Mbete Luk 4
4
1-2Mí Tempuki ƴo ziŋ Zezu. Ti̧hna ye ke mahmbih Zurdeŋ dale, Tempuki maŋ ni si laɓ nam bon niŋ ɓil lawkɔr. Nam bon niŋaw diyabolo a ye mbay záh tukala ƴo ndoh law Zezu ke ɓay. Zezu su̧ fe ya ɓil namuri-aw, mí ɗaka i ni i-i. 3Bale mbay záh tukala ɓah hi̧ ni ɓahri : « Ké mu ɓa gun Ŋgerzah ra, mú ɓah hi̧ kasaway ɓá ti̧h ɓa fe su̧na hi̧ mu, mú su̧. »
4Zezu fer nzak ye ɓahri : « Mbete Ŋgerzah ɓahri, ɔkna nzuk na ɓay fe su̧na kaŋto ya#4.4 Ɓayay na ɓil Mbete Deutéronome 8.3.. »
5Mbay záh tukala maŋ ni si ƴo tul kasaw a gaŋu hi̧ ni ke ko tul puh laknari riw pol mbew. 6Mí ke el ɓah hi̧ ni ɓahri : « Puh laknari ke fe riŋ ɗina woyri gbam ku̧ ndɔk bi. A bi ba, mi él ku̧ ndɔk nzuk a a̧y ké mi yih. 7Dale mú huk siɓa ké pol bi-ay le, mi él ndoh ndɔk wo, mú lak ɓa mbay tulu gbam. »
8Mí Zezu el ke ɓay ɓahri : « Mbete Ŋgerzah ɓahri, Miƴori mí ɓa Ŋgerzah wo. A ye mbew yaŋ mú-u húk siɓa ké pol ye, mu dím ni mbew yaŋ#4.8 Ɓayay na ɓil Mbete Exode 20.3 ke Mbete Deutéronome 6.13. . »
9Bale mbay záh tukala maŋ ni si Zurusalem. Ke hi̧ ni ke ƴo ti̧w gel a gaŋu zeŋleŋleŋ ké tul vul kani Ŋgerzah, mí ke ɓahri : « Ké mu ɓa gun Ŋgerzah ra, mú zo vbu siɓa. 10Mbete ye ɓahri se, ke ɓay pih tem nzak pihna yeri hi̧ kú kɔr mu. 11Mbete-u ɓah ra ɓáy ɓahri se, ku héh mu rɔkɔ bɔk wo ɓá ɓe kasaw#4.11 Ɓayay na ɓil Mbete Siŋ 91.11-12.. »
12Mí Zezu el ke ɓay ɓahri : « Ŋgerzah ɓahri se, Miƴori mí ɓa Ŋgerzah wo, mu fáh ni ya#4.12 Ɓayay na ɓil Mbete Deutéronome 6.16.. »
13Mbay záh tukala leh law Zezu mah ni, mí ke poŋ Zezu, ke tɔr si mu̧h kpɔl. 14Kandɔkaw mí Zezu ti̧h ke ɓil lawkɔr ké tusiɓa Zude el si tusiɓa Galile, mí ŋgerna Tempuki ŋger ni. Riŋ ye ya̧ gelri riw ké tusiɓa-aw. 15Ke ƴo sɔk ɓay lák mbay Ŋgerzah ɓil vul misoŋ woyri hi̧ nzukri lah, riŋ ye el mgbe ké nzak woyri.
16Ke si ka̧h Nasareɗ, puh ké-e hu̧h ké ri. Nam ɔkna, ke si vul misoŋ woyri kandɔk ké ɓa fe laɓna ye. Ku hi̧ ni ke ur síɓa ɓay ki̧ mbete. 17Ku ndar mbete Ezay gun nzak pihna Ŋgerzah a lewsa̧ hi̧ ni. Mí ke mgbur mbete-u, ke ziŋ gel ki̧na a hani mbew. Ke ki̧ ɓayay :
18 Tem Miƴori gi rih tul bi,
ke mbi mi ɓa mbay-ɓah ɓaysuki lák mbay ye hi̧ ko̧hkori.
