Mbete Za̧h 16
16
1« Mi ɓah ɓayawri hi̧ wuri rɔkɔ law woiri ɓá lu ké tul bi ma fal. 2Nzuk tukalari ɓay ni̧h wuri ke ɓil vul misoŋ. Ketina, ke seh-u le, nzukri ɓay i wuri-aw, ku kér ɓahri se, Ŋgerzah ya̧ fe laɓna-i wuri-aw ɓa fe dimna woyri kaŋ. 3Mí fe laɓna woyri-aw na kaŋ ɓay fe le, ku tu baah ya, ku tu mi ya pi. 4Mi ɓah ɓayawri hi̧ wuri ɓay hi̧ seh ké fe-uri ƴo laɓu le, law woiri ɓá dum ɓahri, a bi mi ɓah ɓayu ɓah. Mi ɓah hi̧ wuri ke titilu ya ɓay fe le, mi ƴo ziŋ wuri-ay.
5-6Aŋay dale, mi él ma ta̧w nzuk-pih mi. Mí nzuk mbew ké sakra woiri vbi mi fál suŋ mí-i sí ma mari ya. Wara le rew mgbaŋ law woiri ɓay biri-ay ké mi ɓah hi̧ wuri. 7Mí-i ɓah hi̧ wuri ɓa ketina. Tɔrna bi-ay su ɓay woiri. Mi tɔr ra ya le, nzuk-hew wuri ra ta gi ta̧w woiri ya. Sina bi dale, mi píh ni gi ɓay ké ƴo ziŋ wuri. 8Gina ye le, ke túŋ nzuk tukalari ke ɓay, ɓay tul su ya woyri, ɓay tul sal in kú-u sel poŋ Ŋgerzah, ɓay tul salɓay suya ké ta tul woyri. 9Ke túŋ niri ɓay tul suya woyri ɓay fe le, ku kan law tul bi ya. 10Ke túŋ niri ɓay tul sal in kú-u sel ɓay fe le, mi el si ta̧w baah, mí i ko mun bi mba. 11Ke túŋ niri ɓay tul salɓay suya ké ta tul woyri ɓay fe le, salɓay suya ra kuŋ ku̧ tul mbay záh tukala ku-kuŋ#16.11 Ɓay tu ɓay mbay záh tukala, í ki̧ Mbete Efezeri 2.1-2. Titil-kuŋ salɓayaw titilu ke Mbete Sa̧w fe 3.15. Salɓay hul ta tul mbay záh tukala ke seh hul Ŋgermbay. Mbete Ten sa̧wɓay 20 ur ke gel ki̧na 7 sɔk ɓay ɔ́h tɔr pihna-zi tul mbay záh tukala ra..
12Mi ƴo ke ɓay ɓa ŋgi-u ɓay ɓah hi̧ wuri ɓáy, mí i mah lah ɓayu guri ya. 13Gina nzuk-hew wuri a ye Tem Ketina ra le ke téh gel ké pol woiri maŋ wuri si ɓil ketina gbam. A ye ra ke ɓáh ɓay ke tul ye ya, wara le ɓay a suŋ suŋ ké-e lah ké ta̧w bi mí ke ɓáh hi̧ wuri, mí ke sɔ́k ɓay feri ké ɓay ti̧h-u pi. 14Ke ɓay hi̧ riŋ ɗina bi ɓá mgbe ɓay fe le, ke lah ɓayri-aw ké ta̧w bi, mí ke el sɔk hi̧ wuri-aw. 15Ɓay a suŋ suŋ gbam ké ɓa fe baah ɓa fe bi pi. Sa̧wu mí-i ɓahri, Tempuki ɓay lah ɓayri-aw ké ta̧w bi, mí ke él sɔk hi̧ wuri-aw. 16Kandɔkaw, zah dale, i ta ko mi mba. Bol falu ndi̧ le, i él ko mi ɓáy. »
17Nzuk-dih fal ye a haniri ba, vbi ɓay ké sakra haniri ɓahri, Zezu ra ke ɓah ani munu le, ké-e ɓahri, zah dale a woyri ku ko ni mba, bol falu ndi̧ le, ku él ko ni ɓáy dara mí ku vbi ɓay ɓahri, ɓay Zezu ké-e ɓahri, ke él ma ta̧w bah ye-aw pi.
