San Mateo 12
12
U̧wo̧juȩtä̧u̧ sawaru mo̧ro̧ trigo ocha ka̧ka̧ti̧nä̧tü̧
(Mc 2.13-28; Lc 6.1-5)
1Jesú-mä̧ ji̧yȩnü̧ pä̧nä̧, sawaru mo̧ro̧ kuäwä pättiyu 'kä̧tȩnä̧ 'kuäopomȩnä̧. U̧wo̧juȩtä̧u̧mä̧ ttukua ppä̧i̧ri̧jä̧u̧, trigo ocha ke'ope'ü u̧wä̧ju̧ kuinä̧tü̧. 2Ja̧'wa̧nü̧ ttukua'a topü fariseo wotümä̧ Jesú-ru pä'inä̧tü̧:
—Topittü̧, ku̧wo̧juȩtä̧u̧mä̧ sawaru mo̧ro̧ jȩä̧kuä̧wo̧kü̧ jä̧'i̧jü̧ jȩpä̧tü̧. 3Pättäku ädätinä̧u̧:
—¿Ukutumä̧, Dawi umüwäyotüku ya'utenä̧ ttukua ppä̧i̧ri̧jä̧u̧ jȩtti̧nü̧ wȩyu̧kuä̧'i̧jo̧mȩmä̧ topokotü pä'ijätüjä̧? 4¿Churutä'i̧nä̧, umüwäyotürü'i̧nä̧ weäwokü ja̧'a̧nä̧, Dio-rü ukuokuäkuäwodenä̧ do'ächi'ü sacerdote wotütä kuäkuäwä ro̧ü̧ trigo o̧si̧ ttukuino̧mȩ jä̧'i̧jo̧mȩmä̧? 5¿Ja̧'wa̧ta̧nü̧ sacerdote wotü'i̧nä̧ sawaru mo̧ro̧ aditümä̧ ttadita'anä̧, Moisé weinü̧nä̧mä̧, surojümä̧ jȩpo̧ko̧tü̧ pä'ijomȩmä̧ ukuokuokotü pä'ijätüjä̧ tä̧jí̧? 6Ja̧'wa̧nü̧ ja̧'a̧ttü̧ ukuturu pä'üsä, pȩnȩ́ ukutuku kkü̧mä̧ Dio-rü ukuokuäkuäwodettü'i̧nä̧ abonä̧nü̧ u̧wä̧mȩnä̧ wa̧ ja̧'a̧. 7Pa̧'a̧nü̧ päomȩ ku̧wo̧jui̧pä̧tu̧ku̧ttü̧mä̧ adiu'anü̧ ja̧'a̧: Rȩrü̧jü̧nü̧ toäkuäwätä kkü̧'ka̧sä̧, sacrificio jȩä̧kuä̧wä̧mä̧ kkü'koküsä, jü̧nä̧. Ja̧'wa̧nü̧ jü̧ttü̧mä̧, surojü jȩpo̧ko̧tü̧rü̧mä̧, suronä̧ pä'okotü pa̧ja̧tü̧jä̧. 8Isopäi'ünä̧ ubo I̧tti̧mä̧ sawaru mo̧ro̧'i̧nä̧ u̧ru̧wa̧ ja̧'a̧.
Jesú-mä̧ u̧mü̧ su̧ro̧pa̧rü̧ sawaru mo̧ro̧ aditü ikuinü̧
(Mc 3.1-6; Lc 6.6-11)
9Jesú-mä̧ juorü 'kuä'o'ü juätütä ttiäre sinagoga isodenä̧ do'ächi'inü̧. 10Doächi'omȩnä̧, juodenä̧mä̧ u̧mü̧ ji̧mü̧tȩ jo'ächächinü̧ ya̧tȩ kki̧nü̧; jua̧u̧ ü̧ji̧yä̧u̧ Jesú-ru jä'epü ä̧ju̧kui̧nä̧tü̧, suronä̧ jȩpä̧ji̧ pä'ü, chutä ütü'kü jittäwa pä'ü ttusomȩ ja̧'a̧:
¿Sawaru mo̧ro̧'i̧nä̧ na̧'ä̧chü̧rü̧mä̧ aditü ttiku'anü̧ ja̧'a̧ pä'ü? 11Pättäku ädätinä̧u̧:
¿Dítä jä̧ttü̧ ukututtü, 'kuä'ächi'ü pä̧kuä̧wä̧ mo̧ro̧ äji oweja rejunä̧ ma̧ä̧cho̧mȩnä̧, ȩmo̧po̧'ü̧ 'cho̧kü̧ pajumä̧? 12Ja̧'wa̧nü̧ ja̧'a̧ttü̧ ¿ttü̧ja̧sa̧mä̧ oweja-ttü'i̧nä̧ abonä̧nü̧mä̧ mikuäwokü tä̧jí̧? ja̧'wa̧nü̧ ja̧'a̧ttü̧, sawaru mo̧ro̧'i̧nä̧ adiumä̧ jȩtta̧ pä'ü ja̧'a̧. 13Pä'ü kkä̧nü̧, jua̧u̧ru̧ pä'inü̧:
—Ku̧mü̧ te'ädi. Päku, teädomȩnä̧ kko̧ro̧mü̧ jü̧ta̧'a̧nü̧ adiwächi'inä̧ku̧. 14Ja̧'wa̧nü̧ jȩi̧yä̧u̧ fariseo wotümä̧ juorü rä'opächäjä'kotü ukuokuinä̧tü̧, Jesú-ru kuä'ü ttikua pä'ümä̧.
