ལུ་ཀ། 23
23
ཡེ་ཤུ་པི་ལ་ཏུའི་གདོང་དུ།
(མད་ཐཱ། ༢༧:༡-༢,༡༡-༡༤; མར་ཀུ། ༡༥:༡-༥; ཡོ་ཧ་ནན། ༡༨:༢༨-༣༨)
1འོ་དེ་གཤམ་ནས་ཚོགས་མི་གི་རི་ལངས་རེ་ཡེ་ཤུ་ལ་པི་ལ་ཏུའི་གདོང་དུ་ཁྲིད་པ་ལགས། 2ཁོང་ཀྱ་ཡིས་ཁོང་པ་ལ་དེ་རེ་སྐྱོན་བཙུགས་ཏེ་སྨྲས་བ་ལགས། མི་འདིས་འོ་རི་མི་ཀྱ་ལ་ཁོག་པ་རྒྱང་གིན་དང་རོ་མཱ་པ་རྒྱལ་བོ་ཀེ་སར་ལ་ཁྲལ་འཇང་ཡས་ལ་མི་ཀྱ་ལ་བཀག་གིན་དང་ཁོ་རང་ལ་རྒྱལ་བོ་མཱ་ཤི་ཀ་ཡིན་སྨྲ་གིན་གོ་འི་ཀིས་མཐོང་སོང་།
3འོ་བྱས་རེ་པི་ལ་ཏུ་ཡིས་ཁོང་པ་ལ་དྲིས་བ་ལགས། ཁྱོད་ཡ་ཧུ་དཱ་པ་ཀྱ་ཡི་རྒྱལ་བོ་གོ་ཡིན་ནས།
དེ་ནས་ཡེ་ཤུ་ཡིས་གསུངས་བ་ལགས། ཁྱེད་རང་གིས་དེ་རེ་གསུངས་ང་ལགས།
4དེ་ནས་པི་ལ་ཏུ་ཡིས་མཆོད་དཔོན་ཆེ་ཀྱ་དང་མི་ཚོགས་ཀྱ་ལ་སྨྲས་བ་ལགས། ངས་མི་དེ་ལ་སྐྱོན་བཅུག་དགོས་ཡས་དོན་གིའང་མེད་མཐོང་ང་།
5ཡིན་ནའང་ཁོང་ཀྱ་ཡིས་ཨུ་ཚུགས་བྱས་རེ་སྨྲས་བ་ལགས། འདི་མི་དེས་ག་ལིལ་རྒྱལ་རབས་ནས་འགོ་བཙུགས་ཏེ་དེ་ཐུག་པའི་ཡུ་དེ་ཡཱ་གི་རི་ལ་རང་གི་ཆོས་བསླབ་སྟེ་མི་ཀྱ་ལ་དཀྲུག་བའི།
6དེ་ནས་པི་ལ་ཏུ་ཡིས་དེ་གོ་སྟེ་མི་འདི་ག་ལིལ་པ་ལེ་སྨྲས་རེ་དྲིས་བ་ལགས།
ཡེ་ཤུ་ཧེ་རོ་དཱེའི་གདོང་དུ།
7དེ་ནས་ཡེ་ཤུ་ཧེ་རོ་དཱེ་རྒྱལ་བོའི་ས་ཆའི་མི་ལགས་སྨྲས་རེ་ཧ་གོ་སྟེ། འོ་དེ་གང་ལ་ཧེ་རོ་དཱེ་ཡེ་རུ་ཤ་ལེམ་དུ་རང་བྱས་རེ་པི་ལ་ཏུ་ཡིས་ཁོང་པ་ལ་ཧེ་རོ་དཱེ་རྩ་རུ་བརྫངས་བ་ལགས། 8དེ་ནས་ཧེ་རོ་དཱེ་ཡིས་ཡེ་ཤུའི་སྐོར་ལ་གོ་འོད་ད་ལགས། དེ་ནས་ཁོང་པ་ནས་རྟགས་ཀྱ་མཐོང་ཡས་རེ་བ་བྱས་རེ་ཁོང་པ་ལ་ཡུན་རིང་ང་ནས་ཧ་ལ་མཐོང་ཉིད་འདོད་འོད་ད་ལགས། ད་ཡེ་ཤུ་ལ་མཇལ་ལི་གང་ལ་ཁོ་དམི་ཅིག་གི་ཉམ་མོ་དགྱེས་བ་ལགས། 