Mbete Za̧h 17
17
1-2Zezu ɓah ɓayawri hi̧ nzuk-dih fal yeri. Kandɔkaw ke ɔr nun ye ma síɓa, mí ke ɓahri se : « Baah, sa̧wseh ka̧h da. Mú hi̧ riŋ ɗina gun wo ɓá mgbe ɓay hi̧ gun wo ɓá hi̧ riŋ ɗina wo mgbe. Mú hi̧ riŋ ɗina gunu ɓá mgbe kandɔk ké mu hi̧ ni ke lak mbay tul nzukri riw ɓay hi̧ nzukri gbam ké mu hi̧ ni, kú ƴo ke ɔkna ɓa ŋgɔh. 3Ɔkna ɓa ŋgɔh-aw ra ɓa tú mu, a wo Ŋgerzah ké mu ɓa Ŋgerzah ketina mbew yaŋ. Ɔkna ɓa ŋgɔh-u ɓa tú nzuk ké mu pih ni, a ye Ŋgermbay Zezu. 4A bi mi hi̧ riŋ ɗina wo mgbe ké tusiɓa, mí-i laɓ pihna ké mu hi̧ mi ɔh ke gelu riw. 5Aŋay dale baah, mú hi̧ riŋ ɗina bi mgbe ke riŋ ɗina ké mi ƴo keni ziŋ mu pol dara tusiɓa laɓ ɓáy.
6Nzukri ké mu lu ké haŋsekle nzuk tukalari hi̧ mi ra, mi hi̧ niri ku tu mu. Ku ɓa nunu a wo, mí mu hi̧ mi niri, mí ku ƴo tul ɓay wo. 7Wara mí ku tu ɓahri, feri riw ké mu hi̧ mi ra ur ké ta̧w wo. 8Ku tu ɓahri, ɓayri ké mi ɓah ɓa ɓay ké mu ɓah, mí-i el ɓah hi̧ niri, mí ku ya̧ ɓayuri ya̧-ya̧. Ku tu ɓahri se, mi ur ké ta̧w wo ɓa ketina. Mí ku kan law tulu ɓahri, a wo mú-u pih mi.
9Mberem bi ké mi ƴo lu ziŋ mu-ay, mi vbi ɓay tul woyri. Mi vbi mu ɓay tul nzuk tukalari ya. Uwa, mi vbi mu ɓay tul woyri ɓay fe le, ku ɓa nunu a wo. 10Fe bi gbam ɓa fe wo. Fe wo kara ɓa fe bi pi, kandɔkaw mí riŋ ɗina bi mgbe ké sakra nzukuri-aw. 11Mí mi ɓay poŋ tukala. A woyri ba, ku ɓay kaɓ tukala ɓáy. A bi le, mi si ma ta̧w wo. Baah nzuk lawpuki, mú kɔr tul woyri hi̧ kú ƴo ziŋ mu ke riŋ wo, riŋ wo ké mu hi̧ mi ɓa riŋ bi#17.11 Í mgba Mbete Filipiri 2.9-11 ke Mbete Esaïe 45.23-24 tuh ke gel ki̧na-ay. ɓay kú ɓa nzuk ké mbew kandɔk a wah ké nah ɓa nzuk ké mbew kaŋ pi. 12Sewri ké mi ƴo ziŋ niri, a bi mí-i kɔr tul woyri ke riŋ wo ké mu hi̧ ɓa riŋ bi ra. Mí mi mgba sa̧w woyri. Nzuk mbew zi ya, sa ɓa Zudas mí zi ke tul ye hi̧ ɓay kú-u vbeh lewsa̧ ra laɓ ɔh ƴo gelu kaŋ#17.12 Í mgba Mbete Siŋ (Psaumes) 41.9 ke 55.12-14 tuh ke gel ki̧na-ay.. 13Aŋay dale mi ƴo si ma ta̧w wo. Kandɔk ké mi ƴo tusiɓa ɓáy ra mí-i ɓah ɓayawri ɓay hi̧ law rihna bi ɓá rih law woyri ɔh keɗ keɗ.
14Nzukri ké mu hi̧ mi ra, mi hi̧ niri, ku lah ɓay wo. Nzuk tukalari ba, fu̧y niri ɓay fe le, ku ɓa nzuk tukala mba kandɔk a bi ké mi ɓa nzuk tukala ya ra. 15Mi vbi mu ɓay mú fa̧h niri, ku el si ta̧w wo ya. Wara le mi vbi mu ɓay mú kɔr tul woyri ke ndɔk nzuk law a pipiri-u a ye mbay záh tukala. 16Ku ɓa nzuk tukala ya, kandɔk a bi ké mi ɓa nzuk tukala ya. 17Mú hi̧ law woyri pu ɓa nzuku a wo hi̧ kú kaɓ ɓil ketina. Ɓay wo ɓa Ketina. 18Kandɔk ké mu pih mi gi tukala, a bi kara mi pih niri ma ta̧w nzuk tukalari pi. 19Ɓay tul nzuk biri ra, mi hi̧ law bi pu ɓa nunu a wo ɓay kú na ɓa nzuk lawpukiri kú kaɓ ɓil ketina.
20Mberem bi ké mi lu ra, mi vbi ɓay tul nzuk a a̧yri kaŋto ya. Mi vbi mu ɓay tul nzuk a ɓoruri ké ɓay lah ɓay woyri, mí ku kán law tul bi keni pi. 21Mi vbi mu ɓay tul woyri gbam, kú ɓa nzuk ké mbew kandɔk a wo baah ké mu ɓa mbew ziŋ mi. A bi kara mi ɓa mbew ziŋ mu bale, kú ɓa mbew ziŋ na pi, mi nzuk tukalari ɓá ya̧ ɓayay ɓahri, a wo mú-u pih mi. 22Riŋ ɗina ké mu kan tul bi, a bi wara mí-i kan tul woyri ɓay kú ɓa mbew ziŋ na kandɔk a wah ké nah ɓa nzuk ké mbew ra kaŋ. 23A bi mi ƴo mbew ziŋ niri, a wo mu ƴo mbew ziŋ mi pi. Riŋ ɗina-aw mi kan tul woyri ɓay kú ŋger ɔh ɓa nzuk ké mbew yaŋ, mí nzuk tukalari ɓá tu keni, a wo mú-u pih mi. Kú tu keni, mu sa nzuk biri mah ke law sana ké mu sa mi kaŋ.
24Baah, nzukri ké mu hi̧ mi ra, gel ké mi ƴo ri-aw, mi yih ɓay kú kaɓ ziŋ mi ké ri pi, ɓay kú tu riŋ ɗina bi ké mu kan tul bi ɓay fe le, law sana wo mu sa mi keni dara tusiɓa laɓ ɓáy.
25Baah, a wo ké mu ŋga̧h sal in, nzuk tukalari tu mu ya. A bi le mi tu mu. Nzuk biri kara tu ɓahri, a wo mú-u pih mi. 26Mi hi̧ niri ku tu mu. Mi ɓay hi̧ niri, ku tú law sana wo ké mu sa mi keni ra, mí hi̧ law sana-u ɓá ƴo haŋsekle woyri. Kandɔkaw mí a bi mi ƴo haŋsekle woyri. »
اکنون انتخاب شده:
Mbete Za̧h 17: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
