Yoane 19
19
Adzaŋ za Bɨ Chɛ́rɨ́nɨ́ Ɨsáʼ Yeso Ngə́ á Bɨ Zhwitɨ ayi ɛ
1Branto a tíʼ ndɔgɨ a Yeso nga bɨ ləŋ nɨ ngwan ə. 2Bɨgwe kárɨ́ ɨsáʼfɔ nɨ kyɛrə-kyɛrə ngwəgɨ wu atú; ngwəgɨ a tɔgɨ wu mbaŋnɨ wə ɨnye 3ntiʼə nkɔ́ʼə ngyíŋə́ wə ɨshi nɨ nkfu nɨ nkfu, ɨ sóŋə́ ngə́, “A ɨfɔ bə Yuda a tsi nɨnkoŋ ə!” Ntiʼə nkə́ ndúbə́ ayi a ɨshi zɨə.
4Branto a bə́ nkwiʼ fu abyɛn ɨ soŋ a mbó ɨnɔ ɨbɛn wa ngə́, “Zɛnə azɨŋ ə, ma mɨ soŋ á bɨ fu nɨ zɨ abyɛn a ɨshi bən á nɨ zɛn ngə́ ma sa anu zə tse zɛn za a diʼnɨ ngə́ ŋwɔn wen a vwo ɨsáʼ ə.” 5Yeso a tíʼ fú abyɛn, ngwəgɨ ɨsáʼfɔ kyɛrə-kyɛrə za atú zɨ abɔʼnɨ tɔgɨ wu mbaŋnɨ wa. Branto a sóŋ a mbó bo ngə́, “Zɛnə azɨŋ ə! Ŋwɔn wa a wɛnə!”
6Mbáʼ bɨntumshe bə wi abɔʼnɨ bɨntsiŋ ɨdiʼ bɨ Ndáŋwi zɨ Ngwi zɛ́nɨ́ ayi lá, bo tɔ́nkɨ́ ngə́, “Kwemtɨ ayi atɨ abaŋnɨ-baŋnɨ ə! Kwemtɨ ayi atɨ abaŋnɨ-baŋnɨ ə!”
Branto a sóŋ a mbó bo ngə́, “Nɨ tiʼ ndɔgɨ ayi tsɛʼ bɨŋ mboŋ ngɛn nkwemtɨnə ghe. Ka ma zɛn aghan anu za a fanɨ mbáʼ a diʼnɨ ngə́ ŋwɔn wen a vwo ɨsáʼ ə.”
7Bə Yuda ba byígɨ́ wəmbo ngə́, “Bɨgɨ tsi nɨ nyɔngɔŋ wa a soŋnɨ ngə́ a tsi nɨ nkfo mbɨ́ʼ ngə́ wɛrə a káŋ ngə́ zɨə nɨ Mɔn Ŋwi ə.”
8Mbáʼ Branto a zúʼnɨ́ bo soŋ a məzen lá, nɨbɔgɨ ɨni bə ngɛn nɨ mbyi ɛ. 9Wɛrə a bə́ nkón ngɛ́n a mu ntɔ́ʼ zɨ, mbitɨ a Yeso ngə́, “O lo lá ɨ ghé?”
Lá Yeso a keʼ chwɨgə. 10Branto a bítɨ́ ayi ngə́, “O mɨ koʼ a mbó me gham mbɨ́ʼ ake le? Zhi ɨ shiʼnɨ ngə́ ma tsi nɨ mɨtən mbáʼ be ma nyɛʼtɨ agho kə ɨ chi ghɨ á bɨ kwemtɨ agho atɨ abaŋnɨ-baŋnɨ ə.”
11Yeso a chwɨ́gɨ́ ayi ngə́, “O tsi nɨ mɨtən atú me tsɛʼ mbɨ́ʼ ngə́ Ŋwi a ghá a mɛrə ɨwa. A tiʼ mbe ngə́, ŋwɔn wa a ghanɨ aghan a mbó gho lá, a ghɨ ɨbvu wa ɨ tsanɨ ɨgho ə.”
12Mbáʼ Branto a zúʼnɨ́ a məzen lá, ndɔbtɨ a ndǒ ndóm wa be zɨə tsa ɨwu ɨ nyɛʼtɨ a Yeso ghe. Lá nángyérə́ wa a tɔ́nkɨ́ wu atú ngə́, “Be o nyɛʼtɨ ayi, a be ngə́ o so ɨson Kaisa be. Ŋwɔn tsum wa a kaŋnɨ ngə́ zɨə nɨ ɨfɔ, a nɨ ŋwɔn atɨŋətú a mbó Kaisa ghe!”