9འོ་བྱས་རེ་ཁོས་ཡེ་ཤུ་ལ་དྲི་བ་མང་ང་བསྐུལ་བ་ལགས། ཡིན་ནའང་ཁོང་པ་ཡིས་ལན་གཅིག་འང་མ་གནང་བ་ལགས། 10དེ་ནས་མཆོད་དཔོན་ཆེ་ཀྱ་དང་ཆོས་ཁྲིམས་ཀྱི་སློབ་དཔོན་ཀྱ་ལངས་རེ། ངར་ཏེ་ཁོང་པ་ལ་སྐྱོན་བཙུགས་པ་ལགས། 11དེ་ནས་ཧེ་རོ་དཱེ་དང་དམག་མི་ཀྱ་ཡིས་ཁོང་པ་ལ་སྨད་སྤྲ་བབས་ཏེ་འཕྱ་ལས་བརྒྱབ་པ་ལགས། དེ་ནས་ཁོང་པ་ལ་གོས་ཁག་ཆེ་གཅིག་བསྐོན་ཏེ་པི་ལ་ཏུ་རྩ་རུ་ལོག་སྟེ་བརྫངས་བ་ལགས། 12འོ་དེ་ཉིན་མ་གོ་རང་པི་ལ་ཏུ་དང་ཧེ་རོ་དཱེ་རོགས་བ་བྱུང་བ་ལགས། གི་བྱས་རེ་སྨྲ་ན་འོ་དེ་ཨེན་ལ་ཁོང་གཉིས་བོ་མེད་འཆམས་མ་ལགས།
པི་ལ་ཏུ་ཡིས་ཡེ་ཤུ་ལ་ཆད་པ་བསྐལ་བ།
(མད་ཐཱ། ༢༧:༡༥-༢༦; མར་ཀུ། ༡༥:༦-༡༥; ཡོ་ཧ་ནན། ༡༨:༣༩;༡༩:༡༦)
13དེ་ནས་པི་ལ་ཏུ་ཡིས་མཆོད་དཔོན་ཆེ་ཀྱ་དང་དཔོན་པོ་ཀྱ་དང་མི་མང་ཀྱ་ལ་བོས་རེ། 14ཁོང་ཀྱ་ལ་སྨྲས་བ་ལགས། མི་ཀྱ་ལ་ཁོག་པ་རྒྱང་བའི་སྨྲས་རེ་ཁྱེད་ཀྱ་ཡིས་འདི་མི་ལ་ངའི་རྩ་རུ་ཁྲིད་དེ་འོངས་སོང་། དེ་ནས་ཁྱིད་ཀྱི་གདོང་དུ་རང་ངས་ཁོ་ལ་བརྟག་དཔྱད་བྱས་རེ། ཁྱིད་ཀྱིས་ཁོའི་ཁར་ལ་བཀལ་ཀ་སྐྱོན་འཛུགས་ཀྱ་ཡི་སྐྱོན་གིའང་འདི་མི་ལ་མཐོང་གི་མིན་འདུག། 15དེ་ནས་ཧེ་རོ་དཱེ་ཡིས་འང་གིའང་སྐྱོན་མ་མཐོང་བ་ཁོ་ལ་འོ་རི་རྩ་རུ་རང་ལོག་སྟེ་བརྫངས་སོང་། ད་ལྟོས། ཁོ་ལ་བསད་དགོས་ཀྱིན་ལས་ཀ་ཁོས་གིའང་མ་བྱས་འདུག། 16འོ་བྱས་རེ་ང་ཁོ་ལ་རྟ་ལྕག་གཞུ་ཡས་ཆད་པ་བཀལ་རེ་བཏང་ཡས་ཡིན།
17[ཡ་ཧུ་དཱ་པ་ཀྱ་ཡི་ཐར་པ་ཐོབ་ཐ་པེ་སག་གི་དུས་ཆེན་གོ་ལ་པི་ལ་ཏུ་ཡིས་བཙོན་པ་གཅིག་ལ་གློད་བཏང་དགོས་ཀྱི་ལགས།]#༢༣:༡༧ མང་ཆེ་གྷི་རིག་གསུང་རབ་ཀྱི་དེབ་ཀྱ་ལ་ ༡༧ བྲིས་མེད་ད་ལགས། 18དེ་ནས་འོ་དེ་མི་ཚོགས་གི་རི་ཡིས་ཕེ་ར་བརྒྱབ་པ་ལགས། མི་འདི་ལ་སོད། དེ་ནས་འི་ཀི་ཕྱིར་ལ་བ་རབ་བཱ་ལ་གློད་བཏང་རོགས་བྱེད། 19བ་རབ་བཱ་སྨྲ་གིན་མི་ཡིས་འོ་དེ་རྒྱལ་ས་རུ་འཁྲུག་བསླངས་བ་ལགས། དེ་ནས་མི་བསད་དེ་བཙོན་ཁང་དུ་བཞག་འོད་ད་ལགས།
