Mbete Luk 2
2
1Ké namri-aw, sezar Ogus mbay a luki pih bolnzak hi̧ mbayri gbam ɓahri, kú ki̧ ŋgi̧na nzukri ké kaɓ puh lakna ye ku̧ mbete. 2Sewu-aw Kirinus ɓa guvener ye ké tusiɓa Siri#2.2 Ke sewaw, tusiɓa Zude ke tusiɓa Siri mbew.. Ke ki̧ ŋgi̧na nzukri bɔk mbew ya ɓáy.
3Kaŋ mí nzuk a suŋ suŋ le el si sa̧w puh ye sa̧w puh ye ɓay kú vbeh riŋ ye. 4-5Zezeɓ maŋ wu̧y ye Mari. Ku ur ke Nasareɗ ké tusiɓa Galile si Beɗlehem ké tusiɓa Zude. Ku vbeh riŋ ye ke riŋ Mari mbɔk. Beɗlehem ra ɓa sa̧w puh ŋgermbay Daviɗ a lewsa̧. Zezeɓ ɓa gun zih Daviɗ. Mari ƴo ke ɓil.
6Ku ƴo Beɗlehem, mí Mari kaɓ peŋe. 7Ke mbuŋ gun wo̧ronzuk ɓa gun pol ye. Ke kahra gunu ke gar, mí ke ɓaŋ ni na ɓil gbekre fe su̧na fe hɔlnari. Ɓay fe le gel nam ta mba.
8-9Nzuk-kɔr samiri ƴo kɔr sami ké fal puh-u. Gel ɓa suŋ, mí tem nzak pihna Gaŋ tul feri riw ti̧h nun woyri. Ndu̧yna riŋ ɗina Gaŋ tul feri riw teh gel gberere ɗoŋ niri. Hȩkme se niri ɓa bawu. 10Mí tem nzak pihna ra ɓah hi̧ niri ɓahri : « Í laɓ hȩkme ya. Í lah. Mi gi ke nzak pihna a suki hi̧ wuri. Nzak pihna-u ɓa fe law rihna a luki. Nzak pihna-u na ɓay gun Izarayelri riw 11ɓay fe le, guri-ay gaŋ mí ku mbuŋ gun. A ye mí ke ɓa Ŋgermbay. Ke gi ɓa nzuk-ya̧ wuri gun Izarayelri. Ku mbuŋ ni ké sa̧w puh Daviɗ Mbay a luki. Ke ɓa Gaŋ tul feri riw. 12Gun a peŋu ra i tú ni kandɔkay : ku kahra ni ke gar, mí ke na ké ɓil gbekre fe su̧na fe hɔlnari. »
13Daɓa tem nzak pihna a ɓoruri ba, ti̧h gbah ku̧ tul a pol ra. Ku ɓa soze ŋgermu a nunmbam. Mí ku pir Ŋgerzah ke nzak mbew ɓahri :
14« Riŋ ɗina ɓa nzuku a Ŋgerzah. Riŋ ɗina-u mgbe ɓa riŋ ɗina a nunmbam kal tul riŋ ɗinari gbam ka-kal.
Ké tusiɓa ba, ɗeŋ ye na ɓay nzuk pirmatulri. Law ye na tul woyri. »
15Tem nzak pihnari-aw ɓá tɔr poŋ nzuk-kɔr samiri bale, ku lek ɓay ɓahri : « Náh si wuri Beɗlehem, náh si ko fe ké tem nzak pihna Ŋgerzah sɔk na-ay. »
16Ku ur katal ke ɗukna si ka̧h Beɗlehem. Ku faŋ bol Mari ke Zezeɓ, mí ku ziŋ niri ke gun a peŋu ra ké na ɓil gbekre fe su̧na fe hɔlnari. 17Ku ko ni kaŋ bale, ku el ndazi ɓay ké tem nzak pihna ɓah si tul gunu hi̧ nzukri lah. 18Gbam woyri, ɓayu na niri yer. 19Mari ba, mgba feri ké kal gbamaw ma law ye.
20Nzuk-kɔr samiri el si gel-kɔr sami woyri. Ku pir Ŋgerzah hi̧ riŋ ye mgbe ɓay tul feri riw kú-u lah, kú-u ko. Fe-uri kal kandɔk ké tem nzak pihna ɓah hi̧ niri ra.
