Mbete Za̧h 12
12
1Toŋ nam tɔtɔklɔ ɓay hi̧ nam ti̧hmbih-i guy buma ɓá ka̧h bale, Zezu tɔr si Beɗtani. Ke kaɓ kerpuh Lazar. Lazar ɓa nzuk ké Zezu hi̧ ni ti̧h ke puh záh ra. 2Mí Marta mgba ni gahru. Lazar ke nzuk a ɓoruri kaɓ nzak fe su̧na ra ziŋ ni. 3Dale Mari mbi kuh num ba̧ri kú-u zuh ke sa̧wkpuh nar. Yi̧hna-u mah ke rehta kilo. Numu ɓa num a kpakpaŋu, lari-u ŋger mbamba. Mí ke fer numu ku̧ bɔk Zezu ba, ke el nu̧h bɔk Zezu ke pirmatul ye. Ba̧ri-u ri̧h ɓil vul tȩɗ tȩɗ. 4Bale Zudas Isikariyoɗ nzuk-dih fal Zezu a hani mbew, a ye ké-e ɓay te Zezu ra, ke ɓahri, 5ɓay fe mí ke ɗam numay ya le ? Ke ɗam le, ke zíŋ lari-u mah lari pihna mbihmbam mbew mah so keni ko̧hkori.
6Kerɓay Zudas na tul nzuk sehri ya. Ke ɓah kandɔkaw ɓay fe le, ke ɓa riɓa. A ye ke ɓa nzuk-kɔr sanduku lari woyri, mí ke ƴo rih lari-u ndi̧ ndi̧.
7Wara mí Zezu ɓahri : « Zudas, mú poŋ ni ké nu̧h mi numay. »
Ke el ɓahri se : « Numu-ay mbek ké ta̧w Mari ɓay nam-gɔr mi munu. 8Nzuk sehri ƴo ziŋ wuri kpatara, mí a bi le mi káɓ ziŋ wuri kpatara ya. »
9Daɓa ziɓri ɓa ŋgi̧-u tu ɓahri, Zezu ƴo Beɗtani-aw, mí ku ur si ri. Ku si ɓay tul Zezu kaŋto ya. Le ku si ɓay ko Lazar ke nun woyri, a ye ké Zezu hi̧ ni ti̧h ke puh záh. 10Kandɔkaw mí ŋgernzuk fe puhna Ŋgerzahri lek ɓay i Lazar pi. 11Ɓay fe le ɓay tul ye mí ziɓri ɓa ŋgi̧-u poŋ niri mí el kan law tul Zezu.
12Tipele-u daɓa nzukri ɓa ŋgi̧-u ké gi gel ti̧hmbih-i guy buma ra lah ɓahri, Zezu ƴo gi ma Zurusalem bale, 13ku ti̧h yir ke gay kpuhri ké ndɔk woyri gbiri gbiri nzɔh nun ye. Ku vba̧ nzak le, ku vba̧ ra ɓáy ɓahri : « Nzuk-ya̧ na, mú ya̧ na. Mgbɔkɔ Gaŋ tul feri riw ku̧ tul wo ké mu gi ke riŋ ɗina ye, a wo Ŋgermbay gun Izarayelri. »
14Zezu ziŋ gun bamnde mí ke hil kaɓ tulu ƴo gina#12.14 Í ki̧ gun ɓay ké si ke gel ki̧na Mbete Matiye 21.5 ɓay lah ɓay mbay ké kaɓ tul ɗeŋe.. Fe-u laɓ kandɔk ké mbete Ŋgerzah vbeh ɓayu lewsa̧ ɓahri : 15« Í laɓ hȩkme ya, a woiri gun Zurusalemri. Í ko mbay woiri kaɓ tul gun bamnde ƴo gina. »
16Ke seh-u-aw fe-u na nzuk-dih fal yeri nduŋ dan tu ɓayu. Seh ké riŋ Zezu mgbe ɓay ti̧hna ye ke pa̧ymun a foyu dara mí ku ker ɓay fe-uri ké na ɓil mbete Ŋgerzah ké ɓah ɓay tul ye ɓáy, mí fe-uri laɓ ke nzaku nzaku kandɔk ké mbete ɓah lewsa̧.