Profeta päinü̧ta'anü̧ 'kuäopina̧'a̧
15Jua̧u̧ wo̧jui̧'ü̧, Jesú-mä̧ juorü rä'opächü i̧'cha̧'a̧ ttü̧ja̧'i̧nä̧ rekuätü 'chi̧nä̧tü̧; o'katoi'ünä̧ na̧nȩpä̧tü̧rü̧ aditü ikuinü̧, 16ja̧'wa̧nü̧ aditü ikumä̧, Chutä ütü'kü jittäu juiyünä̧ päinä̧u̧. 17Profeta Isaía pa̧'a̧nü̧ ukuokuinü̧ 'kuäopa'attü:
18Pidetä ja̧'a̧ chu̧mü̧wä̧ya̧, ttü chȩmi̧nä̧ku̧mä̧,
Jua̧u̧ru̧ eseusä, rü̧ȩnä̧ repedäku ja̧'a̧ttü̧.
Jua̧u̧nä̧ ttü i̧sa̧ Epíritu-ru chu̧ju̧nä̧kua̧sä̧,
ja̧'wa̧ta̧nü̧ ro̧ȩkuä̧ wȩnȩ ji̧ä̧wä̧kua̧ judío pokotü pokotürümä̧.
19Ya̧tȩku̧'i̧nä̧ pä'ä'chäkuäu, wopokü jä̧kua̧;
mä̧ni̧yä̧ttü̧'i̧nä̧ i̧wȩnȩmä̧ ä̧ju̧kuä̧kua̧wo̧kü̧ jä̧kua̧.
20Nä̧yü̧na̧ 'tȩä̧wi'inä̧na̧mä̧ 'te'ädü ikuokü jä̧kua̧,
ra̧pa̧ra̧ isä'pa 'teyunu̧ kuoä'pa'i̧nä̧ na̧'ȩpo̧kü̧ jä̧kua̧,
jueü wȩnȩ iso juoepomȩbü päi'ünä̧.
21O'katoi'ünä̧ pi̧jä̧ ttü̧ja̧mä̧ Jua̧u̧ru̧tä̧ tta̧'kua̧ ttu̧wȩnä̧rä̧kuo̧tü̧.
Jesú-ru suronä̧ pä'inä̧tü̧
(Mc 3.20-30; Lc 11.14-23; 12.10)
22Ja̧'wa̧nü̧ ja̧'a̧ Jesú ü̧jo̧mȩku̧ epíritu su̧ro̧pa̧ ü̧jä̧ku̧ru̧ i'kächipinä̧tü̧ ä̧to̧kü̧'i̧nä̧ ä̧to̧kü̧ kkä̧nü̧, ukuokuokürü; ja̧'wa̧nü̧ ja̧'a̧ aditü ikuäjäkumä̧ adiu topü ukuokuinü̧. 23Ja̧'wa̧nü̧ ji̧yä̧u̧ o'katoi'ünä̧ rü̧ȩnä̧ amükuädü, pä'inä̧tü̧: ¿Pidetä, chu Dawi i̧tti̧do pättinä̧ku̧mä̧?
