Gén 27

Isaac takäpfwaye Jacob

1Isaac nech'e häpe hin'o tä hich'ut t'at wet nemhit hiw'enche honhat. Fwala elh p'ante, t'äne lhäs tä thaläkw, Esaú, wet yok:

–¡Yäs!

Esaú yok:

–¿Chiwoye, ijcha?

2Isaac nichulho wet yok:

–Yäs, lew'en tä och'ut t'at. Fwala chik häpe olehiyeja honhat. 3Häp tä ot'uhläk lehoye tayhi, wet chäj alutsej lhäy'e hach'ähal wet ukwe tshäwet. 4Wet enlhila apenek tä akäj mälhyej tä lhenlhipej tä wuj tä oy'akän, wet häna n'oye yämthilek otufw. Wet ow'enla amho okäpfwayaj tä kamaj n'am leyej honhat.

5Mat Rebeca iläte Isaac tä tahuyej lhäs Esaú. Wet tä Esaú yik tä ihoye tayhi tä t'ukwe tshäwet yämthilek yenhoplhi lajcha, 6wet Rebeca ihoye lhäs Jacob wet yok:

–Olätene ajcha tä tahuyej achila Esaú wet yok, 7“Ukwe tshäwet wet enlhila apenek tä akäj yämthilek otufw. Wet ow'enla amho okäpfwayaj tä kamaj n'am leyej honhat.”

8Tä Jacob iläte lako, wet yen tichunhayaja täjtso. Wet Rebeca äp ifwenho tä yok:

–Tä mälhyejtso, yäs, tetshan olhämet wet woye m'ak tä one'tek lewoye. 9Mäh hoye lhaläy wet chäj n'oye täkwfwas kayla lesas tä yätajen, wet olhamlak oyenlhi openek tä akäj tä ajcha wuj tä y'akän. 10Wet amlak lehäne häpkhilek tufw, wet hiw'enla amho lakäpfwayaj tä kamaj nileyayej honhat.

11Jacob nichulho lako wet yok:

–Ochila wuj lew'ole tä i'pe t'äj, mat olham ow'ole ihihit'a. 12¿Chihla iwoyek ojcha tachas n'okwe wet nitäfwel n'oyej tä n'am häpe Esaú tä laj ow'oleya? Wet yenla n'oye hin'o tä iläkwlhi wet takäpfwayhiyeja n'oye m'ak tä ni'isa, häpkhit'ala m'ak chik is chik okatej.

13Matkat lako yok:

–Yäs, is chik nichät n'o'pe olham häp m'ak chik ni'isa. Mat am woye olhämet, mäye kayla lesas wet hän n'oye.

14Tä mälhyejtso, Jacob yik tä yike kayla lesas wet ihäne lako. Wet lham yenlhi lepenek tä akäj tä Isaac wuj tä y'akän. 15Wet itonphä Esaú lew'uyis tä isis tä t'amajej, wet hiw'uyyenhi Jacob. 16Wet ikäfwlejchehen kayla t'ähes Jacob takweyey lhäy'e lew'o lhip tä laj lew'oleya. 17Wet nech'e hiw'enho lepenek lhäy'e pan tä pajche iwaklhat, 18wet Jacob ihäne lajcha wet yok:

–¡Ijcha!

Isaac yok:

–¡Hää! ¿Atsi olhäs tä ahäpe?

19Jacob nichulho lajcha wet yok:

–Ohäpe äs tä thaläkw, Esaú. Wak'alh t'at m'ak tä lene'tek oyenlhi amho. Athana nephä wet tayphä, tufw tshäwet tä otälhte tayhi wet w'en n'oho akäpfwayaj.

20Isaac tay'ätshane lhäs wet yok:

–Yäs, ¿chipte tä yofwajkwet lesakanej tshäwet?

Jacob nichulho lajcha wet yok:

–Awuk Dios tä tach'ot n'oye, wet häp tä yofwajkwet osakanej.

21Mat Isaac yok:

–Äm alhoho, yäs. Otchasla amche, tsi ot'uhläk kalelhäj chik matche tä ahäpe olhäs Esaú.

22Wet Jacob ihowhäye lajcha, wet lajcha tachasche wet yok:

–Jacob lepak t'at tä oläte, mat takweyey häpe t'at Esaú takweyey.

23Tä mälhyejtso, Isaac nitäfwenhiyejt'a lhäs tä häpe, tsi Jacob takweyey lew'ole ihi t'at, hätet iwoye lechila Esaú. Matkat tä Isaac nech'e t'uhläk takäpfwaye lhäs, 24yachajo tä tay'ätshane wet yok:

–¿Hä matche tä ahäpe t'at olhäs Esaú?

Jacob nichulho lajcha wet yok:

–Matche, ohäpe t'at Esaú.

25Tä mälhyejtso, lajcha yok:

–Yäs, w'en n'oho olhäk. Otufwila m'ak tä lelän tä tälhe tayhi, wet ow'enla amho okäpfwayaj.

Jacob hiw'enho lajcha häp lhäk wet tufw. Wet ichäje vino wet iyä. 26Tä ileyej, wet yok:

–Yäs, lhu ho n'oye, ts'u och'alo.

27Tä Jacob ihowhäye yämthilek hits'u lajcha ch'alo, Isaac tan'isinej lew'uyis. Wet nech'e takäpfwayeje lhämtesna wet yok:

“Häp olhäs lenij tet iwoye tayhi lenij,

wet Lhawuk takäpfwaye.

28Is chik Dios hiw'en amho

pelhay tä tälh puleye,

wet ispej alhoho yachuyaj tä lhenlhipej,

wuj trigo lhäy'e vino.

29Is chik wujpey wichi tä w'enhache lhamej

tä i'pe honhat tachumlhi amho,

is chik itsinen lakamchetey

tä ihi tä letatache.

Wet a'en niyatayej apuhfwas,

¡is chik itihiche honhat lakamchetey

tä ihi tä letatache!

Wichi chik takäpfwayej ame awit'äyhyaj,

is chik lewit'äyhyaj ihi t'at lhamel.

Wichi chik takäpfwayej ame m'ak tä is,

is chik Dios lakäpfwayaj iyej t'at lhamel.”

Esaú tapil tä tälhe tayhi wet lhaip'altsene lajcha chik itiyej lakäpfwayaj tä is

30Wet Isaac ileyej tä takäpfwaye Jacob. Wet häpet tä Jacob yik, näm Esaú tä tälhe tayhi tä t'ukwe tshäwet. 31Wet lham yenlhi lepenek tä akäj, tä wak'alh ihäne lajcha wet yok:

–Nephä, ijcha, tufw tshäwet tä otälhte tayhi wet w'en n'oho akäpfwayaj.

32Wet lajcha Isaac yok:

–¿Atsi tä ahäpe?

Lhäs nichulho wet yok:

–Ohäpe Esaú, äs tä achunkatsek.

33Tä Isaac iläte, lhäy'e lhip tä ichettiche wet yok:

–Tä mälhyejtso, ¿atsi tä ihone n'oye wet ichäj n'oye tshäwet tä ipen? Wet olham otufwne tä kamaj kanäma, wet tä oleyej otkäpfwayene. Athana okäpfwayaj iyej t'at.

34Tä Esaú iläte lajcha tä iwoyetso, wuj tä tafwlhi wet t'än tä yok:

–¡Ijcha, häte olham w'en n'oho akäpfwayaj!

35Mat Isaac yok:

–Pajche hach'inij ihomat n'oye wet y'akan n'oyej, wet lham t'at tä ichäj okäpfwayaj tä ot'uhläk ow'en amho.

36Wet Isaac yok:

–¡Ya'that õyen tajya lheya Jacob! ¡Nech'e dos veces tä y'akan n'oyej!#27.36 Häp n'olhey Jacob yiwitej n'olhämet p'ante yok, Akantsaj. Ichun, iso n'oyej on'ohyaj tä ohäpe achunkatsek,#Gén 25.29-34 wet athana äp iso n'oyej akäpfwayaj tä lewukn'o. Ijcha, ¿hä newache akäpfwayaj elh yämthilek lew'en n'oho?

37Isaac nichulho lhäs wet yok:

–Ch'ahuye olhämet. Pajche oyen awuka Jacob, oyen lakawosa nilhokej lepuhfwas. Wet ofwenho tä oyok, “Is chik wuj trigo tä lew'en, lhäy'e vino.” Mat am, yäs Esaú, nemhit iche m'ak chik owoyej ame.

38Mat Esaú tujlhache tä yok:

–¿Mat chiwoye, hä newache elh akäpfwayaj, ijcha? ¡Häte olham käpfway n'oye!

Tä iwoyetso, yachajo tä ifwitsenej tä tafwlhi.

39Wet nech'e Isaac ifwenho lhäs wet yok:

“Honhat tä haw'etla atofwiyelahlä

honhat tä yachuyaj lhäy'e pelhay ihi.

40Aisiyeja afwajnhat

yämthilek lekalhi m'ak tä lewatlä,

wet ahäpkhila hach'inij lakawo.

Mat chik nichäte lewhäy tä letatayhlä,

alefwayhthiyeja m'ak tä iwoyej ame.”

Jacob ilethan tä nowaye lechila Esaú

41Tälhe täjtso Esaú n'äyiho'pe Jacob häp lajcha käpfwayaj tä hiw'enho. Wet letichunhayaj yok, “Tek pajiyeja wet ojcha y'inhila. Chik tajyäme, olänla och'inij Jacob.”

42Tä Rebeca ihanej m'ak tä lhäs Esaú t'uhläk iwoye, ichene elh lakawos häp Jacob wet yok:

–Äne ayej.

Tä Jacob nichäte, wet yok:

–Ch'ahuye olhämet. Achila Esaú t'uhläk ailän yämthilek iwo lahaya m'ak tä lewoyeje. 43Tä mälhyejtso, woye m'ak tä ofwel amho. Mäh lethane ochila Labán lew'et tä ihi Harán, 44wet eweja ayej pajla'tha tafwaytshi lewäk achila 45wet nem yen tichunhayaja m'ak tä lewoyeje. Wet chik ow'en chik is t'at, owohla siläta ame häpkhilek letapil. Tsi tek ot'uhläk tan'iswek oles chik y'inhen.

46Wet nech'e Rebeca tahuyej Isaac wet yok:

–Matche tä oy'elej häp Het lhayis ka'tsinhay tä Esaú lech'efwas.#Gén 26.34-35 ¡Elat chik Jacob äp yen ch'efwaya elh atsinha tä häte iwoye lhamel tä lew'et honhatna, is chik oy'il, ochutthiyejt'a!

Actualmente seleccionado:

Gén 27: WCHB

Destacar

Copiar