Salmow 19

Myttin 4

SALM 19.

Coeli enarrant.

1An nevow a dheriv golewder Duw : ha'n fyrmament a dhiskwa ober y dhiwleuv.

2Dydh a gews orth dydh : ha nos a dhiskwa skentoleth dhe nos.

3Nyns eus kows na geryow : nyns yw aga lev klewys.

4Aga lev a yn-mes dhe oll an nor : ha'ga lavarow dhe bennow an norvys.

5Ynna y hworras ev tylda rag an howl, a dheu yn-mes avel gour pries dhiworth y jambour : ow lowenhe avel kampyer dhe boenya yn y hyns.

6Ev a yn-mes a benn an nevow, hag yma y hyns dhe'n penn arall anedha : ha nyns eus travyth kudhys rag y doemmder.

7Lagha an Arloedh yw perfydh, ow kul dhe'n enev dasvewa : dustuniow an Arloedh yw sur, ow ri furneth dhe'n re sempel.

8Arghadowyow an Arloedh yw ewn, ow lowenhe an golonn : gorhemmynn an Arloedh yw pur, ow ri golow dhe'n dhewlagas.

9Own an Arloedh yw glan, ow turya bys vykken : breusow an Arloedh yw len, ha gwiryon yn tien.

10Moy desirys yns i ages owr, ages meur a owr fin : ha hwekka yns i es mel, ha'n gribenn mel.

11Dha was ynwedh yw gwarnys gansa : yma gober meur dhe'n re a wra aga synsi.

12Piw a woer konvedhes y gammweythresow : glanha vy dhiworth ow feghosow kudh.

13Gwith dha was ynwedh rag peghosow bolder; na wrens i maystri warnav : ena divlam vydhav, ha my a vydh glan a gammweyth meur.

14Bedhes lavarow ow ganow ha prederow ow holonn plegadow a-ragos : A Arloedh ow nerth ha'm dasprenyas.

انتخاب شده:

Salmow 19: ASK

های‌لایت

به اشتراک گذاشتن

کپی

می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید

آیات محبوب کتاب مقدس از
Salmow 19