Awos. 9
9
Akisicanet ŋina a ŋakan: Todyakakin ŋibaren
1Tema nai Ekapolon neni a Moses, “Ape neni a Parao, tolimok atemar ŋakiro ŋuna irworo Ekapolon Akuj a Ŋiburaniyae ikes nu, kimyek ŋituŋa kaŋ toloto, ikotere ilipete neni kaŋ. 2Ani pa kicamak iyoŋ ikes toloto, torubak iwounitor ikes, 3itedyakakini Ekapolon anapedor keŋ ŋibaren kus: Ŋaŋolei, ŋisigirya, ŋikaala, ŋaatuk ka ŋamesekin ta ŋamee. 4Nai iwuakini Ekapolon atyakatait kidiŋ ŋibaren a Ŋisirael ka ŋulu a Ŋijipitian; ikotere nai nyetwana ibarasit idio alobaren a Ŋisirael.” 5Totubu Ekapolon apaki tema, “Itiyakin ŋakiro ŋun moi taparacu nakwap na.” 6Akoloŋit ŋina atupakini ŋin, abu Ekapolon kitiya ŋakiro ŋun; apotu ŋibaren a Ŋijipitian daadaŋ totwaka, nai mam ŋini a Ŋisirael ipei daŋ ŋini abu totwana. 7Kiŋitiŋit Parao ŋituŋa ketwakito ŋibaren a Ŋisirael daŋ, nai abu toryamu atemar mam ipei daŋ alobaren a Ŋisirael kebu totwana. Kikote neni daŋ, abu Parao torubak itogogoŋit akou keŋ, abu nyecamak Ŋisirael toloto.
Akisicanet ŋina a ŋakanikapei: Ŋilepunoe
(Ŋikis. 28:27)
8Tema nai Ekapolon neni a Moses ka Aron, “Tolemutu etulya aneni epurikinit alokenoi, kiela Moses lokuwuam ite Parao. 9Eruwor etulya ŋol apuwa anakwap a Ijipit a daadaŋ, ido eyauni apuwa ŋin ŋilepunoe ŋulu eruwor ŋabusyo ŋuna erutonorete ŋawat a ŋituŋa ka ŋuna a ŋibaren a akwap a Ijipit a daadaŋ.” 10Aŋun, apotu Moses ka Aron tolemut etulya aneni apurikinit alokenoi, toloto towua alokiŋaren Parao, ido kiela Moses etulya lokuwuam, yau ŋilepunoe ŋulu apotu toruwor ŋabusyo ŋuna arutonorete ŋawat a ŋituŋa ka ŋuna a ŋibaren. 11Apotu ŋikekukujak nyepedosi aponare neni ayai Moses, anerae ayakatar ikes ŋilepunoe, apotu ŋilepunoe kiteryamut ŋikekukujak kaapei ka ŋituŋa a Ijipit daadaŋ ŋican. 12Nai abu Ekapolon kitogogoŋ akou a Parao, towou akiirar ŋakiro ata Moses lopite ŋolopei sek alimokinitor Ekapolon Moses.
Akisicanet ŋina a ŋakanikaarei: Agiro ka ŋakako
13Tema nai Ekapolon neni a Moses, “Tonyou moi taparacu eriŋa ataparacu kitoodiyar neni a Parao, tolimok iŋes atemar ŋakiro ŋuna irworo Ekapolon Akuj a Ŋiburaniyae ikes nu: Kimyek ŋituŋa kaŋ toloto, ikotere ilipete neni kaŋ. 14Ani pa kimyek, eyakuuni ayoŋ ŋakisicaneta kaŋ neni kon, neni a ŋikapolok a ŋulu ipukatotor iyoŋ ka neni a ŋituŋa kon, ikotere iyoŋ iyenuni atemar mam ice ikikwaan ka ayoŋ anakwap a daadaŋ. 15Kerae ekyaarite ayoŋ akan kaŋ akiar iyoŋ ka ŋituŋa kon a ŋidekesyo, kemam tokona iyes ŋini eyai nakwap kus na. 16Nai ŋakiro nu ikes pa akaarya ayoŋ iyoŋ: Erae aŋuna ka akisitiya iyoŋ etoodiunia apedor kaŋ ka ikotere kiseraere ekiro kaŋ anakwap a daadaŋ. 17Nai eriŋa bo iyoŋ itopolooro imanit ŋituŋa kaŋ, ido nyicamit akimyekin ikes toloto. 18Moi taparacu ŋisaae lupei lu, eyakuuni ayoŋ akiru ŋina a ŋakako ŋina alalan ŋina nyilima nakwap a Ijipit ŋinapei kesubere akwap ŋin tari tokona. 19Aŋun nai, kiyakiya ŋituŋa kiudakis ŋibaren ka ibore daadaŋ ŋini eyai kiŋa. Kiudakis nakiboisyo ŋuna epedoryata aiun. Ituŋanan, kori ibarasit daadaŋ ŋini eyai kiŋa nenilapat, ŋini nyiudakinitae kai, eari akiru ŋina a ŋakako erae keryamu ikes alokiŋa.” 20Apotu ŋikapolok ŋulu epukatotor Parao ŋulu apotu ŋakiro ŋuna alimuni Ekapolon tonomosi toloto atipei kibunyakis ŋipi kec ka ŋibaren kec, kitolomasi nakiboisyo ŋuna epedoryata aiun. 21Ŋikapolok ŋulu apotu nyemitakis ŋakiro a Ekapolon, apotu kimyekis ŋipi kec ka ŋibaren kec anenilapat.
