Awos. 11
11
Tolimokinae Parao toceite akisicanet ŋina ebuni ekaku a daadaŋ
(Awos. 3:21-22, 12:35-36)
1Tema nai Ekapolon neni a Moses, “Ayauni ayoŋ akisicanet apei nabo neni a Parao ka nakwap a Ijipit. Ekaku ka akisicanet a ŋin, ikimyekini iŋes iyes torotokis a ne, ido ani ikimyekini iŋes iyes, ikiritari iŋes iyes jik. 2Tolimok ŋituŋa atemar emaikina ŋikilyok ka ŋaberu kiŋita ŋikidunyetkec ŋiboro ŋulu itiyaunitae ke esilipa ka egolid.” 3(Abu Ekapolon inak Ŋijipitian arimaanikin Ŋisirael, ido abu Moses toruwor ŋolo etopoloorito ŋulu epukatotor Parao ka ŋituŋa ŋulu a Ijipit daŋ.)
4Tema Moses neni a Parao, “Ŋakiro ŋuna irworo Ekapolon ikes nu: Ani takae eapuuni akidil akuwar, erimokini ayoŋ akwap a Ijipit daadaŋ. 5Aari ayoŋ ŋikiyae ŋulusapa daadaŋ anakwap a Ijipit, akisyakin anikiyae a Parao a ŋinisapat a ŋini emaikina kisiboikinoe lokicoloŋ akipuka, tari nikiyae ŋinisapat ŋini a apito a ŋina eyai diyete amoru ŋinakiryeet. Aari ayoŋ tari ŋikiyae daadaŋ ŋulu a ŋibaren. 6Eyakaun nai akigworo ŋina apolon nakwap a Ijipit daadaŋ, akigworo ŋina nyiirara ŋinapei koloŋ ka nyiiraryo nabo jik. 7Nai mam iŋok ikomokini Ŋisirael, kerae neni a ekile, kori neni a ibarasit kec. Ŋun nai iyenunia iyoŋ atyeketait ŋina ewuak Ekapolon kidiŋ Ŋijipitian ka Ŋisirael.” 8Tema nai Moses irikakini erwor keŋ, “Epote ŋikapolok kus lu daadaŋ neni kaŋ, toryediko alokiŋaren kaŋ ebasi, ‘Apesi, iyoŋ kaapei ka ŋituŋa kon.’ Ekaku a ŋun, arotokini ayoŋ.” Torotok nai Moses aneni a Parao eŋoit nooi.
9Tema Ekapolon neni a Moses, “Nyepupokini Parao ŋakiro kon, anerae emaikina ŋaumonokineta kaŋ tolalata anakwap a Ijipit.” 10Apotu Moses ka Aron kitiyata ŋaumonokineta ŋun daadaŋ alokiŋaren a Parao, nai abu Ekapolon kitogogoŋ akou a Parao, nyecamak Ŋisirael toloto anakwap keŋ.
اکنون انتخاب شده:
Awos. 11: NIB2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Ngakarimojong Interconfessional Bible © Bible Society of Uganda, 2008.