Gāluega 5
5
Ko Anania ma Hafilē
1Kae nae i ei he tamāloa e igoa ki a Anania ma tana āvaga ko Hafilē, na fakatau atu e ki lāua he vāega o tō lā fenua. 2Kae i te māliliega i te va o ia ma tana āvaga, na ia tāofia ai mo ia he vāega o te tupe na maua, kae fōki te tupe na totoe ki te kau apohitolo. 3Oi lea atu ai ia Petelu ki ei, “Anania, he ā te kua fakataga ai e koe ia Hātani ke pule ki a te koe ma kua pepelo ai koe ki te Agaga Paia, i te kua kē tāofia o he vāega o te tupe na maua mai i tō fenua? 4Ka ko hēki fakatau atua e koe te fenua, nae e o koe lava; ma ina kua uma te fakatau atu e koe, ko te tupe e a koe. He ā la te na fai ai e koe he mea vēnā? Ko koe e hēki pepelo ki tagata — ko koe kua pepelo ki te Atua!” 5Na lagona atu lava e Anania te fakakupuga tēnei, oi pakū loa lava ki lalo kua mate; ko nā tino uma na fakalogo ki te mea tēnei na mātataku lahi lele. 6Oi ōmamai ai nā taulelea talavou oi āfīfī tona tino, ma hiki ki fafo oi tanu.
7Kua tai tolu itūlā talu te tupu o te mea tēnei, kae hau tana āvaga, ma ko hēki ia iloa te mea kua tupu. 8Kua fehili atu ki ei ia Petelu, “Lea mai ake, ko te tupe kātoa tēnei na maua e koulua ma tau āvaga mo te koulua fenua?”
Kua tali atu te fafine, “Io, ko te tupe kātoa tēnā.”
9Oi lea atu ai ia Petelu ki te fafine, “He ā te na mālilie ai koulua ma tau āvaga ke koulua tofotofoa te Agaga o te Aliki? Kikila, ko nā taulelea na ki lātou tanua tau āvaga, iēnā kua i te faitotoka i te taimi nei, ma ka ki lātou hikia foki koe ki fafo!” 10Ko te taimi lava tēnā na pakū ai te fafine ki lalo ki tafa o nā vae o Petelu, kua mate. Oi ōmamai ai nā taulelea talavou oi hiki ki fafo te tino o te fafine ma tanu i tafa o tana āvaga. 11Ko te Ekalehia kātoa ma nā tino uma lele na fakalogo ki te mea tēnei, na mātataku lahi lele.
Nā Vāvega ma nā Fakailoga
12E lahi nā vāvega ma nā fakailoga na fai e te kau apohitolo i te mea nae i ei ia tagata. Ko nā tino uma lele kua talitonu ki a Iehu kua fakapotopoto fakatahi i te Poletito o Holomona. 13E hēai lele he tino ko hēki talitonu na loto toa ke i ei fakatahi i te mea kua maopoopo ki ei nā tino kua talitonu, e ui lava ko nā tino kua talitonu nae fakaaloalogia lele e tagata. 14Kae kua haga fakaopoopo pea lava te tokalahi o nā tino kua talitonu ki te Aliki — he kaifenua o fafine ma taulelea. 15Ona ko nā mea a te kau apohitolo nae fai, na tahiki ai nā tauale ki luga o nā auala ma tuku ki luga o nā hofa ma nā epaepa, kae ke tau lava ko te ataata o Petelu ke pa ki luga o he vāega o ki lātou, kāfai e haele ake i te auala. 16Na lolofi mai nā kaifenua mai nā tamā kakai e pili ki Ieluhalema ma kaumai nā tino tauale ma nā tino e ulufia e nā agaga kino; ma na fakamālōlō uma ki lātou.
Kua Maua te kau Apohitolo i nā Fakahāuāga
17Oi lagona ai te lotokino lahi e te Ulu Ohitāulaga ma ona hoa uma, ni tino o te kau Hatukaio, ki te kau apohitolo; 18ma na puke ai e ki lātou te kau apohitolo ma tuku ki te falepuipui. 19Kae i te pō, na hau ai he agelu a te Aliki oi tatala nā faitotoka o te falepuipui ma takitaki te kau apohitolo ki fafo, oi lea vē atu ai te agelu ki a te ki lātou, 20“Olo oi tutū i loto o te Mālumalu ma taku atu ki nā tino nā mea uma lele e uiga ki te ola fou tēnei.” 21Na uhitaki lava ki ei te kau apohitolo, ma na olo ai i te taeaopō ki loto o te Mālumalu ma kāmata oi akoako atu ki tagata.