22Tema Ekapolon neni a Moses, “Kikyaa akan kon kidiama, ikotere akiru ŋina a ŋakako kilim nakwap a Ijipit daadaŋ, totep ŋituŋa ka ŋityaŋ ta ibore ŋini elomunit anakwap a Ijipit a daadaŋ.” 23Kikyaa nai Moses akan keŋ kidiama, ido abu Ekapolon kiyaku akiru ŋina agiro toya ŋakako, kimilya akwap nooi. Iŋes atemar abu Ekapolon kiyaku akiru ŋina a ŋakako nakwap a Ijipit. 24Kilim akiru ŋina a ŋakako nen, torubak agiro ka akimilyaa irimirimi nen. Arae ŋin akiru ŋina alalan nooi anakwap a Ijipit ŋinapei kipukakinet iŋes bon. 25Toara ŋakako ibore daadaŋ anakwap a Ijipit ŋini ayai nenilapat, ŋituŋa ka ŋityaŋ; toara ŋakako tari ibore daadaŋ ŋini alomunit anakwap a Ijipit, tobilibiliyasi ŋikito daadaŋ anariet. 26Nakibois a Gosen bon neni aya Ŋisirael, iŋes abu akiru ŋina a ŋakako ŋin nyilim.
27Tonyarau nai Parao Moses ka Aron, tema neni kec, “Adau ayoŋ apaki na akisec; iyookinit Ekapolon, ido ikidyakarit ayoŋ kaapei ka ŋituŋa kaŋ. 28Kilipa neni ke Ekapolon! Akalalaki ayoŋ nooi agiro ka ŋakako ŋuna eyaunit Ekapolon! Nyekemyekini ayoŋ iyes kiboiyoto a ne adiopaki nabo.” 29Tema Moses neni keŋ, “Alomar a ne alotaun bon, ekyaari ayoŋ ŋakan kaŋ neni ke Ekapolon; ido todaun agiro ka mam nabo ŋakako eyakaun. Aŋun, iyenuni iyoŋ atemar erae akwap daadaŋ ŋina ke Ekapolon. 30Nai ayeni ayoŋ atemar nyikerito iyes Ekapolon Akuj, iyoŋ kaapei ka ŋulu ipukatotor.” 31(Apotu kinyasunos ŋikito ŋulu ekote epamba ŋulu etiyaununuyo ŋausi ŋuna esonyere ŋiboro. Kinyasunos tari ŋikinyom ŋulu ikote erau, anerae akokito ŋikinyom ŋul ka ebutuŋito ŋikito ŋul. 32Nai apotu ŋaganoi ka ŋikinyom ŋulu enyaritae ŋikusemae ŋulu ikwaan ka ŋaganoi nyinyasun; anerae elomununuyete ikes kelomut ŋikinyom ŋuluce.) 33Aŋun, abu Moses torotok aneni ayai Parao, toloma kiŋa etaun, ido kikyaa ŋakan keŋ neni ke Ekapolon; kikwaa a kiru tojoŋoto ŋakako adoiunun, tojoŋo akiru abukuno nakwap ŋin. 34Ani iŋolikini Parao atemar adaun agiro ka ajoŋoto ŋakako adoiunun ka ekwaa akiru ajoŋo abukuno, abu nabo iŋes tosec kaapei ka ŋikapolok ŋulu epukatotor iŋes. Apotu ikes kitogogoŋo ŋakyes kec. 35Abu Parao kitogogoŋ akou keŋ, nyecamak Ŋisirael toloto lopite ŋolopei sek alimokinitor Ekapolon Moses.
انتخاب شده:
Awos. 9: NIB2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Ngakarimojong Interconfessional Bible © Bible Society of Uganda, 2008.