San Lucas 15

Oveja ire'tehuächinö huȩnȩ huo̧juȩti̧nö̧do

1O'ca toi'önä ru̧hua̧ öäre pärätä ȩmä̧'i̧jä̧tö̧'i̧nä̧ suronä jȩä̧cuä̧huä̧ ttö̧ja̧'i̧nä̧ Jesúsru ttä̧ju̧cua̧ pä'ö tö'cöpächinätödo. 2Ja̧'hua̧nö̧ ja̧'a̧ fariseos huotö'inä, hueähuä huȩnȩ huo̧juȩtä̧tö̧'i̧nä̧ suronä pättä'chinäcudo. Pä'inätödo:

—Chujuamä eseunu jȩpö̧ suronä jȩpä̧tö̧rö̧. Ja̧'hua̧ta̧nö̧ u̧cuȩ jahuätötäcu cu.

3Ja̧'hua̧nö̧ ja̧'a̧ Jesús pi̧yȩ koro juäi jä̧'i̧nö̧'a̧nö̧ jö̧ huȩnȩ päinä̧u̧do:

4—Ucututtu ya̧tȩ ubomä, ä̧ji̧mö̧ o̧vȩja̧stö̧ ya'ute cien jo̧mȩnä̧ ku̧nä̧rö̧mä̧, ä̧ji̧mö̧ttö̧ ya̧tȩ toei'omenä, ¿korotörö meje'canä jaropi'ö, äji re'tehuächörö usocö tä̧ji̧, ö̧'o̧cui̧'o̧mȩ jubö päi'önä? 5-6Ja̧'hua̧nö̧ ja̧'a̧ täcö ö̧'o̧cui̧'o̧mȩnä̧, eseunu u'upi'canä huä̧do̧u̧, ojusodera̧'a̧ 'chä̧hui̧'ö̧, ahuaruhuärö ca̧ca̧to̧'ö̧, tö'cö odehuiyä ruhuärö pä'ö: “Esehuätucui ttöcu. Täcö po̧cui̧pä̧ji̧sä̧ chäji oveja re'tehuächäjirö.” 7Ttö pä'ösä ucuturu, ya̧tȩ suronä jȩpö̧mä̧ pärocuäcutä amöcuädomenä, korotö noventa y nueve jo̧mȩnä̧ ttö̧ja̧ adiu jȩpä̧tö̧ pärocuäcutä ttamöcuädoca'attö'inä abonänö eseäcuähuä ka̧'a̧ mo̧ro̧jä̧ra̧'a̧ttö̧.

Pärätä̧bi̧ toei'inä̧bi̧ huȩnȩ ji'ähuinödo

8“Ja̧'hua̧ta̧nö̧ yajute to̧mö̧rȩ jähuä pärätä o̧bi̧ ku̧ju̧nä̧ra̧'a̧, ji̧bi̧tȩ toei'iyäcuamä, ¿lámpara rȩdȩtö̧, kojusode ttu̧ȩcuä̧nä̧ juatö kä̧nö̧ kö̧'o̧cui̧'o̧mȩ jubö päi'önä usocoju tä̧ji̧? 9Ja̧'hua̧nö̧ ja̧'a̧ täcö kö̧'o̧cui̧'o̧mȩnä̧, kahuaruhuärö, kojusode tö'cö odehuiyä ruhuärö, ca̧ca̧to̧'ö̧ pä'äju: “Esehuätucui ttöcu. Täcö po̧cui̧pä̧jä̧ju̧sä̧ chöäre pärätä̧bi̧ toei'inä̧bi̧mä̧.” 10Ttö pä'ösä ucuturu, ja̧'hua̧ta̧nö̧ Dios isotö ángelesmä esehuätö, ya̧tȩ suronä jȩpö̧mä̧ pärocuäcutä amöcuädomenä, —pä'inödo Jesús.

Ya̧tȩ suronä jȩpö̧, öäre pärätä be'ecu icuinö huȩnȩ ji'ähuinödo

11Ja̧'hua̧ta̧nö̧ Jesús pä'inödo:

—Ya̧tȩ i̧tti̧mö̧ ta̧ju̧ru̧ ku̧nä̧ri̧nö̧. 12Jahuätö ta̧ju̧ttu̧ röji ru̧hua̧ pä'inödo jä'orö: “Chä'o, ttö'inä chamönä ttötä jähuä päi'önä 'quȩ'ȩpö̧ iyittö.” Ja̧'hua̧nö̧ ja̧'a̧ jä'o 'quȩ'ȩpö̧ iyinödo jahuätörö ttöäre. 13A̧'u̧cu̧nä̧tä̧ mo̧ro̧ o'come i̧tti̧ röji ru̧hua̧ öäre o'ca juiyönä ca̧ca̧ti̧'ö̧, i̧hui̧nö̧do korotö tti̧rȩjä̧ra̧'a̧ juhuorö oto. Juhua'atä kä̧nö̧ suronä jȩpö̧, öäre pärätä be'ecu icuinödo. 14Ja̧'hua̧nö̧ ja̧'a̧ o'ca juiyönä be'ecu icuäji o'ca'a, rö̧ȩnä̧ ppäi ichina'ado ja̧huä̧jä̧ra̧'a̧ttö̧. Ucua ppäi ttu'inödo. 15Ja̧'hua̧nö̧ ja̧'a̧ aditähuä usu 'chi̧nö̧do ya̧tȩ ja̧u̧ rȩjȩ ru̧hua̧cu̧. Ja̧u̧ hueinäcudo äji cu̧chi̧tö̧rö̧ tta̧huä̧ri̧ya̧rö̧ pä'ö. 16Ja̧'hua̧ta̧nö̧ ö'cäbiyu suhuädi'önä ucua pä'inödo jȩru̧ä̧ o̧ja̧ttö̧, cu̧chi̧tö̧ ttucuttu. Yoröiso ya̧tȩ'i̧nä̧ iyococö pi̧nö̧do ucua pä'ömä. 17Ja̧'hua̧nö̧ ja̧'a̧ amöcuädinödo: “Chä'o ojusodenä recuätö adicuä ruhuä ttucua'anä'inä ka̧cui̧pi̧'ä̧na̧'a̧ qui̧. Ttöhue porö ppäittö 'corujuo'ächösä di̧. 18Ä̧rä̧mi̧'ö̧ chä'o ö̧ja̧'a̧ ppa̧dä̧cha̧ja̧. Jidähuaröjä: Chä'o, suronä jȩpä̧ji̧sä̧ Diosrö'inä, ucuru'inä. 19Täcö cui̧tti̧sä̧ pädäu juiyö'a̧nö̧ jä̧cu̧sä̧. Jitöja cumöhuäyotö ttö̧jö̧'a̧nö̧ chö̧ja̧ hue'ittö.” 20Ja̧'hua̧nö̧ ja̧'a̧ ä̧rä̧mi̧'ö̧, jä'o ojusodera̧'a̧ ppa̧'ä̧chi̧nö̧do.