20དེ་ནས་པི་ལ་ཏུ་ཡིས་ཡེ་ཤུ་ལ་གློད་བཏང་ཡས་ཀྱི་འདོད་པ་བྱས་རེ་ལྡབ་ལེ་ཁོང་ཀྱ་ལ་གོ་བ་བརྒྱབ་པ་ལགས། 21ཡིན་ནའང་ཁོང་ཀྱ་ཡིས་སྐད་བརྒྱབ་སྟེ་རྒྱང་ཤིང་ཁར་ལ་རྐྱོངས། ཁོ་ལ་རྒྱང་ཤིང་ཁར་ལ་རྐྱོངས་སྨྲས་རེ་སྨྲས་བ་ལགས།
22པི་ལ་ཏུ་ཡིས་ཐེངས་མ་གསུམ་པ་ལ་ཁོང་ཀྱ་ལ་སྨྲས་བ་ལགས། གི་བྱས་རེ། མི་འདིས་ངན་པ་གི་བྱེད་དོ། ངས་ཁོ་ལ་བསད་ཡས་ཀྱི་ཆད་པ་བཀལ་དགོས་ཀྱིན་སྐྱོན་གིའང་མེད་མཐོང་ང་། འོ་བྱས་རེ་ཁོ་ལ་ང་རྟ་ལྕག་བཞུས་ཏེ་བཏང་ཡས་ཡིན།
23དེ་ནས་མི་ཀྱ་ཡིས་ཨུ་ཚུགས་བྱས་རེ་ཁོ་ལ་རྒྱང་ཤིང་ལ་བརྐྱངས་དགོས་གུ་ལགས་སྨྲས་རེ་ཡོལ་ལེ་སྐད་ཆེ་བརྒྱབ་པ་ལགས། དེ་ནས་ཁོང་ཀྱ་ཡིས་སྐད་བརྒྱབ་སྟེ་རྒྱལ་བ་ལགས། 24འོ་བྱས་རེ་པི་ལ་ཏུ་ཡིས་ཁོང་ཀྱ་ཡིས་སྨྲ་གིན་ཅོག་རེ་བྱེད་ཡས་ལ་བཀའ་གནང་བ་ལགས། 25དེ་ནས་ཁོང་ཀྱ་ཡིས་ཞུ་གིན་འཁྲུག་བསླངས་རེ་དང་མི་བསད་དེ་བཙོན་ཁང་དུ་ཆུད་ཆ་མི་གོ་ལ་པི་ལ་ཏུ་ཡིས་བཏོན་པ་ལགས། ཡིན་ནའང་ཡེ་ཤུ་ལ་ཁོང་ཀྱ་ཡིས་འཐད་ཀྱིན་གོ་བྱེད་ཡས་ལ་ཁོང་ཀྱ་ལ་རྩི་བརྒྱབ་པ་ལགས།
ཡེ་ཤུ་རྒྱང་ཤིང་ཁར་ལ།
(མད་ཐཱ། ༢༧:༣༢-༤༤; མར་ཀུ། ༡༥:༢༡-༣༢; ཡོ་ཧ་ནན། ༡༩:༡༧-༢༧)
26དེ་ནས་དམག་མི་ཀྱ་ཡིས་ཡེ་ཤུ་ལ་འོ་དེ་ནས་ཁྲིད་དེ་འགྲོའི་གང་ལ་ཀུ་རེ་ནཱེ་པ་སི་མོན་སྨྲ་གིན་མི་གཅིག་རང་གི་ཡུལ་ནས་འོ་དེ་ཕྱོགས་ལ་འོང་བའི་འོད་ད་ལགས། དེ་ནས་ཁོང་ཀྱ་ཡིས་ཁོ་ལ་ཟིམ་ཏེ་ཡེ་ཤུའི་རྒྱང་ཤིང་གོ་ཁྱེར་ཏུ་བཅུག་པ་ལགས། 27དེ་ནས་མི་ཚོགས་ཆེ་གཅིག་ཁོང་པ་ཡི་གཤམ་པ་ལ་འབྲངས་བ་ལགས། དེ་ནས་འོ་དུ་རུ་ཁོང་པ་ཡི་ཕྱིར་ལ་ངུ་མཁན་དང་ངུ་བརྡ་བརྒྱབ་མཁན་སྐྱེས་དམན་ཀྱ་འོད་ད་ལགས། 