Ke pih mi ɓa mbay ka-kah ɓay ti̧hna mgbalri ke ɓil mgbal pi,
ɓay mgburna nun ra̧wri pi # 4.18 Ɓayu ɓah ɓay nun kaŋto ya. Ɓayu ɓah ɓay law nzuk pi. Í mgba Mbete 2 Kɔrenteri 4.4 tuh ke ɓay ra̧wri. .
Ke pih mi ɓa mbay-sel nzukri ké tukala ŋga̧h niri.
19 Le mí ka-kah ɓay sew a a̧y ké law sana Miƴori ƴo ku̧ tul nzukri # 4.19 Ɓayay na ɓil Mbete Esaïe 58.6 ke 61.1-2..
20Zezu ki̧ ɔh, ke tuh mbete-u el ndar hi̧ nzuk-mgba sa̧wu, ke el kaɓ ɓay sɔk ɓayu#4.20 Fe laɓna ziɓri le, nzuk kaɓ dara mí ke sɔk ɓay ɓáy.. Nzukri riw ké kaɓ vul misoŋ ra ko ni yi̧m dale, 21ke ɓahri : « Guri, fe vbehna Ezayay laɓ ɔh ke gelu ké nun woiri da. »
22Mí nzukri gbam ɓal riŋ ye#4.22 Mahful-sɔɓ gel ki̧na ɓoɗ mí na-ay : lu lakna ɓay ye. Nzuk goso fe tuna a haniri ɓahri, ɓayu ké Zezu zo tul gel a hani-u ɓil gel ki̧na ra, mí gelu ƴo ɓah ɓay ɓeɓna sa̧wnzuk a ɓoruri le, ziɓri ziŋ haŋ fa̧hna ké tul ye. Ku geŋ Ŋgermbay woyri ɓá gi dal baa gun Izarayelri ké ta̧w sa̧wnzuk a ɓoruri. Í mgba Mbete Esaïe 61.1-7 ke 58.6 tuh ke fe ki̧na ké Zezu ki̧ ɓay tu ɓayu. . Gelɓay lawsuki ké-e ɓah ra zi niri. Ku ɓahri : « Gunwo̧ro-ay ɓa gun Zezeɓ ya wa ? »
23Mí Zezu ɓah hi̧ niri ɓahri : « I ɓay mbi gamɓayay ɓah hi̧ mi keni ɓahri, “dokta, mú gah mun wo.” I él ɓah hi̧ mi ɓahri, fe saŋri ké i lah ɓayu ra, mí laɓ hi̧ nzuk puh biri-ay kandɔk ké mi laɓ ké fál Kapernayumaw. 24Mí gamɓayaw ra, mi el keni hi̧ wuri ɓahri se, nzukri ké puh gun nzak pihna Ŋgerzah sa ɓay ye ya. 25Dale mi el ɓah ketina-ay hi̧ wuri, sew Eli gun nzak pihna Ŋgerzah a lewsa̧ ra wu̧y sehri ɓa ŋgi̧-u ƴo tusiɓa Izarayelay. Sew Eli ra mbam to ya mbihmbam say ke few tɔtɔklɔ, mí ɗaka bahpihya lih tusiɓa ke gelu gbam. 26Ŋgerzah pih Eli si ta̧w wu̧y seh mbew ké tusiɓa gun Izarayelri ya. Mí ke pih ni si Sareɓta ké tusiɓa Sidoŋ ta̧w wu̧y seh a hani#4.26 Ɓay wu̧y seh ra na ɓil Mbete 1 Rois 17.1-16.. 27Kaŋ pi mí sew Elizeh gun nzak pihna Ŋgerzah a lewsa̧, nzuk ndɔɓeri ɓa ŋgi̧-u ƴo tusiɓa Izarayelay. Bolkusol Ŋgerzah hah niri sí gel fe puhna ye ɓay sena-aw, mí ke hi̧ Elizeh teh mun nzuk ndɔɓeri ké tusiɓa gun Izarayelri ya. Mí ke hi̧ Elizeh lu sena ndɔɓe ké mun nzukbaa woyri Naman nzuk tusiɓa Siri#4.27 Ɓay Naman ra na ɓil Mbete 2 Rois 5.1-15. . »
28Law nzukri gbam ké kaɓ vul misoŋ ra nzek ké tul ɓay ye.
