Mbete Luk 3
3
1Sezar Tiber mbay a luki lak mbay mbihmbam boh falu ndiɓi. Ké ɓil mbihmbam a boh falu ndiɓi-u mí Ponsi Pilaɗ ɓa guvener ye ké tusiɓa Zude. Eroɗ ɓa ŋgermbay gun Izarayeri ké Galile tusiɓa ziɓri. Yi̧n ye Filiɓ ɓa ŋgermbay ké tusiɓa Iture ke Tarakonik. Lisiyas ɓa ŋgermbay ké tusiɓa Abilen. 2Anasi ke Kayif ɓa ŋgernzuk nzuk fe puhna Ŋgerzahri#3.2 Sewu-aw, Kayif soh Anasi ɓa ŋgernzuk nzuk fe puhna. Sa̧wu mí riŋ ɗina ŋgernzuk fe puhna ɗi tul woyri seɗe mbɔk..
Ke sew Anasi ke Kayif dale, Za̧h gun Zakari ba, ƴo ɓil lawkɔr, mí ɓay Ŋgerzah gi ƴo tul Za̧h. 3Za̧h ti̧h ké puhri ke ɓel mahmbih Zurdeŋ gbam. Ke ƴo ka-kah ɓay batem a mbilaw, kú mbi law woyri ké tul suya ma fal el kan law tul Ŋgerzah ɓay hi̧ salɓay suya ɓá lu ké tul woyri.
4Za̧h ka-kah ɓay kandɔk mbete vbehna Ezay gun nzak pihna Ŋgerzah a lewsa̧ ɓah ɓayu ɓahri :
Kusol nzuk mgbe ɓil lawkɔr ɓahri,
í lek wuri mahful geŋ Miƴori.
Í lek wuri fulu ɓá ndar kparak kparak.
5 Goɗori ɓá mbar mah hani gba̧y gba̧y.
Kasawri ke kpar-ri ɓá dir ku̧ fi̧hriri.
Ful a ra̧h-u ɓá ndar kparak kparak.
Gel ké na goɗoŋ goɗoŋ ɓá na ru̧y ru̧y.
6 Nzuk a suŋ suŋ gbam ɓay ko sa̧w-ya̧ ni ké Ŋgerzah hi̧ ɓay ké ti̧h ke ndɔk hul # 3.6 Ɓayay na ɓil Mbete Esaïe 40.3-5..
7Kaŋ mí Za̧h ƴo hi̧ daɓa nzukri ti̧h ɓil batem a mbih. Ke ƴo ɓah hi̧ niri ɓahri : « A woiri, mi̧hri soy#3.7 Í mgba ɓay soy ɓil Mbete Sa̧w fe 3.1 tuh ke ɓay soy ké gel ki̧na-ay., a ge mí sɔk wuri í ɗuk haŋ fa̧hna Ŋgerzah ké ƴo gina le ? 8Í hi̧ mi̧hri mbilaw woiri ké i ruh ɓá ti̧h, ɓá leh lehna siŋ sina a suki ké mah ke kanlaw tul Ŋgerzah. Í yȩkre kerɓay yá̧ mun woiri ke riŋ ziih Abaraham. Mi ƴo ɓah hi̧ wuri ɓahri se, Ŋgerzah ƴo ke ŋgerna-sɔɓ kasawri-aw ti̧h ɓa gun zih Abaraham. 9Tena ƴo ɗih ya ké sa̧w kpuh ɓay te-u wara. Kpuh a suŋ suŋ gbam ké leh lehna a suki ya dale, ke ɓay te ku̧ ɓil hɔrɔ. »
10Nzukri ƴo vbi ni ɓay ɓahri : « Mí-aw ba, náh laɓ ani le ? »
11Ke yih nzak woyri ɓahri : « Nzuk ƴo ke gar seɗe le, ké kehr mbew hi̧ nzuk ké ta keni ya. Nzuk ƴo ke fe su̧na le, ké laɓ mah hani pi. »
12Nzuk-mbu̧h lampohri kara gi ƴo hi̧ Za̧h soh niri mbih batem, mí ku vbi ni ɓahri : « Ŋgernzuk, a wah ba, náh laɓ ani le ? »
13Mí ke el ɓah hi̧ niri ɓahri : « Suy lari ké mbay tusiɓa kuŋ ra, í laɓ a ɓoru ku̧ ri ya. »
14Sozeri kara ƴo vbi ni ɓahri : « A wah ba, náh laɓ ani le ? »
Ke ɓah hi̧ niri ɓahri : « Í gɔɓrɔ nzukri ya. Í kuŋ ɓay kan nzak nzuk ya. Í kaɓ ke law rihna ké tul lari pihna woiri. »
15Nzukri geŋ Ŋgermbay ké Ŋgerzah wahɓay pih-u lewsa̧, mí ku ker ɓahri se, Za̧h-ay ra wa ɓa Ŋgermbay le ? 16Mí Za̧h yih vbiɓay woyri kandɔkay : « A bi le, mi hi̧ wuri ti̧h ɓil batem a mbih, mí nzuk a luki ƴo gina. Ŋgerna ye mba tul bi mba-mba. Ɗíŋ tul ɓay sel sal sabɔk ye kara mi mah ya. A ye mí ke ɓay hi̧ wuri ti̧h ɓil batem a Tempuki ké ɓa batem a hɔrɔ. 17Ŋgoro-zo naŋ#3.17 Sa̧w nzak vbeh ɓahri, pel-zo naŋ, Ziɓri zo naŋ ke pel. Mí nah sɔɓ vbeh ɓahri, ke gi ke ŋgoro-zo naŋ ɓay hi̧ karaŋri ɓá lah ɓa gah-u. na ndɔk ye ɓay kehr keni mbu̧y naŋ ke ti̧hri naŋ. Ke fá̧h ti̧hri naŋ ku̧ ɓil pul. Mbu̧y naŋ ba, ke ɓay nzuh ke hɔrɔ ké ri-rimna ya. »
18Za̧h hew gun Izarayelri-aw ke ɓayri ŋgi̧-ŋgi̧. Ke ƴo ka-kah ɓaysuki gina Ŋgermbay hi̧ niri.
