Mbete Za̧h 13
13
1Toŋ nam mbew ɓay hi̧ nam ti̧hmbih-i guy buma ɓá ka̧h, mí Zezu tu ɓahri, nam ye toŋ ɗih ya. Zah le ke póŋ tukala ɓay tɔr si ta̧w bah ye. Kandɔk ké Zezu sa nzuk yeri ké tukala, mí ke sa niri ke law sana ye puluk si ka̧h sa̧wseh hul ye. 2Zezu ke nzuk-dih fal yeri kaɓ nzak fe su̧na. Ke seh-aw da, mbay záh tukala ɓaŋ ɓay ndoh law Zudas, gun Simu ké Isikariyoɗ, ɓay ké te Zezu.
3Zezu tu ɓahri, baah poŋ feri riw ku̧ ndɔk ye, mí ke tu ɓahri, ke ur ké ta̧w Ŋgerzah, mí ke él ma ta̧w Ŋgerzah. 4Kandɔkaw Zezu ur ke nzak fe su̧na, ke lu mah gar ye, ke el mbi gar-tak mun, mí ke ŋga̧h keni si̧h ye. 5Dale ke kah mbih ku̧ ɓil ko̧no, mí ke titil wɔk keni bɔk nzuk-dih fal yeri. Ke el mgba nzak gar ké-e ŋga̧h keni tak ye ra, mí ke tak keni bɔk woyri.
6Ke ka̧h tul Simu Piyer bale, Piyer ɓah hi̧ ni ɓahri : « Ŋgernzuk, a wo mú-u wɔk bɔk bi ley ? »
7Zezu yih nzak ye ɓahri : « Fe ké mi ƴo laɓu-ay mu tu sa̧wu ya. Falu dara mú-u tú ɓáy. »
8Piyer ba, ɓah : « Mgbaŋ bi, mú wɔk bɔk bi ya. »
Mí Zezu yih nzak ye ɓahri : « Mi wɔk bɔk wo ya le, mu ƴo ziŋ mi ya. »
9Simu Piyer ɓah : « Ŋgernzuk, mú wɔk bɔk bi kaŋto ya. Wara le mú wɔk ndɔk bi ke tul bi pi. »
10Zezu ɓah : « Nzuk soh mbih dale, wɔk bɔk ye wara. A woiri i te-teh, mí nzuk a hani ké sakra woiri-ay teh ya. »
11Zezu tu nzuk ké ɓay te ni tu. Sa̧wu mí ke ɓahri, ku te-teh, mí nzuk a hani ké sakra woyri-aw teh ya.
12Zezu wɔk bɔk woyri ɔh riw bale, ke ndoh mah gar ye, ke el kaɓ nzak fe su̧na ra, mí ke ɓah hi̧ niri ɓahri se : « I tu sa̧w fe ké mi laɓaw tu-tu gaŋ le ? 13A woiri i ɗi mi ɓa “metere”. I ɗi mi ɓa “ŋgernzuk” pi. I ɗi gelu. 14A bi ké mi ɓa ŋgernzuk, ké mi ɓa metere mí-i wɔk bɔk woiri kandɔk mgbal ké wɔk bɔk nzukri kaŋ ra wa, a woiri ba, í mbi pihna mgbalu hi̧ haniri ɓa mbɔl ké na tul woiri#13.14 Sa̧w nzak vbeh ɓahri, wɔk bɔk hani. Zezu ɓah ɓay wɔk bɔk ya, ke ɓah ɓay pihna mgbal. Wɔ́k bɔk ɓa pihna mgbal ké ta̧w ziɓri. Sa̧wu mí gunbɔk pihna wɔk bɔk hi̧ mbaŋ ye ya, Zezu ba, mbi pihna-u. Í ki̧ Mbete Galaɗri 5.13 ɓay tu ɓahri se, Zezu ɓah ɓay laɓ pihna mgbal hi̧ hani. , 15ɓayu ké pihna-u mí-i sɔk wuri ɓay í ndɔl fe laɓna bi-aw. 16Munu, mi laɓ pihna mgbal ɓa ketina. Mi ƴo ɓah ɓayay hi̧ wuri, mgbal mba tul bahgaŋ ye ya. Gun nzak pihna kara mba tul nzuk-pih ni ya pi. 17I tu fe-uri tu le, pol tehna ƴo ziŋ wuri, gelke i ƴo ndɔl fe laɓna ŋgernzuk woiri-ay. 18Mí pol tehna-ay ɓah ɓay tul woiri riw ya. A bi ké mi ɗi wuri, mi tu wuri tu. Le ɓay ké vbeh ɓil mbete Ŋgerzah lewsa̧ ra ƴo laɓ ɔh ke gelu. Ɓay ra ɓahri, nzuk ké ndoh ndɔk fe su̧na mbew ziŋ mi ra, ik tul bi siɓa ke bɔk ye#13.18 Ɓayay na ɓil Mbete Siŋ (Psaumes) 41.9.. 19Mí guri-ay mi ƴo ɓah ɓayu hi̧ wuri ɓay seh ké fe-u ɓá ti̧h le, i kán law tul bi ɓahri, mi ƴo ri ɓa a ye. 20Munu, ɓay pol tehna-aw ɓa ketina. Mi ƴo ɓah ɓayay hi̧ wuri, nzuk ké ya̧ gun nzak pihna bi le, ke ya̧ mi munu. Nzuk ké ya̧ mi le, ke ya̧ nzuk-pih mi munu. »
21Zezu ɓah ɓay kaŋ, mí law ye lu ni hi̧ ke te-teh ɓay Ŋgerzah ra ɓahri : « Munu, ɓay ké vbeh lewsa̧-aw ɓa ketina. Mi ƴo ɓah hi̧ wuri ɓahri se, nzuk mbew ké sakra woiri-ay ɓay te mi. »
22Nzuk-dih fal yeri ko kona ma nun haniri. Gosoɓay zi niri. Ku tu ɓay tul ge mí Zezu ƴo ɓah-u ya. 23Gun sana ye ké ɓa nzuk-dih fal ye a hani kaɓ ɓel ye. 24Bale Simu Piyer te ta̧y nun hi̧ ni, ké vbi Zezu ɓahri, ɓayaw ra ke ɓah si tul ge le ?
