San Mateo 9
9
Jesú parárisi na̧'ä̧chü̧rü̧ äräbe'inü̧
(Mc 2.1-12; Lc 5.17-26)
1Ja̧'wa̧nü̧ jä̧ji̧ o'ka'a Jesú-mä̧, woi'kanä̧ pä̧mä̧dü̧ rü̧ä̧ dubora ji̧jä̧ku̧ kkäwächäji̧'ka̧, idepiyura̧'a̧ rȩbȩwi̧pi̧nü̧. 2Jua'atä ü̧ja̧'a̧, ya̧tȩ parárisi na̧'ä̧chü̧rü̧ cama-bänä̧ ü̧'a̧'a̧ i'kächipinätü̧; ja̧'wa̧nü̧ tta̧'kua̧ ttu̧wȩnä̧ra̧'a̧ topü Jesú-mä̧ na̧'ä̧chü̧rü̧ pä'inü̧:
—Kua̧'kua̧ tta̧kuȩkuä̧ chi̧tti̧; suronä̧ jȩ'kuä̧'i̧jü̧mä̧ jȩpü̧ chikuäkujä̧. 3Ja̧'wa̧nü̧ pä̧i̧yä̧u̧, weäwä wȩnȩ wo̧juȩkuä̧ isotüttü yotüte ukuokuinä̧tü̧: ¿Däjéki̧ amükuädäkuäujä̧? Dio-rü, suronä̧tä̧ pä'ü. 4Ja̧'wa̧nü̧ ji̧yä̧ku̧ Jesú-mä̧ tta̧mü̧kuädü u̧wo̧jua̧'a̧ttü̧ jä'epü ä̧ju̧kui̧nä̧u̧:
—¿Tta̧'a̧nü̧ pä'ü kua̧mi̧so'kitukunä̧mä̧, surojütä amükuädätüjä̧ttü̧? 5¿Toku pättüttütä adiwomȩnä̧ jü̧'a̧nü̧ttü̧: Suronä̧ jȩ'kuä̧'i̧jü̧mä̧ jȩä̧chä̧ku̧jä̧ ¿pättüttütä? ja̧'wa̧nü̧ pättü juiyüttü'i̧nä̧ ä̧rä̧mi̧'ü̧ täi pättüttütä? 6Ja̧'wa̧nü̧ ja̧'a̧nä̧, ubo I̧tti̧mä̧ pi̧jä̧ttü̧mä̧ suronä̧ jȩttä̧'i̧jü̧'i̧nä̧ jȩpü̧ ikua pä'ü ujuru kku̧nä̧rü̧ ja̧'a̧ päkuätukuäkua'anü̧ pä'ü.
(Parárisi na̧'ä̧chü̧rü̧ pä'inü̧):
—Ä̧rä̧mi̧'ü̧, ku̧'ä̧bä ȩmi̧pü̧ kuojusodera̧'a̧tä̧ täi. 7Päku, parárisi na̧'ä̧chä̧ji̧mä̧ ä̧rä̧mä̧chü̧ ojusodera̧'a̧ 'chi̧nü̧. 8Ja̧'wa̧nü̧ ja̧'a̧ topü ttü̧ja̧mä̧ ukuo te'äunu̧, Dio-rü esewinä̧tü̧, ttü̧ja̧rü̧ ttukuo iyini̧yä̧u̧.
Jesú, Mateo-rü wopinü̧
(Mc 2.13-17; Lc 5.27-32)
9Jesú-mä̧, juorü rä'opächü i̧'cho̧mȩnä̧ Mateo pä'ü mi̧kua̧rü̧ topinü̧, Roma-ra̧'a̧ iyäwä pärätä ka̧ka̧kuo̧mȩ ü̧'a̧'a̧. Jua̧u̧ru̧ pä'inü̧:
—Ttüku ichi.
Ja̧'wa̧nü̧ päku, Mateo-mä̧ ä̧rä̧mi̧'ü̧ chutäku 'chi̧nü̧.
