Mbete Za̧h 14
14
1Zezu el ɓahri se : « Í hi̧ kerɓay ɓá gbur law woiri ya. Í kan law sa tul Ŋgerzah, í kan law tul bi pi. 2Ké puh bah bi, vulri ŋgi̧-ŋgi̧. Vulri ta-a le, mi ta sɔk wuri ya ɓay fe le, mi si ma mari ɓay lek gel geŋ wuri. 3Mi sí, mi lék gel dale, mi él gi, mi fá̧h wuri ma ta̧w bi le, i káɓ ziŋ mi ɓáy. 4Gel sina bi ra, i tu mahful tu-tu. »
5Toma ɓah : « Ŋgernzuk, nah tu gel sina wo ya. Ani mí nah mah tu mahfulu le ? »
6Zezu ɓah : « A bi mí-i ɓa mahful, mi ɓa ketina, mi ɓa sa̧w ɔkna. Nzuk kal ké ta̧w bi ya le, ke ká̧h ta̧w baah ya. 7I tu mi tu le, i ɓay tu baah pi. Guri kara i tu ni da, mí i ko ni ko. »
8Filiɓ ɓah : « Ŋgernzuk, mú sɔk na bah wo. Nah ko ni le, mah na da. »
9Zezu ba, ɓah : « Filiɓ, mi ƴo ziŋ wuri sew mah fe mú-u tu mi ya ɓáy ley ? Nzuk ko mi le, ke ko baah da. Ani mú-u ɓahri, mí sɔk wuri baah ɓáy le ? 10Mi ɓahri se, mi ƴo ke baah, baah ƴo ziŋ mi. Law wo mgba ɓayu ya ɓáy le ? Ɓayri ké mi ɓah-aw, mi ɓah ke tul bi ya. Baah ké kaɓ ziŋ mi mí ƴo laɓ fe laɓna ye. 11Í kan law woiri tul bi ɓahri se, a bi mi ƴo ke baah, baah ƴo ziŋ mi. I lah ɓay bi ya le, í kan law tul bi ɓay tul fe laɓnari ké mi laɓ.
12Munu, mi ƴo laɓ fe laɓna baah ɓa ketina. Mi ƴo ɓah ɓayay hi̧ wuri, nzuk ké law ye ƴo ziŋ mi le, ke ɓay mbi nzak pihna bi. Mí fe laɓna nzuku ɓay mba fe laɓna biri-aw mba-mba ɓáy. Ɓay fe le mi ƴo tɔrna ma ta̧w baah. 13Kandɔkaw mí gelke i vbi ɓay fe ke riŋ bi le, mi láɓ fe-u ɓay hi̧ riŋ ɗina baah ɓá mgbe ké tul gun ye. 14Gelke i vbi ɓay fe ke riŋ bi le, mi láɓ fe-u. 15I sa mi le, bolkusol biri mí i ƴó tulu. 16Kandɔkaw a bi mí-i ɓay vbi baah, mí ke píh ke nzuk-hew wuri a ɓoru ɓay ké ƴo ziŋ wuri ɓa ŋgɔh.
17Nzuk-hew wuri-aw ra mí ɓa a ye Tem Ketina. Nzuk tukalari mah ya̧ ni ya ɓay fe le, ku ko ni ya, ku tu ni ya. Mí a woiri ba, i tu ni ɓay fe le, ke kaɓ ziŋ wuri, mí ke ƴo mbew ziŋ woiri pi. 18Mi ta poŋ wuri ɓa gun sehleri ya. Le mi él gi ziŋ wuri ɓáy. 19Nam ndi̧ ɓáy le, nzuk tukalari ɓay ko mi mba. A woiri ba, i kó mi ɓay fe le, a bi mí-i ɔ-ɔkna. Kandɔkaw mí a woiri kara i ɓay ɔ-ɔkna kaŋ pi. 20Namu-aw dale, i tú ɓahri se, a bi mí-i ƴo ke baah, a woiri i ƴo ziŋ mi, a bi kara mi ƴo ziŋ wuri pi. 21Nzuk mgba bolkusol bi ndɔk seɗe, mí ke ƴo tulu le, nzuku sa mi. Nzuk-sa mi ra law sana baah na tul ye. A bi kara mi sá ni, mí-i él hi̧ ni ke kó mi pi. »
22Zudas a ɓoru, ke ta ɓa Zudas Isikariyoɗ ya, ke ɓah : « Ŋgernzuk, ani mí mu ɓay hi̧ náh ko mu, mí nzuk tukalari ɓay ta ko mu ya le ? »
23Bale Zezu yih nzak ye ɓahri : « Nzuk sa mi le, ke ƴo tul ɓay bi. Baah kara ɓay sa ni pi. Mí nah gí ta̧w nzuku ɓay kaɓ kaɓna ziŋ ni. 24Nzuk sa mi ya le, ke ƴo poŋ ɓay bi. Ɓay ra ké i lah ke nzak bi ta ɓa ɓay ké ti̧h ke tul bi ya, wara le ɓa ɓay ké baah nzuk-pih mi ɓah. 25Mi ɓah ɓayawri hi̧ wuri ke sewri ké mi ƴo ziŋ wuri.
26Nzuk-hew wuri a ye Tem lawpuki ra, baah ɓay pih ni ke riŋ bi. A ye mí ke fírma wuri feri riw. Kandɔkaw mí ke dúm law woiri ké tul ɓay biri gbam.
27Ɗeŋ, mi poŋ ku̧ tul woiri. Ɗeŋ bi mi hi̧ wuri. Mi hi̧ ɗeŋ kandɔk tukala hi̧ ɗeŋ ya. Kaŋ dale í hi̧ kerɓay ɓá gbur law woiri ya. Law woiri ɓá se wuri hȩkme ya. 28Mi ɓahri se, ké i lah da-ay mi ƴo tɔrna mí-i él gi ziŋ wuri ɓáy. I sa mi le, law woiri ɓá rih wuri ɓay tɔrna bi ma ta̧w bah bi ɓay fe le, baah ra mba mi mba. 29Kandɔkaw mí-i ɓah hi̧ wuri pol dara fe-u ɓá ti̧h ɓáy, ɓay seh ké fe-uri ɓay ti̧h le, i kán law sa tul bi.
30Mi ta ɓah ɓay hi̧ wuri ɓa ŋgi̧-u mba ɓayu ké mbay a tukala a ye mbay záh tukala ƴo gina. A ye ke ta ke ɓay tul bi ya. 31Keni-aw kara ur síɓa, náh tɔr wuri si nzɔh nun ye ɓay hi̧ nzuk tukalari ɓá tu ɓahri, mi sa bah bi, mí-i ƴo tul bolkusol ye ɔh. »
اکنون انتخاب شده:
Mbete Za̧h 14: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
