1Mos. 25
25
Sapunuteteu Abraham sibara ka sinanalepnia ka bagei
(1Taw. 1:32-33)
1 #
1Taw. 1:32-33
Si Abraham mutalimou minca pasamba sara sinanalep sipuoni si Ketura. 2Sinanalepnia nenda tutuakenangan matat toga simanteu sipuoni: Zimran, Joksan, Medan, Isybak, samba Suah. 3Si Joksan ukkui Syeba samba Dedan, samba punuteteu Dedan iate tai Asyur, tai Letus, samba tai Leum. 4Tatogat Median iate si Efa, Efer, Henokh, Abida, samba Eldaa. Sangamberitdra sapunuteteu Ketura.
5Kenanen aiikepmakean si Abraham sangamberi pukayoatnia kai Ishak, 6ujut puririmanuania maigi aikau panguruat ka tatogania sibara ka sinanalepnia sabagei. Lepa geti koiniakenangan tatoga nenda mujaujau kakupkumen laggai ka isit kabelaiat sulu Kanaan, bule tuareu kai Ishak, togania.
Kamateiat Abraham samba turateiake
7Si Abraham aiailingannia sangotu pitu pulu lima ngarura, 8lepa mateinia. Ai matei kateteret amabulauan alainia, amabajaannia, iageti ruruakerangannia ka muntogat taikebbukatnia. 9Tatogania si Ishak samba Ismael rateiakerangannia kabagat ngaliu Makhpela, sikuddu ka mone ka isit kabelaiat sulu Mamre. Siboiki mone nenda sibakkatnia si Efron togat Zohar, tai Het, 10#1Mos. 23:3-16 tapoi lepat aisakinia si Abraham ka tai Het nenda. Si Sara, sinanalep Abraham leu turateiake sedda. 11Kele ai matei si Abraham, sukatnakenangan Taikamanua si Ishak, togat Abraham. Kateteret nenda si Ishak mukuddu ka bebet uggungan sipouni “Nia sipuletsei Aku”.
Sapunuteteu Ismael
(1Taw. 1:28-31)
12Si Ismael iate togat Abraham samba Hagar, sinanalep tai Misir, pagugulet Sara. 13#1Taw. 1:28-31 Nene onin tatogat Ismael siripokat reddenan putu'tukat matatdra: Nebayot, Kedar, Adbeel, Mibsam, 14Misyama, Duma, Masa, 15Hadad, Tema, Jetur, Nafish samba Kedma. 16Tatoga nenda te ibailiu taikebbukat pulu rua suku bangsa, samba laggai sabeu samba pusapougatda tukua siripokat onindra. 17Kateteret ailango si Ismael ainia sangotu telupulupitu ngarura. 18Sapunuteteunia mukuddu ka kupkumen laggai kaoggak Hawai samba Syur ka kabelaiat sulu Misir ka isit Asyur. Rapurimanua sipasasara le ka sapunuteteu Abraham sabagei.
Pututukat matat Esau samba Jakob
19Nene te enungan puririmanuan Ishak, tagat Abraham. 20Kateteret ai si Ishak epat pulu ngarura, putalimounangan kai Ribka, bagit Laban, togat Betuel, sara tai Aram sibara ka Mesopotamia. 21Kalulut si Ribka ta'anai tuppai tubunia, panindounangan si Ishak kai Tuhan addeat sinanalepnia. Samba si Tuhan aiarepi le panindogat Ishak, pat pusurukatnangan si Ribka. 22Si Ribka masisuruket toga tairua, samba kepei mutu'tu mata tatoga nenda, paguilerangan aisia ka suruketnia. Kuanangan si Ribka, “Angoi kele kise muaili katubukku?” Iageti tiddounangan enungan kai Tuhan.
23 #
Rm. 9:12
Kuanangan si Tuhan katubunia,
“Rua bangsa ai ka suruketnu,
nutu'tuake geti rua bangsa sipasasaggak,
baginia peile magege ka kebbunia
sikebbukat mupagugulet ka sisule.”
24Kele aiaili tetere ipusule si Ribka, tu'tuakenangan rua tatoga simanteu. 25Si kebbukat tubunia simakabonan samba kulitnia kele juba simabulu. Lulut nenda tuoniakenia Esau. 26Kateteret aipututu mata baginia, kabeinia aiuuka bukkut reret Esau. Lulut nenda tuoniake Jakob. Kateteret arapututu mata tatoga nenda si Ishak ainia enem pulu ngarura.
Si Esau masisakiake pusisikebbukatnia
27Karua tatoga nenda memei muurau sia. Si Esau ibailiu sipangungungru simaeru samba ioba mukuddu ka su'su', tapoi si Jakob simakolou tubu samba ioba mukuddu ka lalep. 28Si Ishak manuntu pei le bagania kai Esau, aipoi si Esau ioba mukom akkula tarimeu sipana. Tapoi si Ribka manuntu pei le bagania kai Jakob.
29Ka sara gogoi kateteret ai maneneu gulei kacang simabonan si Jakob, oi si Esau barania kapangungkuratnia. Malajenia. 30Kuanangan kai Jakob, “Malaje aku. Ake pei goiso kacang simabonan nenda.” (Nenda te lulunia tukuania Edom.)
31Aleginangan si Jakob, “Maeruan, tapoi ake boiki bakkat ikepakenen siripokat pusisikebbukat.”
32Kuanangan si Esau, “Apananku pubabakkat nenda. Mateian le aku laje!”
33 #
Ibr. 12:16
Kuanangan si Jakob leuet, “Pusuppa boiki, aakenu pubabakkanu katubukku.”
Pusuppanangan si Esau samba kaunangan pusisikebbukatnia kai Jakob. 34Lepa nenda kaunangan si Jakob katubunia roti samba sangarubeiat kacang simabonan nenda. Pukomnangan si Esau samba pulonangan lepa tuinia. Kise te' aipuarak si Esau pubabakatnia sibailiu toga sikebbukat.
اکنون انتخاب شده:
1Mos. 25: MWV
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید