Gén 26

Isaac ihoye Gerar

1Häp ifwalas p'ante Isaac ihi, wuj nehläs tä ihi honhat, mälhyet iwoye ifwalas p'ante Abraham iläy. Tä mälhyejtso, Isaac ihoye hupuy tä lhey Gerar tä Filisteo lhayis kaniyat tä lhey Abimelec ihi. 2Wet Lhawuk lhain'ältej p'ante Isaac wet tahuyej tä yok:

–Yej hoye Egipto, ehila honhat chik ofwel amho. 3Athana ehi t'at honhat tä lhehina. Olham oihla amej wet otkäpfwayhiyeja ame m'ak tä ischehen. Tsi am lhäy'e ales ow'enhihola imälhewek honhatesna, wet oyämla matche olhämette owoyeje ajcha Abraham. 4Oyämla wujpey ales, hätehlat iwoye katetsel tä ihi pule, wet ow'enhihola imälhewek honhatesna. Häte wichi tä w'enhache lhamej tä ihiche nilhokej honhates isiyeja okäpfwayaj tä tälhe ales.#Gén 22.16-18 5Tsi ajcha Abraham tach'ahu n'oye wet iwoye nilhokej m'ak tä one'tek iwoye, häp olhämtes lhäy'e ochufwenyajay.

6Tä mälhyejtso, Isaac yikhit'ach'oye Gerar tä ihi. 7Wet tä wichi tay'ätshaneje Isaac häp Rebeca, lham yok:

–Och'inhä.

Tsi letichunhayaj yok, “Chik oyok, Och'efwa, elat tamen n'oyej chik lhamel ilänn'o p'iya, tsi häpe atsinha tä wuj tä isilataj.”#Gén 12.13; 20.2

8Wet tä wujpe ifwalas tä Isaac ihi häp honhattso, iche p'ante ifwala tä Abimelec ihi lew'et wet iyahinche laka ventana, wet hiw'ene Isaac tä tatsufwelej lech'efwa Rebeca. 9Tä mälhyejtso, t'äne Isaac wet tahuyej tä yok:

–¡Matlhat hach'efwa t'at häp atsinha! ¿Chipte tä lhämenaj tä hach'inhä t'at?

Isaac nichulho wet yok:

–Häp m'ak tä tamenejnaj tä owoynejetso, häp tä onowaynaj amehen, wet häp tä otichunhayaj yok, “Elat wichi tä ohoyena, chik ilät n'oyek oyok, Och'efwa atsinhana, elat lhamel ilänlan'o.”

10Matkat Abimelec yok:

–¿Chipte tä lewoyej n'oyehen täjtso? Tatäy lhimphaj wet ihichen'e elh olhamel chik imäyej hach'efwa, wet amhin'ek letamen n'oyejen chik otes ihi.

11Tä mälhyejtso, Abimelec ifwenho nilhokej laka wichi wet yok:

–Hin'o chik ilhaklit Isaac wok lech'efwa, õ'länla.

12Wet häp nekchämtso Isaac tutchey tä ihi honhattso, wet wuj yachuyaj lhay tä ilanhi tsi Lhawuk takäpfwaye. 13Wet lhäy'epej lhip m'ak tä hiw'en pajtha wuj lakäywet. 14Wet wujpey leläy tson'atas lhäy'e w'asetas, lhäy'e lakawos, wet Filisteo lhayis y'äytene'pe m'ak tä hiw'en. 15Wet lhamel ipotejchehen honhat häp chowhay tä inätes ihiche tä Isaac lajcha Abraham lakawos tij p'ante häp ifwalas tä Abraham kamaj iläy.

16Tä lepese Abimelec tahuyej Isaac wet yok:

–Mäch'oye täja, tsi wuj m'ayek tä lew'en, lenu'pe olhamel.

17Tä mälhyejtso, Isaac yik. Wet ihi honhat tä w'awulhchä wet häp tä yen lew'eta.

Isaac yenlhi chowhay

18Wet Isaac yachajo tä ifwoyenchehen chowhay tä inätes ihiche tä pajche Filisteo lhayis hip'ohiche, häp chowhay tä Abraham yenlhi p'ante tä iläy mat tä ileyej p'ante honhat Filisteo lhayis ipotchehen. Wet Isaac kamaj yen lheyisa häp lheyis tä lajcha itiyej elhpej chowej.