10Jua̧u̧nu̧tä̧ mo̧ro̧ Jesú-mä̧, u̧wo̧juȩtä̧u̧ku Mateo ojusodera̧'a̧ u̧kuȩ kuä̧nü̧ 'chi̧nü̧. Ja̧'wa̧nü̧ kuä̧nü̧ ü̧'o̧mȩnä̧ rekuätü Roma-ra̧'a̧ iyäwä pärätä ka̧ka̧tä̧'i̧jä̧tü̧'i̧nä̧, suronä̧ jȩttü̧ ukuotä'ijätü'i̧nä̧ jua̧u̧tä̧ku̧ ttu̧kuȩ kuä̧nü̧ pȩji̧nä̧tü̧. 11Ja̧'wa̧nü̧ ukua'a topü, fariseo wotümä̧, Jesú u̧wo̧juȩtä̧u̧rü jä'epü ä̧ju̧kui̧nä̧tü̧:
—¿Tta̧'a̧nü̧ pä'ü ku̧ru̧wa̧tu̧ku̧mä̧ Roma-ra̧'a̧ iyäwä pärätä ka̧ka̧tä̧'i̧jä̧tu̧ku̧'i̧nä̧, suronä̧ jȩpä̧'i̧jä̧tu̧ku̧'i̧nä̧ u̧kuȩmä̧ ukua'ajä̧ttü̧? 12Ja̧'wa̧nü̧ pätta'a ä̧ju̧ku̧ Jesú-mä̧, päinä̧u̧:
—Na̧nȩpo̧ko̧tü̧mä̧ jawapü adikuä i̧sa̧rü̧mä̧ rekuä rü̧jo̧ko̧u̧; na̧'ä̧chä̧tü̧tä̧ ja̧'a̧ jawapü adikuä i̧sa̧rü̧ rekuä rü̧jä̧u̧mä̧. 13Jua̧u̧nu̧mä̧ wo̧jui̧pä̧jä̧tu̧kui̧, pa̧'a̧nü̧ pä'ijü tü'kü: «Rȩrü̧jü̧ toäkuäwätä pä̧wä̧rü̧jä̧ku̧sä̧, sacrificios jü̧nä̧ kuä'ü jȩ'kuä̧tu̧ku̧mä̧ kkü'koküsä» pä'ijomȩ. Isopäi'ünä̧ adiu jȩpä̧tü̧rü̧mä̧ ȩmü̧ ichokü pinü̧sä̧ ja̧'wa̧nü̧ ja̧jü̧ jueimä̧ suronä̧ jȩpä̧tü̧rü̧, surojüttü kättädächa pä'ü ichinü̧sä̧.
A̧do̧chä̧kuä̧wä̧, Jesú-ru jä'epinä̧tü̧
(Mc 2.18-22; Lc 5.33-39)
14Ja̧'wa̧nü̧ ja̧'a̧ Ju̧a̧ bautizo jȩä̧kuä̧wä̧ i̧sa̧ u̧wo̧juȩtä̧u̧, Jesú-ru ichi'ü jä'epü ä̧ju̧kui̧nä̧tü̧:
—¿Tta̧'a̧nü̧ pä'ü ujutu'i̧nä̧, fariseo wotü'i̧nä̧, tu̧kuȩ a̧do̧chü̧ jȩta̧'a̧nä̧, uku ku̧wo̧juȩtä̧u̧mä̧ ttu̧kuȩ a̧do̧chü̧ jȩpo̧ko̧tü̧ ja̧'a̧jä̧ttü̧? 15Pättäku, Jesú-mä̧ ädätinä̧u̧:
—¿Jua̧u̧nu̧mä̧, ya̧tȩ irekuarü ȩma̧'a̧ ä̧tȩpä̧jä̧u̧mä̧, chutä jitütäku ü̧ja̧'a̧nä̧mä̧ tta̧'kua̧ tta̧ttȩku̧'a̧nü̧ tä̧jí̧? Ja̧'wa̧nü̧ ja̧'a̧nä̧, irekuarü ȩmü̧rü̧ ttȩmi̧pü̧ mo̧ro̧ päi'omȩnä̧mä̧, jua̧u̧nu̧tä̧ jä̧kua̧'a̧ ttu̧kuȩ a̧do̧chü̧ jȩttä̧kua̧'a̧mä̧. 16Ja̧'wa̧nü̧ ja̧'a̧ttü̧ ttü̧'ka̧tä̧wä̧ta̧ tä̧bo̧i̧sä̧ta̧mä̧, ja̧rȩä̧ta̧nä̧mä̧ be'epümä̧ 'tü̧ä̧wo̧kü̧. Ja̧'wa̧nü̧ 'tü̧ttü̧ttü̧mä̧ ja̧rȩä̧ta̧ 'tü̧ȩkuä̧cho̧mȩnä̧ tä̧bo̧i̧sä̧ta̧tä̧, 'tü̧ttä̧jo̧mȩmä̧ yaboku ȩmo̧kuä̧cha̧'a̧, ja̧rȩä̧ta̧tä̧ kki̧'a̧'a̧nä̧. 17Ja̧'wa̧ta̧nü̧ vino isoya jareoyamä̧, odres isäba täboisäbanämä̧ 'karäwokü; ja̧'wa̧nü̧ jü̧ttü̧mä̧ vino isoya a̧'ti̧'ü̧, ri'ädia'attü sȩrä̧wi̧'o̧mȩnä̧, vino isoya'i̧nä̧ toe'ächa'anä̧, isäba'i̧nä̧ toe'ächäkua'a. Ja̧'wa̧nü̧ jü̧ juiya pä'ümä̧ vino isoya jareoyamä̧ odres isäba jareäbanä̧tä̧ 'karü kku̧nä̧wa̧'a̧, o'kajuiyünä̧tä̧ adiu kka̧ pä'ümä̧.
