Éx 35
35
Ifwala tä n'ot'elakw'et
1Moisés ihutwek nilhokej wichi tä Israel lhayis wet ifwenhomche tä yok:
–Häp tähesna m'ak tä Lhawuk ne'tek amel lewoyaye: 2Seis ifwalas tä letachumlhi, mat ifwala siete is chik lhen häpeya ifwala tä n'ot'elakw'et wet lhen t'amajchetayej Lhawuk. Elh chik tachumhilhi ifwalatso, iwohiyet'ak õkniläna. 3Yej lhenlhi itäj tä ihi haw'et häp ifwala tä n'ot'elakw'et.
Dios ne'tek wichi iwo t'awayhtesayej lham lew'et
(Éx 25.1-9)
4Moisés tahuyej nilhokej häp wichi tä Israel lhayis wet yok:
–Häp täja m'ak tä Lhawuk ne'tek amel lewoyaye: 5Is chik lehutaywek m'ak tä lhen Lhawuk t'awayhata tä tälhe elh chik häpe chik lehusek ne'tek iwoye täjtso. Is chik ichäj oro, plata, bronce, 6wesaj tä y'it lhäy'e tä ifwak'an wet äp ichät, lhäy'e lino tä wuj tä is, lhäy'e n'oyik tä kayla w'ole, 7lhäy'e tson'ataj t'ähes tä õ'pakhen tä ichät, lhäy'e inätetas t'ähes, lhäy'e m'ak tä hal'ä tä acacia, 8lhäy'e aceite tä õyen n'ochäkwa, lhäy'e m'ayhay tä lenij akäjche tä õ'kasoyej aceite tä õ'tsäype m'ak chik õyen t'amajcheta, wok õ'kasoyej incienso yämthilek lenij akäjche, 9lhäy'e tuntey tä wuj laha tä lhey cornalina, hätet iwoye anek lhawo, lhäy'e iyhäj tuntey tä isis, häpkhilek õ'ti'pe efod lhäy'e n'ot'okwep'ot tä lewuk Sacerdote tä Lhamya.
M'ayhay tä õ'chumyenlhi tä ihi Dios lew'et
(Éx 39.32-43)
10Wet Moisés äp yok:
–Nilhokej lhamel tä ihanej tä yenwethä m'ayhay, is chik iho alhoho yämthilek lhamel yenwethä nilhokej m'ayhay tä Lhawuk ne'tek lhamel yenwethä: 11häp carpa tä Dios lew'et, lhäy'e lep'ot tä õhp'oyejpe, lhäy'e ganchos, lhäy'e tablas, lhäy'e lemäynhay, lhäy'e lech'utey lhäy'e lew'etes, 12lhäy'e Arca tä N'ot'amajchet tä Lhawuk lhämtes ihi, lhäy'e lep'ot tä Lhawuk Lep'altsenyajw'et, lhäy'e lemäynhay tä õhp'alkatchufwi, lhäy'e wesaj tä õhp'oyejlä häp Arca tä ihi lech'o elh, 13lhäy'e mesa, lhäy'e lemäynhay tä õhp'alkatchufwi, lhäy'e nilhokej m'ayhay tä iyej, lhäy'e pan tä õyen t'amajchetayej Lhawuk, 14lhäy'e n'ochäkwhis häpkhilek hin'älitpe lech'o tä ihi, lhäy'e nilhokej m'ayhay tä iyej, lhäy'e n'ochäkwis, lhäy'e aceite tä õ'tsäyhomche n'ochäkwis tä õ'wunhen, 15lhäy'e altar tä incienso lew'et, lhäy'e lemäynhay tä õhp'alkatchufwi, lhäy'e aceite tä õ'tsäype häp elh tä õyen t'amajcheta, lhäy'e incienso tä lenij akäjche, lhäy'e wesaj tä õhp'oyejlä lepe häp Dios lew'et, 16lhäy'e altar tä õ'ti'pe itshätäy tä õ'länhen, lhäy'e chinhas tä bronce tä õ'lafwejlhi, lhäy'e lemäynhay tä õhp'alkatchufwi, lhäy'e nilhokej m'ayhay tä iyej, lhäy'e inät lehi lhäy'e lew'et tä i'pe, 17lhäy'e wesas yämthilek õhp'oyejlhi Dios lew'et ka'alho, lhäy'e letsutes lhäy'e lew'etes, lhäy'e wesaj tä õhp'oyejlhi lepe häp n'olafwek tä ilunejlhi Dios Lew'et, 18lhäy'e carpa tä Dios lew'et t'akay lew'etes, lhäy'e iyhäj n'olafwek t'akay lew'etes, lhäy'e niyhäy, 19lhäy'e sacerdote lew'uyis tä n'oyik yämthilek y'uche tä iwoye lechumet tä ihi Dios lew'et lhip tä T'amajchet. Wok oyok, Aarón lew'uyis tä n'ot'amajchetes lhäy'e leles lew'uyis.
