MARK 5
5
Jesu’n Ṭai Karôn Mi Inkhat Amandam
(Mt 8.28–34; Lk 8.26–39)
1Jesu leh asonlehei Galilee Dîr rekhat ting, Gerasa ramṭhen hong katlung jo hei. 2Jesu rakōng chunga inphut ahei sōk lim a khan khava hmun a thlânkhura inphut ahei kasōk pase inkhat in ale’ntōpui hei. Hiva mipa hi ashunga rathla kaṭhamak aleirôna kae; 3khana thlânkhur shung heia aleika-om kae. Tute’num khit a antadator mak jo kae; 4ave-avea akut leh ake thîrhrui vâng anleikhit, tâk thirhrui kha akapot tanna, ake avōkna heia kae. Ama kha ratha aneihêr tûte’n leisur tor mak hei. 5Sûn leh jân thlânhei leh tlânghei katlung bit a kalôna, kapenga khana abinga hlunga insuk-khok a kae.
6Ama’n kahlajap a a-omlai Jesu kha aleihmu; khan chu katlâna ahmai kunga inkuna akamuk, 7khana ka-ônga, “A’nshângpen Pathen Sapa Jesu! Kei heimo namanlo hnōm eng? Pathen jâra, kangek che, kei karâkna apek mak roh!” ati. 8(Ama’n hinga aleiti hi Jesu’n, “Rathla kaṭhamak, hiva mipa hnenga inphut sōksōt roh,” ati jâra kae.)
9Khava jâra Jesu’n ahnenga, “Narahming heimo?” tia ader.
Ama’n amasôna, “Karahming, ‘Ajâm,’ kae, ajârchu katam ung!” ati. 10Khana khava ramṭhen a inphut rathla kaṭhamak-hei kha atirsōt makna sik ama’n Jesu hneng angek a ka-oma kae.
11Khava hnenga khan vok katamtak rup inkhat khava hmebung sira khan thlai ansâk a leika-om hei. 12Khava jâra rathlahei khan Jesu hneng, “Vok-hei hneng son atir roh, anshunga amanhlut roh,” anti. 13Amansesōt jo hei, rathla kaṭhamak-hei kha mipa inphut kasōksōt heia vok-hei shunga vakahlut jo hei. Vok-hei kha ankhenga aja 2,000 kapō hei kae, hmebung kare panga katlânsuk heia dîr shunga katla inhlut sō jo hei.
14Vok kakhemhei kha katlân heia khōpuihei leh hlei rajei heia anvahri manthang joa kae. Omchen kasōk ka-en sik a mihei kha leikasōk hei, 15khana anmani Jesu hneng anhong pha, rathla kaṭhamak katamtak karônpa kha anleihmu jo. Ama khana khan le’n onga, pōn a’nsia kahlim senga leika-om; khana ankhenga anleiṭit jo. 16Khava aleikahmu hei khan rathla kaṭhamak karôn mipa leh vok-hei chunga omchen kasōk kha mihei anhri pek jo hei.
17Khava jâra Jesu’n anram kha adahlon pekna sik heia anleingek.
18Jesu’n rakōng shunga ahlut pha, rathla kaṭhamak leikarônpa khan, “Nakahnung jui che rong!” tia aleingek.
19Tâk Jesu’n leihnōm pek mak. Khava kanek a, ahnenga aleihri pek, “Na-inna, na-innshunghei hneng inle roh, khana Rōngpu’n heituk-hrep mo nachunga atlopek che khana heituk-hrep lungset arôn che mo vamanthei hei roh.”
20Khava jâra mipa kha kasesōt a Khōpui Sôm inti kha katlung bit a, Jesu’n ama sik heituk-hrep mo atlopek jo ti kha avahri pek hei. Khana akathei rakip in inlak anleisak.
Jairus Sanu leh Jesu Pōn Kasit Nuhmei
(Mt 9.18–26; Lk 8.40–56)
21Jesu dîr rekhat ting inle nôk jo. Khava dîr panga khan mipui katamtak akimvea intûp jo hei. 22Khava khōa intûpna inn synagogue a ṭōnkarôn, Jairus kahonga, khana Jesu kha ahmu pha akekunga abinga hong inbok a, 23khana rahnaktak a aleingek, “Kasanu kasin kana hêr jo. Lungsettak a hong roh adamna sik leh ahringna sik achunga nakut avadapek roh.”
24Khava sōa Jesu’n ama leh inṭhōia kase inphut jo. Mi katamtak leh Jesu le’nṭhōi heia mipui in ama kha ankatōmbit a kae.
25Kum 12 thi kajunga khōdeng katheitak nuhmei inkhat leika-om, 26thempu katamtak in anlei en ravâng leidammak. Asêr nei rakip amathlâng sō jo, tâk anat adampui kanek a pha rakip a kakhôk chet-chet jo. 27Amanu’n Jesu chungchânga aleithei; khava jâra, mipui kâra kahonga akahnungting ahei juia, 28abinga aleiti, “Apōnhmor bek um katôn inchu damna kahmu sik.”
29Amanu’n apōn atôn jo, athi jung kha khava phatak a kabâng jo; khana a’nrengna kha kadam jo ti kha abing malung shunga le’nhret. 30Khavatak a khan Jesu’n ama a inphut ratha akasōk kha amanhret jo, khava jâra ama’n akimvea a-en heia ader hei, “Tu’n mo kapōn asit?”
31Asonle he’n anmasôn, “Mipui hiseng in hingtuk hrep ankatōm che nahmu, heisa mo nakatôn kha nalader?”
32Tâk Jesu’n khava katlo mi kha ahmun a sik a-en manve ṭhak a kae. 33Nuhmeinu khan achunga omchen kasōk kha a’nhret a, ṭit innok pum a kahong jo, akekunga inkuna, akadik rakip kha ahri pek jo. 34Jesu’n amanu hneng, “Sanu, nataksen in amandam jo che. Kamōnga se jo roh, na’nrengna inphut dam jo pa roh,” ati.
35Jesu’n hi ahrilai, Jairus inna inphut ṭongkarôn mi ṭhahrep kahong heia ahnenga anleihri pek, “Nasanu kha kathi jo, Oja kha heisik a mo namanbōi sik?”
36Jesu’n anṭong hri kha khôk saktak a rangei pek mak hei, tâk Jairus hnenga ahri, “Ṭimak roh, taksen rōk taksen roh.” 37Khava sōa ama’n Peter, James khana anaipa John tei loa tûte akahnung leimanjui mak hei. 38Jairus inna katlung jo hei, khana khan mihei bōina leh kare inhnaktak a akaṭap a’n-ôi hei rasa rakip Jesu’n aleithei. 39Innshung kahlut a, anhnenga ati, “Heisa mo akabōi chei? Heisa mo akaṭap chei? Naipang hi akathi changmak, akaje hnâm kae.”
40Anmani’n anleimanuisō, khava jâra anmani ankhenga vângting atirsōt hei, naipangnu anu leh apa khana asonle 3 hei aṭhōi heia naipangnu jena den shunga kahlut hei. 41Ama’n akut amatua, “Talitha, koum,” hiva tina chu, “Naipangnu, ke’n thō roh kati che kae,” ati.
42Khavatak a khan naipangnu kha kathōisōt a kalôn lele jo. (Amanu kha kum 12 leikatluk jo.) Khavakha asōk a khan anmani’n andet-hla hêr jo. 43Tâk tûte hneng anhrimakna sik Jesu’n ṭong inhnaktak apek hei, khana ama’n “Naipangnu kha sâk sik heikhat pek ruh,” ati hei.
انتخاب شده:
MARK 5: KOMRBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