Na̧'ä̧chä̧ju̧ru̧'i̧nä̧, Jairo ittijuru'i̧nä̧ aditü ikuinü̧
(Mc 5.21-43; Lc 8.40-56)
18Jesú-mä̧ ji̧nä̧ juätürü ukuokua'anä̧, ya̧tȩ judío ttu̧ru̧wa̧ ichi'ü Jesú ä'ka jo̧mȩ iwe'kiyunä̧ pä̧mä̧dü̧ pä'inü̧:
—Chittiju 'koru päji'iyäkusä ja̧'wa̧nü̧ ja̧'a̧nä̧ ku̧mü̧ mȩ'ü̧ kuichüttümä̧, kka̧'kua̧ri̧'i̧yä̧kua̧sä̧. 19Ja̧'wa̧nü̧ päjäku Jesú-mä̧ ä̧rä̧mi̧'ü̧, i̧'cha̧'a̧ u̧wo̧juȩtä̧u̧'i̧nä̧ 'chi̧nä̧tü̧. 20Ja̧'wa̧nü̧ i̧'cho̧mȩttü̧, doce-nü̧ años jo̧mȩnä̧ ppü'ottü na̧'ä̧chä̧'i̧jä̧ju̧, Jesú aboja̧'a̧nä̧ 'chä̧wi̧'ü̧ ü̧'ka̧tä̧wä̧ta̧ beipomȩ mȩ'i̧nä̧ju̧. 21Jua'amä̧ kka̧mü̧nä̧tä̧: «Suro ü̧'ka̧tä̧wä̧ta̧nä̧tä̧ mȩdü̧ttü̧'i̧nä̧ chu̧'i̧pä̧kua̧ju̧sä̧» pä'ü kka̧mü̧kuäda'attü̧. 22Ja̧'wa̧nü̧ jä̧ku̧ Jesú-mä̧ aboja̧'a̧ku̧ kkärächi'ü, topü päinä̧kua̧:
—Chittiju esewipi, kua̧'u̧ ku̧wȩnä̧ro̧mȩttü̧ na̧kuä̧chü̧ttü̧mä̧ pi̧'ä̧jä̧ju̧jä̧. Päüta'anü̧, yotäku na̧ja̧chä̧'i̧jü̧ttü̧mä̧ pi̧'i̧nä̧ju̧. 23Jesú-mä̧ judío ttu̧ru̧wa̧ ojusodera̧'a̧ i̧'chi̧'o̧mȩnä̧, mä̧ra̧na̧ ppüäwä isotü'i̧nä̧ ppütta'anä̧, ttü̧ja̧'i̧nä̧ rü̧ȩnä̧ ajuäkuäu wotta'a topü, 24päinä̧u̧: —Rä'opächätukui, mü̧ä̧yajumä̧ 'korujuo'ächokoju päjäju, suro ä'ütä ä'äju. Pä̧i̧yä̧u̧, Jesú-ru ya̧'a̧wä̧'chi̧nä̧tü̧. 25Ja̧'wa̧nü̧ rä'epü ikuäji̧'ka̧, do'ächi'ü mü̧ä̧yaju kku̧mü̧ ȩmo̧po̧'ü̧ käepomȩnä̧, juajumä̧ ä̧rä̧mi̧'i̧nä̧ju̧. 26Jua̧u̧ jȩä̧ji̧mä̧, juä̧jä̧nä̧ kka̧kuä̧tü̧mä̧ o'katoi'ünä̧tä̧ ukuowa'a ä̧ju̧kui̧nä̧tü̧.
Jesú ä̧to̧kä̧tü̧rü̧ aditü ikuinü̧
27Jesú juorü räopächomȩnä̧, ä̧to̧kä̧tü̧ ta̧ju̧ o'ka'anä̧ ru'u wottinä̧ku̧:
—¡Ujuturu re kkä̧wi̧, Dawi i̧tti̧! 28Jesú isodera̧'a̧ i̧'chi̧'ä̧ja̧'a̧, ä̧to̧kä̧jä̧tü̧ ttichi'iyäku päinä̧u̧: —¿Ukutu päkuätukumä̧, pi̧yȩmä̧ jȩchü̧'a̧nü̧ ja̧'a̧?