13Mbáʼ Branto a zúʼnɨ́ a miŋ mɨgham lá, ndɔgɨ a Yeso ɨ fu nɨ wɛrə abyɛn, ɨ shiʼtɨ ntsi atú alaŋ a tabyɛn, a nye adiʼ za bɨ kɨ́nə́ ntɔ́ŋə́ ngə́, “Adiʼ za bɨ lɨʼnɨ nɨ mɨngɔʼ ə”. (Mbe lá “Gabata” a nye nɨgham nɨ bə Ɛbal ə) 14A kə́ ntíʼə mbě tso ntənɨ nyom a nye njwi za njwi mɨ lan á be nɨdorɨ nɨ Tsa-yɛʼnɨ ə. Branto a sóŋ a mbó ɨbɛn ba ngə́, “Ɨfɔ ɨwən a wɛnə!”
15Bo tɔ́nkɨ́ mbyigɨ wəmbo ngə́, “Zhwitɨ ayi ɛ! Zhwitɨ ayi ɛ! Kwemtɨ ayi atɨ abaŋnɨ-baŋnɨ ə!”
Branto a bítɨ́ awa ngə́, “Nɨ lǒ ngə́ á ma kwemtɨ a ɨfɔ ɨwən atɨ abaŋnɨ-baŋnɨ le?”
Bɨntumshe bə wi chwɨ́gɨ́ ngə́, “Bɨgɨ tsi tsɛʼ nɨ táʼ ɨfɔ, a be Kaisa ghe!”
16Branto a tíʼ ngá a Yeso ngə́ á bo ghɛn nkwemtɨ atɨ abaŋnɨ-baŋnɨ ə.
Bɨ Kwemtɨ a Yeso Atɨ Abaŋnɨ-baŋnɨ ə
(Mat 27:32-44; Mar 15:21-32; Alu 23:26-43)
Ma lan, bɨgwe tíʼ ndɔgɨ a Yeso ghe. 17A fú abyɛn ntáʼmbagə wu wi wa, mbáʼ a byɛ́ʼnɨ́ abaŋnɨ-baŋnɨ azhi zɨmboŋ, ngɨ́ ngyen nkuʼ a nye “Ntáʼ Aghɔʼrɨ Atú”, adzaŋ za bɨ tɔ́ŋnə́ ghe. (Mbe “Gɔlgɔta” a nye nɨgham nɨ bə Ɛbal ə.) 18Ɨwu bɨ kwémtɨ́ ayi atɨ abaŋnɨ-baŋnɨ; bo kɨ́ ndzɔŋ nkwemtɨ ɨbɛn bə daŋ bi bɨbá a nye bɨbagɨ bɨ mbó ɨmyi mɨtsum, Yeso a tiʼ ntsi a tɨtərɨ ə. 19Branto a ŋwáʼnɨ́ aŋwaʼnɨ mbán wu atú atɨ́ mbáʼ a kɨ́nə́ sóŋə́ ngə́, “Yeso ŋwɔn Nazarɛ, ɨfɔ bə Yuda” ghe. 20Ɨbɛn bə ghaʼnɨ tɔ́ŋ a zɛrə, mbɨ́ʼ ngə́ adiʼ za bɨ kwémtɨ́nɨ́ a Yeso ɨwu, aghagɨ azhi a sé sagɨ a ndǒ a ntáʼmbagə wu wi ə. Bɨ ŋwáʼnɨ́ aŋwaʼnɨ məzen a nye mɨgham mɨ ɨtóm tsi tárə́; nɨgham nɨ bə Ɛbal, nə Latɨn abɔʼnɨ bə Grikɨ ə. 21Bɨntumshe bə wi sóŋ a mbó Branto ngə́, “Koʼ ŋwaʼnɨ ngə́, ‹Ɨfɔ bə Yuda›, baŋnɨ ŋwaʼnɨ be ngə́, ‹Mba wen a sóŋ ngə́ ma nɨ ɨfɔ bə Yuda ghe.› ”
22Branto a chwɨ́gɨ́ ngə́, “Za ma ŋwanɨnə lá, ma ŋwaʼnɨnə ghe.”
