Éx 34

Moisés yenlhi tunte lhipey tä iti'pe tä ilesayen Dios lhämtes

(Deut 10.1-5)

1Lhawuk tahuyej Moisés wet yok:

–Enlhi tunte lhipey, tech'aynej t'at iyhäjnaj ichun. Wet otihla'pe chik olesayen olhämtesnaj oti'pe iyhäjnaj ichun tä lewasthiche. 2Häte awaklhat yämthilek leho n'oye chik fwala tä nech'e fwala tä oi'pe chenaj tä Sinaí lhip tä atojphä. 3Mat isit'ak iche elh chik yik amche. Häte isit'ak elh ihoye chenaj, lhäy'e tson'atas, w'asetas, chik t'ekwethä tä iwhäye chenaj.

4Wet Moisés yenlhi tunte lhipey, itech'aynej häp iyhäj tä ichun. Wet tä nech'e fwamlafwaj ichäj wet yik tä iho'pe chenaj Sinaí, mälhyej tä Lhawuk ne'tek iwoye. 5-6Wet nech'e Lhawuk inuhchä tä tälh puleye, ihi t'at pule tä nichätpe chenaj. Wet ihoye Moisés wet nech'e lhaiwo lheya, wet ifwitsenej tä yok:

–Ohäpe Dios tä matche wet äp n'ilataj. Ohäpe Dios tä is wet hap'altsentsaj. Onkenhiyejt'a owäk, oteläytej t'at, wet wuj ohumnhayaj lhäy'e ot'ifwtihyaj. 7Wet wujpey wichi tä op'altsen wet otiyej ohumnhayaj, wet otäyhtej lech'isukyajay tä iwoye lhäy'e tä tatay n'ohlä. Mat ihichet'a elh chik häpe chik otasnhayaj newayej tä letes ihi. Otasin lhamel tä iwoye m'ak tä ni'isa, lhäy'e leles, lhäy'e lechetsos.

8Tä Moisés iläte, t'upeyhchä pajtha letacho taji honhat, wet n'okwiyej Lhawuk 9wet yok:

–Iwuk, chik matche tä a'akäjlhi n'oyej, is chik lhekche t'at olhamel. Matche tä lehusey t'unhen wichina. Mat täyhat n'oyejen och'isukyajay lhäy'e nilhokej m'ayhay tä ni'isachehen, wet en n'oyehen aka wichi.

Dios inech'aynhi lhämet

(Deut 7.1-5)

10Lhawuk nichulho Moisés wet yok:

–Ch'ahuye olhämet. Athana owoye olhämet tä ot'untejche aka wichi Israel lhayis. Oyenhilhila m'ayhay tä lhamel iseltejen, häp m'ayhay tä n'am nenhilhi wichi chik häpe. Wet nilhokej wichi chik amel lechäthiyela, lhamel hiw'enla m'ak tä owoyej amehen, häp m'ayhay tä äyteschehen. 11Tä mälhyejtso, ifwalana woyaye t'at m'ak tä one'tek lewoyaye, häpkhilek oyokwesila häp Amorreo lhayis, lhäy'e Canaán lhayis, lhäy'e Het lhayis, lhäy'e Ferez lhayis, lhäy'e Hiv lhayis, lhäy'e Jebús lhayis. 12Chik amel letiyäjo lhamel laka honhat, yej woyejela ämet chik let'untejche, häpkhilek kachätayaho lhamel t'akanyajay. 13Mat wasthichela laka altares, wet wola lhipeya tuntey tä lhamel yen t'amajchetesa, wet isthena hal'äy tä Asera lepeykas tä lhamel yen laka dios tsinhaya.

14“Yej n'okwiyeja dios chik häpe. Tsi olham ohäpe amel Awuk Dios wet matche tä otihit'a lhamhi tähestso. 15Yej woyela ämet chik let'untejche wichi tä ihi honhattso. Tsi chik lewoyeje ämet wet alep'ajtej, wet chik lhamel iwoye m'ak tä ni'isa tä n'okwiyej laka dios lhayis wet ilänhen itshätäy, lhamel t'änla amehen wet letufwayhla itshätäy tä lhamel ilänhen tä yen n'okhayajayej lecheyälis. 16Wok amel ales yenla lech'efwasa lhamel laka'tsinhay, wet chik lhamel iwoye m'ak tä ni'isa tä n'okwiyej laka dios lhayis, ales tä iyejwethä ilehla n'oyej wet häte n'okwihiyeja lhamel lecheyälis.

17“Yej lhenlhila chinaj chik lhenla aka dios lhayisa.

