Éx 37
37
Besalel yenlhi Arca tä N'ot'amajchet tä Dios lhämtes ihi
(Éx 25.10-20)
1Besalel yenlhi Arca tä häpe n'okähi tä hal'ä tä acacia. Itihi un metro wet diez centímetros tä pitaj, wet sesenta y cinco centímetros tä tsajo, wet sesenta y cinco tä atojphä. 2Wet hip'oyejpe oro tä ts'ilak, tä tumphä lhäy'e tä lech'oye, wet itiche häp lhip tä tumphä oro tä ilunkatejlhi. 3Wet yenlhi cuatro argollas tä oro, wet itihiche takäläy tä cuatro, täkwfwas itumtej lhip elh wet täkwfwas itumtej lhip elh. 4Häte yenlhi täkwfwas hal'äy tä acacia, wet ikäfwelejchehen oro häpkhilek hip'alkatchufwi, 5wet y'uyitchehen häp argollas tä oyämetso, häpkhilek õyen tsokeka chik õyikchufwi häp Arca.
6Wet yenlhi Arca lep'ot tä oro, un metro wet diez centímetros tä pitaj, wet sesenta y cinco centímetros tä tsajo. Häpe t'at Dios Lep'altsenyajw'et. 7Wet yenlhi täkwfwas m'ayhay tä lhafwis ihi tä oro. Ihäne lakäjnhat tä ikäji tä yenlhi, wet iti'pe lep'ot, elh ihi lepes wet elh ihi lepes elh. 8Wet lep'ot lhip t'at häp m'ayhay tä iti'petso, w'enhahit'a lhamej. 9Wet itayyenwek m'ayhaytso, mat iyahin t'at häp Arca lep'ot tä i'pe. Wet hich'enhiche lhafwis tä hip'oyejpe lep'ot.
Besalel yenlhi mesa tä pan tä n'ot'amajchet lew'et
(Éx 25.23-29)
10Wet Besalel tachuma hal'ä tä acacia wet yenlhi mesa. Itihi noventa centímetros tä pitaj, wet cuarenta y cinco centímetros tä tsajo, wet tä atojphä itihi sesenta y cinco centímetros. 11Wet hip'oyejpe oro, wet itiche häp lhip tä tumphä oro tä ilunkatejlhi. 12Wet yenlhi lhip hal'ä t'äj tä w'awulhi n'otkwech'o tä tsajche, wet itiche lhipey oro wet iti'pe. 13Häte yenlhi cuatro argollas tä oro wet itiche letselhäs tä takäläy ihiche. 14Wet tek atofwehlä hal'ä tä n'otsokekw'etes, häpkhilek t'unejiche tä õ'neyhatphäpej häp mesa. 15Wet yenlhi täkwfwas hal'äy tä acacia wet ikäfwelejchehen oro, yämthilek y'uyitpejchufwi mesa chik õyikchufwi. 16Wet tachuma oro tä ts'ilak wet yenlhi häp m'ayhay tä õ'ti'pe mesa: häp n'olhäthis, lhäy'e n'okalnhey tä wustas, lhäy'e lehis tä õ'tsäyho hat'es tä õyen Dios t'awayhata.
Besalel yenlhi n'ochäkwhis tä oro
(Éx 25.31-39)
17Häte Besalel yenlhi n'ochäkwhis tä oro tä ts'ilak. Ihänet lakäjnhat wet yenlhi t'äsawet, lhäy'e häp lhip tä nekche lechowej, lhäy'e m'ayhay tä itech'aynej lhawol lhäy'e lakotsol. Wet weihalha t'at, tek w'enhache lhamej. 18Wet tres lhachal itumtej lhip elh, wet tres lhachal iyhäj itumtej lhip elh. 19Wet seis lhachalna tä tälho elh tä nekche lechowej, elh weihalhapej lhacha itihi tres m'ayhay tä itech'aynej hal'ä tä almendro lhawol lhäy'e lakotsol. 20Häte itihi cuatro copas tä itech'aynej almendro lhawol lhäy'e lakotsol häp elh tä nekche lechowej. 21Wet lakawayhi tä tumchä itihi m'ak tä itech'aynej almendro lhawo. Wet häp lakawayhi elh tä ihi lechowej, häte itihi elh m'ak. Wet lakawayhi elh tä tumphä äp itech'aynej t'at iyhäj. 22Wet lhachal, lhäy'e m'ayhay tä itech'aynej lhawol, lhäy'e häp lhip tä nekche lechowej, weihalhahchä, wet äp häpe oro tä ts'ilak tä Besalel ikäjejlhi lakäjnhat tä yenlhi. 23Wet yenlhi siete n'ochäkwisas, lhäy'e lecha tä õyistejpej n'ochäk lhäk tä y'o, lhäy'e platofwas tä õ'tichechufwi. Nilhokej m'ayhayna oro tä ts'ilak. 24Wet tachuma treinta y tres kilos häp oro tä yenejlhi n'ochäkwhis lhäy'e nilhokej m'ayhay tä iyej.
Besalel yenlhi altar tä incienso lew'et tä õ'wunej
(Éx 30.1-5)
25Besalel yenlhi hal'ä tä acacia tä yen häpeya altar tä incienso lew'et tä õ'wunpej. Itihi cuarenta y cinco centímetros tä pitaj lhäy'e tä tsajo, wet noventa centímetros tä atojphä, wet yen lech'ula lhip. 26Wet hip'oyejpe oro tä ts'ilak häp lhip tä tumphä, lhäy'e lhip tä tatache, lhäy'e tä lew'echehi, lhäy'e lhip tä lefwomkat, lhäy'e lets'amkat, lhäy'e lech'ul. Wet itiche lhip tä tumphä oro tä ilunkatejlhi. 27Häte yenlhi cuatro argollas wet itihi lhip tä tumchä. Itiche letselhäs yämthilek chik õyikchufwi, õy'uyitchehen hal'äy wet õtilhäj. 28Wet yenlhi hal'äytso tä acacia wet ikäfwelejchehen oro.
Besalel yenlhi aceite tä n'ot'amajchet lhäy'e häp incienso
(Éx 30.22-38)
29Wet häte Besalel yenlhi aceite tä n'ot'amajchet, häpkhilek õ'tsäypejpe m'ak chik õyen t'amajcheta, lhäy'e häp incienso tä ts'ilak tä lenij akäjche. Itech'aynej t'at m'ak tä hin'o iwoye tä yenlhi m'ayhay tä lenij akäjchehen.
Actualmente seleccionado:
Éx 37: WCHB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Wichí, Dios Lhämtes tä Matchehen © Sociedad Bíblica Argentina, 2002.
