26Kaneko ŵamŵilasile jwamasengo jumo ni ŵamwusisye kuti, ‘Ana cikutendekwa akuno cici?’ 27Jwamasengo jula jwajanjile kuti, ‘Apwenu ayice, nipo baba ŵenu awuleje mwanace jwa ng'ombe jwakwimbala jula ligongo lyakuti ampocele jwalakwejo ali cijumi.’

28“Piŵapikene yeleyo mwanace jwamkulungwa jwapile mtima nipo jwakanile kwinjila m'nyumbamo, mpaka babagwe ŵakopwece m'nyumbamo ni kwika kukumcondelela jwalakwejo kuti ajinjile. 29Jwalakwejo ŵajanjile babagwewo kuti, ‘Mlole, mbele ndili kumtumicila yaka yosopeyi, nipo pangali lisiku linanyosisye maloŵe genu. Nambotu nganimumbeje atamose kambusi kamwana kuti none sangalale ni acimjangu. 30Nambo pawusile mwanagwenuju, juŵajonasile yipanje yenu kwa acakongwe ŵa cigwagwa, ni mumwulajile mwanace jwa ng'ombe jwakunakana jula.’ 31Babagwe ŵala ŵamsalile kuti, ‘Mwanangu, m'mwejo mkusitama pampepe ni une ndaŵi syosope, nipo yosope yingwete une yili yenu. 32Nambo tukwenela kusangalala ni kusengwa kuti mpwenuju jwaliji jwam'we nambo sambano ali cijumi, jwasokonecele nambo sambano asimanikwe.’ ”

Sélection en cours:

Luk 15: YAWO

Surbrillance

Copier