28ཁོང་ཀྱ་ཕྱོགས་ལ་གཟིགས་ཏེ་ཡེ་ཤུ་ཡིས་གསུངས་བ་ལགས། ཡེ་རུ་ཤ་ལེམ་གྱི་བུ་མོ་ཀྱ་བོ། ངའི་ཕྱིར་ལ་མ་ངུ། ཡིན་ནའང་ཁྱེད་ཀྱ་ཁྱེད་རང་དང་ཁྱེད་རི་ཕྲུ་བ་ཀྱ་ཕྱིར་ལ་ངུས། 29གི་བྱས་རེ་སྨྲ་ན་རབས་ཆད་ཀྱ་དང་ཕྲུ་སྐྱེ་མ་མྱོང་གིན་དང་འོ་མ་སྟེར་མ་མྱོང་གིན་བུ་མོ་ཀྱ་གིན་གྱི་བསོད་བདེ་ཆེ་སྨྲས་རེ་སྨྲ་གིན་ཉིན་མ་ཀྱ་འོང་བའི་འོད་ད་ལགས། 30འོ་དེ་གང་ལ་མི་ཀྱ་ཡིས་གང་རི་ཀྱ་ལ་འི་ཀི་ཁར་ལ་ལྷིམ། དེ་ནས་རི་ཀྱ་ལ་འེ་ཀྱ་ལ་ཀོབ་#ཧོ་ཟེ། ༡༠:༨སྨྲས་རེ་སྨྲ་གི་ལགས། 31གི་བྱས་རེ་སྨྲ་ན་ཁོང་ཀྱ་ཡིས་ཤིང་སྡོང་སྔོན་པོ་འོད་དེ་གང་ལ་དེ་རེ་བྱེད་ན། ཤིང་སྡོང་བསྐམས་ན་གི་བྱེད་འདིག་འོད་གྲོ།
32དེ་ནས་ཁོང་ཀྱ་ཡིས་གཞན་མ་ཇག་པ་གཉིས་ལ་ཁོང་པ་མུ་ལ་བསད་ཡས་ལ་ཁྲིད་དེ་སོང་བ་ལགས། 33ཁོང་ཀྱ་མགོ་རུས་སྨྲ་གིན་ས་ཆ་གོ་ལ་སླེབས་པ་ལགས། དེ་ནས་འོ་དུ་རུ་ཁོང་པ་ལ་རྒྱང་ཤིང་ཁར་ལ་བརྐྱངས་པ་ལགས། དེ་ནས་ཇག་པ་གཉིས་བོ་ནས་གཅིག་ལ་ཁོང་པ་ཡི་གཡས་ཕྱོགས་དང་གཞན་མ་ལ་གཡོན་ཕྱོགས་ལ་བརྐྱངས་པ་ལགས།
34དེ་ནས་ཡེ་ཤུ་ཡིས་གསུངས་བ་ལགས། ངའི་ཡབ། དེ་ཀྱ་ལ་དགོངས་པ་གནང་རོགས་གནང་། གི་བྱས་རེ་སྨྲ་ན་དེ་ཀྱ་ཡིས་གི་བྱེད་ཀྱིན་གོ་དེ་ཀྱ་མེད་ཤེས་ལ་ལགས། དེ་ནས་དམག་མི་ཀྱ་ཡིས་ཡེ་ཤུའི་གོས་ལག་གོ་རྒྱན་བརྒྱབ་སྟེ་ཁོ་རང་ཀྱ་ནང་དུ་བགོས་བ་ལགས། 35མི་ཀྱ་ལངས་རེ་བལྟས་རེ་བསྡད་འོད་ད་ལགས། ཡིན་ནའང་དཔོན་པོ་ཀྱ་ཡིས་ཁོང་པ་ལ་སྨད་ཇུ་བཏང་རེ་སྨྲས་བ་ལགས། འདི་མི་དེས་གཞན་མ་ཀྱ་ལ་སྐྱོབས་སོང་། ད་འདི་དཀོན་མཆོག་གི་བདམས་ད་མཱ་ཤི་ཀ་གོ་ཡིན་ན། ཁོ་རང་ལའང་སྐྱོབ་པར་ཤོག།