24Ja̧'wa̧nü̧ pätta'a ä̧ju̧ku̧ fariseo wotümä̧ pä'inä̧tü̧: «epíritu-tu̧ suropätürü, rä'epü ikua'amä̧ ttu̧ru̧wa̧ Beelzebú#12.24 Beelzebú Pi̧yȩmä̧ Jareünä̧ Esekuinü̧nä̧mä̧ (N. Testamento-nä̧mä̧) epíritu-tu̧ suropätü ttu̧ru̧wa̧ äwettärü ja̧'wa̧nü̧ oa'a ja̧'wa̧ta̧nü̧ kkoro wȩyu̧kuä̧ wȩnȩ ji̧nü̧nä̧ Beelzebú pä'ü räopa'a ja̧'wa̧ta̧nü̧ Baalzabub pä'ü'i̧nä̧ rä'opa'a. Baalzabub pättäku i̧mi̧ttü̧ ottinä̧ku̧ 'kua̧ra̧'a̧ pä'ü rekuätü amükuädätü («na̧nü̧ ttu̧ru̧wa̧») pinü̧, Ecrón ütawiyä ttü̧ja̧ ttü̧ä̧nä̧wa̧ (2 R 1.2; Mt 9.34; 10.25). ujurunä̧tä̧, rä'epe'ü iku ja̧'a̧.»
25Ja̧'wa̧nü̧ ttamükuäda'a wo̧juö̧, Jesú-mä̧ päinä̧u̧: Ruwo weäwä o'kajuiyünä̧tä̧ tta̧mü̧nä̧ pa̧ja̧tü̧ 'kȩttȩkuä̧cho̧mȩnä̧mä̧, jua̧u̧mä̧ rekuo kko̧kü̧. Ja̧'wa̧ta̧nü̧ ütawiyä o'kajuiyütä, i̧tti̧mü̧ku̧ 'kȩttȩkuä̧chü̧ttü̧mä̧, rekuomä̧ kka̧kuo̧ko̧tü̧. 26Jua̧u̧ jü̧ta̧'a̧nü̧ Satanás a̧mü̧nä̧ pa̧ja̧tü̧ 'kȩkuä̧chü̧ttü̧mä̧, uruwomä̧, rekuomä̧ 'chu̧ä̧ro̧ko̧ku̧. 27Isopäi'ünä̧, epíritu-tu̧ suropätürü, «Beelzebú» ujurunä̧ rä'epe'ü chikuttümä̧ ¿jua̧u̧nu̧mä̧, kui̧tti̧mü̧tu̧ku̧mä̧ dí ujurunä̧ rä'epe'ü ttikua'ajä̧ttü̧? ja̧'wa̧nü̧ ja̧'a̧ttü̧ juätütä jä̧kua̧'a̧ ukutu jȩ'kuä̧tu̧ku̧ pättäkuotümä̧. 28Ja̧'wa̧nü̧ ja̧'a̧nä̧, Dio i̧sa̧ Epíritu jäwänä̧ epíritu-tu̧ suropätürü rä'epe'ü chikuttümä̧, jua'amä̧ täkü ru̧wa̧ Dio weü wȩnȩ ukuturu rȩbȩä̧kuä̧wa̧'a̧ ja̧'a̧.
29¿Toku jȩpü̧ dottächü'anü̧ ja̧'a̧jä̧ttü̧, ya̧tȩ ju̧ru̧wa̧rü̧ ojusodenä̧ iäre 'chottiparü pä'ümä̧; ji̧nä̧ ä'kanä̧ jua̧u̧ru̧ ttü̧nü̧'koka'anä̧mä̧? ja̧'wa̧nü̧ jua̧u̧ru̧ nü̧'kipü'kotütä ojusode jäwämä̧ ȩmi̧pü̧ i̧wä̧wa̧'a̧.
30Ttürü ppä'ädokümä̧, ttü cha̧bo̧i̧ya̧tä̧ wa̧; ja̧'wa̧ta̧nü̧ ttüku ka̧ka̧to̧kü̧mä̧, pperetütä iku. 31Ja̧'wa̧nü̧ ja̧'a̧ttü̧ ukuturu pä'üsä: O'kajuiyünä̧tä̧ suronä̧ jȩttü̧mä̧ ja̧'wa̧ta̧nü̧ ttü̧ja̧rü̧ suronä̧ pättümä̧, surojü jui'ätü jü̧nä̧ jȩpü̧ ikuäwäkuotü; ja̧'wa̧nü̧ ja̧'a̧nä̧ Epíritu Sa̧tu̧rü̧ suronä̧ ukuokurumä̧, surojümä̧ jȩpü̧ ikuäwokü jä̧kua̧. 32Ja̧'wa̧ta̧nü̧ yotüte Dio I̧tti̧rü̧ suronä̧ pättüttümä̧ surojü jȩpü̧ ikuäwäkuotü ttäkuotü; ja̧'wa̧nü̧ ja̧'a̧nä̧ Epíritu Sa̧tu̧rü̧ suronä̧ pä'ätürümä̧, surojü jȩpü̧ ikuäwokotü ttäkuotü jitä pä̧nä̧'i̧nä̧, yodoji mo̧ro̧'i̧nä̧, jü̧nä̧.
