San Mateo 11
11
1Jesú-mä̧ u̧wo̧juȩtä̧u̧ doce-nü̧ wotürü jȩttä̧kuȩ wo̧juȩtü̧ kä'ädi'ü, juorü rä'opächü juätü ttidepiyura̧'a̧ ji'äu kkä̧nü̧, wo̧juȩtü̧ 'chi̧nü̧.
Bautizo jȩä̧kuä̧wä̧ i̧sa̧, Ju̧a̧ u̧wo̧juȩtä̧u̧rü we'inü̧
(Lc 7.18-35)
2Ju̧a̧-mä̧, kärenä̧ pänü̧kkä̧nü̧, Crito jȩü̧ wȩnȩ ukuowa'a ä̧ju̧kuä̧ji̧'ka̧, u̧wo̧juȩtä̧u̧ttü̧ ta̧ju̧ru̧ we'inü̧ 3jä'epü ttä̧ju̧kuä̧ji̧ya̧rü̧ pä'ü. Isopäi'ünä̧ i̧chä̧kua̧ pättinä̧ku̧mä̧ ¿Chutä ja̧já̧ pä'ü ja̧'wa̧nü̧ jü̧ juiyüttü'i̧nä̧ kka̧ra̧rü̧ tta̧tä̧rä̧kua̧'a̧ pä'ü?, jä'epü ttä̧ju̧kui̧ya̧rü̧ pä'ü.
4Ja̧'wa̧nü̧ pättäku Jesú-mä̧ ädätinä̧u̧: Ju̧a̧-rü̧mä̧ to'kuätukutä ja̧'wa̧ta̧nü̧ kuä̧ju̧kuä̧tu̧ku̧tä̧ ji'äwäjätukuirü. 5Ä̧to̧kä̧'i̧jä̧tü̧'i̧nä̧ topätü, tti̧'chü̧ juiyünä̧ wotü'i̧nä̧ kue'ächätü, Repra na̧nȩpä̧tü̧'i̧nä̧ pȩji̧pä̧tü̧, ttä̧ju̧ku̧ juiyünä̧ wotü'i̧nä̧ ä̧ju̧kuä̧tü̧, 'korujuo'ächätü'inä̧ tto'ächätü ja̧'wa̧ta̧nü̧ usurä isotürü'i̧nä̧ jareü wȩnȩ ji'äkuäwia'a. 6¡Ja̧'wa̧ta̧nü̧ eseäkuäwä kka̧'a̧ ttü jäwänä̧ ttoepokokumä̧!
7Juätü ppa̧ttä̧chä̧chä̧ji̧ o'ka'a Jesú-mä̧, Ju̧a̧ ütü'kü ji'äunu̧ ttü̧ja̧rü̧ pä'inü̧: ¿Däje topü kuichäjätukuättü̧ rȩba̧ dȩ'a̧ra̧'a̧mä̧? ¿Nä̧yü̧na̧nä̧ kkä̧rü̧'koppa düa'a topü kuichäjätukua'a? 8Ja̧'wa̧nü̧ jü̧ juiyüttü'i̧nä̧, ¿däjé topü kuichäjätukuättü̧? ¿Ttü̧ja̧sa̧ ü̧'ka̧tä̧wä̧ta̧ adiwäjuei i̧sä̧ta̧ 'ka̧tä̧wuö̧rü̧? ja̧'wa̧nü̧ ü̧'ka̧tä̧wä̧ta̧ adiwäjuei i̧sä̧ta̧ 'ka̧tä̧u̧mä̧ ruwotü ttojusodenä̧tä̧ kkü̧, ru̧wa̧ ja̧'a̧ttü̧. 9Ja̧'wa̧nü̧ jo̧ka̧'a̧ jü̧ttü̧mä̧ ¿Däje topü ttichäja'ajä̧ttü̧? ¿Profeta wa̧rü̧? A̧, ttü pädümä̧ profeta-ttü'i̧nä̧ abonä̧nü̧ wa̧rü̧ topü ichäjätüjä̧. 10Isopäi'ünä̧ Ju̧a̧ ütü'kü ja̧'a̧, wȩyu̧kuä̧ wȩnȩ jiäwä'ijäkumä̧;
«Ttü chi̧wȩnȩ ȩkuä̧ i̧sa̧rü̧ kuä'kanä̧ we'üsä,
ku̧mä̧nä̧ jo̧mȩnü̧ aditü u̧ju̧nä̧kua̧rü̧.»