36དེ་ནས་དམག་མི་ཀྱ་ཡིས་འང་འོངས་རེ་ཁོང་པ་ལ་རྒུན་ཆང་སྐྱུར་མོ་གོ་སྟེར་ཏེ་སྨད་ཇུ་བཏང་རེ་སྨྲས་བ་ལགས། 37ཁྱོད་ཡ་ཧུ་དཱ་པ་ཀྱ་ཡི་རྒྱལ་བོ་ཡིན་ན། རང་ལ་སྐྱོབས།
38དེ་ནས་ཁོང་པ་ཡི་དབུ་ཁར་ལ་འདི་ཡ་ཧུ་དཱ་པ་ཀྱ་ཡི་རྒྱལ་བོ་ལགས་སྨྲས་རེ་བྲིས་ཏེ་བཏག་འོད་ད་ལགས།
39དེ་ནས་རྒྱང་ཤིང་ལ་བཏག་ཏ་ཇག་པ་གཉིས་བོ་ནས་ཇག་པ་གཅིག་གིས་ཁོང་པ་ལ་སྨད་སྤྲ་བབས་ཏེ་སྨྲས་བ་ལགས། ཁྱོད་མཱ་ཤི་ཀ་གོ་མ་ལེ། ཁྱོད་རང་དང་འེ་ཀྱ་ལ་སྐྱོབས།
40ཡིན་ནའང་འོ་དེ་ལ་ཨང་ཇི་བཏང་རེ་གཞན་མ་ཡིས་སྨྲས་བ་ལགས། ཁྱོད་ལའང་ཆད་པ་འདི་རང་ཕོག་འོད་ད་ལགས། དོ་རང་འང་བ་དཀོན་མཆོག་ལ་འཇིགས་སྐྲག་མི་བྱེད་ད་ལེ། 41འོ་རང་གཉིས་བོ་ལ་འོ་རི་ལས་ཀ་ཡིས་ཆད་པ་ཕོག་དགོས་ཀྱིན་གོ་ཕོག་པ་ལགས། ཡིན་ནའང་འདི་མི་ཡིས་ལས་ཀ་ངན་པ་གིའང་མ་བྱེད་འོད་ད་ལགས།
42དེ་ནས་ཁོས་ཡེ་ཤུ་ལ་སྨྲས་བ་ལགས། ཡེ་ཤུ་ལགས། ཁྱེད་རང་རང་གི་རྒྱལ་སྲིད་ལ་ཕེབས་བའི་གང་ལ་ང་ལ་དྲན་རོགས་མཛད།
43ཁོང་པ་ཡིས་ཁོ་ལ་གསུངས་བ་ལགས། ང་དངོས་གནས་སྨྲ་ཡིན། དི་རིང་རང་ཁྱོད་ངའི་མུ་ལ་ནམ་མཁའི་ཞིང་ཁམས་དུ་འོང་གི་ལགས།
ཡེ་ཤུ་གྲོངས་པ།
(མད་ཐཱ། ༢༧:༤༥-༥༦; མར་ཀུ། ༡༥:༣༣-༤༡; ཡོ་ཧ་ནན། ༡༩:༢༨-༣༠)
44ད་ཉིན་མོའི་ཆུ་ཚོད་བཅུ་གཉིས་བྱུང་བ་ལགས། དེ་ནས་ཆུ་ཚོད་གསུམ་པ་ཐུག་པའི་ས་ཆ་གི་རི་ལ་ནག་ཐག་བའི་བྱུང་བ་ལགས། 45དེ་ནས་ཉི་མའི་འོད་བསྒྲིབས་པ་ལགས། དེ་ནས་མཆོད་ཁང་གི་ཡོལ་བ་གོ་ཁག་གཉིས་ལ་རལ་བ་ལགས། 46དེ་ནས་ཡེ་ཤུ་ཡིས་གསུང་སྐད་ཆེ་ལ་གསུངས་བ་ལགས། ངའི་ཡབ། ངའི་སེམས་ང་ཁྱེད་རང་གི་ཕྱག་ལ་འབུལ་ཡས་ཡིན། དེ་ནས་དེ་གསུངས་རེ་ཁོང་པ་གྲོངས་བ་ལགས།
