Awos. 10
10
Akisicanet ŋina a ŋakanikauni: Emaase
(Yoel 1:2-4)
1Tema nai Ekapolon neni a Moses, “Ape neni a Parao; anerae etogogoŋ ayoŋ akou keŋ ka ŋuna a ŋulu ipukatotor iŋes, ikotere ayoŋ etiyae ŋakujuwuanisya kaŋ neni kec 2ka emaikina nai iyes kitatamyanakis ŋidwe kus ka ŋipapae kus epite ŋolo abunio ayoŋ esicania Ŋijipitian aryenyaana ka ŋolo abunio ayoŋ etiyaa ŋakujuwuanisya kaŋ neni kec, ido iyenunete iyes atemar arae ayoŋ Ekapolon.”
3Aŋun, apotu Moses ka Aron toloto neni a Parao temasi neni keŋ, “Ŋakiro ŋuna iŋita Ekapolon Akuj a Ŋiburaniyae ikes nu: Tari ori iwounit iyoŋ akitiditeun aneni kaŋ? Kimyek ŋituŋa kaŋ toloto, ikotere ilipete neni kaŋ. 4Ani erae pa kimyek iyoŋ ŋituŋa kaŋ toloto, eyakuuni ayoŋ moi taparacu emaase nakwap kon. 5Eburusiyari emaase akwap kon, mam ituŋanan iŋolikini neni emam emaase alokwap. Irikari emaase ŋapiya ŋuna apotu ŋakako kimyekis, irikari ŋikito daadaŋ ŋulu eya nariet anakwap kon. 6Ilelebun nakais kon ka nakais a ŋulu ipukatotor iyoŋ ta ŋuna a Ŋijipitian a daadaŋ. Ŋakiro ŋun ikes ŋuna nyiŋolikina atapapa kon, kori atapapaa kon akisyakin akoloŋit ŋina keponiata ikes nakwap tari nakoloŋit na.” Torotok nai Moses aneni a Parao kimyek iŋes.
7Kiŋita ŋulu epukatotor Parao iŋes temasi, “Tari ori erubakinit ekile lo ikiteryamunit iwon ŋican? Emyekisi ŋituŋa toloto, ikotere ilipete neni ke Ekapolon Akuj kec. Eriŋa mono iyoŋ nyiŋolikina atemar enyasun Ijipit a?” 8Aŋun, aponi kinyakunae Moses ka Aron neni a Parao, tema Parao neni kec, “Apesi, kilipa neni ke Ekapolon Akuj kus. Nai ata ŋae mono emaikina toloto?” 9Toboŋok Moses tema, “Elosyo isua ka ŋidwe kosi tari ka ŋulu cicik, ŋikasikou ka ŋakimak kosi, ŋidwe kosi ŋulusapa ka ŋulupesur, ŋamesekin kosi ka ŋaatuk kosi, anerae emaikina isua kitiyae ŋasuban ŋuna itopolooritere isua Ekapolon.” 10Tema Parao neni kec, “Ekoŋi ayoŋ alokiro a Ekapolon atemar nyekemyekini ayoŋ iyes toloto ka ŋidwe kus ŋulu cicik; anerae ileere kire jik atemar iyakatar iyes ŋakiro ŋuna aronok natameta kus. 11Nyepedor ŋun! Kimyekisi ŋikilyok bon toloto kilipa neni ke Ekapolon, anerae ŋuna iŋitasi iyes ikes ŋun.” Aponi nai kiritarae Moses ka Aron kiŋa alokiŋaren Parao.