N'okäjyaj tä ihi nekchämpej

(Éx 23.14-19; Deut 16.1-17)

18“Chik lechäte ifwala tä letufw pan tä levadura newayej, ena akäjyaja, mälhyej olhämet tä one'tek lewoyaye, pajtha siete ifwalas. Wet lewhäy häpe t'at iwel'a tä lhey Abib, tsi häpenaj iwel'atso tä amel lhekaych'oye Egipto.

19“Wet häp ales tä achunkatshay Olewuk t'at, lhäy'e nilhokej aläy chunkatshay, w'asetas, tson'atas, kayla lhayis. Wok oyok, lhäs chik asnak tä ichun häp tä Olewuk. 20Wet häp asno lhäs tä lechunkatsek tä asnak, is chik lhen lahayayej tson'ataj lhäs wok kayla lhäs. Mat chik kawoya lahaya, is chik lenäk'äs lew'o. Häte is chik lewo otw'ayhata tä lhen lahaya äs tä achunkatsek. Elh chik newache m'ak chik ichäj n'oye, isit'ak iho n'oye.

21“Seis ifwalas tä letachumlhi, mat häp ifwala siete wola elakw'eta. Tej chik häpe lewhäy tä letutchey wok lelanhi yachuyaj lhay, mat wola elakw'eta ifwala siete.

22“Häte, häp ifwala tä lelanhi trigo lhay tä ichun, ena akäjyaja, lhäy'e ifwalak noj yachuyaj, häp ifwala tä nekchäm lepes.

23“Nilhokej hin'ol nekchämpej tres veces tä is chik iho n'oye tä ohäpe Israel Lewuk Dios, yämthilek n'okwi n'oyej. 24Oyokwesila wichi tä ihiche honhates tä lenuhikwela, wet oy'ayhthitshila amel aka honhat. Wet chik amel lehopej n'oye tres veces nekchämpej, ihichet'ala hin'o chik lhayenla lewuka aka honhat.

25“Chik lelän itshäwet tä lhen han'okhayaja n'oyej, yej p'ajteja pan tä levadura iyej. Häte yej t'amajeja lhip itshäwet tä lelän tä Pascua.

26“Is chik lehäne ow'et häp akäs lhay tä ichun wet äp isis.

“Yej peneja kayla lhäs häp lako kat'os.”

Moisés ilesayen Dios lhämtes

27Lhawuk tahuyej Moisés wet yok:

–Lesayen olhämtesna, tsi olhämtes tä ow'en amho, lhäy'e Israel lhayis, häp tä letetsel.

28Moisés iyej Lhawuk pajtha cuarenta ifwalas wet cuarenta honatsis, wet nit'eka wet niyäya. Wet häp p'ante tä ilesayen Dios lhämtes tä i'pe tunte lhipey, wok oyok, Diez Mandamientos. 29Wet tä tajyäme ifwalastso, Moisés inuhchä tä tälhpe chenaj Sinaí. Ichäjlhi t'at häp tunte lhipey tä ilesayen Dios lhämtes tä i'pe. Mat tä inuhchä, ihanhiyejt'a tä lham tate'pe isi t'at tä yämhoplhi Lhawuk. 30Wet Aarón lhäy'e Israel lhayis, tä lhamel hiw'en tä Moisés tate'pe isi, lhamel nowaye wet tek lhaitott'ayne. 31Mat Moisés t'äne lhamel, wet Aarón lhäy'e nilhokej niyatey tä iyej wichi, lhamel ihoye Moisés wet lham yämhoplhi. 32Tä pajfwaj nilhokej wichi ihoye Moisés, wet lham ifwenho lhamel häp Lhawuk lhämtes tä ifwenho lham tä i'pe chenaj Sinaí, yämthilek lhamel iwoye. 33Tä ileyej tä yämhoplhi wichi, nech'e iwo lep'ota tate'pe.

34Wet tä Moisés ihoyepej Lhawuk tä yämhoplhi, itiyej kanhi tateyp'ot pajtha inuphä. Wet ifwenho Israel lhayis häp Lhawuk lhämtes tä ifwenho. 35Mat Israel lhayis hiw'en tä Moisés tate'pe isi t'at. Tä mälhyejtso, Moisés hip'o'pe tatey pajtha nichätepej ifwala tä lham ihoye Lhawuk yämthilek yämhoplhi, wet nech'e häp tä ilanhi tateyp'ot.#2~Cor 3.7-18

Actualmente seleccionado:

Éx 34: WCHB

Destacar

Copiar