11Isopäi'ünä̧ pädäu̧jä̧: O'katoi'ünä̧ nä̧tü̧ttü̧ uwäpächinä̧tü̧mä̧, bautizo jȩä̧kuä̧wä̧ i̧sa̧ Ju̧a̧ u̧wä̧mȩnä̧ wa̧mä̧ toa'a; ja̧'wa̧nü̧ ja̧'a̧nä̧ mo̧ro̧jä̧ jäwä weomȩttü̧ a̧'u̧kua̧mä̧ jua̧u̧ttü̧'i̧nä̧ u̧wä̧mȩnä̧ wa̧ jä̧kua̧.
12Bautizo jȩä̧kuä̧wä̧ i̧sa̧, Ju̧a̧ ichino̧mȩttü̧ kkä̧mä̧dü̧ jitä pi̧yȩ mo̧ro̧bü päi'ünä̧, mo̧ro̧jä̧ jäwä weomȩmä̧ rowäkuäwätä kka̧'a̧ ja̧'wa̧ta̧nü̧ rowäkuäwä juruwätütä jua̧u̧mä̧ 'cho'ipätü. 13Isopäi'ünä̧ Profeta jittäwinü̧'i̧nä̧ o'kajuiyünä̧ ja̧'wa̧ta̧nü̧ weäwä wȩnȩ wȩyu̧kui̧nü̧'i̧nä̧ Ju̧a̧-bütä ji'äwinä̧tü̧; 14Ja̧'wa̧ta̧nü̧ pi̧yȩ kueseta päkuätukuttümä̧, Ju̧a̧ ja̧'a̧ profeta Elía i̧chä̧kua̧ pä'ü jittäwinä̧ku̧mä̧. 15Ä̧ju̧kuä̧kuä̧wä̧ kku̧nä̧rä̧tü̧mä̧, ä̧ju̧kuä̧tu̧kui̧.
16¿Pi̧yȩ pä̧nä̧ kka̧kuä̧tü̧rü̧mä̧ däjenä̧ chu̧wȩnȩtä̧u̧ttü̧? Ttu̧kuȩ ȩmä̧wo̧mȩttü̧ jareü pȩjü̧, ppo̧'ä̧tü̧ ttawaruwäku wopäkuäwätü jä̧'i̧nü̧'a̧nü̧ wotüjä̧, pa̧'a̧nü̧ pä'ä'chäkuäu: 17«Mä̧rä̧na̧nä̧ ppüta'anä̧ baira tü'okotü pinä̧tü̧jä̧; tta̧'kua̧ tta̧wȩpü̧ ra̧ta̧'a̧nä̧, ajuäkuäwokotü pinä̧tü̧jä̧.» 18Isopäi'ünä̧ u̧kuȩ'i̧nä̧ kuokü, au'i̧nä̧ awokü, Ju̧a̧ ichina̧'a̧mä̧ epíritu su̧ro̧pa̧rü̧ kku̧nä̧rü̧ pä'inä̧tü̧. 19Jua̧u̧nü̧ o'ka'a ubo I̧tti̧ ichinü̧ u̧kuȩ'i̧nä̧ kuäkuäwä i̧sa̧ ja̧'wa̧ta̧nü̧ au'i̧nä̧ awäwä i̧sa̧ pä'ätü, ja̧'wa̧nü̧ ichina̧'a̧mä̧ pä'ä'ijätü: Pidemä̧ 'kuäopünä̧tä̧ kuäkuäwä i̧sa̧, vino-tä̧ awäwä i̧sa̧, suronä̧ jȩpä̧'i̧jä̧tü̧tä̧ ja̧'wa̧ta̧nü̧ pärätä ka̧ka̧tä̧'i̧jä̧tü̧tä̧ tta̧wa̧ru̧wa̧tä̧ wa̧, jü̧nä̧. Ja̧'wa̧nü̧ ja̧'a̧nä̧ Dio iyü wo̧juä̧wä̧ wȩnȩmä̧ jȩttü̧ttü̧tä̧ topü wo̧juä̧wä̧ ja̧'a̧.
