MARK 4
4
Hmuchi Kavorpa Tekâk
(Mt 13.1–9; Lk 8.4–8)
1Jesu’n Galilee dîr panga mantheina aleiphut nôk jo. Ahnenga mipui ahon’tûp hei kha antamrei jo jâra rakōng shunga kahlut a in-ong jo. Rakōng kha tui chunga annam sôn jo khana mipuihei khan dîrpang tuikhama leikangir hei.#Lk 5.1-3 2ṭong katamtak aman theina heia khan tekâk hei aleihmanga anhnenga ahri:
3“Rangei ruh! Pha khat a mi inkhat hmuchi kavor sik a leikasōk a kae. 4Ama’n hmuchi kha khanga aleivora, ṭhahrep chu hlamdunga katla, khana vahei kajōng heia anleisâk jo. 5Ṭhahrep chu hlung chunga ralei inpana katla. Ralei kha a’npâ jâra hmuchi kha inrangtak a kakeksōt jo. 6Khava sōa, kani ahong inshâng pha, sakung kadông kha asat manvōi jo; arajung kha inthûk a aṭhōmak jâra sakung kadông kha inranga kachâr jo. 7Hmuchi ṭhahrep chu rahlingbuk kâra katla, rahling kha ahong khang pha sakung dông kha akabuksi jo, khahei kha heite inramak jo hei. 8Tâk hmuchi ṭhahrep chu ralei ṭhatna hmun a katla, hmuchihei kha kakeksōt hei, kakhangsōt hei khana inra hei: ṭhahrep in arahme 30, ṭhahrep in 60 khana ṭhahrep in 100 inra hei.”
9Khana Jesu’n achaina ahri, “Kōr nannei inchu rangei ruh!”
Ṭong Tekâkna Ajâr
(Mt 13.10–17; Lk 8.9–10)
10Jesu kha abinga aleiom pha, aṭong leikathei loi ṭhahrep leh asonle 12 hei ahnenga kahong hei, khana ṭong tekâk kha ahri manchên pekna sik heia anleidera kae. 11Jesu’n amasôn hei, “Pathen Rengram in-ip kha nangni inpek jo chei. Tâk vânga aka-om milak he’nchu heirakip hi ṭong tekâk vâng antathei sik kae, 12hinga achangna sik a kae, khachu:#Is 6.9-10
“Anmani’n enchu an-en sik,
tâk hmumak hei ning;
anmani’n rangei chu anrangei sik,
tâk manhret mak hei ning.
Ajârchu anmani’n khanga anleitlo’nchu, anmani Pathen hneng he’nle sik jo hei,
khana ama’n aleirangei mandam sik jo hei.’”
Jesu’n Hmuchi Kavorpa Tekâk Ahri manchên
(Mt 13.18–23; Lk 8.11–15)
13Khava sōa Jesu’n ader hei, “Hiva tekâk hi manhret mak chei mo? Chu achang inchu, heikhong mo tekâk heikhat nantamanhret tor sik? 14Hmuchi kavorpa’n Pathen ṭong kha avor kae. 15Mi ṭhahrep chu hlamdunga anvor hmuchi kapō hei kae; ṭong kha antheilim bât leh, Seitan kha kahonga ṭong invor kha alosōt bât jo. 16Milak-hei khan hlung kâra a’nvor hmuchi kapō hei kae. Ṭongrôn kha antheilim bât leh inpâktak a anrahlâng. 17Tâk khava khan anlungri shunga hlutmak, khana akasôt om mak. Khava ṭong jâra suk manrimna a-emak leh khōdeng theina ahong om pha, inrangtak a anmasō jo. 18Milak-hei khan rahling kâr heia a’nvor hmuchi kapō hei kae. Hiva mihei hi ṭong katheihei kha kae, 19tâk hiva hringkhō sik a malung dongna, nei leh hao maduna, khana aralak madu rangeina katamtak hongkahlut a ṭong kha ankabuk sia kara neimak jo hei. 20Tâk milak-hei khan ralei ṭhatna a’nvor hmuchi kapō hei kae. Anmani’n ṭong kha anthei, anrahlâng, khana kara annei: ṭhahrep in aja 30, 60, khana 100 inra heia kae.”
