Mbete Za̧h 11
11
1Nzuk a hani-u riŋ ye ɓa Lazar na sena. Puh ye ɓa Beɗtani ké tusiɓa Zude, puh Mari ke yi̧n ye Marta pi. 2Mari ra ɓa wu̧y ké fer num ké ba̧ri-u fu̧ buy buy ku̧ bɔk Gaŋ tul feri riw el nu̧h ri ke pirmatul ye#11.2 Ɓay tu ɓay Mari ké fer num ra í ki̧ Mbete Za̧h 12.1-8.. Ke ɓa manah Lazar ké na sena ra. 3Manah yeri seɗe mbɔkaw pih nzak pihna si ta̧w Zezu ɓahri, ŋgernzuk ɓá lah le, mun ya̧h ye se-se. 4Zezu lah kaŋ bale, ke ɓahri : « Sena Lazar ra ɓa sena-ziŋ hul ya. Sena-u laɓ ɓay hi̧ riŋ gun Ŋgerzah ɓá mgbe keni ɓay tul riŋ ɗina Ŋgerzah. »
5Zezu sa Marta ke yi̧n ye Mari ke Lazar sa. 6Ke lah ɓay sena Lazar kaŋ ba, ke kaɓ falu nam seɗe ɓáy.
7Bol falu ke ɓah hi̧ nzuk-dih fal yeri : « Náh el wuri si tusiɓa Zude ɓáy. »
8Nzuk-dih fal yeri ɓah : « Rabbi, laɓ nam ŋgi̧ ya ɓáy, ku yih ɓay vbuk mu ke kasaw ɓay i mu wa, mu yih ɓay náh el si Zude ra ɓáy le ? »
9Ke yih nzak woyri ɓahri : « Seh ti̧h, ɓa se-seh, kaŋ ya le ? Nzuk si sina ke se-seh le, ke ta ɓe fe ya ɓay fe le, gel tehna ƴo teh gel hi̧ nzuku. 10Mí nzuk si sina ke suŋ le, ke ɓe fe ɓay fe le, gel tehna teh ké pol ye ya. »
11Ke ɓah kaŋ, mí ke el ɓahri : « Ya̧h wahri Lazar na nam. Mi si ri ɓay tom ni. »
12Nzuk-dih fal yeri ɓahri : « Ŋgernzuk, ke na nam le, ke zíŋ mun gahna ɓáy. »
13Zezu ɓah ɓay hul Lazar, mí a woyri ku ker ɓahri, ke ɓah ɓay nam ké-e na.
14Bale ke ɓah ɓa teh-u ɓahri : « Lazar hu-hu. 15Law bi mí rih mi ɓay tul woiri. Í kan law tul bi ɓay fe le, mi ta gelaw ya. Náh tɔr wuri si ta̧w ye. »
16Toma kú-u ɗi ni ɓa gun hore ra ɓah hi̧ mbaŋ yeri nzuk-dih fal Zezuri ɓahri, kú si hu ziŋ ni.
17Ku ka̧h Beɗtani bale, Zezu lah ɓahri, ku gɔr Lazar laɓ nam niŋ da.
18Ur ke Beɗtani ɓay si Zurusalem ra mah salful say yaŋ. 19Daɓa ziɓri gi kaɓ ziŋ Mari ke Marta ɓay hul manah woyri.