12Tema nai Ekapolon neni a Moses, “Kikyaa akan kon kidiama nakwap a Ijipit, ikotere ebuni emaase nakwap a Ijipit kirika ibore daadaŋ ŋini elomunit anakwap a ŋin, ibore daadaŋ ŋini apotu ŋakako kimyekis.” 13Aŋun, abu Moses kikyaa ebela keŋ kidiama nakwap a Ijipit, ido abu Ekapolon kitukut ekuwuam alowae a ŋolo alo Kide, tokutak akwap ŋin apaaran daadaŋ ka akuwar daadaŋ. Ani ŋisaae ŋulu ewalarya, todolunio ekuwuam emaase. 14Bu emaase nakwap a Ijipit daadaŋ, torubak eyai nen lotela ŋulu ka akwap a ŋin daadaŋ elal nooi isijisija. Nyetakanuna sek ekiŋaren emaase ŋolo etya ŋol nakwap ŋin, mam daŋ nyetakanuni nabo jik. 15Abu emaase ŋol toburusiya akwap ŋin daadaŋ, kiryoniar akwap cuc; kirika emaase ibore ŋini alomunit anakwap a Ijipit daadaŋ kaapei ka ŋaraito daadaŋ ŋuna sek kepotu ŋakako kimyekis. Mam ibore abu kidoŋ elib alokito, kori anibore a ŋini alomunit anakwap a Ijipit a daadaŋ. 16Tonyarau Parao Moses ka Aron atipei tema, “Asec ayoŋ aneni ke Ekapolon Akuj kus ka aneni kus. 17Kisyoni ayoŋ anasecit kaŋ anapei ca a na bon, kilipa neni ke Ekapolon Akuj kus tolema akisicanet ŋina aaran na aneni kaŋ.” 18Torotok nai Moses aneni a Parao, kilip neni ke Ekapolon. 19Abu nai Ekapolon kitukuta ekuwuam lowae ŋolo alo To ekusi nooi, ido abu ekuwuam kiwok emaase, tokuta Nanam ŋina Areŋan. Mam epei daŋ abu kidoŋ iwadio anakwap a Ijipit. 20Nai abu Ekapolon kitogogoŋ akou a Parao, nyecamak Ŋisirael toloto.
Akisicanet ŋina a ŋakanikaomwon: Akiryonut
21Tema nai Ekapolon neni a Moses, “Kikyaa akan kon kidiama, ikotere toburusiya akwap a Ijipit akiryonut ŋina epedori ainakin ŋituŋa ekabule.” 22Aŋun, abu Moses kikyaa akan keŋ kidiama, ido abu akiryonut ŋina eryonon cuc, toburusiya akwap a Ijipit daadaŋ todolo ŋirwa ŋiuni iryono cuc. 23Mam ituŋanan apedori akiŋolikin ŋinice, kori mam ŋini abu torotok iwace anakibois keŋ alotooma ŋirwa ŋul ŋiuni. Nai ayai akica nakiboisyo daadaŋ ŋuna aya Ŋisirael. 24Tonyarau nai Parao Moses tema, “Apesi, kilipa neni ke Ekapolon. Torukosi tari ka ŋaberu kus ka ŋidwe kus, nai idoŋete ŋamesekin ka ŋaatuk kus ne.” 25Tema Moses neni keŋ, “Itemokino iyoŋ ikimyek isua yaarae ŋamuronisya ka ŋainakineta ŋuna epeyo, inakinae neni ke Ekapolon Akuj kosi erae amuronot. 26Emaikina isua yaarae ŋibaren kosi, nyidoŋ tari ipei daŋ ne, anerae emaikina isua toseunae alobaren a ŋul ŋulu erae ŋikilipet neni ke Ekapolon Akuj kosi. Nyikiyeni isua ibore ŋini emaikina kilipere neni ke Ekapolon akitodol ŋina edolere isua neni elosyo.” 27Nai abu Ekapolon kitogogoŋ akou a Parao, nyecamak Ŋisirael toloto. 28Kiŋenyak Parao Moses tema, “Torotok alokiŋaren kaŋ! Nyiboŋu nabo jik neni kaŋ! Itwani iyoŋ erae kibu aanyun ayoŋ.” 29Tema Moses, “Ikokinete nenipei ilimunio iyoŋ! Nyabuni nabo ayoŋ aanyun iyoŋ.”
انتخاب شده:
Awos. 10: NIB2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Ngakarimojong Interconfessional Bible © Bible Society of Uganda, 2008.