Wichi ihäne Dios lew'et häp t'awayhtes
20Nilhokej Israel lhayis yikch'oye Moisés. 21Tä pajfwaj nilhokej lhamel tä lehusek ne'tek tach'ote Dios lechumet, lhamel tapil wet ichäje m'ayhay tä yen t'awayhata häp Lhawuk yämthilek õyenlhi carpa tä lham lew'et, lhäy'e m'ayhay tä hich'otyeneje sacerdotes lechumet, lhäy'e lhamel lew'uyis. 22Wet nämhen hin'ol, atsinhay, tä lhamel ichäje Moisés häp m'ayhay tä yen tichunhayaja tä yen t'awayhata häp Lhawuk: häp lhamsilis, lefwujhis, lech'ote lheley, lhäy'e n'otkwet'akay tä oro, lhäy'e m'ak at chik häpe tä oro. Nilhokej wichi ihäne Lhawuk häp m'ayhay tä oro tä yen t'awayhata. 23Elhpej tä hiw'en wesaj tä y'it, wok ifwak'an, wok ichät, wok lino tä wuj tä is, lhäy'e n'oyik tä kayla w'ole, lhäy'e tson'atas t'ähes tä õ'pakej tä ichät, wok inätetas t'ähes, nilhokej m'ayhaytso tä wichi ihäne. 24Wet wichi tä yen t'awayhata plata wok bronce, lhamel ihäne t'at häp Lhawuk. Wet iyhäj tä hiw'en hal'äy tä acacia, häte lhamel ihäne t'at yämthilek õyenejlhi Dios lew'et. 25Wet atsinhay tä lhäy'e lhip tä ihanej tä tayhinhen, lhamel ihäne leyhiy tä y'it lhäy'e tä ifwak'an wet äp ichät, lhäy'e lino tä wuj tä is. 26Häte atsinhay tä ihanej tä ipätsinchehen kayla w'ole wet ihumin tä tach'ote Dios lechumet, lhamel yenlhi t'at. 27Wet hin'ol tä iyhäj kaniyatey, lhamel ichäj häp tuntey tä lhey cornalina, hätet iwoye anek lhawo, lhäy'e iyhäj tuntey tä wuj tä laha ihi, yämthilek õ'ti'pe efod lhäy'e n'ot'okwep'ot tä lewuk Sacerdote tä Lhamya. 28Häte ichäj m'ak tä lenij akäjche, lhäy'e aceite tä õ'tsäyhomche n'ochäkwis tä õ'wunhen, lhäy'e tä õ'tsäype m'ak chik õyen t'amajcheta, lhäy'e tä õ'kasoyej incienso yämthilek lenij akäjche. 29Nilhokej Israel lhayis, hin'ol, atsinhay, tä t'uhläk tach'ote häp m'ak tä Lhawuk ifwenho Moisés tä ne'tek wichi yenlhi, lhamel ihäne Lhawuk häp t'awayhtes.
Häp hin'ol tä Lhawuk t'äne yämthilek yenlhi lham lew'et
(Éx 31.1-11)
30Wet Moisés tahuyej Israel lhayis wet yok:
–Lhek yahinya, Lhawuk tatshupiye hin'o tä lhey Besalel, Urí lhäs wet lechäti lhey Hur, tä lham iyej wichi tä tälhe letes Judá. 31Lhawuk yäm tapoyejej lehusek häp t'awayhat yämthilek lehanyaj ihi, lhäy'e letäfwnhayaj, wet wuj tä ihanej m'ayhay tä yenwethä. 32Lham ihanhiyeja iwoyneje lhenek tä oro wok plata wok bronce tä itech'aynej m'ak at chik häpe. 33Wet yenlawethä tuntey tä isis wet itihichela'pe, häte tachumhiyela hal'ä wet yenhilhila m'ak at chik häpe. Wet ihanhiyejat iwoyneje lhenek at chik häpe. 34Häte Lhawuk hiw'enho lehanyaj yämthilek ichufwenhen iyhäj. Wet lham lhäy'e hin'o tä lhey Oholiab, häp Ahisamac lhäs tä iyej wichi tä tälhe letes Dan, 35Lhawuk yäm wuj lehanyajay yämthilek yenwethä m'ayhay wet yäm isis. Lhamel yen chumeta chinhas, wet ihanej tä tayhin wet iwo lhäya wesaj tä y'it lhäy'e tä ifwak'an wet äp ichät, lhäy'e lino tä wuj tä is. Wuj tä lhamel ihanej iwoyneje tä yenwethä m'ayhay.
Actualmente seleccionado:
Éx 35: WCHB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Wichí, Dios Lhämtes tä Matchehen © Sociedad Bíblica Argentina, 2002.