18Ku ƴo ɓahri : « Zah ra wa, ke ɓah ani munu le ? Nah tu sa̧wu ya. »
19Zezu tu vbiɓay ké zaŋ niri, mí ke ɓahri se : « I vbi haniri munɓay ké mi ɓah ra le, zah dale i ta ko mi mba. Bol falu ndi̧ le, i él ko mi ɓáy ra wa ? 20Munu, i kó mi ya. Bol falu ndi̧ dale, i él ko mi ɓáy ɓa ketina. Mi ƴo ɓah hi̧ wuri ɓahri se, i ɓay vba̧ mun, i ɓay vuh rew ke mbihnun. Tukala ba, ɓay zay mun. I káɓ ke law sena, mí law sena woiri ɓay voh el ti̧h ɓa law rihna. 21Gelke wu̧ynzuk kaɓ peŋe le, law ye se ɓay koseh ké ƴo gaw ni ke sa̧wseh-u. Ke mbuŋ dale, ke yȩkre koseh ye ɓay tul law rihna ye ɓay fe le, ke mbuŋ gun. 22A woiri kara i ƴo kaɓ ke law sena wara, mí mi él gi ko wuri ɓáy. Law woiri ɓay rih wuri, mí nzuk mbew ta gboh law rihna woiri ya. 23Namu le, i ta vbi mi ɓay mbew mba. Munu, i vbi mi mba, ɓayu ɓa ketina. Mi ƴo ɓah ɓayay hi̧ wuri, i vbí baah ɓay fe a suŋ suŋ ke riŋ bi dale, ke ɓay laɓ fe-u hi̧ wuri. 24Ka̧h guri-ay i vbi ɓay mbew ke riŋ bi ya ɓáy. I vbi ni le, i ya̧-u ɓay ɓo law woiri ɓá rih keɗ keɗ.
25Mi ɓah ɓayawri hi̧ wuri ke lawɓay. Seh a ɓoru mi ɓáh ke lawɓay hi̧ wuri mba wara le, mi ɓáh ɓay tul bah bi ɓa teh-u hi̧ wuri í lah. 26Namu-aw mi ta vbi baah ɓay tul woiri mba. A woiri mí i vbí baah fe ke riŋ bi. 27Ɓayu ké law baah na tul woiri ɓay fe le, law woiri na tul bi. I kan law tul bi ɓahri se, mi ur ké ta̧w Ŋgerzah. 28Kandɔk ké mi ur ké ta̧w baah mí-i gi kaɓ tukala ra, mi póŋ tukala ɓay el si ta̧w baah ɓáy. »
29Nzuk-dih fal yeri ɓah : « A ha̧h, aŋay mu ƴo ɓah ɓay a teh-u wara, lawɓay ta mba. 30Aŋay nah tu ɓahri, mu tu feri riw da. Ɗaka-vbi ɓay kara ta mba. Kaŋ mí nah kan law tul ɓayu ɓahri, mu ur ké ta̧w Ŋgerzah. »
31Zezu ba, yih nzak woyri ɓah : « I kan law tul bi ley ? 32Í lah, sa̧wseh ƴo gina, mí ka̧h da ɓay hi̧ í zikri ke gelri ɓoɗ ɓoɗ ɓay poŋ mi ke hȩk bi. Mí mi ƴó ke hȩk bi ya ɓay fe le, baah ƴo ziŋ mi. 33Mi ɓah ɓayawri hi̧ wuri ɓay mbu̧hna woiri ké tul bi le, í ƴo ke ɗeŋ. Ké tukala ba, koseh ƴo ziŋ wuri, mí í ko kona ke nun nzena dan hȩkme ma. A bi mi haw ŋgermu ké tukala ha-haw. »
اکنون انتخاب شده:
Mbete Za̧h 16: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
