Salmow 18
18
Gwesper 3
SALM 18.
Diligam te, Domine.
1My a'th kar, A Arloedh, ow nerth; an Arloedh yw ow harrek, ha'm kastell, ha'm delivrer : ow Duw, ow harrek krev may hwilav skovva ynno, ow skoes, ha korn ow selwyans, ow dinas.
2My a elow war an Arloedh, neb yw gwiw dhe vos gordhys : ytho my a vydh selwys a'm eskerens.
3Yth esa kerdyn ankow a-dro dhymm : ha frosow sherewynsi a wrug euth dhymm.
4Yth esa kerdyn ifarn a-dro dhymm : yth esa antylli mernans a-dheragov.
5Y'm anken my a elwis war an Arloedh : ha dhe'm Duw y kriis vy rag gweres.
6Ev a glewas ow lev yn-mes a'n tempel : ha'm kri a-dheragdho a dheuth bys yn y dhiwskovarn.
7Ena an nor a grenas ha kryghylli : ha selyow an menydhyow a grysyas ha krena, rag y vos serrys.
8Mog a yskynnas mes a'y dhewfrik : ha tan a'y anow, ow tevorya; kolennow a dardhas yn flammow a-dhiworto.
9Hag ev a blegyas an nevow, hag a dheuth yn-nans : hag yth esa tewolgow yn-dann y dreys.
10Hag ev a varghogas war jerub ha nija : ev a nijas uskis war eskelli an gwyns.
11Ev a wrug tewlder y gudhans, y babell a-dro dhodho : kommol tewl a dhowr y'n ebron.
12Dhiworth an golewder a-ragdho y gommol a dremenas: keser ha kolennow tan.
13An Arloedh ynwedh a darenas y'n nevow, ha'n Ughella a ros y lev : keser ha kolennow tan.
14Ev a dhellos y sethow ha skattra y eskerrens : lughesennow pals, ha'ga gorra yn deray.
15Ena yth omdhiskwedhas goverow dowr, ha selyow an norvys a veu diskudhys, orth dha geredh, A Arloedh : orth hwyth anall dha dhewfrik.
16Ev a dhannvonas dhiworth an ughelder ha'm kemmeres : ev a'm tennas mes a dowrow pals.
17Ev a'm delivras dhiworth ow eskar galloesek, ha dhiworth an re a'm kas : rag yth ens i re grev ragov.
18I a dheuth er ow fynn yn dydh ow therroesa : mes an Arloedh re beu skoedhyans dhymm.
19Ev a'm dros yn-mes dhe dyller ledan : ev a'm delivras, drefenn bos dhodho delit ynnov.
20An Arloedh re wrug dhymm herwydh ow ewnder : herwydh glander ow diwleuv yth attylis ev dhymm.
21Rag my re synsis fordhow an Arloedh : ha ny dhiberthis yn trog dhiworth ow Duw.
22Rag yth esa oll y vreusow ev a-dheragov : ha ny dreylis vy y ordenansow dhiworthiv.
23Hag yth en vy divlam a-dheragdho : ha my a omwithas dhiworth ow hammweyth.
24Rakhenna an Arloedh re attylis dhymm herwydh ow ewnder : herwydh glander ow diwleuv yn y wolok ev.
25Gans an den tregeredhus ty a vydh tregeredhus : gans an gour divlam ty a vydh divlam.
26Gans an den glan ty a vydh glan : ha gans an den kamm ty a vydh gorth.
27Rag ty a selow an bobel uvel : mes ty a dhre dhe'n dor an dhewlagas woethus.
28Rag ty a enow ow lugarn : an Arloedh ow Duw a wra dhe'm tewlder splanna.
29Rag dredhos my a yll poenya erbynn lu : ha der ow Duw my a yll lemmel dres fos.
30Duw yw divlam y fordh : lavar an Arloedh yw prevys; skoes yw dhe seul a drest ynno.
31Rag piw yw Duw marnas an Arloedh : ha piw yw karrek marnas agan Duw ni?
32An Duw neb a worr grogys a nerth a-dro dhymm : hag a wra ow fordh divlam.
33Ev a wra ow threys kepar ha treys ewigow : ha'm settya fyrv war dylleryow ughel.
34Ev a dhysk dhe'm diwleuv gwerrya : ha'm dywvregh a yll plegya gwarak a vrons.
35Ha ty re ros dhymm skoes dha selwyans : dha leuv dhyghow a'm menten, ha'th weres re'm meurhas.
36Ty a ros spas ledan rag ow hammow yn-dannov : ma na drebuchyas ow dewufern.
37My a helgh ow eskerens ha'ga hachya : ha ny dhehwelav bys pan vons distruys.
38My a's brew ma na allons sevel : i a goedh yn-dann ow threys.
39Rag ty re worras grogys a nerth a-dro dhymm rag an gas : ty re worras yn-dannov an re a sevis er ow fynn.
40Ty a ros dhymm gwarrow ow eskerens : may hallen vy distrui an re a'm kas.
41I a grias, mes nyns esa nagonan dh'aga selwel : war an Arloedh, mes ny worthybis dhedha.
42My a's brew munys avel doust a-dherag an gwyns : my a's trett yn-dann dreys avel leys an stretys.
43Ty re'm delivras dhiworth strifow an bobel, ha'm gorra yn penn an kenedhlow : pobel na aswonnis vy a wra ow servya.
44Kettell glewons ahanav, gostydh yns i dhymm : estrenyon a ombleg dhymm.
45Estrenyon a gemmer digolonn : i a dheu ow krena yn-mes a'ga heryow.
46An Arloedh a vew, ha benniges re bo ow harrek : ha bedhes Duw ow selwyans ughelhes,
47An Duw neb a re dhymm dial : hag a worr poblow yn-dannov,
48Neb a'm delirv dhiworth ow eskerens, ha'm drehevel a-ugh an re a sev er ow fynn : ty a'm delirv dhiworth an gour garow.
49Rakhenna my a'th wormel, A Arloedh, yn mysk an kenedhlow : ha kana gormola dhe'th Hanow.
50Ev a re selwyans meur dh'y Vyghtern : hag a wra tregeredh dh'y Untys, dhe Davydh ha dh'y has bys vykken.
انتخاب شده:
Salmow 18: ASK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Kesva an Taves Kernewek 1997, 2019
© Cornish Language Board 1997, 2019