MARK 6
6
Nazareth a Jesu Antarahlâng mak
(Mt 13.53–58; Lk 4.16–30)
1Jesu’n khava hmun kha adahlona, akhōpuiting le’nle jo, asonle he’n anleijui. 2Châmhngat kani ning intûpna innpuia, mantheina aleiphut jo. Mi katamtak khana khan leika-om hei; aṭong kha anthei pha anmani’n ankhenga inlak ansâk pet jo. Anmani indertō hei, “Hihei rakip hi khona inphut achen hei mo? Hei singna mo ama hneng a’npe hi? Heikhong mo ṭōn inlak-hei hi atlosōt? 3Ama hi thingṭōn katlopa, Mary sapa, James, Joseph, Judas leh Simon hei sōpui kha changmak mo? Anainuhei hin aka-om hei changmak mo?” Khang’khan anmani’n leirahlâng mak jo hei.
4Jesu’n anhnenga, “Sânkathemhei hi, akhōshung leh a-innshung, khana asōpuihei hnenga tei loa, hmun rakip a chu kajana annei hei,” ati.#Jn 4.44
5Khava hmun a khan akadam mak ṭhahrep hei chunga akut adapek heia amandam hei tei loa, ṭōn-inlak heite leitlosōt tor mak. 6Anmani’n taksenna annei mak jâra khan inlak aleisak hêr.
Jesu’n Sonle 12 Atirsōt hei
(Mt 10.5–15; Lk 9.1–6)
Khava sōa Jesu’n khava hnenga khō rakip a kalônlea mi aleimanthei hei. 7Ama’n sonle 12 hei kha abek manchun heia, mi inhni-hnia atirsōt hei. Rathla kaṭhamak-hei chunga torna ratha apek hei, 8khana hinga ṭong apek hei, “Nanhlam hro pha khōnghre tei loa neinâk heite rônsa mak ruh, buhlom, sâk derna mârsha, mârsha shunga sêr, rônmak ruh.#Lk 10.4-11 9Kekōk nei ruh, tâk zakkō inbo rônmak ruh.” 10Ama’n ahrisa nôk, “Mihe’n anrahlângna chei hmun rakip a, ahmun kha nandahlon mak kârseng khava inn mama khan om ruh. 11Khōpui inkhat a nanhonghlut pha khana khan mihe’n anrahlâng mak cheia nanṭong anrangei mak inchu, khava hmun kha dahlon ruh khana nankebōk vaiphin kathing mathla ruh. Khavakha anmani sik ṭong-gîkna kachang sik!”#Ṭōn 13.51
12Khava jâra anmani kasesōt jo hei khana mihei khan ansetna inphut anhong inlena sik anhrile joa kae. 13Anmani’n ṭai katamtak anhnongsōt hei, mi kadam mak katamtak chunga olive thai anmanthi heia anmandam hei.#Jam 5.14
Tui Inhlutpa John Thi
(Mt 14.1–12; Lk 9.7–9)
14Tûnchu Reng Herod in hihei rakip chungchânga athei jo, ajârchu Jesu rahming ṭhatna hmuntina le’nthang jo. Mi ṭhahrep in, “Tui Inhlutpa John hongkahring nôk jo! Khava jâra hinghiva ṭōn-inlak tlona ratha hi anei kae,” anti.#Mt 16.14; Mk 8.28; Lk 9.19
15Achang ravâng alak he’n, “Ama Elijah kae,” anti.
Alak nôk he’n, “Ama hi hmalaia sânkathem kapōa, sânkathem inkhat kae,” anti.
16Herod in hi athei pha, ama’n ati, “Ama hi Tui Inhlutpa John kae! Ke’n alu kaleitan jo, tâk hongkahring nôk jo.” 17Herod khet in John surna sik ṭong aleimasōa, khana thîrhrui vâng aleikhit a kurkhum shunga aleida kae. Herod in hinga aleitlo hi anaipa Philip nuhmei ama’n aleikasut a aleiompui jo, Herodias jâra kae.#Lk 3.19-20 18Tui Inhlutpa John khan Herod hneng hinga ahri pek ṭhak, “Nanaipa nuhmei na-ompui sik hi nang sik akadik changmak.”