19Ifwala elh p'ante Isaac lakawos yenlhi chowej tä ihi honhat tä lhamel ihi, wet hiw'en inät tä akäji. 20Mat häp tson'ataswos tä hit'ekyenwethä leläy tä ihi lhiptso, lhamel tatayhlä Isaac leläy tson'atas lewos, tsi fwetaj lhamel t'at tä lewuhuy häp inättso. Tä mälhyejtso, Isaac yen lheya N'oka'tshayaj häp chowejtso. 21Wet Isaac lakawos yenlhi elh chowej. Tä wak'alh, yachajo tä wichi iwo ka'tshayaja'pe. Wet Isaac yen lheya N'on'äyihyaj häp chowejtso.

22Tä mälhyejtso, Isaac lhäy'e lhip tä lhaitontehlä honhattso. Wet tä nichätho lhip tä yen lew'eta, lakawos yenlhi elh chowej. Wet tä nem iche n'oka'tshayaj, häp tä tamenej tä Isaac yen lheya Laj Wuka häp chowejtso. Tsi yok:

–Athana Lhawuk iti n'amhihen honhat tä laj lewuka, häpkhilek y'aw'en m'ayek.

23Wet Isaac yikch'oye täjtso wet ihoye Beerseba. 24Wet honatsitso Lhawuk lhain'ältej wet tahuyej tä yok:

–Ohäpe ajcha Abraham laka Dios. Yej noway, oi'amej. Häp okawo Abraham tamenhiyejak oti amej okäpfwayaj tä is wet oyäm wujpey ales.

25Tä mälhyejtso, Isaac yenlhi altar tä ihi honhattso wet t'änch'oye häp Lhawuk wet n'okwiyej. Wet iwo lew'etahi honhattso wet lakawos yenlhi chowej tä t'ukwe inät.

Isaac lhäy'e Abimelec hit'unhatche lhamejen lhämet

26Ifwala elh p'ante Abimelec tälhe Gerar, lhäy'e lech'otfwa tä lhey Ahuzat, lhäy'e laka sip'äl kaniyat tä lhey Ficol, wet ihoye Isaac. 27Tä nichäte, Isaac tahuyej tä yok:

–¿Chipte tä leho n'oye? Pajche tek lewatläk oi'amejen wet lhokwesn'o tä oihi aka honhat.

28Lhamel nichulho Isaac wet yok:

–Olhamel ow'en tä Dios i'amej. Wet häp tä olhamel ot'uhläk y'awoyej n'amehen lhalhämet tä y'at'unhatche n'amejen. 29Wet let'unhatche n'oyej ämet tä ihichet'ala m'ak chik ni'isa chik lewoyej n'oyehen, tsi olhamel tek oailhaklit naji wet atamsek ihi t'at tä lhek, wet athana Dios iti amej lakäpfwayaj tä is.

30Tä mälhyejtso, Isaac iwo lakäjyaja wet t'ekhen wet iyä. 31Tä ifwala elh tä nech'e fwamlafwaj, lhamel nechephä wet iwoyej lhamehen lhämet tä hit'unhatche lhamejen. Tä ileyej, Isaac iwo tsilhekayej, häte lhamel, wet yikhen wet letamsekis ihi.

32Wet häp ifwalatso Isaac lakawos ihoye wet iwo silätaye tä lhamel taje inät tä yenlhi chowej. 33Tä mälhyejtso, Isaac yen lheya “Ot'unhatche Olhämet” häp chowejtso. Wet häp tä tamenej tä hupuy tä ihi honhattso lhey Beerseba, wok oyok, Chowej tä ot'unhatche olhämet.

Esaú yen ch'efwasa atsinhay tä iyej Het lhayis

34Tä Isaac lhäs tä lhey Esaú hiw'en p'ante cuarenta nekchämis, yen ch'efwaya atsinha tä lhey Judit tä lajcha häpe Het lhayis elh tä lhey Beeri. Häte yen ch'efwa elha häp atsinha tä lhey Basemat, tä äp lajcha häpe elh hin'o tä iyej Het lhayis tä lhey Elón. 35Wet atsinhayna wuj tä iwo lefwitajayaja Isaac lhäy'e Rebeca.

Actualmente seleccionado:

Gén 26: WCHB

Destacar

Copiar