25Mí nzuk-dih fal ye ra ndoh nzak ye vbi Zezu ɓah : « Ŋgernzuk, ɓay ké mu ɓah ra si tul ge le ? »
26Zezu yih nzak ye : « Mi duk peŋ ké gahay mí-i ndoh hi̧ nzuk dale, a ye munu. »
Bale ke gɔh peŋ, mí ke duk ké gahay hi̧ nzuk-dih fal yeri titilu ke tul Zudas gun Simu ké Isikariyoɗ#13.26 Sa̧w nzak vbeh ɓahri, duk ké gahay hi̧ Zudas gun Simu ké Isikariyoɗ. Ké nzak fe su̧na ti̧hmbih-i guy buma, ɓa fe laɓna ŋgernzuk dúk peŋ ké gahay hi̧ nzukri ké kaɓ nzak fe su̧na ziŋ ni titilu ke nzuk ké kaɓ ɓel ye ké fál ndɔk lakna. Sa̧wu mí ku tu a ge mí ɓay te Zezu ya. Gbam woyri la-lak. Mí nah ten fe laɓna-u hi̧ karaŋri lah ɓa gah-u.. 27Zudas ɓá ya̧ peŋ bale, mbay záh tukala gi rih tul ye.
Mí Zezu ɓah hi̧ ni ɓahri : « Mú laɓ fe ké mu laɓu wara. »
28Nzuk-dih fal yeri kú-u kaɓ nzak fe su̧na ziŋ ni, mbew tu ɓay ké Zezu ɓah ke Zudas ya. 29Nzuk a haniri ker ɓahri, Zezu pih Zudas si yéh fe ti̧hmbih a hani ké toŋ kandɔk ké Zudas ɓa nzuk-mbek lari woyri mini ke pih ni si hi̧ fe hi̧ nzuk sehri.
30Zudas ya̧ peŋ ra bale, ke ti̧h ɓa gah-u. Gel si-sih ɓa suŋ.
31Zudas ti̧h tɔr bale, Zezu ɓahri se : « Aŋay riŋ ɗina gun nzuk pirmatul mgbe da. Riŋ ɗina Ŋgerzah kara mgbe ké tul gunu da pi. 32Ŋgerzah ɓay hi̧ riŋ ɗina gun nzuk pirmatul ɓá mgbe. A ye kara ke ɓay hi̧ riŋ ɗina ye-aw ɓay mgbe wara.
33Gun biri, mi káɓ ziŋ wuri zah ɓáy. I ƴáh mi, mí ɓay ké mi ɓah hi̧ ŋgernzuk ziɓri-aw, guri mi ƴo ɓah hi̧ wuri, i mah si gel ké mi él si ma mari ya. 34Bolkusol a foyu mí-i poŋ hi̧ wuri-ay : Í sa haniri. Law sana ké mi sa woiri ra, í sa haniri kaŋ pi. 35Gelke i sa hani le, nzukri riw ɓay tu ɓahri, i ɓa nzuk-dih fal biri ɓay law sana-aw. »
36Simu Piyer ba, ɓah : « Ŋgernzuk, fál suŋ mú-u si ma mari le ? »
Zezu yih nzak ye : « Gel sina bi ra mu mah si ziŋ mi aŋay ya. Seh a ɓoru dara mú-u si fal bi ɓáy. »
37Piyer ɓahri : « Ŋgernzuk, ɓay fe mí-i mah si guri ya le ? Mi póŋ mun bi hi̧ hul ɓay tul wo. »
38Zezu yih nzak ye ɓahri : « Mu póŋ mun wo hi̧ hul ɓay tul bi ley ? Mu mah si ziŋ mi ya ɓa ketina. Mi ƴo ɓah ɓayay hi̧ mu. Dara tuhndoy mgbal ɓá kah le, mu má̧y ɓay tul bi bɔk say ɓahri, mu tu mi ya. »
اکنون انتخاب شده:
Mbete Za̧h 13: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
