San Mateo 10
10
Apótore doce-nü̧ wotürü pojopinü̧
(Mc 3.13-19; Lc 6.12-16)
1Ja̧'wa̧nü̧ ja̧'a̧ Jesú-mä̧, u̧wo̧juȩtä̧u̧ doce-nü̧ wotürü wopo'ü ttukuo iyinä̧u̧, epíritu-tu̧ suropätürü rä'epü ttikua pä'ü'i̧nä̧, na̧nȩttü̧ttü̧mä̧ o'kajuiyünä̧ aditü ttikua pä'ü'i̧nä̧, ubara ttu'u na̧nȩttü̧ aditü ttikua pä'ü'i̧nä̧, jü̧nä̧.
2Doce-nü̧ wotü apótore tti̧mi̧pi̧yä̧mä̧ pi̧yȩ ji̧na̧'a̧: Ä̧kuo̧mȩnä̧mä̧ Simón ji̧na̧'a̧, Peduru pä'ü oinä̧ku̧'i̧nä̧, i̧jä̧wa̧ André'i̧nä̧; ja̧'wa̧ta̧nü̧ Zebedeo i̧tti̧mü̧: Sa̧ti̧a̧ku̧'i̧nä̧, i̧jä̧wa̧ Ju̧a̧'i̧nä̧, jü̧nä̧; 3Felipe'i̧nä̧, Bartoromé'i̧nä̧; Tomá'i̧nä̧ ja̧'wa̧ta̧nü̧ pärätä ka̧ka̧tä̧'i̧jü̧ Mateo'i̧nä̧; Alfeo i̧tti̧ Sa̧ti̧a̧ku̧'i̧nä̧, Tadeo'i̧nä̧; 4Canaá̧ ttü̧ja̧sa̧ Simón'i̧nä̧, Jesú-ru iyü i̧kuä̧kua̧ pinü̧ Juda Icariote'i̧nä̧, jü̧nä̧.
Doce-nü̧, apótore-rü we'inü̧
(Mc 6.7-13; Lc 9.1-6)
5Jesú-mä̧, pitü doce-nü̧ wotürü pa̧'a̧nü̧ ji'äu we'inü̧: Judío pokotü ttu̧mä̧nä̧nä̧mä̧ kui̧'chä̧tu̧kuä̧ ja̧'wa̧ta̧nü̧ Samaria ttü̧ja̧ ttidepiyunä̧mä̧ dokuächätukuä; 6pärokua'aku, Iraettü oweja-tü̧ re'tewächinä̧tü̧ ttü̧ja̧kua̧'a̧tä̧ tätukui. 7Jua'a kui̧'chä̧tu̧kua̧'a̧ttü̧mä̧ pa̧'a̧nü̧ jikuäwätukuajä̧: Mo̧ro̧jä̧nä̧ttü̧ Dio weümä̧, täkü tü'küwächa'a, jü̧nä̧. 8Na̧nȩpä̧tü̧rü̧mä̧ aditü iku, 'korujuo'ächätürümä̧ tto'ädü kku̧nu̧, Repra mä̧richei na̧nȩpä̧tü̧rü̧ aditü iku kkä̧nü̧, epíritu-tu̧ suropätürü'i̧nä̧ rä'epü kuikuätukuajä̧. Mippoünä̧ kuȩminä̧tu̧ku̧ ja̧'a̧ttü̧, mippoünä̧ iyäjätukui.
9Kuȩpä̧tu̧kuä̧, oro'i̧nä̧, cobre'i̧nä̧, pärätä'i̧nä̧, kusakuyutukunämä̧; 10mä̧nä̧ttü̧ ku̧kuä̧tu̧kuä̧kuȩ'i̧nä̧, ku̧'ka̧tä̧wä̧ti̧yu̧'i̧nä̧ to̧ta̧rȩ pünä̧mä̧, ku̧jä̧pü̧ isäya'i̧nä̧, kuitta'ka i̧so̧'kȩ'i̧nä̧ kuȩpä̧tu̧kuä̧, isopäi'ünä̧ adikuä i̧sa̧mä̧ u̧kuȩ i̧yä̧wa̧.
