1Mos. 26
26
Si Ishak ka laggaira tai Filistin
1Ka kupkumen laggi nenda bara minca pulajeat kele sipuaaili kateteret Abraham. Si Ishak masialiake si Abimelekh, rimatatda tai Filistin, ka Gerar samba masitiddou iobaake tukuddu sedda. 2Aigalaiake nenda si Ishak kalulut ai pakoinongngan tubunia si Tuhan katubunia samba kuanangan, “Bui nuei ka Misir, kudduake le ekeu ka kupkumen laggai nene, kele siparentaakenenKu katubum. 3#1Mos. 22:16-18 Kusakkeri samba Kusukanake le ekeu geti. Sangamberi kupkumen laggai nene Kuaake te geti katubum samba katubut sapunuteteunu. Kusunnake le geti palelengan siakeKu kai Abraham ukkuinu. 4Kuake le geti katubum sapunuteteu igit panyanyat ka manua, samba sangamberi kupkumen laggai nene Kukau le katubutdra. Sangamberi bangsa ka polak masitiddou geti bule Aku le masisukatnake sia kele Kusukatnake leuet sapunuteteunu. 5Kususukatnake te geti kam, kalulut si Abraham mareddetnia katubukKu samba aipasikelingan sangamberi samba parentaKu.”
6Oto kaddiuake le si Ishak ka Gerar. 7#1Mos. 12:13, 20:2 Kele arapanounouake sirimanua sedda pagalaiat si Ribka, aleginangan si Ishak, si Ribka nenda bagikku, samba ta'sinanalepnia. Si Ishak malotonia ka sirimanua nenda ramamateiakenia addeat masibakkati si Ribka simalainge tubu nenda. 8Piga pa' burunia aikuddu si Ishak sedda, kasara gogoi kinerenangan rimata Abimelekh ka jandelania, samba itconangan si Ishak ainia pauumun pasamba si Ribka, sinanalepnia. 9Iageti sogainangan si Abimelekh si Ishak samba kuanangan, “Ta'pa sinanalep nenda sinanalepnu? Angoi nukua nia bagim?”
Aleginangan si Ishak, “Kupaatu, ramamateiake aku ke'kukua, nia sinanalepku.”
10Kuanangan si Abimelekh, “Aponia anugalaiake katubumai? Sara katalagat taikaumangku momoi le iperep ka sinanalepnu, ke'bai nenda muaili, ekeu le masibairat puseleatmai nenda.” 11Lepa geti parepdepnangan si Abimelekh sangamberi taikaumania kise, “Kasei masigeugeu sirimanua nene ele sinanalepnia, tuukum matei le geti.”
12Karapmakenangan uremen si Ishak addeat mangurep ka kupkumen laggai nenda, samba rura nenda bara buania sangotu ngaminca igit sikarapmakenennia, kalulut aisukatnakenia si Tuhan. 13Pukayoatnia memei itutuppai samba bailiunangannia simakope kayo. 14Tai Filistin matutu baga le katubunia kalulut maigi paguguletnia, mungkuat biribiri samba jaui. 15Lepa palabbukirangan polak sangamberi uggungan sigaigai sapagugulet Abraham, ujut ai purimanua si Abraham. 16Lepa geti kuanangan si Abimelekh kai Ishak, “Kaddiuake laggaimai. Makopean le anumagege katubumai.” 17Oto, tuitui si Ishak samba musapou ka peleu Gerar. Sedda kuddunia piga pa' ujunia. 18Gaigainangan minca uggungan sigaigai kateteret Abraham samba sipalabbura tai Filistin lepat ai matei si Abraham. Sangamberi uggungan nenda tukauoni simakere kele sikau ukkuinia.
19Sapagugulet Ishak masigaigai uggungan ka peleu Gerar nenda samba seserangan oinan simalilimai. 20Tapoi sipasijajago tarimeu ka Gerar paukle pasamba sipasijajago tarimeu Ishak. Kuarangan, “Oinan nene kai le sibakkatnia.” Lulut nenda oniakenangan si Ishak uggungan nenda “Paukelat”.
21Sapagugulet Ishak masigaigai minca uggungan bagei, iageti bara paukelat pagalaiat uggungan nenda leuet. Lulut nenda oniakenangan si Ishak uggungan nenda “Pasaggangan”. 22Lepa geti tuituinia sedda samba gaigainangan minca uggungan bagei. Pagalaiat uggungan nene ta'abara paukelat. Lulut nenda, oniakenangan si Ishak uggungan nenda “Kabelaiat”. Kuanangan, “Kineiget aiakean ka sita si Tuhan oggak mukuddu ka kupkumen laggai nene, samba bailiunangan sita geti simakayo murimanua sene.”
23Lepa geti kaddiuakenangan si Ishak kudduat nenda samba sege' ka Bersyeba. 24Ka soibo nenda patoilanangan tubunia si Tuhan katubunia samba kuanangan, “Aku te Taikamanuan ukkuini si Abraham. Bui numaloto', Aku masipaalei ekeu. Kususukatnake te geti ekeu samba Kuaake te geti katubum sapunuteteu simaigi kalulut palelenganKu ketubut Abraham, paguguletKu.” 25Iageti rioakenangan si Ishak kudduat pasibuluat samba masipanindougi si Tuhan kakudduat nenda. Pukemanangan sedda samba sapagugulet leu masigaigai uggungan bagei.
26 #
1Mos. 21:22
Ka sara gogoi oi si Abimelekh barania ka Gerar, pasamba si Ahuzat, sipangantrunia, samba si Pikhol, panglima saladdunia masiailiake si Ishak. 27Iageti parerenangan si Ishak, “Angoi anuoi kam masiailiake aku kineiget, siboki nusaggangi samba nutuituiake le kam aku ka kupkumen laggaimui?”
28Lepa alegirangan, “Kineiget kuagai kai, si Tuhan le masipaalei ekeu, lulut nenda kuamaian maeru peile tabaraakekam palelengan. Pusuppa le, 29ta'an te geti nugagalai katai katubumai, kele kai leuet taan kugagalaikai katai katubum. Amuparaboatnankai simaeru katubum samba masiobaake ekeu mutuitui kabagat aban. Amakolouan kakai si Tuhan le masipanukani ekeu.” 30Lepa geti tarekngakenangan komen si Ishak, iageti pukomrangan samba mulo. 31Patonia simansenan pusupparangan senenda. Iageti obaakenangan raputuiutui si Ishak, samba kaddiuakerangannia kabagat aban.
32Ka gogoi nenda leuet oi sapagugulet Ishak samba masipaagai katubunia pagalaiat uggungan sigaigaira. Kuarangan, “Aku sesengan kai oinan.” 33Iageti oniakenangan si Ishak uggungan nenda “Suppa”. Nenda te pubakkanannia ituoniake laggai nenda Bersyeba.
34Kateteret si Esau ainia epat pulu ngarura, putalimounangan pasamba rua taiokko sibara ka suku bangsa Het, iate Judit togat Beeri, samba Basmat togat Elon. 35Karua tainanalep nenda masibaraake pubesikat paatuat Ishak samba si Ribka le.
انتخاب شده:
1Mos. 26: MWV
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید