Yoane 20
20
Yeso a Zhwemnɨ a mbó Nɨvwo ə
(Mat 28:1-8; Mar 16:1-8; Alu 24:1-12)
1A tənjwi nɨ mbvugɨrɨ a nye ntsambyi njwi a mu ngabɨ mbáʼ a bénɨ́ Sɔnde, Mɛrɨ Matarɨna a ghɛ́n atú a nɨshe wa ndzɛn ngə́ bɨ lɔ́gɨ́ ngɔʼ za a ntsu nɨshe wa ndotɨ nɨ zɛrə ghe. 2A ló nkɨə tsɛʼ kɨənɨ ngɛn soŋ a mbó Samɔn Bita bo ngyɛʼ wa wu mɔʼɔ, wa Yeso a kɔ́ŋnɨ́ tsɛʼ a nkan lá, ngə́, “Bɨ fɨgɨ a Maʼmbyí gha a mu nɨshe, lá bɨgɨ keʼ zhi adiʼ za bɨ lɛnɨ ayi ɨwu ə!”
3Bita bo ngyɛʼ wa wu mɔʼɔ tíʼ ndo ngɛn atú a nɨshe wa. 4Bo wa bɨbá kə́ ngyiŋə nkɨə, lá ngyɛʼ wa wu mɔʼɔ a kɨ́ə ntsa a Bita ɨ fom ngɛn nkon atú a nɨshe wa. 5A kfúʼnɨ́ ndzɛn atsɛʼ atɨŋndvuŋ za, lá nkeʼ a mu nɨshe wa kuŋə. 6Samɔn Bita a yén a ndzum zɨ, mbyi ntsa nkon ngɛn a mu nɨshe na. A zɛ́n atsɛʼ atɨŋndvuŋ za a nɔŋ ɨwu 7abɔʼnɨ atsɛʼ za bɨ kárɨ́nɨ́ atú a Yeso ɨwu lá. A sé nɔŋ abɔʼnɨ atsɛʼ atɨŋndvuŋ za, lá bɨ kárɨ́ a nɔŋ atú zɨə. 8Ngyɛʼ wa wu mɔʼɔ, wa a tsánɨ́ mbyi nkuʼ atú a nɨshe wa lá, a kɨ́ nkón wə mu; ndzɛn nkɨ nɨŋ ntəm ɨyi ɨwu ə. 9(Bo bvúrɨ́ tɨ zuʼ kɨ nji aŋwaʼnɨ a Ŋwi za a sóŋnɨ́ ngə́ a ghɨ zagɨ zhwemnɨ a mbó nɨvwo ə.) 10Bɨyɛʼ ba tíʼ mbə nkwɛn ngɛn awa a njwuʼ ə.
Yeso a Fu a Ɨshe a Ɨshi Mɛrɨ Matarɨna ghe
(Mat 28:9-10; Mar 16:9-11)
11Mɛrɨ a tɛ́m abyɛn a ntsu nɨshe wa mbúgə́ ghe. A kfúʼnɨ́ nden ɨmu nɨshe za mbáʼ a kɨ́nə́ mbvúrə́ mbúgə́ 12ndzɛn ɨtsenda Ŋwi tsi bá tsɨ wəgɨ ɨtsɛʼ tsə fú, tsɨ shiʼtɨ ntsi adiʼ wa bɨ nyɔ́ŋnɨ́ akfú za ɨwu, táʼ a kɨʼ wa atú azhi a nɔ́ŋnɨ́, wu mɔʼɔ a kɨʼ wa mɨku ɨmyi nɔ́ŋnə́. 13Bo bítɨ́ ayi ngə́, “Mangye, o búgə́ lá ake le?”
Wɛrə a chwɨ́gɨ́ ngə́, “Bɨ lɔgɨ a Maʼmbyí ɨghan ndo nɨ wɛrə, ma kaʼ zhi adiʼ za bɨ lɛnɨ ayi ɨwu ə!”
14Mbáʼ a kɨ́nə́ soŋə a məzen lá, mbəŋtɨ ayi ndzɛn a Yeso a tɛm ɨwu; lá a sé zhi ngə́ a nɨ Yeso ghe. 15Yeso a bítɨ́ a wɛrə ngə́, “Mangye, o búgə́ lá ake le? O lǒ lá a ɨwa le?”
Wɛrə a kwáʼtɨ́ ngə́ a bé lá ŋwɔn wa a kɨ́nə́ faʼə a mu mɨnya ɨshwom wa, ntiʼ soŋ wəmbo ngə́, “Tə̧, be a be ngə́ o lo ndɔgɨ akfú a Yeso za ngɛn ndɛn adiʼ zə tse, soŋ adiʼ zə wu á ma ghɛn ndɔgɨ a zɛrə ghe.”
16Yeso a tɔ́ŋ ayi ngə́, “Mɛrɨ!”
Mɛrɨ a tíʼ mbəŋ ayi ndyiŋə a wɛrə, ɨ soŋ nɨ nɨgham nɨ bə Ɛbal ngə́, “Rabonai!” (Məzen a diʼ lá ngə́ “Ndiʼ aŋwaʼnɨ”.) 17Yeso a sóŋ wəmbo ngə́, “Njimbɨʼ o mɔmtɨ aghə, mbɨ́ʼ ngə́ ma bvurɨ tɨ bə nkɔʼ ngɛn nkon a mbó Tarɨ ə. Lá ghɛn soŋ a mbó ɨbɔmbɨma ɨban ngə́ ma tiʼnə mbɨŋə ngěn a mbó zɨ wa a nɨ Ta ɨghan nkɨ mbe Ta ɨwa, Ŋwi ɨghan nkɨ mbe Ŋwi ɨwa lá.”