17-18Nzukri ké nzɔh nun Zezu ra lah ké nzak nzukri ké ko Lazar ti̧h ké tupal nam ti̧hna ye ke záh. Sa̧wu mí daɓa nzukri-aw ƴo nzɔh nun Zezu. Ɓay fe le ku lah ɓay fe saŋ ké-e laɓaw. 19Kaŋaw ba, fariziri ɓah ké sakra haniri ɓahri : « Nah ko wuri, i mah laɓ fe ɓoɗ mba. »
Ku el ɓahri se : « Í ko nzuk a suŋ suŋ gbam toŋ fal ye. »
20Nzuk a haniri ké sa̧w woyri ɓoɗ kara hil gi gel ti̧hmbih ké Zurusalem ɓay dim Ŋgerzah pi. 21Ku gi ta̧w Filiɓ ké puh ye Beɗsayda ké tusiɓa Galile, mí ku vbi ni ɓahri : « Ŋgernzuk, nah yih ɓay ko Zezu. »
22Filiɓ si ɓah ɓayu hi̧ Andere, mí ku si seɗe mbɔk ɓah hi̧ Zezu. 23Bale Zezu yih nzak woyri ɓahri : « Nam mgbena riŋ ɗina gun nzuk pirmatul ka̧h da. 24Munu, namu ka̧h da ɓa ketina. Mi ƴo ɓah ɓayay hi̧ wuri, gelke ti̧hri naŋ mbew toh siɓa, mí ti̧h ya le, ɓay na mbew yaŋ kpatara. Gelke lawu ti̧h poŋ zah-u hu le, ɓay laɓ ti̧hri a ɓoru ɓa ŋgi̧-u. 25Nzuk ké yih su̧ tukala le ke ɓay zi-u. Mí nzuk ké poŋ kerɓay-ƴah ɓil ye ké tukala le, ke ƴo kɔr tul ye ke ɔkna si ka̧h sew ké na ɓa ŋgɔh. 26Nzukay ké yih ɓay laɓ pihna hi̧ mi le, ké toŋ fal bi. Kandɔkaw mí gun-laɓ pihna bi ɓay kaɓ gel ké mi kaɓ ri pi. Nzukay ké yih ɓay laɓ pihna hi̧ mi ra baah ɓay pir ni. »
27Ke el ɓahri se : « Law bi ƴo kuŋ kuŋna. Mi ɓáh ra ani ɓáy le ? Mi ɓáhri, baah, mú ten mi ké ɓil koseh ké ɓay ziŋ mi-ay, kaŋ le ? Mi ta ɓah kaŋ ya ɓay fe le, ɓay tul nam koseh-aw mí-i gi ɓayu. 28Baah mú hi̧ riŋ wo ɓá mgbe ɓa fe riŋ ɗina wo. »
Bale kusol mgbe ké nunmbam ɓahri : « Riŋ ɗina bi mgbe da, mí ɓay el mgbe ra ɓáy. »
29Daɓa nzukri ké ƴo gelu lah kusol ké mgbe ra. Nzuk a haniri ɓahri, mbam mí nduh-aw. Nzuk a ɓoruri ba, ɓahri, tem nzak pihna mí ɓah ɓay ziŋ ni-aw. 30Zezu yih nzak woyri, mí ke ɓahri : « Ɓay tul bi mí kusol mgbe-aw ya. Wara le kusolaw mgbe ɓay tul woiri. 31Aŋay kara nam-kuŋ salɓay kan tul tukala ka̧h da. Aŋay mí mbay záh tukala, ku ɓay ɗer ni ke gel kaɓna ye vbu kala. 32A bi ba, nam kú-u ɔr tul bi kan síɓa dale, mi fá̧h nzukri gbam gi ta̧w bi. »
33Zezu ɓah kaŋ ɓa fe sɔkna hul ye ké-e ɓay hu-u.
