Gāluega 4
4
Kua Kave ia Petelu ma Ioane ki Mua o te Taupulega
1Koi tautatala atu ia Petelu ma Ioane ki tagata kae taunuku mai ni ohitāulaga,#4.1 ni ohitāulaga; ko iētahi tuhituhiga e lea mai ni ohitāulaga hili. te takitaki o nā leoleo o te Mālumalu, ma iētahi o te kau Hatukaio. 2Kua hē fiafia ki lātou ona e akoako e nā apohitolo iēnei e toka lua ki tagata, ko Iehu kua toe tū mai te oti, ma ko te mea ia e fakamāonia ai ko nā tino kua oti ka toe fakatutū mai te oti. 3Oi puke ai loa e ki lātou te toka lua, ma e ona kua pō i te taimi tēnā, na tuku ai e ki lātou ki lāua ki te falepuipui ke pa ki te aho alafaki. 4Kae e tokalahi nā tino na fakalogo ki te fekau ma talitonu ki ei; ma na tuputupu ai pea lava te nūmela o tagata na fakapotopoto ki ei, ma na maua he limaafe pe ā.
5I te aho alafaki, oi fakamāopoopo mai ai ki Ieluhalema nā takitaki o Iutaia, te kau toeaina, ma nā faiakoga o te Tūlāfono. 6Kua fono fakatahi ki lātou ma Anaha te Ulu Ohitāulaga, vēnā ma Kaiafa, ma Ioane, ma Alehana, ma iētahi tino uma mai te puikāiga Ulu Ohitāulaga. 7Kua fakatutū e ki lātou ia Petelu ma Ioane i mua o te fono, oi fehili vē ai ki ei, “Na vēhea ona mafai e koulua oi fakamālōlō te pipili? E o ai te mana pe ko te igoa na koulua faia ai te mea tēnei?”
8Na fakatumulia ia Petelu i te Agaga Paia, oi tali vē atu ai ki ei, “Koutou nā takitaki o te nuku ma toeaina: 9kāfai ki māua kua koutou hukehukegia i te aho nei e uiga ki te gāluega lelei na ki mā faia ki te pipili, ma pe na vēhea foki ona fakamālōlōgia, 10e tatau foki la ke iloa e koutou uma vēnā ma tagata uma o Ihalaelu, ko te tino tēnei e koutou kitea mai, kua fakamālōlōgia kātoa i te mana o te igoa o Iehu Keliho te Nahaleta — tē na koutou fakahātauloagia ma na toe fakatū mai te oti e te Atua. 11#Hal 118.22Ko Iehu te na lea mai ai te tuhituhiga paia vē,
‘Ko te fatu na tīaki e koutou nā tufuga faufale,
na iku ake kua kavea ma fatu e pito hili te tāua.’
12Ko te fakaolataga e maua oioti lava e ala ia te ia; e hēai hētahi tino i te lalolagi kātoa kua fōki mai e te Atua, e ia mafaia oi fakaola ki tātou.”
13Na ofo nā tino o te Taupulega ki nā fakamatalaga a Petelu ma Ioane ona ko te hē mātataku, kae maihe lava i te ki lātou iloaga ko te toka lua tēnei e hē ni tino e lauiloa pe na akoakogia. Oi hāfia ai e ki lātou ko te toka lua tēnei nae ni hoa e o Iehu. 14Kae kua hēai lele ha lātou kupu e mafai ke fai, auā kua ki lātou kitea atu ko te taulealea na fakamālōlō, e tutū fakatahi mai ma ki lāua. 15Oi fakatonu ai e ki lātou te toka lua ke olo ki fafo o te potu fono, kae kua kāmata oi talatalanoa lava ki lātou. 16Kua fakatau fehili tētahi ki tētahi vēnei, “He ā nei ta ki tātou ka fai ki te toka lua tēnei? Kua iloa e tagata uma lele e nonofo i Ieluhalema, te vāvega ofoofogia na ki lā faia, ma e hē mafai ki tātou ke lea e hēki ki lā faia te mea tēnei. 17Kae e tatau ke lapataki mālohi ki tātou ki te toka lua, ke nahe toe tautatala lele ki he tino i te igoa o Iehu. I te faiga tēnei, ka tāofiofia ai te toe halalau o tēnei tala ki tagata.”
