Yohani 12

Mapaloso' to Simal i Pitani

(Matay 26.6-13; Maroko 14.3-9)

1I 'ayaw no Pita'lifan a Lisin to ^nem a romi'ad i, tayra ci Yis i Pitani. (O niyaro' ni Lacarus oya nipalowadan ni Yis a pa'orip nai patay konini.) 2Mapatalato nangra ko sakalafi ni Yis. Mipatahka ci Marta. Ira ci Lacarus a mikapot ca Yisan a mitahka. 3Itiya i, alaen ni Mariya ko ccay a tingting no matkesay a fangsisay a simal no narto a mipaloso' i wa'ay ni Yis. O fokes ningra ko sapisipasip ningra to wa'ay ni Yis. Safangsis sato ko laloma' toya simal. 4Pasowal ko ccay no nisawawaan ni Yis oya sapipacakayananay ci Yisan a Yuta no Iskariyot, 5<<Nawiro caay pacakayen konini a fangsisay a simal a palapayso to tolo a so'ot no tinali ta malosapafli i pakoyoc a tamdaw!>> han ningra. 6Onini a sowal ningra i, caay ko nipipa'ayaw ningra to pakoyoc a tamdaw. O mitakaway cingra. O mitatoyay cingra to papaysoan nangra. Mananam cingra a mitakaw to mitatoyan ningra a payso.

7Nikawrira, pasowal sa ci Yis, <<Aka lalangen ko harateng ningra. O nipatalaan ningra konini to saki pitademan Takowanan a romi'ad. 8Mararid a mikapot i tamowanan to romi'ami'ad ko pakoyoc a tamdaw. Nikawrira, caay ka rarid kamo a mikapot i Takowanan,>> han Ningra.

O Pisahalaka to Sapipatayaw ci Lacarusan

9Matngil no 'alomanay a Yutaya tamdaw ko nika ira ci Yis i Pitani saka, tayra sato cangra. Caay ka ci Yis a ccay ko niraodan nangra. O sapinengnengaw nangra ci Lacarusan oya nipalowadan ni Yis a pa'orip nai patay. 10Sasowasowal sa ko kakridan no citodongay to ta'ong, <<Halo ci Lacarus han ita a mipatay,>> saan. 11Nawhani pakayni ci Lacarusan ko sakapiliyas no 'alomanay a Yutaya a tamdaw to pakayraan nangra a pasayra ci Yisan a paso'lin.

O Kacihrang ni Yis a Micomod i Yirusalim

(Matay 21.1-11; Maroko 11.1-11; Luka 19.28-40)

12Cilasato a romi'ad i, matngil noya tayraay a misalisin a 'alomanay a finawlan ko nika o tatayni ci Yis i Yirusalim. 13Saka, alaen nangra ko ca'ang no sarengad a tayra a militmoh i ci Yisan. Lkal sa cangra, <<Hmeken ko Kawas! Nanay mapalmed koya tayniay pakayni i ngangan no Tapang! Nanay mapalmed no Kawas ko Hongti no Israil!>> saan.

14Matama ni Yis ko lofa i, dakaw han Ningra. Onini i, mato sowal a matilid i Fangcalay Cudad toya,

15<<Finawlan no Cion, aka ka talaw!

Nengnengen, midakaw to tofor no lofa a tayni ko hongti namo,>> saan.

16Itiya i, caay ka fana' ko nisawawaan tonini a dmak. Nikawrira, yo macakatto ci Yis a ci'dil i, itiyato a maharateng nangra konini a matiliday a sowal to pakayniay i Cingraan ato so'lin a mado^do no tamdamdaw a milahci toya nisowalan a midmak.

17Yo mitahidang ci Yis ci Lacarusan a palowad a pa'orip nai patay a pasadak nai tadem i, 'aloman ko mikapotay a tamdaw itiya. Onini a mikapotay ko paratohay tonini a dmak. 18Matngil no 'alomanay a tamdaw ko nipidmak ni Yis tonini a kafahka'an a dmak saka, litmoh sa cangra ci Yisan. 19Sasowasowal sa ko Farisay a tamdaw, <<Awa ko ^po^poc no dmak ita! Nengnengen, mitoor i ci Yisan ko tamdamdaw no hkal a ma^min!>> saan.

O Pikilim no Krisiya a Tamdaw ci Yisan

20Mikapot ko papinapina a Krisiya a tamdaw toya tayraay i pisalisinan a mita'ong. 21Tayra cangra i ci Filipan. (O Pitsayta a niyaro' no Kalili ci Filip.) Sowal sa cangra, <<Singsiaw, sapinengnengan kami i ci Yisan!>> han nangra.

22Tayra sato ci Filip ci Antirian a pasowal tonini. Ta malahaklong ci Antiri aci Filip a tayra a pasowal ci Yisan tonini. 23Pasowal ci Yis i cangraan, <<Maraodto ko romi'ad to katadamaanan noya nai kakarayanay a Wawa no Tamdaw. 24So'linen Ako a somowal kamo, ano caay ka tfad i sra a mapatay ko ccay a sapaloma no ^mi i, oyananto a ccay koya ^mi. Nikawrira, ano mapatay i, adihay ko hci nira. 25Malcad tonini o limlaay to 'orip no tireng i, o mamafalah ningra ko 'orip. O kinafalah sanay to 'orip no tireng i tini i hkal i, o ma'imeray to 'orip ningra a tahada'oc. 26Ano sakatayalan ko cima to saki Takowanan i, o mamitoor cingra Takowanan. Ta ano i cowacowato Kako i, o aira cingra a mikapot i Takowanan. O matayalay to saki Takowanan i, o mamakahmek no Wama Ako cingra.