Esetokotürü, Jesú woäkuäwinü̧ wȩnȩ
(Lc 10.13-15)
20Ja̧'wa̧ta̧nü̧ Jesú-mä̧ jȩtto̧kü̧ juei rü̧ȩnä̧ jȩi̧na̧'a̧nä̧, surojüttü kä'ädi'ü Dio-ku ppa̧ttä̧chi̧yo̧ko̧ku̧, ütawiyä ttü̧ja̧rü̧ rȩri̧jä̧tü̧nü̧ pä'inü̧: 21¡Isoó isottü̧, Corazín ütawiyä ttü̧ja̧we! ¡Isoó Betsaida ütawiyä ttü̧ja̧we! Isopäi'ünä̧ ukuturu jü̧'a̧nü̧ Tiro ttü̧ja̧rü̧, Sidón ttü̧ja̧rü̧ jȩtto̧kü̧ juei jȩtti̧nü̧ttü̧mä̧, ä̧ya̧ri̧ jäwänä̧ jȩpä̧kuä̧u̧ su̧ro̧jä̧ta̧ 'ka̧tä̧wi̧'ü̧, täkü mo̧tä̧ Dio-ku ppa̧'a̧chi̧na̧ja̧tü̧. 22Ja̧'wa̧nü̧ ja̧'a̧ttü̧ ukuturu pä'üsä, pojokuä mo̧ro̧ päi'omȩnä̧ ukuturumä̧ Tiro ttü̧ja̧ttü̧'i̧nä̧, Sidón ttü̧ja̧ttü̧'i̧nä̧ abonä̧nü̧ usurä kuȩmä̧wä̧tu̧ku̧nä̧ ro̧ȩkuä̧ kkä̧kuä̧u̧jä̧. 23Ja̧'wa̧ta̧nü̧ uku Cafarnaúm-mä̧, mo̧ro̧jä̧bü päi'ünä̧ ä̧rä̧mü̧jä̧, ja̧'wa̧nü̧ ja̧'a̧nä̧, wa'inä̧tü̧ tti̧rȩjä̧ra̧'a̧bü kki'opü ikuäwäkua̧jä̧. Isopäi'ünä̧ Sodoma ütawiyättü jȩtto̧kü̧ juei jȩtti̧nü̧ttü̧mä̧ jitä pi̧yȩ mo̧ro̧bü päi'ünä̧ kka̧ja̧'a̧ jua̧u̧ ütawiyämä̧. 24Ja̧'wa̧nü̧ ja̧'a̧ttü̧ ukuturu pä'üsä, pojokuä mo̧ro̧ rüjí mo̧ro̧ päi'omȩnä̧, ukuturumä̧ sodoma ttü̧ja̧ttü̧'i̧nä̧ abonä̧nü̧ usurä kuȩmä̧wä̧tu̧ku̧nä̧ ro̧ȩkuä̧ kkä̧kuä̧u̧jä̧.
Jä'orü wo̧jua̧mä̧ I̧tti̧tä̧ ja̧'a̧
(Lc 10.21-22)
25Ji̧yȩnü̧ mo̧ro̧ Jesú-mä̧ ädätinü̧: Chä'o, uku mo̧ro̧jä̧'i̧nä̧ pi̧jä̧'i̧nä̧ u̧ru̧wa̧rü̧ eseusä, isopäi'ünä̧ wo̧juä̧wä̧ kku̧nä̧rä̧tü̧ ttu̧wo̧jui̧pü̧ juiyünä̧ dajü kku̧nu̧, ppo̧'ä̧tü̧rü̧tä̧ ttu̧wo̧jui̧pü̧nä̧ i̧jȩpi̧nü̧jä̧. 26Iweye ja̧'wa̧nü̧tä̧ ja̧'a̧ Chä'o, ukumä̧ ja̧'wa̧nü̧tä̧ eseujä̧.
27Kka̧ku̧ o'kajuiyünä̧tä̧, Chä'ottümä̧ iyäwi'inä̧ku̧sä̧. Isopäi'ünä̧ i̧tti̧rü̧ wo̧jua̧mä̧ jä'otä ja̧'a̧, pärokua'aku jä'orü wo̧jua̧mä̧ I̧tti̧tä̧ ja̧'a̧ ja̧'wa̧ta̧nü̧ I̧tti̧ i̧jȩpä̧ku̧tä̧ ja̧'a̧ wo̧jui̧'ü̧mä̧. 28O'katoi'ünä̧ aditü usurä ȩmä̧u̧ 'kuä'ächi'inä̧tü̧mä̧ ttüku ichätukui, ttümä̧ usurä chȩmä̧wuö̧ juiyünä̧ jȩchä̧kuä̧u̧jä̧. 29Ttü wedümä̧ jȩpä̧tu̧kui̧, ttüttü wo̧jui̧pätu̧kui̧ cha̧mi̧so'kinä̧ ra̧wä̧rü̧ ukuo tedäwoka'a; ja̧'wa̧nü̧ jȩpü̧ ku̧'o̧kui̧'ä̧kuo̧tü̧jä̧ kua̧'kua̧rä̧tu̧ku̧ a̧'kua̧ ȩma̧ pä'ümä̧. 30Isopäi'ünä̧ ttü wedümä̧ jeruwü'i̧nä̧ jeruwokü ja̧'a̧nä̧, ä̧mä̧kü̧'i̧nä̧ ä̧mä̧ko̧kü̧ jäwä ja̧'a̧.
اکنون انتخاب شده:
San Mateo 11: PNT13
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedades Biblicas Unidas en Venezuela