19Eroɗ mbay a ŋgeru ra, ke ya̧ Herodiya wu̧y yi̧n ye ké ƴo ke nun ɓáy, mí Za̧h tuŋ ni ke ɓayu. Ke tuŋ ni ke ɓay fe laɓna pipiri-u a ɓoruri ké Eroɗ laɓ gbam pi. 20Mí Eroɗ el laɓ fe a pipiri-u dɔm tul fe laɓna a pipiri-u yeri-aw ɓáy. Ke mgba Za̧h mbih ɓil vul mgbal.
21Sewu ké Za̧h ƴo hi̧ nzukri ti̧h ɓil batem a mbih, Zezu ti̧h ɓil batemu pi. Ti̧hna ye, ke goŋ Ŋgerzah, mí nunmbam mgbur, 22Tempuki ɗer gi kaɓ tul ye ke mun ké eŋ mbɔre, mí kusol ti̧h ke nunmbam ɓahri : « A wo mú-u ɓa gun sana bi. Law bi na sa tul wo. »
23Zezu titil pihna. Mbihmbam ye laɓ bon say. Nzukri tu ni ɓa gun Zezeɓ, Zezeɓ ɓa gun Eli. 24Eli ɓa gun Mataɗ, Mataɗ ɓa gun Levi, Levi ɓa gun Malki, Malki ɓa gun Zanay, Zanay ɓa gun Zezeɓ. 25Zezeɓ ɓa gun Matatiya, Matatiya ɓa gun Amos, Amos ɓa gun Nahum, Nahum ɓa gun Hesili, Hesili ɓa gun Nagay, Nagay ɓa gun Maɗ. 26Maɗ ɓa gun Matatiya, Matatiya ɓa gun Semen, Semen ɓa gun Zesek, Zesek ɓa gun Zoda. 27Zoda ɓa gun Zohanan, Zohanan ɓa gun Resa, Resa ɓa gun Zorobabel, Zorobabel ɓa gun Salatiyel, Salatiyel ɓa gun Neri, Neri ɓa gun Malki. 28Malki ɓa gun Adi, Adi ɓa gun Kosam, Kosam ɓa gun Elmadam, Elmadam ɓa gun Er, Er ɓa gun Yesuwa. 29Yesuwa ɓa gun Eliyazer, Eliyazer ɓa gun Zorim, Zorim ɓa gun Mataɗ, Mataɗ ɓa gun Levi, Levi ɓa gun Simiyoŋ. 30Simiyoŋ ɓa gun Zuda, Zuda ɓa gun Zezeɓ, Zezeɓ ɓa gun Zonam, Zonam ɓa gun Eliyakim, Eliyakim ɓa gun Meleya. 31Meleya ɓa gun Mena, Mena ɓa gun Matata, Matata ɓa gun Natan, Natan ɓa gun Daviɗ, Daviɗ ɓa gun Zeseh. 32Zeseh ɓa gun Obeɗ, Obeɗ ɓa gun Bowaz, Bowaz ɓa gun Sala#3.32 Í mgba ɓayay tuh ke Mbete Matiye 1.4. Sala ke Salmoŋ mbew yaŋ., Sala ɓa gun Nasoŋ. 33Nasoŋ ɓa gun Aminadaɓ, Aminadaɓ ɓa gun Aɗmin, Aɗmin ɓa gun Arni, Arni ɓa gun Heserom, Heserom ɓa gun Peres, Peres ɓa gun Zuda. 34Zuda ɓa gun Zakoɓ, Zakoɓ ɓa gun Isak, Isak ɓa gun Abaraham, Abaraham ɓa gun Tera, Tera ɓa gun Nahɔr. 35Nahɔr ɓa gun Seruk, Seruk ɓa gun Ragu, Ragu ɓa gun Pelek, Pelek ɓa gun Ebere, Ebere ɓa gun Sala. 36Sala ɓa gun Kenaŋ, Kenaŋ ɓa gun Arfazaɗ, Arfazaɗ ɓa gun Sem, Sem ɓa gun Nuwe, Nuwe ɓa gun Lamek. 37Lamek ɓa gun Matusala, Matusala ɓa gun Hanok, Hanok ɓa gun Yaraɗ, Yaraɗ ɓa gun Mahalale, Mahalale ɓa gun Kenaŋ. 38Kenaŋ ɓa gun Enos, Enos ɓa gun Seɗ, Seɗ ɓa gun Adam, Adam ɓa gun Ŋgerzah.
انتخاب شده:
Mbete Luk 3: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