Oi fakamāopoopo ai e te Ulu Ohitāulaga ma ona hoa te kau toeaina uma o Iutaia mo he fono a te Taupulega kātoa, ma kave ai te lātou fakatonuga ki te falepuipui ke kaumai te kau apohitolo ki o lātou mua. 22Kae i te pa atuga o nā leoleo ki te falepuipui, kua hēai he tino i ei, ma na toe liliu ai ki te Taupulega ma lea vē atu ki ei, 23“E pa atu ki mātou ki te falepuipui e loka mau te fale kātoa, ma ko nā faitotoka e kikila lelei e nā leoleo; kae tatala atu e ki mātou nā faitotoka kua hē i loto te kau apohitolo!” 24I te lagona atuga e te takitaki o nā leoleo o te Mālumalu vēnā ma te kau ohitāulaga hili te mea tēnei, oi taumafai ai ke ki lātou iloa pe ko he ā te na tupu ki te kau apohitolo. 25Oi hau ai he tino oi lea vē atu ki a te ki lātou “Kikila! Ko nā taulelea na koutou tukua ki te falepuipui e i te Mālumalu nei; e fai a lātou akoakoga ki tagata!” 26Na olo ai loa te takitaki o nā leoleo ma tana vāega oi toe kaumai te kau apohitolo. Kae e hēki ki lātou honafaia te kau apohitolo ona e mātataku nā ki lātou e fetogia e tagata.
27Kua kaumai e ki lātou te kau apohitolo ki loto o te fono ma fakatutū i mua o te Taupulega, ma na lea vē atu ai ki a te ki lātou te Ulu Ohitāulaga, 28#Mat 27.25“Na fakatonu lelei atu lava koutou e ki mātou ke nahe toe faia autou akoakoga i te igoa o te tino tēnei. Kae kikila atu ki te mea kua pa ki ei! Kua fakahalalau e koutou autou akoakoga ki Ieluhalema kātoa, ma taumafai koutou ke tukuaki mai ki a te ki mātou tona mate!”
29Oi tali vē atu ai ia Petelu ma nā apohitolo ki ei, “Ko ki mātou e tatau ke uhitaki ki te Atua kae hē ki tagata.” 30Ko te Atua o nā tupuna o ki tātou te na ia fakatūa ia Iehu mai te oti, i te tāmatega e koutou i luga o te hātaulo. 31Kua fakaeke ake ia e te Atua ki tona itū taumatau ke fai ma Takitaki ma ke fai foki ma Fakaola, kae ke maua ai e te nuku o Ihalaelu te avanoa ke halamō ai, ma fakamāgalo ai mai a lātou agahala. 32Ko ki mātou ni molimau ki nā mea iēnei — ki mātou ma te Agaga Paia, tē kua fōki e te Atua mo ki lātou e uhitaki ki a te ia.
33I te lagona atuga e te Taupulega o te mea tēnei, oi na fēkakai lahi lele ai ma fofou lele ke ki lātou tāmatea te kau apohitolo. 34Kae kua tū ki luga hētahi o ki lātou, he Falehaio e igoa ki a Kamalielu, ma ko he faiakoga o te Tūlāfono e amanakia lahi lele e tagata uma. Kua fakatonu e ia ke kave ki fafo te kau apohitolo mo hina taimi, 35oi lea vē atu ai ki te Taupulega, “Oku uho Ihalaelu, kikila totoka ki tautou mea ka fai ki nā taulelea iēnei. 36Auā e manatua e koutou te hauga o Teutaha i he taimi kua mamao mālie atu, na lea ko ia he tino e lauiloa ma e maua te toka fa helau o tagata na mulimuli ki ei. Kae i te taimi na tāmate ai, ko nā tino uma nae mulimuli ki ei na takape, ma na uma atu ai lava foki ma tana fakalapotopotoga. 37E uma atu te mea tēnā, kae hula mai ia Iuta te tino Kalilaia i te taimi o te tuhigāigoa; na mulimuli foki ki ei he kaifenua, kae na tāmate foki ma na takape ai ma nā tino nae mulimuli ki ei. 38Ko te tūlaga la e i ei te mea tēnei, ko au e lea atu ki a te koutou, nahe faia hautou mea ki nā taulelea. Tuku vēia. Kāfai a lātou fuafuaga ma nā gāluega kua fai e hau mai tagata, oi e fano lava e teka; 39kae kāfai e hau mai te Atua, e hē koutou mafaia lele oi fakatōkilalo ki lātou. E i nā ka fakahagatau koutou ki te Atua!”
Na talia e te Taupulega te fautuaga a Kamalielu. 40Oi fakatonu ai e ki lātou ke kaumai te kau apohitolo ki te fono ma ke kini, ma fakatonu ai ke nahe ki lātou toe tautatala lele i te igoa o Iehu; oi tuku ai ke olo. 41I te olo kehega o te kau apohitolo mai te fono, na fiafia lele ki lātou ona ko te fakatāuagia o ki lātou e te Atua ke fakamātagāgia, i te igoa o Iehu. 42Ma i aho uma, i loto o te Mālumalu pe ko nā fale o nā tino, na fakaauau pea lava a lātou akoakoga ma te tālakiga o te Tala Lelei e uiga ki a Iehu te Mehia.
Currently Selected:
Gāluega 5: TNT
Tõsta esile
Share
Kopeeri
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.