O Pipasowal ni Yis to Pakayniay i Patay Ningra

27<<Marawraw ko faloco' Ako i matini. Maanen Ako ko sowal hakini? Wamaaw, paliyasen Kako i matini nai tini tonini a dmak haenaw Ako hakini? Nikawrira, onini ko patosokan Ako a tayni i hkal a milifet tonini a pades. 28Wamaaw, patalahkalen ko nika tadamaan no ngangan Iso!>> saan.

Itiya i, ira a matngil ko ngiha' nai kakarayan. Sowal sa, <<Maharekto Kako a patalahkal to nika tadamaan Ako. O mamiliyaw haca Kako a patalahkal tonini!>> saan.

29Matngil no tomirengay itira a finawlan konini i, sowal sa, <<O soni no kakleng!>> saan. Sowal sa ko romaroma a tamdaw, <<O nipipasowal no coyoh i cingraan konini!>> saan.

30Pasowal sa ci Yis, <<Caay ko pa'ayaway i Takowanan konini a sowal, o pa'ayaway tamowanan konini a sowal. 31O mamasawkit i matini konini a hkal. O mama'afas i matini ko mikowanay tonini a hkal. 32Ano maca'itto itini i hkal Kako haw i, o mamasolot Ako ko polong no tamdamdaw a pasayni i Takowanan!>> han Ningra. (33Onini a sowal ni Yis i, o nipahapinang Ningra to nika o mamasamaan ko patay Ningra.)

34Paca'of sa ko finawlan, <<O sowal a matilid i Rikec niyam i, o mamida'oc a ma'orip ci Kristo saan. Ano hatira i, nawiro o mamaca'it ko nai kakarayanay a Wawa no Tamdaw saan kiso saw? O maan kora nai kakarayanay a Wawa no Tamdaw hananay iso?>> han nangra.

35Pasowal sa ci Yis i cangraan, <<^Cato ko hahalafin ko likat a pata^ngad i tamowanan. Yo iraho ko likat a pata^ngad i tamowanan i, kararid ko dmak namo. Ta caay ka takop no to'man kamo. Nawhani caay ka fana' ko romakatay i to'manay to nika o tatalacowa ko rakat ningra. 36Orasaka, yo iraho ko likat a pata^ngad i tamowanan i, paso'linen konini a pata^ngaday a likat, ta o i ta^ngaday ko dmak namo,>> han Ningra.

Caay Paso'lin ko Yutaya a Tamdaw

Mahrek ci Yis a somowal tonini i, miliyas Cingra itira a milimek cangraan. 37Talacowa adihay ko nipipatiri' ni Yis to kafahka'an a dmak i cangraan i, caay paso'lin cangra i ci Yisan. 38Onini i, o sakalahciaw no nipali'ayawan ni Isaya a sowal toya,

<<Tapangaw, cima ko paso'linay to nipatnakan niyam saw?

I cimaanan ko nipipatiri' no Tapang to 'icel Ningra?>> saan.

39-40O roma a sowal ni Isaya i,

<<Pohawen no Kawas ko mata nangra.

Ta caay paka'araw cangra.

Sa'atkaken Ningra ko faloco' nangra.

Ta caay ka fana' cangra.

Ta caay ka pasasiyor ko faloco' nangra a papiadah i Takowanan,>> saan.

Onini ko saka^ca pakapaso'lin nangra.

41O sakasaan ni Isaya a somowal tonini i, ma'araw ningra ko 'dil ni Yis, saka, pasowal cingra to pakayniay i ci Yisan.

42Ano hatiratira i, 'aloman ko paso'linay ci Yisan a kakridan no Yutaya a tamdaw. Nikawrira, matalaw cangra to Farisay a tamdaw saka, caay patalahkal cangra tonini a dmak. Onini i, o talaw nangra to sakalaplapaw nai kasa'opoan a loma'. 43Nawhani ikaka no kahmek no Kawas ko nika olah nangra to nika hmek no tamdaw cangraan.

O Sowal ni Yis ko Misawkitay to Tamdaw

44Satata'ang sa ci Yis to ngiha' a somowal, <<O paso'linay i Takowanan i, caay ka o Kako a ccay ko nipaso'linan ningra. O paso'linay cingra to miocoray Takowanan. 45O paka'araway Takowanan i, o paka'araway cingra to miocoray Takowanan. 46O todong no likat ko tireng Ako a tayni i hkal. Ta caayto ka i to'manay ko paso'linay i Takowanan a tamdaw. 47O sakatayni Ako i, caay ko sapisawkitaw to tamdamdaw, o sapa'oripaw to tamdamdaw. Orasaka, ano caacaay ka 'imer ko mitngilay to sowal Ako a tamdaw i, caay pisawkit Kako toya tamdaw. 48O mifalahay Takowanan a caay pilayap to sowal Ako i, ira ko mamisawkit i cingraan. O sowal Ako ko mamisawkit cingraan i saikoray a romi'ad. 49Nawhani caay ko no Mako a harateng ko sakasomowal Ako. O nipalimo'otan no miocoray Takowanan a Wama ko sakasomowal Ako. 50Mafana' Kako to nika o sakapida'oc no tamdaw a ma'orip ko limo'ot no Wama Ako. Orasaka, o nanosowal no Wama i Takowanan ko nisowalan Ako.>>

انتخاب شده:

Yohani 12: AMIS2019

های‌لایت

به اشتراک گذاشتن

کپی