18Ma lan, Mɛrɨ Matarɨna a tíʼ ngɛn a mbó bɨyɛʼ bɨ Yeso nkərɨ a mbó bo ngə́ zɨə zɛ́n a Maʼmbyí nkɨ soŋ ɨnu tsa wɛrə a sóŋnɨ́ a mbó zɨə.
Yeso a Fu a Ɨshe a Ɨshi Bɨyɛʼ ɨbyi ɛ
(Mat 28:16-20; Mar 16:14-18; Alu 24:36-49)
19A bé a nkwɛfɔ ntsambyi njwi a mu ngabɨ, bɨyɛʼ bɨ Yeso ghótɨ́ ɨ fɨŋ ndá ntsi ɨwu, mbɨ́ʼ ngə́ bo kə́ mbɔ́gɨ́ bɨsáʼ bɨ ɨlaʼ bɨ bə Yuda ghe. Yeso a tíʼ ngyen ntɛm a tɨtərɨ bo ɨ soŋ ngə́, “A mbɔnɨ ɨ tsi a mbó bɨŋ ə.” 20A soŋnə a məzen lá, ntiʼ ndiʼ mbó ɨmyi bo bɨ mumbyɛn ɨyi a mbó bo ghe. Bɨyɛʼ bɨ Yeso lón nɨ nɨdorɨ a ndzé Maʼmbyí ɛ. 21Yeso a kwíʼ nkwátɨ́ sóŋ a mbó bo ngə́, “A mbɔnɨ ɨ tsi a mbó bɨŋ ə. Adzaŋ za Tarɨ a tságɨ́nɨ́ aghan lá, ma kə́ ntságə́ awɨŋ ə.” 22A nyom məwa a tíʼ nzhwi a nye bo ɨ soŋ ngə́, “A nɨ kwarɨ Azhwi zə Fɛmnɨ ə. 23Be nɨ lɨgɨnɨ mɨbvu mɨ ɨbɛn, muŋ bɨ lɨgɨnɨnə a mɛrə ghe; be nɨ tú mɨbvu ɨma ɨ lɨgɨnɨ, bɨ keʼ kɨ ndɨgɨnə.”
Yeso a Fu a Ɨshe a Ɨshi Tɔməshi ə
24Táʼ ngyɛʼ wa wu mɔʼɔ a tɨtərɨ bɨyɛʼ ba nɨghúm ntsɔb bá wa ɨkum ɨyi bénɨ́ Tɔməshi (bɨ kə́ ntɔ́ŋə́ ayi ngə́ Nɨfágɨ ə), a sé ɨwu tsi a nkfu za Yeso a yénə́. 25Ma lan, bɨyɛʼ bə mɔʼɔ ba sóŋ wəmbo ngə́, “Bɨgɨ zɛnə a Maʼmbyí ɛ!”
Tɔməshi a byígɨ́ a mbó bo ngə́, “Be ma tú ze ɨləŋ mbán tsa a nye mbó ɨmyi, ɨ tsagɨ bɨshwi bɨ mbó ɨban a nye ɨləŋ tsa, ɨ kɨ tsagɨ abó azan a nye ngvo wa wə mumbyɛn, ma chi kaʼ ntəm ɨghan ɨwu nɨŋə.”
26Ngabɨ bənə nkwem, bɨyɛʼ ba bə nkɨ ngyen mbomnkɨ a mu ndá, mbvuʼnɨ, Tɔməshi a tsi bo bo ghe. Bɨ fɨ́nkɨ́ mɨntsu mɨ ndá, lá Yeso a yén ntɛm a tɨtərɨ bo ɨ soŋ ngə́, “A mbɔnɨ ɨ tsi a mbó bɨŋ ə.” 27Wɛrə a tíʼ soŋ a mbó Tɔməshi ngə́, “Tsagɨ a shwi abó gho ɨghan, nkɨ ndyiŋ mbó ɨmə; tiʼ nkɨ nasɨ abó azo ɨ nɨŋ a mumbyɛn me ɨghə. Kyɛntɨ ɨməŋnə ɨzo za, ntiʼ nɨŋ ntəm ɨgho a nye me ghe!”
28Tɔməshi a chwɨ́gɨ́ ngə́, “O nɨ Maʼmbyí ɨghan nkɨ mbe Ŋwi ɨghə!”
29Yeso a sóŋ wəmbo ngə́, “O nɨŋ ntəm ɨgho ɨwu lá mbɨ́ʼ ngə́ o zɛn aghan le? Ɨfɔgə wu wi tsi a mbó ɨbɛn ba bɨ nɨŋnɨ mɨntəm ɨma ɨwu tə́ ndzě aghə!”
Yentəzɔʼ wa Aŋwaʼnɨ Zen a Sóŋnɨ́ Ɨnu tsa a Sóŋnə́ ghe
30Yeso a ghɨ́ ɨnu tsɨ yerɨnɨ-yerɨnɨ tsə mɔʼɔ tsə ghaʼnɨ a ɨshi bɨyɛʼ ɨbyi tsa bɨ se a mu aŋwaʼnɨ zen ŋwaʼnə. 31Lá bɨ ŋwaʼnɨ a tsen lá taŋ o chi nɨŋ ntəm ɨgho ɨwu ngə́ Yeso a nɨ Wa bɨ Zɔ́ʼnɨ́ nkɨ mbe Mɔn Ŋwi ə. Nkɨ mbe ngə́ a ntsǎ a ndzum abeməntəm azo wə nye, o chi tsi nɨ ntsi ntən nɨnkoŋ ə.
انتخاب شده:
Yoane 20: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, CABTAL