34Mí daɓa nzukri yih nzak ye ɓahri : « Nah lah ɓil mbete bolkusol Ŋgerzah ɓahri se, Ŋgermbay ɓay kaɓ ɓa ŋgɔh wa, ani mí mu ɓahri, ku ɓay ɔr gun nzuk pirmatul kan síɓa le ? A ge mí ɓa gun nzuk pirmatul ra le ? »
35Bale Zezu ɓah hi̧ niri ɓahri : « Gel tehna ƴo teh gel tul woiri zah ɓáy. Í si wuri sina ké gel tehna ra rɔkɔ tirima ɓá riŋ wuri mo̧r. Nzuk si sina ké ɓil tirima le, ke tu fál suŋ mí ke si ma ma ri ya. 36Kandɔk ké gel tehna ƴo ri ɓáyay, í kan law woiri sa tul gel tehna-u ɓay í na ɓa gun gel tehnari. »
Zezu ɓah kaŋ, mí ke ti̧h roŋ tɔr si kaɓ duh gel.
37Kandɔkaw mí Zezu laɓ fe saŋri ɓa ŋgi̧-u hi̧ nzukri ko, mí nzukri-aw kan law tul ye ya. 38Fe-u laɓ kaŋ ƴo hi̧ ɓay ké Ezay gun nzak pihna Ŋgerzah ɓah lewsa̧ laɓ ɔh. Ɓayu ɓahri, Gaŋ tul feri riw, a geri mí kan law tul nzak pihna ké nah ka-kah-u ra le ? Sa̧wɓay nzuk ké ɓa ndɔk lakna Gaŋ tul feri riw ten mun hi̧ nzuk a suŋri mí ko le#12.38 Ɓayu na ɓil Mbete Esaïe 53.1. ? 39Sa̧w ɓay Ezay ra mí nzukri-aw ziŋ ŋgerna-kan law woyri tul Zezu ya. Ezay ɓahri se, 40ke ra̧h nun woyri ra̧h rɔkɔ nun woyri ɓá ko. Ke hi̧ law woyri kpuh rɔkɔ law woyri ɓá guh le, kú sɔɓ el gi ta̧w Ŋgerzah, mí ke gah niri#12.40 Ɓayu na ɓil Mbete Esaïe 6.10.. 41Ezay ɓah kaŋ ɓay fe le, ke tu riŋ ɗina Zezu tu, mí ke ɓah keni ɓayaw.
42Ŋgernzuk ziɓri kara ɓa ŋgi̧-u kan law woyri tul Zezu, mí ku ɓah ke nzak woyri ya. Ku laɓ hȩkme nun fariziri rɔkɔ kú ni̧h niri ke vul misoŋ. 43Ŋgernzukri-aw taw ɓay riŋ ɗina a nzuk pirmatulri poŋ riŋ ɗina a Ŋgerzah.
44Zezu vba̧ nzak ɓeleŋ, ke ɓah ɓay ɓahri, nzuk ké kan law tul ye le, ke kan law tul ye ke hȩk ya wara le, nzuk-pih ni mí ke kan law tulu-aw. 45Nzuk ké ko ni ye le, ƴo ko nzuk-pih ni. 46A ye-ay mí ke ɓa gel tehna ké tukala-ay ɓay hi̧ nzuk a suŋ suŋ ké kan law sa tul ye le, ta kaɓ ɓil tirima ya. 47Nzuk lah ɓay ké-e ɓah-ay, mí nzuku poŋ ɓayu le, a ye mí ke kuŋ salɓay kan tul ye ya, ɓayu ké-e gi tukala-ay ɓay kuŋ salɓay hul ku̧ tul nzukri ya. Wara le ke gi ɓay ya̧ nzukri. 48Nzukay ké to suyɓay ye ma kpah, mí nzuku sa ya̧ ɓayu ya le, salɓay hul ké ɓay ta tul nzuku ƴo ri. Ɓay ké Zezu ɓah-ay mí kuŋ salɓay kan tul nzuku nam a ɔh tɔru. 49Ɓay fe le ke ɓah ɓay ke tul ye ya wara le ɓa bolkusol baah nzuk-pih ni mí ke ƴo ɓah-ay. 50Mí ke tu ɓahri se, bolkusol baah ɓa ɔkna a ŋgɔh-u bale, ke toŋ ɓah-u. Kandɔkaw mí ɓayri ké-e ɓah le, ke ɓah ke bolkusol baah ké baah ɓah hi̧ ni-ay.
اکنون انتخاب شده:
Mbete Za̧h 12: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