Daumä̧ u̧wä̧ju̧ttü̧ topü wo̧juä̧wä̧
(Lc 6.43-45)
33Adiwäjuei isäi daumä̧, u̧wä̧ju̧ adiwäjuei wȩjäi; ja̧'wa̧ta̧nü̧ suräjuei isäi daumä̧, u̧wä̧ju̧ surojütä wȩjäi; ja̧'wa̧nü̧ ja̧'a̧ttü̧ daumä̧ u̧wä̧ju̧ttü̧ topü wo̧juä̧wä̧ ja̧'a̧. 34¡Ä̧ka̧tü̧ tti̧tti̧mü̧ wotüjä̧! ¿toku kukuokuätukua'ajä̧ttü̧ adiwäjueimä̧, suropätü isotü kuätukua'amä̧? isopäi'ünä̧ tta̧mi̧'iso'kinä̧ rü̧ȩnä̧ ȩkü̧tä̧ ttänä̧mä̧ räopa'a. 35Adiwä i̧sa̧mä̧ adiwäjuei u̧ju̧nä̧rü̧tä̧ rä'epü ja̧'wa̧ta̧nü̧ surojünä̧ kkü̧mä̧ surojü u̧ju̧nä̧rü̧tä̧ rä'epü. 36Ja̧'wa̧nü̧ ja̧'a̧ttü̧ ukuturu pä'üsä, pojokuä mo̧ro̧ rüjí mo̧ro̧ päi'omȩnä̧mä̧ o'kajuiyünä̧tä̧ ja̧'a̧tä̧ ttukuokuä'ijümä̧ i̧jȩkuä̧kua̧'a̧. 37Isopäi'ünä̧ kua̧mü̧nä̧ kukuokunä̧tä̧ päwäkua'a, adiu kukuokuinü̧ttü̧'i̧nä̧ ro̧ȩkuä̧ttü̧ ku̧ji̧pä̧kua̧jä̧ ja̧'wa̧ta̧nü̧ surojünä̧ kukuokuinü̧ttü̧'i̧nä̧ usurä kuȩmä̧u̧nä̧ ro̧ȩkuä̧kua̧jä̧.
Jȩtto̧kü̧ juei jȩa̧'a̧ totta pä'ü jä'epinä̧tü̧
(Mc 8.12; Lc 11.29-32)
38Ja̧'wa̧nü̧ ja̧'a̧ fariseo wotümä̧, weäwä wȩnȩ wo̧juȩtä̧tü̧ttü̧'i̧nä̧ yotüte Jesú-ru pä'inä̧tü̧:
—Wo̧juȩkuä̧ i̧sa̧, ukuttü tota pä'ätüjä̧ ji̧yȩtȩ ttü̧ja̧ jȩtto̧kü̧ ja̧jü̧ juei jȩ'kua̧'a̧.
39Pättäku Jesú-mä̧ ädätinä̧u̧:
—Pitü suropätü ttü̧ja̧mä̧, jȩtto̧kü̧ juei jättepa'anä̧ iyäwokotü ttäkuotü pärokuä profeta Joná-rü̧ ji̧nü̧tä̧ iyäwäkuotü. 40Ja̧'wa̧nü̧ ja̧'a̧ttü̧, wäbodäkuä mo̧ro̧ jo̧mȩnä̧, wäbodäkuä yodó jo̧mȩnä̧ büó po̧i̧sa̧ üakuä jakuä Joná ȩki̧nü̧ta̧'a̧nü̧, ubo I̧tti̧'i̧nä̧ rȩjȩ jakuä ȩkä̧kua̧. 41Pojokuä mo̧ro̧, rüjí mo̧ro̧ päi'omȩnä̧ Nínive ütawiyä ttü̧ja̧mä̧ wa'arettü ttottächi'äkuotü pi̧yȩ pä̧nä̧ ttü̧ja̧ku̧ usurä ttȩmä̧u̧nä̧ ro̧ȩkuä̧nä̧ iyü ttikua pä'ü; jua'amä̧ Joná jiäwomȩnä̧ Dio-ku ppa̧ttä̧chi̧nomȩttü̧. Pȩnȩmä̧ kkü̧sä̧ Joná-ttü̧'i̧nä̧ u̧wä̧mȩnä̧ wa̧. 42Ja̧'wa̧ta̧nü̧ pojokuä mo̧ro̧, rüjí mo̧ro̧ päi'omȩnä̧, Sabá rȩjȩ ruwaju'i̧nä̧ wa'arettü ttojächi'äkuaju pi̧yȩ pä̧nä̧ ttü̧ja̧ku̧, juätürü usurä ttȩmä̧u̧nä̧ ro̧ȩkuä̧nä̧ iyü kkikua pä'ü; jua'amä̧ Saromón u̧wo̧juö̧ wȩnȩ ä̧ju̧ku̧ kkichina̧'a̧ttü̧. Pȩnȩtä̧ kkü̧sä̧ Salomón-ttü'i̧nä̧ u̧wä̧mȩnä̧ wa̧.
