San Lucas 16

Ya̧tȩ ippeyä ru̧hua̧ huȩnȩ ji'ähuinödo

1Ja̧'hua̧ta̧nö̧ Jesús pä'inödo u̧huo̧juȩtä̧u̧ru̧:

—Ya̧tȩ järe ru̧hua̧ ki̧nö̧do. Ja̧u̧ ku̧nä̧ri̧nö̧do u̧mö̧huä̧ya̧ ippeyä ru̧hua̧rö̧. Ja̧'hua̧nö̧ ja̧'a̧ ja̧u̧ ippeyä ru̧hua̧ jȩö̧mä̧ ji'ähuinätödo ji̧nä̧ isocu ru̧hua̧rö̧. “Ja̧u̧ cuippeyä ru̧hua̧ suronä be'ecu icu cuhuäre”, ji'ähuinätödo. 2Ja̧'hua̧nö̧ ja̧'a̧ ru̧hua̧ ja̧u̧ru̧ huopö päinäcudo: “¿Däjehuä jä̧ ja̧u̧mä̧ ucu jȩcu̧'u̧ ttörö jittäumä? Cuaditähuä huȩyu̧tu̧ iyittö. Täcö chippeyä ru̧hua̧ huocö cuä̧cua̧jä̧.” 3Ja̧'hua̧nö̧ ja̧'a̧ järe ru̧hua̧ ippeyä ru̧hua̧ amöcuädi'inödo: “¿Däjetä jȩchä̧cua̧'a̧jä̧ttö̧ jitämä, chu̧ru̧hua̧ chaditähuättö rä'epö icua'amä? Rȩjȩ sahuähuänä chijuiyuhua'amä, ja̧'hua̧ta̧nö̧ mippoönä jä̧'ȩpä̧rö̧mä̧ dä'ä rö̧jä̧cu̧sä̧. 4Täcösä huo̧jua̧ jȩchä̧cuȩmä̧, ttojusodenä dottädattö pä'ö, chaditähuä jui̧'a̧ chö̧jo̧mȩnä̧.” 5Ja̧'hua̧nö̧ ja̧'a̧ ya̧cu̧nä̧rö̧ u̧ru̧hua̧rö̧ mippotätörö jä'epe'inödo. Äcuomenä jäepäcuru pä'inödo: “¿Tta̧'a̧nö̧ rö̧ȩnä̧ cuimippotä chu̧ru̧hua̧rö̧mä̧?” 6Ja̧u̧ ädätinödo: “Ciento sesenta a̧dȩ latabiyu mippotösä.” Järe ru̧hua̧ ippeyä ru̧hua̧ pä'inödo: “Ja̧ja̧, jurunä pä̧nö̧ yojäja cuyäru isojänä huȩyu̧ti̧ ochenta jo̧mȩtä̧.” 7Ju̧huȩnȩ o'comenä ka̧ra̧rö̧ jä'epinödo: “¿Ucumä di̧ttö̧, ¿tta̧'a̧nö̧ rö̧ȩnä̧ cuimippotä?” Pä'inödo ja̧u̧: “Cien jo̧mȩ ya̧mö̧ sacu oyutä mippotösä.” Ja̧'hua̧nö̧ ja̧'a̧ pä'inödo: “Ja̧ja̧. Yojäja cuyäru isojänä huȩyu̧ti̧ ochenta jo̧mȩtä̧.” 8Järe ru̧hua̧ huo̧juä̧chi̧'i̧nö̧do ippeyä ru̧hua̧ jȩpö̧ jȩä̧ji̧, huo̧ju̧nä̧ jȩpi̧nö̧ juhua'amä, pä'ö. Iso päi'önä tȩa̧u̧ ttö̧ja̧ttö̧'i̧nä̧ abonänö huo̧juä̧chi̧'ö̧nä̧ jȩpä̧tö̧ pi̧jä̧ ttö̧ja̧ ka̧ra̧ ka̧ra̧nö̧rö̧.

9“Ttö pädä̧u̧jä̧, pi̧jä̧ jähuä cu̧ju̧nä̧rä̧tu̧cu̧mä̧, korotö ttesehuätucuacu pä'ö jȩpä̧tu̧cui̧. Pi̧jä̧ jähuä cu̧ju̧nä̧rä̧tu̧cu̧mä̧ beipächomenä, Dios eseunu ȩmä̧cua̧'a̧nö̧ ucuturu chutä ö̧jo̧mȩ beipocome cu̧ja̧cuä̧tu̧cua̧ pä'ö.

