San Juan 9

Jesús ya̧tȩ ä̧to̧ca̧rö̧ aditö icuinödo

1Jesús korome 'cuäopomenä, ya̧tȩrö̧ topinödo, uhuäpächina'anätä ä̧to̧ca̧rö̧. 2Chutä u̧huo̧juȩtä̧u̧ ja̧u̧ru̧ jä'epinätödo:

—Huo̧juȩcuä̧ I̧sa̧, pidemä, ¿dä̧bö̧ ä̧to̧ca̧ uhuäpächinättö? ¿Jä'ocu, ja̧ju̧cu̧ suronä jȩpi̧nä̧tö̧ tä̧ji̧? ¿Chutä suronä jȩpi̧nö̧ tä̧ji̧?

3Jesús jahuätörö pä'inödo:

—Chutä'inä, jä'o'inä, ja̧ju̧'i̧nä̧ suronä jȩpo̧co̧tö̧ pi̧nä̧tö̧do. Pi̧jä̧ ttö̧ja̧ Dios ujuru tottäcua'a̧nö̧ ja̧'hua̧nö̧ uhuäpächinödo. 4Jitämä, mo̧ro̧ ja̧'a̧ttö̧ ttö̧rö̧ hueinäcu aditähuä chaditö'a̧nö̧ ja̧'a̧. Mä̧cuä̧, yodo ichomenä, yoröiso adicuoca'a. 5Pi̧jä̧nä̧ chö̧jo̧mȩnä̧, pi̧jä̧ tȩa̧u̧ päi'önä kö̧sä̧.

6Ja̧'hua̧nö̧ pä'äji'ca̧ Jesús rȩjȩ su'u, redä'ca ji̧'qui̧cha̧nö̧tä̧ huihuatö jȩpö̧, ä̧to̧ca̧ ö'ärenä ma̧ri̧nö̧do. 7Ja̧'hua̧ ja̧'a̧ ja̧u̧ru̧ pä'inödo:

—Siloé reju iso'unä töcähuäji. —Juhuo'u i̧mi̧mä̧, Huettino'u pä'ö mi̧cui̧no̧mȩ.

Ja̧u̧ ä̧to̧ca̧ 'chä̧nö̧ töcähuinödo. Ja̧'hua̧nö̧ ötöcähuäji o'ca'a ppa̧huä̧cho̧mȩnä̧, ö'äre adiu topinödo. 8Ja̧'hua̧ ja̧'a̧ttö̧ ahuaruhuä'inä, korotö ja̧u̧ru̧ ä̧to̧ca̧ ö̧ja̧'a̧ topinätö'inä pä'inätödo:

—¿Pidemä mä̧nä̧ jäyänä pä̧nö̧ mippoönä jä'epocö pi̧nö̧ tä̧ji̧?

9Korotö ädätinätödo:

—A̧, ja̧u̧tä̧do.

Korotö'inä pä'inätödo:

—Tta̧'a̧huä̧jä̧. Ja̧u̧tä̧ a̧'cua̧ra̧'a̧nä̧ ka̧ra̧to.

Ja̧'hua̧nö̧ ja̧'a̧nä̧ chutä pä'inödo:

—Ttötäsä.

10Ja̧'hua̧nö̧ päomenä, ja̧u̧ru̧ jä'epinätödo:

—¿Tta̧'a̧nö̧ päi'äcu tocu'a'ajä̧ttö̧ jitämä?

11Jahuätörö ädätinödo:

—Chutä Jesús pättäcu, redä'ca huihuatäji'ca̧, chö'ärenä ma̧rä̧ji̧'ca̧, ttörö pä'äji: “Siloé reju iso'unä töcähuäji.” Päji ta'anö chötöcähuomenä, chö'äremä tochönä päi'äjäcusä, —pä'inödo.

12Juhua'a yabonö jä'epinätödo ja̧u̧ru̧:

—Ja̧u̧ ubomä, ¿to ö̧jä̧ttö̧ jitämä?

Ja̧u̧ ädätinödo:

—Ttösä jȩru̧pa̧.

Fariseos huotö ä̧to̧ca̧'a̧ tottinäcuru jä'epinätödo

13Ja̧'hua̧ ja̧'a̧ttö̧ ja̧u̧ ä̧to̧qui̧nö̧rö̧, fariseos huotö ttä'ca jo̧mȩ ȩpi̧nä̧tö̧do. 14Jesús ä̧to̧ca̧rö̧ redä'ca huihuätö aditö icuinö mo̧ro̧, ttö̧ja̧ 'cuättächi'ö mo̧ro̧ ji̧na̧'a̧do. 15Ja̧'hua̧nö̧ ja̧'a̧ttö̧ fariseos huotö pä'äji ta'anö jä'epinätödo ja̧u̧ ä̧to̧qui̧nö̧rö̧:

—Jitämä, ¿tta̧'a̧nö̧ pä'ö tocu'ättö? —pä'ö jä'epinätödo.