11Ütawiyä rü̧o̧mȩttü̧'i̧nä̧, ppo̧ü̧ ütawiyättü'i̧nä̧ dokuächätukuomȩnä̧mä̧, jä'epü kuä̧ju̧kuä̧tu̧kua̧jä̧ ya̧tȩ ukutu doäda pä'ürü ja̧'wa̧nü̧ ja̧'a̧mä̧ juorü räkuopächätukuomȩbü päi'ünä̧, jua̧u̧ ojusodenä̧tä̧ ku̧jä̧tu̧kua̧jä̧. 12Isodenä̧ dokuächätukuomȩnä̧mä̧, wȩnȩ juiyü kuȩpä̧tu̧kua̧'a̧ te'äunu̧ jikuäwätukuajä̧. 13Juodenä̧ kka̧kuä̧tü̧ eseunu̧ dottädüttümä̧, ukutu kuesewätukumä̧ ttȩmä̧kuo̧tü̧; ja̧'wa̧nü̧ ja̧'a̧nä̧ ttüjü'kü juiyüttümä̧, ukutu kuesewätukumä̧ ukutunä̧tä̧ kki̧'ä̧kua̧'a̧. 14Ja̧'wa̧nü̧ ja̧'a̧nä̧, kui̧wȩnȩtu̧ku̧ ttä̧ju̧kua̧ pä'ü jui'ü dottädü juiyüttümä̧; isodettü ja̧ pä'ü'i̧nä̧ ütawiyättü ja̧ pä'ü'i̧nä̧ juorü rä'opächümä̧ ku̧jä̧pü̧tu̧ku̧ redä'ka i̧sa̧ppȩmä̧ ppüsäu kuikuätukuajä̧. 15Isopäi'ünä̧ pädäu̧jä̧, ü'ojo'ü mo̧ro̧ päi'omȩnä̧mä̧ Sodoma rȩjȩ ttü̧ja̧rü̧ ji̧no̧mȩttü̧'i̧nä̧, Gomorra rȩjȩ ttü̧ja̧rü̧ ji̧no̧mȩttü̧'i̧nä̧ abonä̧nü̧ usurä ttȩmä̧wä̧kuo̧tü̧ juȩnȩ ütawiyä ttü̧ja̧mä̧.
Usurä ttȩmä̧wä̧kuȩ wȩnȩ
16¡Ttu̧'ȩpä̧rä̧kuä̧u̧ kka̧kuä̧tu̧kui̧! ä̧ka̧tü̧ to̧ttä̧rä̧kuä̧u̧'a̧nü̧, u̧nu̧ku̧tu̧ jü̧'a̧nü̧ pä̧i̧ juiyünä̧. Oweja-tü̧rü̧ Rowotü̧ ttü̧'kä̧tȩ jo̧mȩ wettajü'anü̧ wȩdä̧u̧jä̧. 17Ja̧'wa̧ta̧nü̧ tta̧kuä̧rä̧kuä̧wä̧tu̧kua̧jä̧, isopäi'ünä̧ ruwotürü iyü iku kkä̧nü̧'i̧nä̧, sinagogas odewiyättü'i̧nä̧ kuäkuättäkuä̧u̧jä̧. 18Jua'a yabonä̧ ttü jäwänä̧mä̧, ruwotü gobernadores ttä'ka'i̧nä̧, ruwotü tturuwotü ttä'ka'i̧nä̧, judío pokotü ttä'ka jo̧mȩ'i̧nä̧ ttȩpä̧kuä̧u̧jä̧ ttü jäwänä̧mä̧, juätürü jikuäwätukua pä'ü. 19Ja̧'wa̧nü̧ ja̧'a̧nä̧, iyü ttikuomenä̧mä̧ däjé jidäwäkua'ajó, toku jidäwäkua'ajó pä'ümä̧ kua̧'kua̧ tta̧kuȩkuä̧tu̧kuä̧, jua̧u̧nü̧ kukuokuätukuä̧kuȩmä̧ i̧yä̧wi̧'ä̧kuä̧u̧jä̧. 20Isopäi'ünä̧, ukutumä̧ ukuokuokotü kuäkuotüjä̧, Dio i̧sa̧ Epíritu jä̧kua̧'a̧ ukutunä̧ ukuokuäkua̧mä̧.
21Ja̧'wa̧ta̧nü̧ ttu̧bü̧o̧tü̧mä̧ tti̧jä̧wa̧tü̧rü̧ kuä'ü ttikunä̧ iyü ttikuäkuotü, ttä'otü̧'i̧nä̧ tti̧tti̧mü̧rü̧ iyü ttikuäkuotü; ja̧'wa̧ta̧nü̧ tti̧tti̧mü̧mä̧ ra̧wä̧rü̧ ttä̧'o̧tü̧rü̧ kuä'ü ttikunä̧ iyü ttikuäkuotü. 22Ttü chi̧mi̧ jäwänä̧mä̧, o'katoi'ünä̧tä̧ tta̧mi̧suru tottäkuä̧u̧jä̧; ja̧'wa̧nü̧ ja̧'a̧nä̧ rüjí mo̧ro̧bü päi'ünä̧ a̧mi̧ 'ki'ächi'ü ü̧jü̧ttü̧mä̧, jua̧u̧tä̧tä̧ jä̧kua̧'a̧ ü̧ji̧pä̧kua̧mä̧. 23Ku̧jä̧tu̧ku̧ ütawiyättü suronä̧ jȩtta̧ pä'ü ttusomȩnä̧mä̧, kkoro ütawiyäku dükuekuätukuajä̧; isopäi'ünä̧ pä'üsä ukuturu, Irae ütawiyä jü̧'a̧kuä̧ o'kajuiyünä̧ jo̧mȩ päi'ünä̧mä̧ 'kuäkuopätukuoka'anä̧, ubo I̧tti̧mä̧ i̧chä̧kua̧.