10“A̧'u̧cu̧nä̧tä̧ u̧ju̧nä̧rö̧nä̧ adiu jȩpö̧mä̧, ja̧'hua̧ta̧nö̧ rö̧ȩnä̧ u̧ju̧nä̧ro̧mȩnä̧'i̧nä̧, adiu jȩpö̧. Ja̧'hua̧ta̧nö̧ a̧'u̧cu̧nä̧tä̧ u̧ju̧nä̧rö̧nä̧ suronä jȩpö̧mä̧, ja̧'hua̧ta̧nö̧ rö̧ȩnä̧ u̧ju̧nä̧ro̧mȩnä̧'i̧nä̧ suronä jȩpö̧. 11Ja̧'hua̧ta̧nö̧ pi̧jä̧ jähuänä adiu jȩcu̧'ä̧tu̧cu̧, juiyöttömä, ¿dijä̧ttö̧ ucuturu huȩä̧cua̧mä̧, iso päi'önä adihuä juäi ku̧nä̧rä̧cuä̧huä̧mä̧? 12Ja̧'hua̧ta̧nö̧ ucutu adiu jȩcu̧'ä̧tu̧cu̧ juiyöttömä korotö ttöäre, ¿dijä̧ttö̧ ucuturu i̧yä̧cua̧mä̧, ucututä cuamönä cuhuäretucu päi'önä?

13“Ya̧tȩ uruhuotö ta̧ju̧ huettömä, yoröiso jȩpo̧cö̧. Ta̧ju̧ru̧mä̧ eseunu repe'ocö. Ya̧tȩrö̧tä̧ eseunu rȩpȩä̧cua̧, ka̧ra̧rö̧ repe'oca'anä. Ja̧'hua̧ta̧nö̧ ya̧tȩ hueömä eseunu jȩa̧'a̧nä̧, ka̧ra̧ hueömä ra̧huä̧rö̧nö̧tä̧ jȩä̧cua̧. Ja̧'hua̧ta̧nö̧ Diosrö'inä, pärätä'inä ji̧nä̧ yo̧mȩtȩnä̧ amöcuädäcuähuocödo.

14Fariseos huotömä, pärätä kö'cätömä, ja̧u̧ o'ca juiyönä ä̧ju̧cuä̧ri̧nä̧tö̧do. Jesúsru ya̧'ä̧huȩ'i̧nä̧tö̧do. 15Ja̧'hua̧nö̧ ja̧'a̧ Jesús päinä̧u̧do:

—Ucututä ttö̧ja̧ ttä'ca jo̧mȩttö̧ adiu jȩpä̧tö̧mä̧ ttö̧ja̧ tottönä. Ja̧'hua̧nö̧ ja̧'a̧nä̧ Diosmä huo̧jua̧ cuami iso'quitucunä. Ttö̧ja̧ ttucuo kö̧nä̧ ttamöcuädömä, Diosmä kö'cocö.

Jesús Moisés hueähuä huȩnȩ ji'ähuinödo

16“Juan ö̧ji̧no̧mȩ jubötä ki̧na̧'a̧ Moisés hueähuä huȩnȩmä̧. Ja̧'hua̧ta̧nö̧ ki̧na̧'a̧ Dios i̧huȩnȩ jiäcuähuä isotö ttu̧huo̧juȩti̧nö̧'i̧nä̧. Ja̧u̧ ö̧ji̧nö̧ o'ca'a ji'ähuätö adihuä huȩnȩ, Dios Tu̧ru̧hua̧ päi'önä ö̧jä̧cuȩ huȩnȩ. O'ca toi'önä yo̧mȩtȩnä̧ dottächa pä'ö jȩpä̧tö̧.

17“Mo̧ro̧jä̧'i̧nä̧, pi̧jä̧'i̧nä̧ beipächa'anä, hueähuä huȩnȩ ji̧'qui̧cha̧nö̧'i̧nä̧ beipächocödo.

Ttirecuarö jaroi'äcuähuä huȩnȩ ji'ähuinödo

18“Ya̧tȩ irecuarö ja̧'a̧tä̧ jaroi'öttömä, karajuru ȩmö̧, suronä jȩpö̧. Ja̧'hua̧ta̧nö̧ ka̧ra̧mä̧ yajutä kirecuo jaroi'inäcuarö irecua päi'önä ȩmö̧ttö̧mä̧, suronä jȩpö̧, —pä'inödo Jesús.