20Marta lah ɓay gina Zezu, mí ke ur si nzɔ́h nun ye. Mari ba, kaɓ sa vul. 21Marta ka̧h ta̧w Zezu, mí ke ɓahri : « Ŋgernzuk, mu ƴo ra gelay le, manah bi ta hu ya. 22Aŋay kara mi tu ɓahri, fe a suŋ suŋ ké mu goŋ Ŋgerzah le, ke ɓay hi̧ mu. »
23Bale Zezu ɓah : « Manah wo ɓay el ke puh záh gi. »
24Marta ɓah : « Mi tu ɓahri, sew a ɔh tɔru, sew ké záhri ɓay ti̧h ke puh záh ke pa̧ymun a foyu, a ye kara ke él kaɓ ke pa̧ymun a foyu pi. »
25Dale Zezu ɓah hi̧ ni ɓahri : « A bi mí-i ɓa nzuk sa̧w ɔkna. Mi ɓa nzuk-hi̧ záhri ti̧h ke puh záh ke pa̧ymun a foyu. Nzuk kan law sa tul bi, mí hul i ni kara, ke él kaɓ ke pa̧ymun a foyu ɓáy. 26Nzukri ké ƴo ke ɔkna, a woyri gbam ku ɓa nzukri ké kan law sa tul bi. Nzukuri ta hu mba wu̧m gaŋ. Marta, mu ya̧ ɓayay ya̧-ya̧ gaŋ le ? »
27Marta ɓah, ke ya̧-ya̧ gaŋ. Ke ɓahri se : « Ŋgermbay, law bi te tul wo gaŋ. A wo mú-u ɓa Ŋgermbay ké nah ƴo geŋu, gun Ŋgerzah ké ɓay gi tukala. »
28Marta ɓah kaŋ, mí ke sɔɓ mun el si ɗi yi̧n ye Mari. Ke ɗakla ni ɓahri : « Metere gi ƴo ma gelay. Ke ƴo ɗi mu. »
29Mari ba, ur ɓa gah-u si ta̧w Zezu. 30Zezu rih ɓil Beɗtani ya. Ke ƴo sa gel ké Marta ziŋ ni ra kɔɓ ɓáy. 31Ziɓri ké kaɓ vul ké ta̧w Mari ɓay hul manah ye ra ba, ko ni ké-e ur ɓa gah-u ti̧h-aw, mí ku ur dih bol ye. Ku ker ɓahri, ke si ma tupal ɓay vuh rew sa̧.
32Mí Mari si ta̧w Zezu. Ke ko ni, mí ke lih siɓa ké pol ye ɓahri se : « Ŋgernzuk, mu ƴo ra gelay le, gun mah bi ɓay ta hu ya. »
33Zezu ko Mari ƴo vuh rew, ke ko ziɓri ké dih fal ye ƴo vuh rew pi bale, law ye se ni, kerɓay gbur law ye. 34Mí ke ɓahri : « Gel suŋ mí i gɔr ni ké ri le ? »
Ku ɓah : « Ŋgernzuk, mú gi ko. »
35Mbihnun mbaŋ law Zezu.
36Ziɓri ko, mí ku ƴo ɓahri : « A ye-ay ke yih Lazar mbamba. »
37Mí ziɓ a haniri ba, ɓahri : « A ye ké-e mgbur nun ra̧wri ra wa, ke ta ke ŋgerna ɓay gboh hul ɓá i Lazar ya le ? »
38Law Zezu el se ni ra ɓáy, mí ke si ka̧h tupal. Tupal ra ɓa hoh kasaw. Ku mbek hulu ké ri. Ku mbih nzaku ke baw kasaw.
39Mí Zezu ɓah : « Í sɔkrɔ kasaway ma fal. »
Marta manah hul ra ɓah : « Ŋgernzuk, ku mbek hulu laɓ nam niŋ da. Ɓay fu̧-fu̧ wara. »
40Zezu ba, ɓah : « Ani mí-i ɓah hi̧ mu le ? Mu kan law tul bi le, mu kó riŋ ɗina Ŋgerzah. »
41Mí ku sɔkrɔ kasaw ra. Zezu ɔr nun ye ma síɓa mí ke ɓahri : « Baah, mi el ke tumbɔl hi̧ mu ɓay fe le, mu lah mi lah. 42A bi mi tu ɓahri, mu ƴo lah mi kpatara. Mí nzukri ké ɗoŋ mi-ay mi ɓah ɓay tul woyri ɓay hi̧ kú lah, kú ya̧ ɓayu ɓahri, a wo mú-u pih mi gi ɓa ketina. »
43Mí ke el ɗi ni ɓeleŋ : « Lazar, mú ti̧h. »
44Mí hul ra ti̧h dukuku. Gar kú-u kahra keni ndɔk ye ke bɔk ye, ke gar-kuh nun ye kara sel ya ɓáy.