Epíritu su̧ro̧pa̧ ppa̧wä̧chü̧ wȩnȩ
(Lc 11.24-26)
43Epíritu su̧ro̧pa̧ ttü̧ja̧sa̧ttü̧ räopächomȩnä̧mä̧, rȩjȩ joü o̧du̧nä̧ usú kue'ächü kkü̧, 'kuä'ächi'ü ü̧jä̧mä̧da̧ pä'ü; 44ja̧'wa̧nü̧ usomȩnä̧, ü̧'o̧kui̧'o̧ko̧mȩnä̧, amükuädü pä'ü: Ppa̧dä̧cha̧jä̧ chojusodera̧'a̧, rädopinomȩku̧tä̧. Ja̧'wa̧nü̧ ja̧'a̧ ppa̧wä̧cho̧mȩnä̧mä̧, todetä, juatü kku̧nä̧wodetä, aditü kku̧nä̧wodetä po̧kui̧pü̧. 45Ja̧'wa̧nü̧ ji̧yä̧ku̧, kkorotü kko̧ro̧mü̧ttü̧ ta̧ju̧nü̧ wotürü ȩmü̧ 'chü̧, chutättü'i̧nä̧ abonä̧nü̧ suropätürü, juätümä̧ o'katoi'ünä̧tä̧ jua̧u̧nä̧ dodepü kka̧kuä̧tü̧; ja̧'wa̧nü̧ jo̧mȩnä̧ jua̧u̧ ttü̧ja̧sa̧mä̧ ä̧kuo̧mȩnä̧ ji̧no̧mȩttü̧'i̧nä̧ abonä̧nü̧ wa̧. Ja̧'wa̧nü̧tä̧ jä̧kua̧'a̧ pi̧yȩ pä̧nä̧ ttü̧ja̧ suropätürümä̧.
Ja̧ju̧'i̧nä̧, i̧jä̧wa̧tü̧'i̧nä̧ Jesú-ru usinä̧tü̧
(Mc 3.31-35; Lc 8.19-21)
46Jesú-mä̧ ji̧nä̧ ttü̧ja̧ rekuätürü ukuokua'a 'kä̧tȩnä̧, u̧mi̧ ichi'äjä'kotü kka̧kui̧nä̧tü̧ ja̧ju̧'i̧nä̧, i̧jä̧wa̧tü̧'i̧nä̧ jua̧u̧ru̧ ttukuokua pä'ü, 47Ja̧'wa̧nü̧ ja̧'a̧, ya̧tȩ Jesú-ru ji'äwinü̧:
—Kua̧ju̧'i̧nä̧, kui̧jä̧wa̧tü̧'i̧nä̧ u̧mi̧nä̧ kka̧ku̧ ukuru ttukuokua pä'ätü.
48Pä'ü jiäwäku, ädätinä̧ku̧:
—¿Tajujä̧ttü̧ ttü cha̧ju̧mä̧, titujä̧ttü̧ ttü chü̧jä̧wa̧tü̧mä̧?
49Pä'ü kä'ädü, u̧wo̧juȩtä̧u̧rü te'ünü̧ pä'inü̧:
—Pȩnȩtä̧ kkä̧ju̧, cha̧ju̧ wajumä̧ ja̧'wa̧ta̧nü̧ chi̧jä̧wa̧tü̧ wotümä̧. 50Isopäi'ünä̧ Chä'o mo̧ro̧jä̧nä̧ kkü̧ üjü'komȩnä̧ jȩpä̧ju̧tä̧ ja̧'a̧ cha̧ju̧ wajumä̧, chijäwaju wajumä̧ ja̧'wa̧ta̧nü̧ chi̧jä̧wa̧ wa̧mä̧.
اکنون انتخاب شده:
San Mateo 12: PNT13
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedades Biblicas Unidas en Venezuela