Hrai Thōia Thaihmei
(Lk 8.16–18)
21Jesu’n ahri manjōm, “Tu inkhat in thaihmei inkhat ahei choi manhlut pha hrai thōia a-emak leh jekhum thōia ada phung mo? Amatungna chunga damak a mo?#Mt 5.15; Lk 11.33 22A’nthup rakip inlârtak a keisō sik kae, khana makhu sia aleika-om rakip mahlâng sik kae.#Mt 10.26; Lk 12.2 23Nangni’n kōr nannei inchu, rangei ruh!” ati.
24Ama’n anhnenga ahrisa nôk, “Nanṭongthei chunga nanmalung pek ruh! Milak-hei chunga nantahmang ṭong tanna dânhei mama kha Pathen in nanchunga ajōng hmang sik, tâk a’nhnakdet sik kae.#Mt 7.2; Lk 6.38 25Ajing akaneihei kha inpeksa sik hei; khana akanei hêrmak hei kha antanei kha’m kha losōtpek sik hei kae.”#Mt 13.12; 25.29; Lk 19.26
Hmuchi Kakek Tekâk
26Jesu’n khanga ahrisa nôk, “Pathen Rengram kha hiva kapō kae. Mi inkhat in ahleia hmuchi avor. 27Ama jân a kaje, sûn leh kathōi, khana khava pha shung seng heia khan hmuchihei kha kakeksōt hei khana kakhang hei; kha’num heikhonga mo khanga akachang kha ama’n manhret mak. 28Ralei khan abinga hmuchi kha amankhangsōt a kara amannei, ahma inkeia ajîk, khava sōa akai, khava sōa akara kasiptak savui hong kasōk. 29Kara kha ahonghmin pha, mipa khan akoite vânga ât aphut jo, ajârchu sa-ât pha kha hong katlung jo.”#Jl 3.13
Anṭamhmu Tekâk
(Mt 13.31–32,34; Lk 13.18–19)
30Jesu’n ader hei, “Pathen Rengram hi eini’n hei leh mo nitekâk sik? Khana hei tekâk vânga mo nihri manchên sik? 31Khavakha hiva kapō kae. Mipa inkhat in anṭamhmu inkhat alo, raleichunga hmuchi kasinpen kae, raleia avor mankek jo. 32Bongkhat sōa hong kakeksōt a khana kahar kâra akalenpen inkhat hongkachang jo. Khana abâk kalen tatak asem jo khava chunga vahei kahong heia adaihlim a rabu an-inchom jo.”
33Jesu’n hiva kapō tekâk katamtak ahmanga mihei hneng aṭong aleihri pek hei; antamanhret torchen kha ahri pek hei. 34Tekâk tei loa anhnenga ṭong leihri mak, tâk abing rōk a asonlehei leh aleiom pha chu sonlehei hneng heirakip ahri manchên pek heia kae.
Jesu’n Thlipui Arakôk Mandai
(Mt 8.23,27; Lk 8.22–25)
35Khava ning bât a khōhleia, Jesu’n asonlehei hneng, “Eini dîr rekhat ting rakan me sona se jo rih,” ati hei. 36Khava jâra mipuihei kha andahlon jo hei; asonlehei khan Jesu leichōng dekna rakōnga hong kachōng heia ama kha anṭhōi jo. Alak rakōng he’m khan leika-om hei. 37Manhret theiloa thlipui inhnaktak heikahrâng jo, tui in-nông khan rakōng shunga tui ahong kathek manhlut jo, rakōng kha tui hongsip rong ati jo. 38Jesu chu rakōng kahnungting leika-om, akut lukham amanchanga leikaje; asonle he’n anmathōa anti, “Oja, keini thirih kanti jo adonlo che mo?”
39Jesu kangira thlipui hneng ṭong aleipek, “Dai hnger roh!” khan chu tui in-nông hneng ati, “Innok mak roh!” Khana thli kha kahai jo khana kadai hnger jo. 40Khava sōa Jesu’n asonlehei hneng, “Heisa mo khangtuk hrep akaṭi chei? Tûn katlung taksenna neimak chei mo?” ati hei.
41Tâk anmani kaṭihêr jo hei khana anmani khat leh khat inbek heia, “Hiva mipa hi tu mo? Thli leh tui in-nông kapha’n aṭong anjui!” antia kae.
انتخاب شده:
MARK 4: KOMRBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
