Luk 18

Citagu ca jwamkongwe jwa masije ni mundu jwakulamula magambo

1Yesu* ŵasalile ŵakulijiganya* ŵakwe citagu* cakwajiganya jemanjajo kuti aŵeje ŵakupopela ndaŵi syosope mwangawujila panyuma. 2Kaneko ŵatite, “M'musi wine wakwe mwapali jwakulamula jwine jwele nganamjogopaga Mlungu kapena kusamalila ya ŵandu ŵane. 3M'musi m'momo mwaliji mwana jwamkongwe jwa masije. Jwalakweju jwayikaga kwa jwakulamulaju kaŵilikaŵili kukuŵenda kuti, ‘Mjilanye mwakunonyela une pa magambo sikati ja une ni m'magongo jwangu.’ 4Kwandaŵi jelewu jwakulamulila jula jwaliji mkukana, nambo panyuma pakwe jwalakwejo jwaganisisye kuti, ‘Atamose une jwangamjogopa Mlungu kapena kusamalila ya umi wa ŵandu ŵane, 5nambope tinamkamucisye jwamkongweju ligongo akulimbicila kusawusya une, tinamjilanyile magambo gakwe, kogopela kumbesya une mtande wa kwikayika kwakwe.’ ”

6Ambuje ŵapitilisye kuŵeceta kuti, “Mpikene yiŵaŵecete jwakulamula jula? 7Nambi Mlungu ngasiŵacenjela ŵakusagulidwa ŵakwe ŵakusapopela kwa jwalakwejo musi ni cilo? Ana tacigamba kwaleka? 8Ngumsalila kuti tacalamulila magambo gawo mwacitema. Nambo pitaciyikaga Mwanace jwa Mundu,* ana tacasimana ŵandu ali ŵana cikulupi pa cilambo pano?”

Citagu ca Mfalisi ni jwakomesya msongo

9Yesu ŵasalile soni citagu ŵandu ŵane ŵakulitenda ŵakulungama ni kwanyosyaga acimjawo. 10Ŵatite kuti, “Ŵandu ŵaŵili ŵajile ku Nyumba ja AMBUJE kukupopela. Jwine jwaliji Mfalisi jwine jwakukomesya msongo.”

11“Mfalisijo jwajimi ni kutanda kupopela mu mtima mwakwe acitiji, ‘Mlungu une ngwatogolela ŵalakwe pakuti une nganimba mpela ŵandu ŵane, ŵawiyi, ŵangalumbana, ni ŵalilama kapena mpela jwakomesya msongoju. 12Une ngusalijima kulya kaŵili pa cijuma, soni ngusapeleka ca likumi ca yindu yosope yingusaka.’ ”

13“Nambo jwakomesya msongo* jula jwajimi patali pamti myoyo, soni ngananyakulila meso gakwe kwinani. Jwalakweju ŵaliputile pamtima kulosya kulinondiya kwakwe acitiji, ‘Mlungu andendele canasa une mundu jwa kulemwa.’ ” 14Yesu ŵatite, “Ngumsalila kuti jwakomesya msongoju ŵajawile kumangwakwe ali jwamkululucidwe ulemwa* wakwe kupunda Mfalisijo, pakuti jwalijose jwakulinondiya tacimkwesya, ni jwakulikwesya tacimtulusya.”#Mat 23:12; Luk 14:11

Yesu akwajaliwasya ŵanace

(Mat 19:13-15; Mak 10:13-16)

15Ŵandu ŵane ŵayice ni ŵanace ŵawo kwa Yesu kuti ŵape upile jemanjajo, nambo ŵakulijiganya ŵakwe piŵayiweni yeleyi ŵakalipile jemanjajo. 16Nambo Yesu ŵaŵilasisye ŵanacewo ni ŵatite kuti, “Mwaleceni ŵanacewo ayice kwa une, mkasimwalekasya pakuti Ucimwene wa Mlungu* uli wa jemanjaji. 17Kusyene ngumsalila kuti, jwalijose jwangakupocela Ucimwene wa Mlungu mpela mwanace, jwelejo ngasajinjila mu Ucimwene.”

Mundu jwine jwakusicila

(Mat 19:16-30; Mak 10:17-31)

18Jwamkulungwa jwine jwa Ayuda jwamwusisye Yesu kuti, “Cemwalimu ŵambone, ana ngwenela kutenda cici kuti ngapocele umi wangamala?”*

19Yesu ŵamjanjile kuti, “Ana ligongo cici mkundenda kuti ndili jwambone, pakuti jwambone jika ni Mlungupe? 20Mkumanyilila yigakuti Malamusi, ‘Mkatenda cikululu, mkawulaga, mkajiŵa, mwacimbicisyeje baba ni mama ŵenu.’ ”#Eks 20:12-16; Det 5:16-20

21Mundu jula jwatite, “Malamusi gosopega mbele ndili mkugakuya kutandilila ndili mcanda.”

