Yohani 11

O Patay ni Lacarus

1Ira ko ccay a adadaay ci Lacarus hananay a Pitani a tamdaw. O niyaro' ni Mariya aci Marta a malikaka ko Pitani. (2Onini a fafahiyan ci Mariya i, o nano paloso'ay to fangsisay a simal i wa'ay no Tapang, ta o fokes ningra ko sapisisit ningra to wa'ay Ningra. O salikaka ningra koya adadaay ci Lacarus.) 3Orasaka, ocoren noya malikakaay ko pakarongay a papipasowal i ci Yisan, <<Tapangaw, adadaay koya kaolahan iso a tamdaw han a pasowal,>> han nangra.

4Matngil ni Yis konini i, sowal sa, <<Caay ko sakapatay ni Lacarus konini a adada, o sapahmekaw no tamdaw to Kawas. O romasato, o sapahmekaw no tamdaw to Wawa no Kawas pakayni i cingraan,>> han Ningra.

5Maolah ci Yis ci Martaan aci Mariyaan aci Lacarusan a malikaka. 6Nikawrira, yo pakatngil Cingra to nika adada ni Lacarus i, i tiraho Cingra to tosa a romi'ad i kaitiraan Ningra. 7Nanoya, sowal sa ci Yis, <<Tayra haca kita i Yutaya,>> han Ningra ko nisawawaan Ningra a somowal.

8Sowal sa ko nisawawaan ci Yisan, <<Singsiaw, sapitkolanho to fokloh i Tisowanan ko kakrikridan no Yutaya a tamdaw i, sakatayraan haca Kiso saw?>> han nangra.

9Paca'of sa ci Yis, <<Caay ka tosa ko safaw a tatokian ko ccay a romi'ad saw? Ano o romi'ad ko sakaromakat no tamdaw i, caay ka tahastol cingra. Nawhani mapata^ngad no likat nonini a hkal cingra. 10Nikawrira, ano o dadaya ko sakaromakat no tamdaw i, tahastol cingra. Nawhani awaayto ko likat a pata^ngad i cingraan,>> han Ningra. 11Mahrek ci Yis a somowal tonini i, sowal sa, <<Mafoti'ay ko idang ita ci Lacarus. Nikawrira, tayra Kako a mipalal i cingraan,>> han Ningra ko nisawawaan a somowal.

12Pasowal sa ko nisawawaan, <<Tapangaw, ano o mafoti'ay cingra i, o mamaadahto cingra,>> han nangra.

13O mapatayay ci Lacarus o sanay ni Yis. Nikawrira, o pahanhanay a mafoti' cingra, o sanay ni Yis saan ko harateng no nisawawaan. 14Orasaka, pahapinang hanto ni Yis cangra a somowal, <<Mapatayayto ci Lacarus. 15Manga'ay ko nika awa Ako itira. Onini i, o pa'ayaw Ako to saki tamowanan to sapaso'linaw namo. Tata, tayra kita i cingraan i matini,>> han Ningra.

16Pasowal sa ci Tomas (ci 'Api hananay) to kapot ningra a nisawawaan, <<Tata, kita ko roma a tayra a mikapot cingraan a mapatay!>> saan.

O Kalomowad a Ma'orip nai Patay ato o Tapang no 'Orip

17Yo tahira ci Yis i, o saka spatto a romi'ad ni Lacarus a matadem. 18I ngata no Yirusalim ko Pitani. Ma^deng tolo a kongli ko nika raraay noya niyaro'. 19'Aloman ko tayraay a Yutaya a tamdaw i ci Martaan aci Mariyaan a mihinom to nika patay no salikaka nangra.

20Matngil ni Marta ko nika ira ni Yis i, sadak sato cingra a tayra a militmoh ci Yisan. Nikawrira, aro' sa ci Mariya i loma'. 21Pasowal sa ci Marta ci Yisan, <<Tapangaw, ano ranikayay kiso a tahini i, kona caay ka patay ko salikaka ako. 22Nikawrira, mafana' kako, ano o maan ko nilongocan iso i Kawas i, o papafli cingra i matini i tisowanan,>> han ningra.

23Pasowal sa ci Yis, <<O lalomowad a ma'orip ko salikaka iso,>> han Ningra ci Marta.

24Paca'of sa ci Marta i ci Yisan, <<Mafana' kako to nika o lalomowad cingra a ma'orip nai patay i saikoray a romi'ad,>> han ningra.

25Pasowal sa ci Yis, <<Kako ko palowaday a pa'orip nai patay to tamdaw, o tatapangan no 'orip Kako. Ano mapatapatay ko paso'linay i Takowanan a tamdaw i, o mamiliyaw a ma'orip cingra. 26Yo ma'oripho cingra, tona paso'lin i Takowanan saka, caayto ko mamapatay a tahada'oc. Paso'lin kiso tonini haw?>> han Ningra.

27Paca'of sa ci Marta, <<Hai, Tapang. Paso'lin kako to nika o tayniay i hkal a Wawa no Kawas, ci Kristo Kiso,>> han ningra.

Tomangic ci Yis

28Mahrek ci Marta a somowal tonini i, nokay sato cingra. Hawhaw han ningra a somowal ko safa ningra ci Mariya, <<Irato ko Singsi. Mitahidang Cingra i tisowanan,>> han ningra. 29Matngil ni Mariya konini i, tangsol sa a lomowad a tayra i ci Yisan. (30Itiya i, caho picomod ci Yis i niyaro'. I tiraho Cingra i pilitmohan ni Marta.) 31Ma'araw no mikapotay ci Mariyaan i loma' a mihinomay cingraan a Yutaya a tamdaw ko nika kalah ni Mariya a lomowad a masadak i, o tatayra cingra i tadem a tomangic saan cangra. Saka, toor sato cangra ci Mariyaan.