19Khava jâra Herodias khan John kha aleihōt khana that sik a amadu, tâk Herod a-om jâra leitlotor mak. 20Herod in John kha aleiṭit ajârchu John kha mikaṭha mi intheng kae ti amanhret, khava jâra kaṭhatak a aleida. Aṭong hri athei kataia amalung a’nrim inum, aṭong hri chu aleirangei hnōm ri.
21Atorna Herodias khan pha kaṭha achen jo. Khavakha Herod intetna kani kae, khava ning ama’n ram vaikarôn akalen rakip, rehlam kakei, khana Galileea hlamkakeihei revei atlopuina pha kha kae. 22Herodias sanu hongkahlut a hong kalâm, khana Herod leh ahmelâk-hei seng malung kha amantlai. Khava jâra rengpa’n nuhngâknu hneng ati, “Heimo chen sik a namadu? Namadu rakip kha kapek sik che.” 23Intepna katamtak leh amanu hneng ati, “Kei intep eng khachu hei-hei achang inum nader eng kha, karengram her khat kapha achang inum kapek sik che!”
24Khava jâra nuhngâknu kha kasesōt a, anu hneng, “Heimo kader sik?” ava ti.
Anu’n, “Tui Inhlutpa John lu,” tia amasôn.
25Nuhngâknu kha khava laitak inranga rengpa hneng kahlut inlea ader, “Nang in Tui Inhlutpa John lu kha tûntak thleng chunga napek sik eng kamadu!”
26Hivahin Rengpa malung amanrim hranghra jo; achang ravâng ahmelâk-hei hmaikunga aṭong le’ntepna jâra khan amanu derna kha dâng leiti tor mak jo. 27Khava jâra rengpa khan ankahrung remi inkhat khava phatak a John lu ahei chōina sik ṭong apek a atir jo. Akahrungpa kha kurkhum a vakasea John lu kha avatan jo. 28Khava sōa thleng inkhat chunga alu kha ahei choi manhlut a nuhngâknu hneng apek, khana amanu’n khavakha anu hneng apek nôk jo. 29John sonle he’n khava ṭong kha anthei pha, kahong heia, akalōng kha anchoia, thlâna anvahre jo.
Jesu’n Mi katamtak Avei hei
(Mt 14.13–21; Lk 9.10–17; Jn 6.1–14)
30Sonlehei kha ho’nle heia Jesu leh inhmu hei, khana anṭōn leitlo rakip leh anmi mantheina hei kha ahnenga anhri pek. 31Khava khan mi akase leh akahong katamtak leika-om heia Jesu leh asonlehei kha bu sâkna sik pha bek um leihmu tor mak hei. Khava jâra Jesu’n asonlehei hneng, “Eini nibinga ni-omna sik khana nangni bongkhat châm nan-inhnga theina sik hmun hlopting sesōt jo rih,” ati. 32Khava jâra anmani hmun daina kajonga anbing rōk a rakōng inkhat anchōnga kasōk inphut jo hei.
33Achang ravâng anmani sesōt kha mi katamtak in anhmu hei khana anmani an-e kha anmanhret bât hei; khava jâra khōpui rakip a mi vakase hei khana katlân heia Jesu leh asonlehei mak hma ahmun kha leikatlung masadek jo hei. 34Jesu’n rakōnga inphut akesōt pha, mipuihei kha ahmu heia, anmani sik a amalung kha lungsetna’n kasip jo, ajârchu ankakhem kase kemōng ka-ang jo hei. Khava jâra ṭong katamtak amanthei manphut jo hei.#Mj 27.17; 1 Rn 22.17; 2 Th 18.16; Eze 34.5; Mt 9.36 35Khana apha asôt jo pha, asonlehei kahong heia ahnenga, “Tûnchu khōhlei kasôt hêr jo, khana ahmun hi mi daihngerna hmun kae. 36Mihei hi tirsōt jo hei roh khana akahnai hleihei leh khōheia son sâk sik heikhat anva rachôkna sik a sehei rasoh,” anti.