24Ya̧tȩ u̧wo̧juȩtä̧ku̧mä̧, u̧ru̧wa̧ wo̧juȩtü̧ u̧wä̧mȩnä̧mä̧ wokü. Ja̧'wa̧ta̧nü̧ ya̧tȩ u̧wo̧juȩtä̧ku̧mä̧ u̧ru̧wa̧ u̧wä̧mȩnä̧mä̧ wokü. 25Ya̧tȩ u̧wo̧juȩtä̧u̧mä̧, u̧ru̧wa̧ wo̧juȩtü̧ jo̧mȩbütä i̧rȩbȩwo̧mȩnä̧mä̧ täkü adiwa'a ja̧'wa̧ta̧nü̧ ya̧tȩ u̧mü̧wä̧ya̧mä̧ u̧ru̧wa̧ jo̧mȩbütä wa̧ jo̧mȩnä̧mä̧ adiwa'a. Isopäi'ünä̧ isode u̧ru̧wa̧rü̧'i̧nä̧ Beelzebú pä'ü ottina̧'a̧mä̧, ukutu chumüwäyotürümä̧, juȩnȩ abonä̧nü̧ jä̧kua̧'a̧.
¿Ji̧nä̧somä̧ dirü yekuäkuäwa'ajättü̧?
(Lc 12.2-7)
26Ja̧'wa̧nü̧ ja̧'a̧ttü̧ ttü̧ja̧rü̧mä̧ yekuekuätukuä. Isopäi'ünä̧ yä̧wä̧i̧nä̧tä̧ da̧jä̧rä̧kuä̧wä̧mä̧ juiya'a ja̧'wa̧ta̧nü̧ yoriso ttu̧wo̧jui̧pü̧ juiyünä̧ i̧jȩkuä̧cho̧kü̧mä̧ juiya'a. 27Yo̧mȩttü̧ pädümä̧, mo̧ro̧ tȩya̧wo̧mȩttü̧ ji'äwätukui; ja̧'wa̧ta̧nü̧ yä̧wä̧i̧nä̧ päda'a kuä̧ju̧kuä̧tu̧ku̧mä̧, isode wä̧mȩttü̧ ji'äwätukui. 28Ja̧'wa̧ta̧nü̧ kuidepätuku kuä'ü ikurumä̧ yekuekuätukuä, jua̧u̧mä̧ kua̧'kua̧rü̧mä̧ kuä'ü ikuokü; ji̧nä̧somä̧ kua̧'kua̧rü̧ kuä'ü ikuru, kuidepä okurä beipokaränä̧ kuä'ü ikurütä ye'ekuätukui. 29¿Ppi̧yu̧ ta̧ju̧nä̧mä̧, pä̧rä̧tä̧bi̧ ji̧bi̧tȩtä̧ mikuä pä'ü iyäwa'akü̧ pädä'ijä'ä? Ja̧'wa̧nü̧ ja̧'a̧nä̧ juätüttümä̧ ya̧tȩ'i̧nä̧ 'korujuo'ächokü Dio-rü pä̧wä̧rü̧jo̧ko̧mȩnämä̧. 30Isopäi'ünä̧ Dio-mä̧ ukutu kuwo'chetukumä̧ yoikunä̧ pa̧ja̧kua̧'a̧tä̧ u̧ju̧nä̧rä̧u̧jä̧. 31Ja̧'wa̧nü̧ ja̧'a̧ttü̧ yekuekuätukuä: ukutumä̧ ppi̧yu̧ o'katoi'ünä̧ttü̧'i̧nä̧ abonä̧nü̧ mikuäwätüjä̧.