21Nam gun ra ka̧h toŋndɔk seɗe, ku kuŋ ndi̧w ye, mí ku tu riŋ ye ɓa Zezu, riŋ ké tem nzak pihna sɔk Mari dara ke ya̧ ɓil ɓáy.
22-23Nam a bon niŋu, Zezeɓ fa̧h Mari ke gun ye hil si Zurusalem, puh ké vul kani Ŋgerzah a ye Gaŋ tul feri riw ƴo ri. Ku si ke fe hi̧na ɓay tul gun a peŋu ke fe puhna ɓay tul mah gunu pi. Ɓa fe laɓna ké Moyiz vbeh ɓil mbete bolkusol Ŋgerzah. Mbete-u ɓahri, gun pol a suŋ suŋ gbam kú-u mbuŋ ɓa gun wo̧ronzuk le, riŋ Gaŋ tul feri riw kan tul gunu ɓa fe ye#2.22-23 Ɓay tu ɓay fe puhna gun a peŋu, í ki̧ Mbete Exode 13.1-15 ke Mbete Nombres 18.14-16.. Kandɔkaw mí ku sɔk Zezu hi̧ Ŋgerzah. 24Ku si ke fe puhna ɓay tul mah gun kandɔk ké mbete bolkusol Gaŋ tul feri riw sɔk ɓay fe puhna ra ɓá na ɓa mbɔre seɗe mini ndoy mbɔre seɗe#2.24 Ɓay tu ɓay fe puhna mah gun, í ki̧ Mbete Lévitique 12.1-8. .
25-26Nzuk a hani ƴo Zurusalemaw. Riŋ ye ɓa Simiyoŋ. Ke ƴo mbew ziŋ Ŋgerzah ɓa záh ye. Ke dim Ŋgerzah ke law mbew, mí ke ƴo geŋ nam ké Ŋgerzah ɓay hi̧ ni ké ko Nzuk-voh law gun Izarayelri. Tempuki ƴo ziŋ ni, mí hi̧ ni ke tu ɓahri se, ke ɓay ko nzuk ké Gaŋ tul feri riw mbi ni ɓa Ŋgermbay ke nun ye dara ké hu ɓáy.
27Nam ké bah Zezu ke mah ye si vul kani Ŋgerzah ra, Tempuki sɔkrɔ Simiyoŋ si rih ɓil ila vul kani Ŋgerzah. Bah gun laɓ sa̧w fe laɓna woyri ɓay tul gunu kandɔk bolkusol Ŋgerzah sɔk ɓil mbete vbehna Moyiz, 28mí Simiyoŋ mbi gun ra mgba ma law ye, mí ke el ke tumbɔl hi̧ Ŋgerzah ɓahri se :
29« Gaŋ bi, nam ka̧h ɓay mú sel mgbal wo-ay ɓá poŋ tukala ke ɗeŋ kandɔk ké mu ɓah ra wara.
30Ɓay fe le nun bi ko ni a ye ké-e ɓa ndɔk lakna wo, ké ɓa sa̧w-ya̧ nzukri da.
31Mu lek riŋ ɗina ye lewsa̧ ké pol gun Izarayelri gbam.
32Ke ɓa gel tehna ké teh tul sa̧wnzuk a ɓoruri,
ke ɓa gun riŋ ɗina sa̧w wo gun Izarayelri. »
33Bah Zezu ke mah ye ɓá lah ɓay ké Simiyoŋ ɓah si tul Zezu le, ku el kaɓ yer. 34Simiyoŋ lu mgbɔkɔ ku̧ tul woyri, mí ke el ɓah hi̧ Mari mah gunu ɓahri : « Mú ko, gunay ɓa fe lihna daɓa gun Izarayelri. Daɓa gun Izarayel a ɓoruri ba, ke ɓa fe-ɔr tul woyri. Riŋ ye ɓa fe-fah ɓay nzukri. 35Ketina nzukri ɓay ti̧h ma gel a teh-u. A wo mah gun ba, law wo ɓay kuŋ kandɔk law ké mahwu̧y vbeh kaŋ. »
36Gun nzak pihna Ŋgerzah a ɓoru ƴo ɓil ila vul kani Ŋgerzah-aw pi. Riŋ ye ɓa Ana. Ke ɓa gun Fanuyel ké mi̧hri Aser. Ke kpɔ-kpɔkrɔ. Ke tikla ye, ke ya̧ wo̧ro. Ke kaɓ puh wo̧ro ye laɓ mbihmbam toŋndɔk say. 37Mí wah ye hu. Ke ya̧ wo̧ro a ɓoru ya. Kpatara ke ƴo sa ɓil ila vul kani Ŋgerzah. Ke ƴo saŋ mbih, ke ƴo goŋ Ŋgerzah ƴo dim ni keni suŋ ke seh. Mbihmbam ye ka̧h bon toŋndɔk seɗe falu niŋ.