37Jesu’n amasôn hei, “Nangni’n anmani tasâk sik heikhat pe hei ruh.”
Anmani’n ahnenga ander, “Anmani veina sik buhlom dangka 200 vâng rachôkna sik akase sik ung mo?”
38Khava jâra Jesu’n anhnenga ader hei, “Buhlom heija mo nantanei? Se una va-en ruh.”
Anmani’n anva jongsōt pha, “Buhlom pheng 5 leh nga 2,” tia anmanthei.
39Khava sōa Jesu’n asonlehei hneng mipuihei kha arup-rup a ṭhenna sik leh phōi in-êm chunga man-ongna sik amanthei hei. 40Khava jâra mipuihei kha 100 sasâm leh 50 rup sasâma agôra in-ong jo heia kae. 41Khava sōa Jesu’n buhlom 5 leh nga 2 kha aloa, marvânting a-ena, Pathen amanpâk. Buhlom kha ahar akhōia mihei hneng sempekna sik a asonlehei hneng apek jo hei. Ama’n nga 2 kha’m ankhenga hnenga asempek jo hei. 42Mi rakip in ansâk a kakhop et hei. 43Khava sōa asonle he’n mihei tasâk manhlei buhlom leh nga kha hrai 12 kasip anhrut a kae. 44Veimankhop mihei anja kha pase 5,000 hei kae.
Jesu Tui Chunga Alôn
(Mt 14.22–33; Jn 6.15–21)
45Ama’n mipuihei kha amansesōt lai hei khan, inranga Jesu’n asonlehei kha rakōng inkhat a amanhlut heia dîr rekhat a, Bethsaida a ama hmadet a amanse jo hei. 46Jesu’n anmani mathlâna ahrisō pha, Pathen kader sik a hmebungting kake jo. 47Khōhlei ahongtluk jo pha, Jesu ralei chârna aleiomlai khan rakōng chu dîrlaia leika-om. 48Ama’n kachâmtak a rakōng katôr asonlehei kha aleihmu hei; ajârchu anmani’n thli suktōa anrakōng anleitôra kae. Khang’khan jîngkâr pung 3 leh pung 6 kâr radona tui chunga hongkalôna anhnenga kahong. Ama’n anhnengting aheisor hei, 49tâk anmani’n tui chunga akalôn kha anhmu jo. Anmani’n anmandona, “Hiva hichu rathla kae!” antia ka-ông jo hei. 50Ama anhmu pha ankhenga anṭit hêr jo. Jesu’n khava laitak khan anhnenga hongkaṭonga, “Lungngam nei ruh! Kei eng kae, ṭimak ruh!” ati.
51Khava sōa Jesu anmani leh rakōnga kachōng jo hei, khana thli kha kabâng jo. Sonlehei khan andet-hla hêr jo, 52ajârchu anmani’n mipui 5,000 avei hei ajâr kha leimanhret mak hei; anmalung in khavakha leisur tor mak.
Jesu’n Gennesaret a Mi Amandam
(Mt 14.34–36)
53Anmani dîr rekhat ting anrakana Gennesaret ram a kahong jo hei, khana khan anrakōng kha ankhit jo. 54Anmani rakōng anhei dahlon pha, mihe’n Jesu kha inranga anmanhret bât jo. 55Khava jâra ram pumpuia mi katlân jo hei; khona a-enum ama ka-om ti anthei pha, ankapher chunga akaje akanahei ahnenga anheiṭhōi hei. 56Jesu sena hmun rakip a, khōa, khōpuia, hlei rajei achanga, mihe’n akanahei kha keithe tlânga anheiṭhōi heia apōnhmor bek um mantôn sik heia anleingek; khana khava akatôn phâk rakip hei kha leikadam heia kae.
انتخاب شده:
MARK 6: KOMRBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