23Mbáʼ bɨgwe ba mɛ́tɨnə a nkwemtɨ Yeso, bo lɔ́gɨ́ ɨtsɛʼ ɨchi ngyɛbtɨ ɨdiʼ tsi nɨkwa, táʼ gwe a tsi nɨ táʼ adiʼ ə. Bo kɨ́ ndɔgɨ a tɔgɨ ɨyi wa bɨ nyɛ́tɨ́nɨ́ nɨ táʼ abó atsɛʼ wa bɨ nyɛ́tɨ́nɨ́ ndɔgɨnɨ atú ɨ shiʼ nkuʼ a ntɨ́ŋ tɨ adiʼ za bɨ bósɨ́nɨ́ nta ɨwu ə. 24Bɨgwe ba sóŋ a mbó ŋwɔn nɨ ŋwɔn ngə́, “Bɨgɨnə keʼ a zɛrə abagɨ abagɨ yɛbtə; bɨgɨnə maʼ ndzɔʼ a njí ŋwɔn wa a mɨ tsi nɨ zɛrə ghe.” Məzen a fú lá taŋ ɨ kɔʼ bomnkɨ bo anu za aŋwaʼnɨ a Ŋwi a kwɛ́nə sóŋ ngə́:
#
Salmsɨ 22:18. “Bo yɛ́btɨ́ ɨtsɛʼ ɨtsan a tɨtərɨ bo,
ɨ maʼ ndzɔʼ a nchyɛ́ nɨ tɔgɨ ɨghə.”
Nə nɨ anu za bɨgwe ba ghɨ́nə́.
25Nɨmi bɨ Yeso, mɨma nɨmi bɨ Yeso, Mɛrɨ ngwe Krobasɨ abɔʼnɨ Mɛrɨ Matarɨna tɛ́m ɨ fátɨ́ abaŋnɨ-baŋnɨ a Yeso ghe. 26Yeso a kɨ́ ndzɛ́n a ngyɛʼ ɨyi wa a kɔ́ŋnɨ́ tsɛʼ a nkan lá a tɛm a mbyɛn nɨmi bɨ Yeso ghe. Ma lan, Yeso a sóŋ a mbó nɨmi ɨyi ngə́, “Lɔgɨ ayi tso mɔn ɨgho wu mbáŋnɨ́ ə.”
27A kɨ́ ntíʼ sóŋ a mbó ngyɛʼ ɨyi wa ngə́, “Lɔgɨ ayi tso nɨmi ɨgho ghe.” Nchwuʼnɨ a njwi məwa, ngyɛʼ wa a lɔ́gɨ́ ayi a tiʼə nchyɛ̌ a njwuʼ zɨə.
Adzaŋ za Yeso a Kfónə́
(Mat 27:45-56; Mar 15:33-41; Alu 23:44-49)
28Məzen a ghɨnə ntsá, Yeso a zhí a nyom məwa ngə́ ɨnu ɨtsum tsa tsɨ tsínɨ́ nɨ ɨ fuə taŋ á kɔʼ mbom bo za aŋwaʼnɨ a Ŋwi a kwɛ́nə soŋ tsɨ fúnə ghe. Wɛrə a tíʼ sóŋ ngə́, “Nji nkyi ɨ zaŋə aghə.”
29Sotɨ a tɛ́m ɨwu, ndon nɨ tɨntsɛgɨ mɨluʼ ə; ma lan, bɨ tsúbtɨ́ a kuncha a mu tɨntsɛgɨ mɨluʼ za, ndoŋ atú atɨ aisɔbɨ nkɔʼsɨ a wɛrə atɨ́ a nye ɨwəŋ ntsu ɨchi ɛ. 30Yeso a nó mɨluʼ ma ntiʼ soŋ ngə́, “A minə ghe!” Ntiʼ ndzəŋ atú azhi a ɨshe, ntsəmə.