38Simiyoŋ el ke tumbɔl hi̧ Ŋgerzah ɓay Zezu ba, Ana kara ƴo pir Ŋgerzah pi, mí ke el ɓah ɓay tul gun ra hi̧ ziɓri a woyri gun Izarayelri ké ƴo ri-aw pi. Law woyri te tul Ŋgerzah, ku ƴo geŋ nam ké-e ɓay ten Zurusalem ɓil mgbal.
39Zezeɓri ɔh ke fe puhna ɓay tul gun ke mah gun kandɔk mbete bolkusol Gaŋ tul feri riw sɔk ra, mí ku el si puh woyri Nasareɗ ké tusiɓa Galile. 40Gun ra hu̧h. Nun ye ru̧, kerɓay ye nze. Mí Ŋgerzah ko kona ma tul ye.
41Mbihmbam ke mbihmbam, bah Zezu ƴo si Zurusalem ɓay ti̧hmbih-i guy buma#2.41 Ɓay tu ɓay ti̧hmbih-i guy buma, í ki̧ Mbete Exode 23.14-17. Sí Zurusalem ɓa fe hahna ké tul gun Izarayel a wo̧rori.. Mah Zezu si ziŋ ni pi. 42Sa̧wseh ké mbihmbam Zezu ka̧h boh falu seɗe dale, ke si ziŋ niri ké gel ti̧hmbih ké Zurusalem kandɔk ké ɓa fe laɓna sa̧w woyri. 43Ti̧hmbih ra laɓ ɔh, mí nzukri el ma puh. Zezu ba, kaɓ sa Zurusalem. Mah ye ke bah ye tu ya. 44Ku ker ɓahri, Zezu ƴo ziŋ bɔh gahru woyri. Ku ƴo tul ful mah nam mbew dara mí ku ƴah ni ké sakra yi̧n woyri ke ya̧h woyri ɓáy. 45Ku ziŋ ni ya, mí ku el. Ku ƴah ni par par si ka̧h Zurusalem.
46Nam a sayu bale, ku ziŋ ni ké ɓil ila vul kani Ŋgerzah. Ke kaɓ haŋsekle nzuk-sɔk mbete bolkusol Ŋgerzahri ƴo lah fe firma woyri, ƴo vbi niri ɓay pi. 47Ziɓri gbam ké ƴo gelu-aw ko kona ka̧h ma tul ye ɓay goso fe tuna ké-e yih keni nzak ŋgernzukri-aw. 48Mah ye ke bah ye gi ziŋ ni, mí kerɓay zi niri. Mah ye vbi ni ɓahri : « Gun bi, ɓay fe mú-u laɓ na kaŋ le ? Nah ƴah mu, ƴah mu ke mbihnun. »
49Ke yih nzak woyri ɓahri : « Ɓay fe mí i ƴah mi le ? Zíŋ mi se ya. Mbihmbam bi ka̧h ɓay mí kaɓ ɓel baah#2.49 Mbihmbam Zezu laɓ boh falu seɗe. Ka̧h guri-ay, mbihmbam gun ziɓri laɓ boh falu seɗe bale, ku mbi fe laɓna a titiluri ké na ɓil mbete bolkusol Ŋgerzah. Fe laɓnari-aw si ke mbete vbehna Moyiz., i tu ya le ? »
50Mí ku lah ɓay ye teh ya.
51Ke el ɗer si Nasareɗ ziŋ niri. Ke lah nzak bah ye ke mah ye. Mah ye mgba feri ké kalaw riw ma law ye kpatara. 52Zezu ŋger ɓa suki. Nun ye ru̧. Ke ziŋ law rihna ké ta̧w Ŋgerzah pi, ké ta̧w nzukri pi.
انتخاب شده:
Mbete Luk 2: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