“Jä'omä ji̧nä̧ otonänö icha'a topö, re rö̧jö̧nä̧ toinäcudo. Eseunu jopächö 'chä̧hui̧'ö̧ i̧tti̧rö̧ hua'adi'ö esehuinäcudo. 21Ja̧'hua̧nö̧ ja̧'a̧ i̧tti̧ pä'inödo: “Chä'o, suronä jȩpä̧ji̧sä̧ Diosrö'inä, ucuru'inä. Täcö cui̧tti̧sä̧ pädäu juiyö'a̧nö̧ jä̧cu̧sä̧.” 22Ja̧'hua̧nö̧ ja̧'a̧ jä'o umöhuäyotörö pä'inödo: “Jurunä ȩmo̧po̧'ä̧tu̧cui̧. 'Ca̧tä̧cuä̧huä̧ o̧ta̧ adiuttö 'ca̧tä̧tu̧cui̧rö̧. “Ödo'che i̧so̧bö̧'i̧nä̧ rö̧nä̧tu̧cui̧rö̧ ödo'chenä. Ö̧jä̧pö̧ isä'ca'inä ö̧jä̧pö̧nä̧ ku̧nä̧tu̧cui̧rö̧. 23Päcäyä bä̧rȩpa̧ttö̧ i'cächö cuä'ätucui, cuäcuähuä'inä eseunu kä̧nö̧ tucuätucua. 24Pide ttö chi̧tti̧ 'corupä'i'inö'ca̧, pä'äji ta'anö kö̧. Re'tehuächinö'ca̧, pä'äji ta'anö tö̧'o̧cui̧'ä̧cu̧.” Ja̧'hua̧nö̧ pä'ö ttu̧cuȩ eseunu cuinätödo.

25“Ja̧u̧nu̧ pä̧nä̧ i̧tti̧ ä'canä ru̧hua̧ ö'ättara̧'a̧ kä̧ji̧'ca̧ ichomenä, isode tö'cö pä'i'ö ä̧ju̧cui̧nö̧do fiesta jȩtta̧'a̧. 26Ja̧'hua̧nö̧ ja̧'a̧ ya̧tȩ u̧mö̧huä̧ya̧rö̧ huopö, jä'epinödo däje jȩtta̧ja̧ pä'ö. 27Ja̧u̧ pä'inödo: “Cu̧jä̧hua̧ täcö ichäjido. Cuä'o hue'äji päcäyä bä̧rȩpa̧rö̧ tucua cuätta pä'ö, na̧huä̧cho̧ca̧'a̧ ichäjiyäcu.” 28Uböo ä'canä ru̧hua̧ ra̧huä̧ri̧pi̧nö̧do. Doächö juiya pä'inödo. Chutä jä'otä u̧mi̧cu̧ rä'opächö, doächa pä'ö ucuocuinäcudo. 29Ja̧u̧ pä'inödo jä'orö: “Ucu huo̧jua̧jä̧ rö̧ȩnä̧ a̧'ȩ aditinösä ucuru jarodäcuähuä juiyönä. Ja̧'hua̧nö̧ ja̧'a̧nä̧ yoröisotä cabritorö'inä cuiyococö pä'ijösä, ttö'inä fiesta chadita pä'ö chahuaruhuäcu. 30Ja̧'hua̧nö̧ ja̧'a̧ jitä cui̧tti̧, nä̧tö̧ suronä jȩpä̧tö̧cu̧ cuhuäre pärätä be'ecu icuinö icha'attö, cuä'öjä päcäyä bä̧rȩpa̧rö̧.” 31Ja̧'hua̧nö̧ ja̧'a̧ jä'o pä'inödo: “Chi̧tti̧, ucumä ttötäcu 'cuäopönä kö̧jä̧. Ja̧'hua̧nö̧ ja̧'a̧ttö̧ o'ca juiyönä chu̧ju̧nä̧rö̧mä̧ ucutä cuhuäre ja̧'a̧. 32Ja̧'hua̧nö̧ ja̧'a̧ttö̧ jitämä juiyo adihua'a cuä̧nö̧ tesehuomenämä. Cu̧jä̧hua̧ 'corupä'i'inö'ca̧, pä'äji ta'anö kö̧. Re'tehuinö'ca̧, pä'äji ta'anö tö̧'o̧cui̧'ä̧cu̧,” pä'inödo ja̧u̧ jä'omä, —pä'ö huo̧juȩti̧nö̧do Jesús.

Actualmente seleccionado:

San Lucas 15: PIDNT86

Destacar

Copiar