Jesú-ru ä̧ppü̧tä̧rä̧kuä̧wo̧kü̧ wȩnȩ
(Lc 12.8-9)
32Ja̧'wa̧nü̧ ja̧'a̧ttü̧, ya̧tȩ ttürü u̧wo̧jua̧'a̧ ttü̧ja̧ ttä'ka jo̧mȩttü̧ jiäuttümä̧, ttü'i̧nä̧ Chä'o mo̧ro̧jä̧nä̧ kkü̧ ä'ka jo̧mȩttü̧ jua̧u̧ru̧ chu̧wo̧jua̧'a̧ ji̧dä̧wä̧kua̧sä̧; 33isopäi'ünä̧ ya̧tȩ ttü̧ja̧ ttä'kajo̧mȩttü̧, ttürü ieruwa'a jiäuttümä̧, ttü'i̧nä̧ Chä'o mo̧ro̧jä̧nä̧ kkü̧ ä'ka jo̧mȩttü̧ jua̧u̧ru̧ chieruwa'a ji̧dä̧wä̧kua̧sä̧.
Jesú-mä̧ tti̧'kȩ'chä̧kuä̧wä̧chü̧nä̧ wa̧
(Lc 12.51-53; 14.26-27)
34Pi̧jä̧ra̧'a̧mä̧ wȩnȩ juiyünä̧ kkä̧kuä̧wä̧ i'kächinü̧ pä'ümä̧ kuamükuädätukuä; wȩnȩ juiyümä̧ i'chächokü pinü̧sä̧, kurodätä i'kächinü̧sä̧. 35Isopäi'ünä̧ ttü̧ja̧rü̧mä̧ ttä'oku'i̧nä̧, kki̧tti̧mü̧ nä̧tü̧ tta̧ju̧ku̧'i̧nä̧, kkü̧jo̧ri̧mü̧ nä̧tü̧ ttimiyajuku'i̧nä̧ ttürowäunä̧ ichinü̧sä̧; 36Ja̧'wa̧nü̧ ja̧'a̧ttü̧ ttü̧ja̧sa̧ aboiyotümä̧, chutä ukuojattü awaruwätä jä̧kua̧'a̧.
37Jä'orü'i̧nä̧, ja̧ju̧ru̧'i̧nä̧ ttüttü abonä̧nü̧ eseu repeüttümä̧, ttü i̧sa̧mä̧ pä'i'okü; i̧tti̧rü̧'i̧nä̧, ittijuru'i̧nä̧ ttüttü abonä̧nü̧ eseu repeüttümä̧, ttü i̧sa̧mä̧ wokü jä̧kua̧; 38Ja̧'wa̧ta̧nü̧ ü̧jo̧kä̧nü̧ jäi kä'eku wȩnä̧wi̧'ü̧ cho'ka'anä̧ ichü juiyüttümä̧, ttü i̧sa̧mä̧ wokü jä̧kua̧. 39A̧'kua̧rü̧ tta̧wä̧rä̧kuä̧wa̧ pä'ü amükuädümä̧, to̧ȩ'ä̧chä̧kua̧ ja̧'wa̧nü̧ ja̧'a̧nä̧ ttü jäwänä̧ to'e'ächümä̧, a̧'kua̧rü̧ ü̧'o̧kui̧'ä̧kua̧.
Iso juo'epätürü iyäwä
(Mc 9.41)
40Ukuturu eseu do'ädümä̧, ttürü eseu do'ädü; ja̧'wa̧ta̧nü̧ ttürü eseu do'ädümä̧, ttürü we'inü̧rü̧ eseu do'ädü. 41Dio-mä̧ premio pättü i̧yä̧kua̧, ojusodenä̧ ya̧tȩ profeta-rü do'ädürümä̧, jua'amä̧ profeta-mä̧ Dio i̧wȩnȩ jiäwa'attü̧, jua̧u̧ru̧ premio iyümä̧ profeta-rü iyüta'anü̧tä̧ jä̧kua̧'a̧. Jua̧'a̧nü̧tä̧, i̧yä̧kua̧ Dio-mä̧ premio-mä̧, Dio-rü esetürü do'ädürümä̧. Jua̧u̧ premio-mä̧ Churutä ukuotätürü iyü'anü̧tä̧ jä̧kua̧'a̧. 42Ja̧'wa̧ta̧nü̧ pitüttü ya̧tȩ ji̧'ki̧cha̧wa̧ ja̧ pä'ü'i̧nä̧, ttü chu̧mü̧wä̧ya̧ wa̧rü̧ ajiya diyawoya ji̧'ta̧tȩnä̧ iyürümä̧, isopäi'ünä̧ pä'üsä, jua̧u̧ iäre premio-mä̧ Dio-mä̧ unichi'okoku jä̧kua̧.
اکنون انتخاب شده:
San Mateo 10: PNT13
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedades Biblicas Unidas en Venezuela