47ད་བརྒྱ་དཔོན་གྱིས་དེ་མཐོང་རེ་དཀོན་མཆོག་ལ་བསྟོད་སྒྲ་བཏང་རེ་སྨྲས་བ་ལགས། དངོས་གནས་རང་འདི་མི་དེ་སྐྱོན་མེད་ཀྱིན་ཡིན་ད་རགས། 48དེ་ནས་དེ་ལྟ་ཡས་ལ་འཛོམས་ཛ་མི་ཀྱ་གི་རི་དེ་མཐོང་རེ་རང་གི་བྲང་ཁོག་ལ་བརྡུངས་བའི་བརྡུངས་བའི་ལོག་པ་ལགས། 49དེ་ནས་ཁོང་པ་ཡིས་ངོ་ཤེས་ཀྱིན་དང་ག་ལིལ་ནས་ཁོང་པའི་གཤམ་ལ་འོང་གིན་བུ་མོ་ཀྱ་རྒྱང་ནས་འོ་དུ་རུ་བྱུང་བྱ་གི་རི་ལངས་རེ་བལྟས་རེ་བསྡད་པ་ལགས།
ཡེ་ཤུའི་སྐུ་ཕུང་སྐུང་བ།
(མད་ཐཱ། ༢༧:༥༧-༦༡; མར་ཀུ། ༡༥:༤༢-༤༧; ཡོ་ཧ་ནན། ༡༩:༣༨-༤༢)
50-51ད་འོ་དུ་རུ་ཡུ་དེ་ཡཱའི་ཨ་རི་མ་ཐཱི་ཡ་སྨྲ་གིན་རྒྱལ་སའི་ཡོ་སེབ་སྨྲ་གིན་མི་བཟང་ང་དྲང་པོ་གཅིག་འོད་ད་ལགས། དེ་ནས་ཁོ་ཚོགས་འདུའི་ཚོགས་མི་གཅིག་ལགས། དེ་ནས་ཁོ་ཁོང་ཀྱ་ཡི་གྲོས་དང་ལས་ཀ་ལ་མ་འཆམས་པ་ལགས། ཁོ་དཀོན་མཆོག་གི་རྒྱལ་སྲིད་ལ་རེ་བ་བྱས་རེ་བསྡད་འོད་ད་ལགས། 52ད་ཁོ་པི་ལ་ཏུ་རྩ་རུ་སོང་རེ་ཡེ་ཤུའི་སྐུ་ཕུང་གོ་ཞུས་བ་ལགས། 53དེ་ནས་ཁོང་པ་ཡི་སྐུ་ཕུང་གོ་རྒྱང་ཤིང་ནས་མ་ལ་པབ་སྟེ་རས་གཅིག་གིས་སྒྲིལ་བ་ལགས། དེ་ནས་ནམ་མའང་ཕུང་པོ་བཞག་མ་མྱོང་གིན་བྲག་ཕུག་ཏུ་བཟོས་ཟ་དུར་ཁྲོད་དུ་བཞག་པ་ལགས། 54ད་ངལ་གསོ་གིན་ཉིན་མོ་གོ་འགོ་བཙུགས་གུ་བྱས་རེ་འོ་དེ་ཉིན་མ་གོ་གྲ་སྒྲིག་གི་ཉིན་མོ་གོ་ལགས། 55དེ་ནས་ག་ལིལ་ནས་ཁོང་པ་ཡི་གཤམ་པ་ལ་འོང་གིན་སྐྱེས་དམན་ཀྱ་ཡོ་སེབ་ཀྱི་མུ་ལ་སོང་བ་ལགས། དེ་ནས་དུར་ཁྲོད་གོ་མཐོང་རེ་ཁོང་པ་ཡི་ཕུང་པོ་གང་གི་བྱས་རེ་བཞག་གིན་གོའང་མཐོང་བ་ལགས། 56དེ་ནས་ཁོང་ཀྱ་ལོག་སྟེ་ཕུང་པོ་ལ་དྲི་བཟང་དང་སྤོས་ཆུ་གྲ་སྒྲིག་བྱས་བ་ལགས། ཡིན་ནའང་ངལ་གསོ་གིན་ཉིན་མ་གོ་ལ་ཆོས་ཁྲིམས་ཀྱི་བཀའ་ལ་བརྩིས་རེ་ཁོང་ཀྱ་ངལ་གསོས་བ་ལགས།།
اکنون انتخاب شده:
ལུ་ཀ། 23: LOY
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. and Nepal Bible Society