Järe ru̧hua̧cu̧, Lázarocu jiähuinö huȩnȩ

19Ja̧'hua̧ta̧nö̧ pä'inödo Jesús:

—Ki̧nö̧do ya̧tȩ järe ru̧hua̧. Ö̧'ca̧tä̧huä̧ti̧yu̧ adihuä juäitä 'ca̧tä̧hui̧nö̧do. 'Cuäopönä mo̧ro̧jö̧ a̧'u̧cuä̧ a̧'cua̧ adiu eseunu fiesta jȩpi̧nö̧do. 20Ru̧hua̧ äpate ä'ca pi̧'ä̧ji̧nö̧do usurä i̧sa̧ Lázaro pä'ö mi̧cua̧. Öttahuiyä rö̧ȩnä̧ ku̧nä̧ri̧nö̧do. 21Ja̧u̧ usurä i̧sa̧ järe ru̧hua̧ u̧cuȩ cuäcuähuodä dȩa̧'a̧ ma̧ä̧chö̧tä̧ ucua pä'inödo. Ä̧hui̧ri̧tö̧ öttahuiyä netta pä'ö ttichi'äjinäcudo. 22Koro mo̧ro̧ usurä i̧sa̧ 'corupä'i'inödo. Angeles ttȩpi̧nä̧cu̧do mo̧ro̧jä̧ra̧'a̧ Abraham ö̧ja̧'a̧. Järe ru̧hua̧'i̧nä̧ 'corupä'i'inödo. 'Turu tticuinäcudo. 23Ja̧u̧nu̧ järe ru̧hua̧ 'corujuo'ächätö rȩbȩä̧cuä̧huo̧mȩ i̧rȩbȩhuo̧mȩnä̧, ubara ttu'inödo. Otonätä topinödo Abrahamrö Lázarocu ö̧ja̧'a̧. 24Ja̧'hua̧nö̧ ja̧'a̧ huopinödo: “Chä'o Abraham, re rö̧jö̧nä̧ topittö. Lázarorö hue'i ajiyanä ji̧'qui̧cha̧nö̧ ödo'che ta'epö chi̧nȩnä̧ ttinänö päi'önä tahuepattö. Rö̧ȩnä̧ ubara ttu'usä pottö ocurära̧'a̧ttö̧.” 25Ja̧'hua̧nö̧ ja̧'a̧ Abraham ädätinödo: “Chi̧tti̧, amöcuädäcuähui. Ucu adiu 'cuäopinäcujä äcuomenä cu̧ji̧nä̧jä̧ra̧'a̧ttö̧mä̧. Lázaromä surojinäcu ja̧huä̧jä̧ttö̧mä̧. Jitä ja̧u̧ a̧'cua̧ ȩmö̧ pottö, ucu jitä ubara ttucuhua'anä. 26Ja̧u̧ pädäjitämä̧cö̧. Ja̧'hua̧ta̧nö̧ idahuä cu̧ju̧ppa̧'a̧ abo ja̧'a̧to ujututtu'inä, ucututtu'inä. Pa̧nä̧ttö̧ tti̧'cha̧ pä'ätö'inä, tti̧'chö̧ juiyö'a̧nö̧ ja̧'a̧. Pocu'inä ttichö juiyö'a̧nö̧ ja̧'a̧.” 27-28Ja̧'hua̧nö̧ ja̧'a̧ järe ru̧hua̧ pä'inödo: “Ja̧'hua̧nö̧ ja̧'a̧ttö̧ chä'o Abraham, ucuotönö pä'ösä, Lázarorö hue'i chä'o ojusodera̧'a̧, ji̧mö̧tȩ ruhuä chö̧jä̧hua̧tö̧rö̧ jiähua, po ttö̧ja̧ ubara ttuttome ttichö juiyönä jahuätö'inä.” 29Ja̧'hua̧nö̧ ja̧'a̧nä̧ Abraham pä'inödo: “Jahuätö täcö ku̧nä̧rä̧tö̧ Moisés'inä, Dios i̧huȩnȩ jiäcuähuä isotö'inä huȩyu̧tu̧ huettinö. Esetötä ttesetado.” 30Järe ru̧hua̧ ädätinödo: “Iso päi'önä pä'öjä, chä'o Abraham. Ja̧'hua̧nö̧ ja̧'a̧nä̧ ya̧tȩ 'corupä'i'inö ji'äu i̧'chö̧ttö̧mä̧, pärocuäcutä ttamöcuädäcuotö.” 31Ja̧'hua̧nö̧ ja̧'a̧nä̧ Abraham pä'inödo: “Moisés'inä, Dios i̧huȩnȩ jiäcuähuä isotö jittähuinö ttesetö juiyöttömä, ya̧tȩ 'corupä'i'inö pä'äji ta'anö tto'ächö jiäuttu'inä, esetocotö ttäcuotö,” —pä'inödo Jesús.

Actualmente seleccionado:

San Lucas 16: PIDNT86

Destacar

Copiar