22Yesu piŵapikene maloŵego, ŵamsalile mundu jula kuti, “Cikumsoŵa cimo cakuti mtende. Mkasumisye yindu yosope yimkwete, nipo mbiya syakwe mkasipelece kwa ŵandu ŵakulaga, ni timcipocela yipanje yakwinani. Kaneko myice munguye une.” 23Nambo mundu jula pijwapikene yeleyi, jwadandawile mnope ligongo lyakuti jwaliji jwakusicila mnope.

24Yesu ŵamlolite jwalakwejo ni kumsalila kuti, “Cili cindu cakusawusya kuti mundu jwakusicila akajinjile mu Ucimwene wa Mlungu. 25Cili cindu cakusawusya kuti mundu jwakusicila akajinjile mu Ucimwene wa Mlungu, kulekangana ni kuti ngamila* jijinjile pebowo lya singano.”

26Ŵandu ŵaŵapikene maloŵega ŵawusisye kuti, “Nambi ŵani ŵitakakulupuce?”

27Yesu ŵasalile kuti, “Yindu yili yangakomboleka ni mundu yili yakomboleka ni Mlungu.” 28Kaneko Petulo* ŵatite, “Alole, uwetu tulesile mangwetu kwakuya ŵalakwe.”

29Yesu ŵasalile kuti, “Ngumsalila yakuwona kuti, jwalijose jwalesile mangwakwe kapena ŵamkwakwe, kapena acalongo acimjakwe, kapena acinangolo ŵakwe, kapena ŵanace ligongo lya Ucimwene wa Mlungu, 30jwalakwejo tacikola mangwakwe gejinji pa ndaŵi ajino kupunda kala, ni ndaŵi jikwisa ja msogolo tacipocela umi wangamala.”

Yesu akuŵeceta katatu ya kuwa ni kwimuka kwakwe

(Mat 20:17-19; Mak 10:32-34)

31Yesu ŵajigalile pambali ŵakulijiganya ŵakwe likumi ni ŵaŵili ŵala ni kwasalila kuti, “Tuli pa ulendo wakuja ku Yelusalemu, nipo yosope yiŵalembile ŵakulocesya kwambaga Mwanace jwa Mundu tiyikatendecekwe kweleko. 32Takampelece kwa ŵandu ŵa mitundu jine* ŵele ŵitakamlalatile, ni kumnyosya jwalakwejo ni kumsunila mata. 33Takamkwapule ni kumwulaga, nambo gali gamasile masiku gatatu jwalakwejo tacijimuka ku ŵawe.”

34Ŵakulijiganya ŵala nganayipikanicicisya yeleyi. Gopolela kwa maloŵe gelega kwaliji kwakusisika kwa jemanjajo, ali ni ligongo lyakwe nganapikanicisya yiŵaŵecetaga Yesujo.

Yesu ŵamposisye mundu jwangalola

(Mat 20:29-34; Mak 10:46-52)

35Yesu piŵaliji mkuŵandicila msinda wa Yeliko, mundu jwine jwangalola jwatemi mungulugulu msewu nipo jwaliji mkuŵenda kwa ŵandu. 36Jwalakweju piŵapikene kwenda kwa ŵandu ŵajinji mu msewumo jwawusisye kuti, “Ana cikutendekwa cici?”

37Ŵandu ŵala ŵamjanjile kuti, “Yesu jwa ku Nasaleti akupita.”

38Jwalakwejo jwaŵecete mwakwesya maloŵe kuti, “Ŵalakwe Yesu mwanace jwa Daudi,* andendele canasa!”

39Ŵandu ŵiŵaliji pasogolo ŵamjamwice acitiji kuti, “Mtulale!” Nambo jwalakwejo jwapitilisye kugumila mwakwesya maloŵe acitiji kuti, “Ŵalakwe Mwanagwawo Daudi, andendele canasa!”

40Yesu ŵajimi nipo ŵalamwile ŵandu ŵala kuti amjigale mundujo ayice najo piŵaliji jwalakwepo. Mundu jula piŵayice pakuŵandicila ni Yesu, Yesu ŵamwusisye jwalakwejo kuti, 41“Ana mkusosa kuti nimtendele cici?”

Mundujo jwajanjile kuti, “Ambuje, ngusosa nipakombole kulola.”

42Yesu ŵamsalile kuti, “Lolani, kulupilila kwenu kumposisye.”

43Ndaŵi jijojo ŵapakombwele kulola nipo jwalakwejo jwatandite kumkuya Yesu, acimtogolelaga Mlungu. Ŵandu wosope piŵayiweni yeleyi ŵamtogolele Mlungu.

Sélection en cours:

Luk 18: YAWO

Surbrillance

Copier