Éx 36

1Tä mälhyejtso, Besalel lhäy'e Oholiab, lhäy'e hin'o chik häpe tä Lhawuk hiw'enho lehanyaj lhäy'e letäfwnhayaj yämthilek yenlhi lham lew'et, lhäy'e nilhokej m'ayhay tä iyej, is chik lhamel yenwethä m'ayhay mälhyej tä lham ne'tek lhamel yenwethä.

Wichi t'awayhtes tä ihäne Dios lew'et

2Moisés t'äne Besalel lhäy'e Oholiab, lhäy'e nilhokej iyhäj tä ihanej tä yenwethä m'ayhay, häp lhamel tä Lhawuk hiw'enho lehanyajay wet nin'etäjayej tä tach'ote lham Lhawuk lew'et tä õyenlhi. 3Wet Moisés hiw'enho häp m'ayhay tä Israel lhayis yen t'awayhtesa yämthilek lhamel iwo tesa häp lechumet. Wet ifwalapej ifwalapej Israel lhayis ihäne m'ayhay tä yen t'awayhtesa.

4Wet häp hin'ol tä yenlhi Dios lew'et, lhamel ileyej ayej lechumet 5wet iwo silätaye Moisés wet yok:

–Kamaj wichi ihänlhat alhoho t'awayhtes tä olhamel oyenejlhi m'ayhay tä Lhawuk ne'tek oyenlhi.

6Tä mälhyejtso, Moisés ifwenho wichi wet yok:

–Amel, hin'ol lhäy'e atsinhay, leyej tä lehänaye m'ayhay häp hin'ol tä yenlhi Dios lew'et.

Tä mälhyejtso, wichi ileyej tä ihäne t'awayhtes 7tsi naya t'at m'ayhay tä iche, w'awulhej yämthilek wak'alh m'ak tä õyenlhi, wet häte wuj tä imälhehi.

Õyenlhi Dios lew'et

(Éx 26.1-14)

8Häp hin'ol tä wuj tä ihanej tä yenwethä m'ayhay, häpe t'at lhamel tä yenlhi Dios lew'et, tsi lehanyaj inu'pe iyhäj n'ochumyenhay lehanyaj. Lhamel yenlhi diez cortinas tä n'oyik tä y'it lhäy'e tä ifwak'an wet äp ichät. Häpe lino tä õyen niyhäya tä õ'pätsin, wet yenlhi lhäy tä isis tä itech'aynej m'ayhay tä lhafwis ihi, wet ifwuhatchelahchä yämthilek yen häpeya Dios lewukwe carpa. 9Elh weihalhapej cortina lhamel itihi doce metros y medio tä pitaj wet dos metros tä tsajche. 10Wet lhamel itsekwek cinco cortinas, wet iyhäj cinco häte itsekwek. 11Wet nech'e ipätsinchehen argollas tä niyhäy tä y'it, wet itichehen lhipey, iyhäj häte iwoye. 12Wet ipätsinchehen cincuenta argollas tä wesaj lhipey, wet itichehen lhipey tä hip'ajtitchewek. 13Wet yenlhi cincuenta ganchos tä oro häpkhilek inuhat lhamhomche tä hip'ajtitchewek häp cortinas tä yen Dios lewukweya.

14-15Häte lhamel yenlhi once cortinas tä kayla w'ole. Itihi trece metros y medio tä pitaj wet dos metros tä tsajche elh weihalhapej, yämthilek yen lep'ota häp Dios lewukwe. 16Cinco tä itsekwek wet itumtej lhip elh, wet seis iyhäj tä itsekwek itumtej lhip elh. 17Wet yenlhi cincuenta argollas tä niyhäy, wet itichehen lhipey häp cortinas tä itsekchewek. 18Wet yenlhi cincuenta ganchos tä bronce yämthilek hip'ajtitchewek cortinas tä lhamel yen Dios Lewukweya. 19Wet lhamel yenlhi tson'ataj t'ähes tä itsekchewek, wet ipakej m'ak tä ichät wet hip'oyejpe häp Dios lewukwe. Wet äp itsekwek inätetas t'ähes wet itumhatphä tä hip'oyejpe lewukwe.