—Päomȩnä̧, pä'inä̧tü̧: A̧, chu̧ru̧wa̧ jȩ'ku̧'a̧nü̧ wa̧jä̧.
29Ja̧'wa̧nü̧ ja̧'a̧ Jesú tti'ärenä̧ mȩ'ü̧ päinä̧u̧:
—Kua̧'u̧ ku̧wȩnä̧rä̧tu̧ku̧'a̧kuä̧, jua̧u̧nu̧mä̧ jä̧u̧jä̧.
30Päomȩnä̧, tti'äremä̧ adiwächi'inä̧u̧. Ttadiwächäjiyäku Jesú-mä̧ ro̧'ȩpü̧ päinä̧u̧:
—Yoriso, ya̧tȩrü̧'i̧nä̧ jikuäwätukuä. 31Ja̧'wa̧nü̧ päja'anä̧, yotäku rä'opächü, Jesú jȩä̧ji̧mä̧ juä̧jä̧nä̧mä̧ o'kajuiyünä̧ ukuounä̧ ji'äwinä̧tü̧.
Jesú i̧wȩnȩ jui̧'a̧rü̧ aditü ikuinü̧
32Juätümä̧ rättopächa'anä̧, kkorotümä̧ Jesú ü̧jo̧mȩku̧ i̧wȩnȩ jui̧'a̧rü̧, epíritu su̧ro̧pa̧ ü̧jä̧ku̧ru̧ i'kächipinä̧tü̧. 33Jesú epíritu su̧ro̧pa̧rü̧ rä'epü ikuomȩnä̧; i̧wȩnȩ jui'äjimä̧ jua̧u̧nu̧tä̧ kkä̧mä̧dü̧ ukuokuinü̧. Ukuokuiyä̧u̧ ttü̧ja̧mä̧ rü̧ȩnä̧ amükuädünü̧ pä'inä̧tü̧:
—¡Iraettümä̧ pa̧'a̧nü̧ jü̧mä̧ yorisotä topokotü pä'ijätüjä̧! 34Ja̧'wa̧nü̧ ja̧'a̧nä̧, fariseo wotümä̧ pä'inä̧tü̧: —epíritu-tu̧ suropätü ttu̧ru̧wa̧ ujurunä̧tä̧, rä'epä'chü iku epíritu-tu̧ suropätürümä̧.
U̧wä̧ju̧ ka̧ka̧kuä̧mä̧ rü̧a̧'a̧
35Jesú-mä̧ bäreu ütawiyänä̧'i̧nä̧, ppo̧ü̧ ütawiyänä̧'i̧nä̧, sinagogas odewiyä pünä̧ kue'ächü wo̧juȩti̧nü̧. Jareünä̧ Ru̧wa̧ Dio weü wȩnȩ wo̧juȩtü̧mä̧, na̧nȩttü̧mä̧ o'kajuiyünä̧ aditü iku kkä̧nü̧, ubara ttu'u na̧nȩttü̧'i̧nä̧, o'kajuiyünä̧tä̧ aditü ikuinü̧. 36Ja̧'wa̧nü̧ ja̧'a̧ ttü̧ja̧ rekuätürü topü, rȩrü̧jü̧nü̧ toinä̧u̧, usurä ȩmä̧u̧ ttipperekuächini̧yä̧ku̧, oweja-tü̧ ttu̧ru̧wa̧ pató to'ätü 'kua̧rü̧nä̧ ttü̧ja̧kui̧yä̧ku̧. 37Ja̧'wa̧nü̧ ji̧yä̧ku̧ u̧wo̧juȩtä̧u̧rü pä'inü̧:
—Isopäi'ünä̧ u̧wä̧ju̧ jo̧mȩnü̧ jü̧mä̧ rü̧a̧'a̧nä̧, adikuä isotütä a̧'u̧ku̧nä̧ ja̧'a̧. 38Ja̧'wa̧nü̧ ja̧'a̧ttü̧ u̧wä̧ju̧ jo̧mȩnü̧ jü̧ u̧ru̧wa̧rü̧ jä'epätukui, ka̧ka̧kuä̧ isotürü ttü̧ka̧ka̧ta̧ pä'ü weäkua'anü̧.
اکنون انتخاب شده:
San Mateo 9: PNT13
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedades Biblicas Unidas en Venezuela