18Oi toe fekau ai e ki lātou te toka lua, ma fakatonu ke nahe toe tautatala lele pe akoako e ki lāua he tino, i te igoa o Iehu. 19Ka kua tali atu ia Petelu ma Ioane, “E tatau ke fuafua e koutou pe ko tēfea te mea e hako i te kikila a te Atua — pe ko te uhitaki atu ki a te koutou, pe ko te uhitaki ki te Atua. 20Auā e hē kimā mafaia oi hē tautatala e uiga ki nā mea kua kikila ma fakalogo ki māua ki ei.” 21Oi toe lapataki mālohi ai te Taupulega ki te toka lua, ma tuku ai ke olo. Kua ki lātou kitea e hē ki lātou mafaia oi fakahala te toka lua, auā ko tagata uma kua viviki ki te Atua ona ko te mea na tupu. 22Ko te taulealea na fakamālōlō e ala i te vāvega, kua hili atu i te fahefulu tauhaga tona matua.
Kua Tatalo nā Tino kua Talitonu ke Maua ki Lātou i te Lototele
23Na tatala fakahaoloto loa lava ia Petelu ma Ioane, oi na olo ai loa ki te lātou vāega ma taku ki ei te mea na lea ake ai nā ohitāulaga hili ma nā toeaina. 24#Eho 20.11; Nem 9.6; Hal 146.6I te fakalogoga o ki lātou ki te mea na tupu, oi tatalo fakatahi ai ki lātou ki te Atua vēnei, “Te Aliki te Tupu, na kē faia te lagi ma te lalolagi, te tai, ma nā mea uma e i ei! 25#Hal 2.1-2Na vāgana koe ki to mātou tupuna ko Tavita tau kaukauna e ala i te Agaga Paia, i te leaga vēia,
‘He ā te na feita ai ia tagata nukukehe;
he ā te na fai ai e tagata a lātou fuafuaga e hēai he aogā?
26Ko nā tupu o te lalolagi kua hāuniuni
ma kua fakamāopoopo fakatahi ia takitaki,
ke teteke ki te Aliki te Atua ma tē kua ia fakaukuagia ma Mehia.’
27 #
Mat 27.1-2; Mlk 15.1; Luk 23.1, 7-11; Ioa 18.28-29 Auā e moni lava ko Helota ma Ponitiō Pilato na potopoto fakatahi i te kakai tēnei ma tagata nukukehe vēnā ma tagata o Ihalaelu, ke teteke ki tau Kaukauna paia ko Iehu na kē fakaukuagia ke kavea ma Mehia. 28Na potopoto ki lātou ke fakatino ho he mea na finagalo koe ke tutupu e ala i tō mana. 29Ma i te taimi nei te Aliki, kikila ki a lātou kupu fakamataku kua fai mai ki a te ki mātou, ma fōki mai ki au kaukauna te avanoa ke folafola ai e ki mātou tau fekau, e aunoa ma he mataku. 30Fālō atu tō lima ke fakamālōlō ai ia tagata, ma ke mafai ke fai ni fakailoga ma ni vāvega e ala i te igoa o tau Kaukauna paia ko Iehu.”
31Kua uma te fai o te lātou tatalo, oi lūlū ai te nofoaga nae maopoopo ai ki lātou. Na fakatumulia ki lātou uma i te Agaga Paia, oi kāmata ai oi tautatala i te fekau a te Atua, e aunoa ma he mataku.
Kua Fakaaogā Fakatahi a lātou Meatōtino
32 #
Gāl 2.44-45
Kua gātahitahi ia loto ma māfaufau o te vāega kua talitonu ki a Iehu. E hēai lele he tino o ki lātou na lea ko ana meatōtino e a ia lava, kae na ki lātou fakaaogā fakatahi nā mea uma lele a ki lātou tau tokatahi. 33Na molimau te kau apohitolo ki te toetū o te Aliki ko Iehu i he tūlaga matuā mālohi, ma na liligi e te Atua ki luga o ki lātou uma nā fakamanuiaga e lahi. 34Ko nā mea uma nae manakomia e ki lātou, na maua e ki lātou. Ko nā tino nae i ei o lātou fale ma ni fenua, na fakatau atu e ki lātou ma ko te tupe na maua mai, 35na ki lātou tuku atua ki te kau apohitolo; oi fakahoahoa ai nā tupe fuafua ki nā manakoga o ki lātou tau tokatahi.
36Ma ko Iohefa la, te ha-Levī na fānau i Kupulona, tē nae fakaigoa e te kau apohitolo ki a Panapa (ko tona uiga “Ko Tē e Fakamākeke ki tagata”), 37na fakatau atu e ia he fenua e o ia, oi kaumai ai te tupe oi fōki ki te kau apohitolo.
Currently Selected:
Gāluega 4: TNT
Tõsta esile
Share
Kopeeri
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.