Õ'waklhat tablas lhäy'e m'ayhay iyhäj yämthilek õyen Dios lewukweya

(Éx 26.15-29)

20Wet lhamel tachuma häp tablas tä acacia wet itshupyenchehchä tä ikasthaynhen. 21Hiw'en cuatro metros y medio tä pites elhpej, wet sesenta y cinco centímetros tä tsajche. 22Wet ilanche lhipey wet elh tä itayyenlä tijche lechowej, häpkhilek is tä y'uyit lhamhomche. Nilhokej tablas tä iwoynejetso, häpkhilek yenejlhi häp Dios lewukwe. 23Wet tä wak'alhen, itumtej veinte häp lhip tä tapinhiye, 24wet äp yenlhi cuarenta plata lhipey yämthilek yen t'äsawtesa. Tabla weihalhapej y'äsayenpe täkwfwas t'äsawetes, itichufwi lhipey tä tiyäj lhamhomche.

25Wet häp veinte iyhäj tablas itumtej lhip elh tä tafwojhiye, 26lhäy'e cuarenta t'äsawetes tä plata lhipey yämthilek y'äsayenche'pe. 27Wet häp lhip tä tumej tä ifwala y'uy, itumtej seis tablas, 28wet y'isej täkwfwas tablas iyhäj wet itihiche letselhäs lhip tä lew'echehi. 29Wet tablastso tä hip'ajtitchewek tä tumchä, lhäy'e tä tumphä tä inuhat lhamhomche häp argollas. Mälhyej'attso tä lhamel yenlhi. 30Tä mälhyejtso, iche ocho tablas lhäy'e dieciséis t'äsawetes tä plata lhipey tä lhamel y'äsayenche'pe.

31Wet tablas tä tumej lhip elh häp Dios lewukwe, lhamel hip'alkatejo cinco lemäynhay. 32Wet häp iyhäj tä tumej lhip elh häte itech'aynej t'at iyhäj. Wet häp tablas tä tumej tä ifwala y'uy häte hip'alkatejo cinco lemäynhay. 33Wet häp lemäynek tä inukwe lechowej, lepes i'pe tablas iyhäj tä ifwache. 34Wet hip'oyejche'pe oro häp tablas lhäy'e lemäynhay. Wet äp yenlhi argollas tä oro häpkhilek y'uyitchehen häp lemäynhay.

Lep'ot tä sak'al tä tumejlä Dios lewukwech'o tä Lhamya tä N'ot'amajchet

(Éx 26.31-32)

35Wet lhamel yenlhi lep'ot tä sak'al tä y'it lhäy'e tä ifwak'an wet äp ichät, wet yenlhi lhäy tä itech'aynej m'ayhay tä lhafwis ihi. 36Wet tachuma cuatro ch'utey tä acacia tä hip'oyejche'pe oro. Wet itihi ganchos tä oro wet y'äsayenche'pe plata lhipey.

N'oyik tä lepe p'ot

(Éx 26.36-37)

37Häte lhamel yenlhi n'oyik tä y'it lhäy'e tä ifwak'an wet äp ichät, wet äp häpe lino tä õyen niyhäya tä õ'pätsin, wet lhäy wuj tä isis, häpkhilek lhamel yen lepe p'ota häp carpa tä Dios lewukwe. 38Wet lhamel yenlhi cinco ch'utey, wet hip'ajtej ganchos, wet y'äsayenche'pe t'äsawetes tä bronce. Wet hip'oyejche'pe oro häp ch'utey lhipey tä tumchephä lhäy'e argollas.

Actualmente seleccionado:

Éx 36: WCHB

Destacar

Copiar