32Tahira ci Mariya i ci Yisan. Ma'araw ningra Cingra i, hinokop sa i ka'ayaw ni Yis. Sowal sa, <<Tapangaw, ano ranikayay kiso i, kona caay ka patay ko salikaka ako,>> han ningra.

33Ma'araw ni Yis ko nika tomangic ni Mariya ato nika tomangic no mikapotay cingraan a Yutaya a tamdaw i, mikihatiya ci Yis a mararom. 34Sowal sa, <<I cowa a tademen namo cingra?>> han Ningra. Pasowal sa cangra ci Yisan,

<<Tapangaw, katayni a minengneng,>> han nangra.

35Tomangic ci Yis. 36Saka, sowal sa ko Yutaya a tamdaw, <<Nengnengen, wata: ko nika olah ningra ci Lacarusan,>> saan.

37Nikawrira, sowal sa ko roma a tamdaw, <<O miadahay konini a tamdaw to mata no mapohaway i, caay ko mamafilo ningra hakiya a mipa'orip ci Lacarus?>> saan.

O Pipalowad a Pa'orip ci Lacarusan

38I faloco' han ni Yis ko rarom Ningra a tayra i tadem. O dihif koya tadem. Ma'def to fokloh koya tadem. 39<<Walinen kora fokloh,>> han ni Yis. Sowal sa ci Marta, o kaka noya mapatayay, <<Tapangaw, o saka spatto a romi'ad anini saka o mamasanekto ko horac a tireng,>> han ningra.

40Pasowal sa ci Yis i cingraan, <<Ano paso'lin kiso Takowanan i, o mama'araw iso ko nika tadamaan no Kawas han Ako kiso kyami,>> han Ningra. 41Saka, walin hanto nangra koya fokloh. Ta ca'a sa ci Yis a pasikakarayan a somowal, <<Wamaaw, mikansiya Kako i Tisowanan to nipitngil Iso to longoc Ako. 42Mafana' Kako to nika rarid Iso a mitngil to longoc Ako. O sakasaan Ako a somowal i matini i, o pa'ayaw Ako tonini a finawlan, ta paso'lin cangra to nika o niocoran Iso Kako,>> saan. 43Maharek ci Yis a somowal tonini i, satata'ang sa to ngiha' a micli', <<Lacarusaw, kasadak!>> han Ningra. 44Sadak sato ci Lacarus. Mafedfed to kiradom ko wa'ay ato kamay ningra, matafo to sasifin ko pising ningra. <<Tadtaden kora satafo ta papinokayen cingra!>> han ni Yis.

O Pisahalaka to Sapipatayaw ci Yisan

(Matay 26.1-5; Maroko 14.1-2; Luka 22.1-2)

45Paka'araw koya tayraay i ca Mariyaan a 'alomanay a Yutaya tamdaw to dmak ni Yis i, paso'lin sato cangra ci Yisan. 46Nikawrira, tayra i Farisay a tamdaw ko papinapina nangra a pasowal to dmak ni Yis. 47Saka, sa'opo hanto no kakridan no citodongay to ta'ong ato Farisay a tamdaw ko lomaocay a somowal, <<Adihayto ko nidmakan noya tamdaw to kafahka'an a dmak i, samaanen ita? 48Ano pakonira han ita koya tamdaw i, paso'lin asa ko tamdamdaw i cingraan. Ano hatira i, o tatayni ko Loma a tamdaw a mipleng to Fangcalay Pita'ongan ita ta patayen nangra ko finawlan ita!>> saan.

49Nikawrira, pasowal sa ko ccay nangra ci Kayafas hananay a tomirengay toya mihcaan a sakakaay a citodongay to ta'ong, <<Caay ka fanafana' kamo to maan aca. 50O nika patay no ccay a tamdaw a patodong to finawlan ko nga'ay to nika patay no polong no finawlan, caay ka saasaan ko harateng namo saw?>> han ningra. 51Caay ko no ningra a niharatengan konini a sowal. O sakakaay a citodongay to ta'ong cingra toya mihcaan saka, o nipipali'ayaw ningra a pasowal konini to nika o mamapatay ci Yis a patodong to Yutaya a finawlan. 52Caay ko pipatodong Ningra tonini a finawlan a ccay. O sapalaccayaw Ningra to maliwasakay a mitooray to Kawas a ma^min.

53Nanitiya a misatapang ko kakrikridan no Yutaya a tamdaw a misahalaka to sapipatayaw ci Yisan. 54Saka, pakalimelimek sato ci Yis a talacowacowa i Yutaya a pala. Nanoya, liyas sato Cingra, itiya a tayra ingataay no kohkohan i Ifraim hananay a niyaro'. Itira sato Cingra ato nisawawaan a maro'.

55Mangatato ko Pita'lifan a Lisin no Yutaya a tamdaw. O sapikoracaw no 'alomanay a tamdaw to tireng i 'ayaw no nipisalisin nangra saka, macokacok ko nanitiraay i mamangay a niyaro' a tamdamdaw a tayra i Yirusalim. 56Halamham sa cangra ci Yisan a masa'opo i Fangcalay Pita'ongan a masasowasowal, <<Latek caay ka tayni koya tamdaw i pisalisinan kiya. Maan saan ko harateng namo?>> saan. 57Nawhani nano nipalimo'otanto no kakridan no citodongay to ta'ong ato Farisay a tamdaw ko finawlan. O sowal nangra i, <<Ano cima ko mafana'ay to kaitiraan ni Yis i, paratohen kami ta manga'ay kami a mirpet ci Yisan,>> saan.

انتخاب شده:

Yohani 11: AMIS2019

های‌لایت

به اشتراک گذاشتن

کپی