29Ku ur síɓa yiw, mí ku ten ni ti̧h kala puh. Ku si ziŋ ni ka̧h nzak hereŋ ké fal puh ɓay sɔkrɔ ni vbu ɓilu. 30Mí ke ti̧h ké sakra woyri tɔr.
31Ke ɗer si Kapernayum ké tusiɓa Galile. Nam ɔknari, ke ƴo firma nzukri ɓay Ŋgerzah ké vul misoŋ. 32Gosoɓay zi nzukri ɓay tul fe firma ye ɓay fe le, ke ɓah kandɔk a ye mí ke ɓa mbay bolkusolu.
33Ké vul misoŋaw, nzuk a hani ƴo ri. Záh tukala ƴo tul ye. 34Ke vba̧ nzak ɓeleŋ ɓahri : « Hȩh, Zezu ké Nasareɗ, a fe mí ƴo sakra wah le ? Mu gi ɓay ɓeɓ na wa ? Mi tu mu tu-tu. Mu ɓa nzuk lawpuki Ŋgerzah. »
35Mí Zezu hah záh ra ɓahri : « Poŋ nzak wo-aw. Mú ti̧h ke tul nzukay. »
Záh ra mbi nzukaw vbu siɓa gbirik ké sakra nzukri, ke ti̧h ke tul nzuku mí poŋ ni dan láɓ fe hani ziŋ ni gaŋ ba. 36Hȩkme laɓ nzukri riw. Fe-u na niri ɓa saŋ, mí ku el ɓah ɓay ke haniri ƴo ɓahri : « Sam ɓay fe mí kari-ay le ? Ɓay fe le ke hah záh tukalari ke kusol mbay ke huhrumun hi̧ ku ti̧h tɔr. » 37Kandɔkaw mí mberem Zezu ya̧ gel ya̧h ya̧h ké tusiɓa-aw.
38Zezuri ti̧h ke vul misoŋ dale, ku si kerpuh Simu. Sena mun zaŋna zaŋ mahfay Simu mbamba, mí ku ɓah ɓayu hi̧ Zezu. 39Ke si, ke ɗiŋ tul ko mahfay Simu. Ke hah sena mun zaŋna ra, mí sena-aw el poŋ ni. Sa gelu-aw mí mahfay Simu ur mgba niri gahru.
40Seh na nzȩh ɓay riŋna, mí nzuk a suŋ suŋ le suk sena ye sena ye gi ku̧ niri ké ta̧w Zezu. Bale Zezu ɓaŋ ndɔk ye kan tul nzuk senari mbew mbew gbam gah niri. 41Záhri kara ti̧h ke tul nzuk senari ɓa ŋgi̧-u pi. Záhri-aw ƴo vba̧ nzak ɓeleŋ ɓeleŋ ɓahri : « A wo mú-u ɓa gun Ŋgerzah#4.41 Í mgba gel ki̧na-ay tuh ke Mbete Siŋ 2 ɓay tu ɓay gun Ŋgerzah.. »
Mí ke hah niri ɓáh ɓay kaŋ ɓay fe le, ku tu ni ɓa Ŋgermbay tu-tu.
42Gel pele Zezu ti̧h tɔr si gel ké nzukri ta ri ya. Mí daɓa nzukri ƴah ni fál síɓa ke fál siɓa, ku ziŋ ni. Ku sa poŋ ni ké tɔr ya. 43Bale ke ɓah hi̧ niri ɓahri : « Mi sí ma puh a ɓoruri, mi ká-kah ɓaysuki lák mbay Ŋgerzah ɓay fe le, Ŋgerzah pih mi ɓayu. »
44Kandɔkaw mí ke si ke vul misoŋ vul misoŋ ké tusiɓa ziɓri, ke ƴo ka-kah ɓay lák mbay Ŋgerzah.
انتخاب شده:
Mbete Luk 4: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
