Gāluega 6
6
Nā Tino e Toka Fitu na Fehoahoani ki te kau Apohitolo
1I he taimi mulimuli ake, kua tuputupu pea lava te nūmela o nā tino kua talitonu ki a Iehu, na tupu ai he fekehekeheakiga i te va o nā tino Iutaia e tautatala i te gagana Eleni ma nā tino Iutaia lava e nonofo i kinā. E lea nā tino Iutaia e tautatala i te gagana Eleni, ko nā fafine o ki lātou kua feoti a lātou āvaga, e hē maua ni o lātou vāega i nā tupe e fakahoahoa i nā aho takitahi. 2Oi fakamāopoopo mai ai e te kau apohitolo e toka hefululua, nā tino uma lele kua talitonu ma lea vē atu ki ei, “E hē he mea tatau ke tuku e ki mātou te tālakiga o te kupu a te Atua, kae ke kikila e ki mātou te mea tau tupe. 3Ko te mea ia te kau uho, filifili mai ko ni tino o koutou e toka fitu ke ki lātou faia te gāluega tēnei. Ni tino kua fakamoemoegia ma e iloa e tagata kua fakatumulia ki lātou i te Agaga Paia ma i te poto. 4Kae ke tukutahi lava o mātou taimi ki te tatalo ma te tālakiga o te kupu a te Atua.”
5Na fiafia uma lele te fakapotopotoga ki te mea tēnei kua lea ake ai te kau apohitolo; oi na filifili ai e ki lātou ia Hetefano, he tino kua fakatumulia i te fakatuatua ma te Agaga Paia, vēnā ma Filipo, ko Pelokolona, ko Nikanola, ko Timona, ko Pamena, ma Nikolao, he tagata nukukehe mai Anitioka na liliu ki te tāpuakiga Iutaia. 6Kua tuku atu ki lātou iēnei e te fakapotopotoga ki te kau apohitolo, oi tatalo ai te kau apohitolo ma fakaeke atu ki ei o lātou lima.
7Ma ko te kupu a te Atua kua halalau pea lava. Kua tuputupu pea lava te nūmela o tagata kua talitonu ki a Iehu i Ieluhalema; ma e tokalahi nā ohitāulaga na ki lātou taliagia te Tala Lelei.
Kua Puke ia Hetefano e nā Takitaki o Iutaia
8Ko Hetefano ko he tino na fakamanuiagia lahi e te Atua ma nae ia te ia te mana. Na fai e ia nā vāvega uiga kehe ma nā mea ofoofogia i te mea e i ei ia tagata. 9Kae nae teteke ki ei ni taulelea mai te hūnako o Tagata kua Fakahaolotogia#6.9 Tagata kua Fakahaolotogia: Ko nā tino iēnei ni tino Iutaia nae fai ma pologa kae na toe fakahaoloto. (e vē oi fakaigoa ai), ma e aofia ai nā tino Iutaia mai Kulene ma Alehania. Ko ki lātou iēnei fakatahi ma iētahi tino Iutaia mai nā kogāfenua o Kilikia ma Ahia, kua kāmata oi fai fīnauga ma Hetefano. 10Kae kua tuku atu e te Agaga o te Atua ki a Hetefano te poto, ma kua hē mautali ai ki lātou ki a te ia. 11Ko te mea ia na ki lātou fakaoleolea ai ni taulelea i ni tupe ke fai ni a lātou tala vē, “Na lagona e ki mātou ia Hetefano e faikupu fāifāi ki a Mohe ma te Atua!” 12Ko te fakakupuga tēnei na tīgā ai ia loto o tagata, nā toeaina ma nā faiakoga o te Tūlāfono. Oi puke ai e ki lātou ia Hetefano ma kave ki mua o te Taupulega. 13Oi kaumai ai e ki lātou ni taulelea ke molimau pepelo e uiga ki a Hetefano. Kua lea vē atu nā taulelea, “Ko te tagata tēnei e teteke pea lava i ana kupu e tautala ai, ki te Mālumalu paia vēnā ma nā Tūlāfono a Mohe. 14Na ki mātou lagona e lea ko te Iehu tēnei mai Nahaleta, ka talepe e ia ki lalo te Mālumalu, ma tahui na tu māhani uma na tuku mai ki a te ki tātou e Mohe!” 15Ko ki lātou uma nae i loto o te fono kua kikila lava ki a Hetefano, ma ki lātou kitea atu ai ko ona mata kua vēia ni mata e o he agelu.
Currently Selected:
Gāluega 6: TNT
Tõsta esile
Share
Kopeeri
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.