Zezu ɓah : « Sel wuri ni, í poŋ ni, ké tɔr si puh. »
45Daɓa ziɓri ké gi kaɓ ziŋ Mari ra ko fe laɓna Zezu-aw dale, ku kan law sa tul ye.
46Ziɓ a ɓoruri ba, tɔr si sɔk fariziri fe ké Zezu laɓ ra.
47Bale ŋgernzuk fe puhna Ŋgerzahri ke fariziri ɗi maŋna ŋgernzuk-kuŋ salɓayri. Ku ƴo ɓahri : « A fe mí nah laɓ wuri le ? Fe saŋri ɓa ŋgi̧-u mí gun wo̧ro-aw ƴo laɓu. 48Ko ya mí nah poŋ ni, mí ke laɓ fe-aw ma pol pol le, ziɓri riw ɓay kan law tul ye. Dale rɔmri ɓay gi ɓéɓ vul kani wah pi, ɓay duh sa̧w wah pi. »
49Ŋgernzuk fe puhna Ŋgerzah ke sewu-aw ɓa Kayif mí ƴo haŋsekle woyri. A ye ba, ke ɓahri : « A woiri-ay ra, tul woiri ta-a lo ? 50I ko ya le ? Su-su ɓay nzuk mbew ɓá hu ɓay tul wah sa̧w nzuk Ŋgerzahri rɔkɔ mi̧hri sa̧wu ɓá duh. »
51Ɓay ɓahna ké ŋgernzuk fe puhna Ŋgerzah ɓah-aw ti̧h ke tul ye ya. Kandɔk ké-e ɓa ŋgernzuk fe puhna Ŋgerzah ke sewu mí Tempuki ndoh ɓayu ké nzak ye hi̧ ni ke ɓah, Zezu ɓay hu ɓay tul sa̧w ziɓri. 52Mí ke hú ɓay sa̧w ziɓri kaŋto ya, wara le ke hú ɓay gun Ŋgerzahri ké zikri ké tusiɓari gbam ɓay kú mbu̧h hani mbew ɓa sa̧w ye#11.52 Í mgba Mbete Efezeri 2.18-19 tuh ke gel ki̧na-ay..
53Ur ke seh maŋna-aw bale ŋgernzuk ziɓri-aw lek nzak woyri ɓay i ni. 54Kaŋ mí Zezu si ha̧rma ké gel daɓa ké tusiɓa Zude mba. Mí ke loh si Efarayim puh a hani ké ɗih ya ke lawkɔr, mí ke kaɓ ri ke nzuk-dih fal yeri.
55Ti̧hmbih-i guy buma ziɓri toŋ ɗih mba ɓay hi̧ ɓá laɓ. Wara mí ziɓri ɓa ŋgi̧-u ur ke puh woyri ɓoɗ ɓoɗ hil si ka̧h Zurusalem dara ti̧hmbih-u ɓá laɓ ɓáy. Ku yih lek mun woyri ɓay si ke fe puhna-aw ma vul kani Ŋgerzah. 56Mí ku ƴo ƴah Zezu. Ku ƴo ɓil ila vul kani Ŋgerzah, ku ɓah ké sakra haniri ɓah : « I ker wuri ani le ? Ke ta gi gel ti̧hmbih-ay ya mini ani le ? »
57Ŋgernzuk fe puhnari ke fariziri pih bolkusol hi̧ nzukri ɓahri se, nzuk ko gel ƴona Zezu le, ɓá sɔk niri gelu ɓay kú mgba ni.
اکنون انتخاب شده:
Mbete Za̧h 11: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