Bɨ Sɔbɨ a Mumbyɛn Yeso ghe
31Bɨsáʼ bɨ ɨlaʼ bɨ bə Yuda tíʼ ndɔ́ntɨ́ a mbó Branto ngə́ á nyɛʼtɨ awa á bo bɛʼtɨ mɨku mɨ ɨbɛn ba bɨ kwémtɨ́nɨ́ atɨ abaŋnɨ-baŋnɨ lá, ntiʼ shiʼsɨ ɨkfú ɨtsa a nye ɨbaŋnɨ-baŋnɨ ɨtsa ghe. Bo lɔ́ntɨ́ a məzen lá mbɨ́ʼ ngə́ a bé Frade, bo sě ndǒ ngə́ á ɨkfú ɨtsa tsi ɨwu a nye Njwi Alaʼ Ŋwi, mbɨ́ʼ ngə́ Njwi Alaʼ Ŋwi məza ɨ bé zɨ fɛmnɨ nɨ líʼ ə. 32Ma lan, bɨgwe tíʼ ngɛn mbɛʼtɨ mɨku mɨ ntsambyi ŋwɔn, ndzɔŋtɨ nɨ wu mɔʼɔ ŋwɔn, bo wa bɨ kwémtɨ́nɨ́ awa atú ɨtɨ ɨbaŋnɨ-baŋnɨ bo bɨ Yeso lá. 33Lá bo ghɨnə ngyén nkuʼ a nye Yeso, ndzɛn ngə́ a kfónə ghe. Bo tíʼ nkeʼ mɨku ɨmyi bɛʼtə. 34Lá táʼ gwe wa wu mɔʼɔ, a sɔ́bɨ́ nɨkɔŋ ɨni a mumbyɛn Yeso, alɛm bo nkyi tiʼ mbyi mbebɨnɨ ɨ fu ɨwu ə. 35(Ŋwɔn wa a zɛ́nɨ́ anu məzen a gham mbɨ́ʼ a zɛrə lá taŋ o chi kɨ nɨŋ ntəm ɨgho ɨwu ə. Anu za wɛrə a sóŋnɨ́ lá a nɨ nkənu ə, a kɨ nji ngə́ zɨə ghamə lá nkənu ə.) 36#Ɛksɔdɔsɨ 12:46; Nkwaʼə 9:12; Salmsɨ 34:20. Bɨ ghɨ́ a məzen lá taŋ á kɔʼ mbom bo za aŋwaʼnɨ a Ŋwi a kwɛ́nə soŋ ngə́, “Kə́ tsɛʼ táʼ akwɛn ɨyi a ghɨ keʼ bɛʼnə.” 37#Zakaria 12:10; Nkyɛʼə 1:7. Adiʼ aŋwaʼnɨ a Ŋwi zə mɔʼɔ a kwiʼ soŋ ngə́, “Ɨbɛn ghɨ liŋ ayi wa bo sɔ́bɨ́nə́.”
Adzaŋ za bɨ Twə́ŋnɨ́ a Yeso ghe
(Mat 27:57-61; Mar 15:42-47; Alu 23:50-56)
38Məzen a ghɨnə ntsá, Yosɛb, wa a lónɨ́ a ntáʼmbagə Arimatia, a ghɛ́n ndɔ́ntɨ́ akfú a Yeso a mbó Branto ɨ ghɛn nɨ zɛrə ghe. (Yosɛb a bé ngyɛʼ Yeso lá ngɨə ma lan be ndzum ndzum, mbɨ́ʼ ngə́ a kə́ mbɔ́gə́ bɨsáʼ bɨ ɨlaʼ bɨ bə Yuda ghe.) Branto a sóŋ ngə́ a chi ghɛn lɔgɨ akfú za. Yosɛb a tíʼ ngɛn ndɔgɨ ndo nɨ zɛrə ɨ ghɛn twəŋə. 39Nɨkorɨmbo, wa a kwɛ́nə ngɛn a ndzé Yeso nɨ ɨtfúʼ lá, a ghɛ́n bo Yosɛb ə. A tíʼtɨ́ bɨnyuʼtə bətɨŋndvuŋ ba bɨ kɨ́nə́ ntɔ́ŋə́ ngə́ maya abɔʼnɨ alo, ndɨrɨ ɨzhi be tso bɨkilogram mɨghúm mɨntárə́ nɨ ntsɔb nɨkwa ghe. 40Ɨbɛn ba bi bɨbá lɔ́gɨ́ akfú a Yeso, ndwɛrɨ a zɛrə a mu atsɛʼ atɨŋndvuŋ abɔʼnɨ bɨnyuʼtə ba wə mu, ndzɔ̌ŋ mbɔm bə Yuda a nkyáŋtɨ́ akfú a ŋwɔn bɔŋ á bɨ twəŋə. 41Mɨnya mɨ ɨshwom wu tse a tsí ɨwu a kɨʼ adiʼ wa bɨ zhwítɨ́nɨ́ a Yeso lá. A mu mɨnya mɨ ɨshwom wa nɨshe nə fi (mbe be ɨfuʼ wa bɨ tóŋnɨ́ a mu ngɔʼ) mbáʼ bɨ bvúrɨ́nɨ́ a ŋwɔn ɨwu tɨ twəŋ nɨ tsí ɨwu ə. 42Mbɨ́ʼ ngə́ njwi za ɨ lán nga nɨ Njwi Alaʼ Ŋwi, nkɨ mbe ngə́ nɨshe na tsí ɨ fátɨ́, bo nyɔ́ŋ akfú a Yeso wə mu ə.
انتخاب شده:
Yoane 19: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, CABTAL