Ja̧u̧ pä'inödo jahuätörö:

—Ja̧u̧mä̧ redä'ca chö'ärenä u̧ma̧rä̧ji̧ o'ca'a töcähuäjisä. Jitämä topösä.

16Ja̧'hua̧ ja̧'a̧ttö̧ fariseos huotöttö korotö pö̧nä̧ pä'inätödo:

—Ja̧'hua̧nö̧ jȩpä̧ji̧mä̧, Dios huȩ'ä̧hua̧mä̧cö̧. Ja̧u̧mä̧ ttö̧ja̧ 'cuättächi'ö mo̧ro̧ ucuotocö.

Korotömä pä'inätödo:

—Ya̧tȩ suronä jȩpö̧mä̧, ¿ja̧'hua̧nö̧ ttö̧ja̧ ttieru juäi jȩpö̧ tä̧ji̧?

Ja̧'hua̧nö̧ pättomenä, yoröiso ji̧nä̧ yo̧mȩtȩnä̧ amöcuädocotö pi̧nä̧tö̧do. 17Ja̧'hua̧ ja̧'a̧ttö̧ pä'äji ta'anö ja̧u̧ ä̧to̧qui̧nö̧rö̧ jä'epö ä̧ju̧cui̧nä̧tö̧do:

—Ucuru tocu'a pä'ö aditö icuäjirömä, ¿tta̧'a̧nö̧ päcuhuäcujä̧ttö̧?

Ja̧u̧ pä'inödo:

—Ja̧u̧mä̧ Dios i̧huȩnȩ jiäcuähuä i̧sa̧do pä'ösä ttömä.

18Ja̧'hua̧nö̧ ja̧'a̧nä̧ judíos ttö̧ja̧ ja̧u̧ jitä toa'a totta'anä, pä'äji ä̧to̧qui̧nö̧mä̧ tteseta pä'ocotö pi̧nä̧tö̧do jä'orö'inä, ja̧ju̧ru̧'i̧nä̧ jättepö juiya'anä. Ja̧u̧ jä'orö'inä, ja̧ju̧ru̧'i̧nä̧ huopinätödo. 19Jahuätörö jä'epinätödo:

—Pidemä, ¿ucutu cui̧tti̧tu̧cu̧ tä̧ji̧? ¿Uhuäpächina'anätä, ä̧to̧ca̧ pi̧nö̧ pä'ätöjä tä̧ji̧? Jitä topö ö̧'a̧'a̧ ¿tta̧'a̧nö̧ päi'äjäcujä̧ttö̧?

20Jä'o'inä, ja̧ju̧'i̧nä̧ ädätinätödo:

—Pidemä, ujutu ti̧tti̧ huo̧juä̧tö̧jä̧. Ja̧'hua̧ta̧nö̧ uhuäpächina'anätä ä̧to̧ca̧ pi̧nö̧ huo̧juä̧tö̧jä̧. 21Ja̧'hua̧nö̧ ja̧'a̧nä̧ jitä ö'äre toa'amä jerupätöjä. Ja̧'hua̧ta̧nö̧ ö'äre aditö icuäjirö jerupätöjä. Ja̧u̧ru̧tä̧ jä'epätucui. Täcö böo ja̧'a̧. Chutä jiähuäcua'a̧nö̧ ucuturu.

22Jä'o'inä, ja̧ju̧'i̧nä̧ judíos ttö̧ja̧rö̧ ye'ecu, ja̧'hua̧nö̧mä̧ pä'inätödo. Jahuätö judíos ttö̧ja̧ ä'canä ji̧nä̧ yo̧mȩtȩ amöcuädö, pä'inätödo:

—Ya̧tȩ Jesús iso päi'önä Cristodo pä'örömä, judíos ttu̧huo̧jui̧'i̧nodettö i̧mi̧cu̧nä̧ 'quȩ'ȩpö̧ ticuäcuotöjä. 23Ja̧'hua̧nö̧ ja̧'a̧ttö̧ jä'o'inä, ja̧ju̧'i̧nä̧ pä'inätödo: “Ja̧u̧ru̧tä̧ jä'epö ä̧ju̧cuä̧tu̧cui̧. Täcö böo ja̧'a̧.”

24Ja̧'hua̧ ja̧'a̧ttö̧ judíos ttö̧ja̧ ja̧u̧ru̧ pä'äji ä̧to̧qui̧nö̧rö̧ huopö, pä'inätödo:

—Dios ä'ca jo̧mȩttö̧ iso päi'önä ji'ähuitö. Ja̧u̧ ubomä suronä jȩpö̧ huo̧juä̧tö̧jä̧.

25Ja̧u̧ ä̧to̧qui̧nö̧mä̧ ädätö pä'inödo:

—Ja̧u̧ suronä jȩpo̧cö̧. Ttömä ja̧'hua̧nö̧mä̧ jȩru̧pa̧sä̧. Ttörö pä'äji chä̧to̧cö̧ aditö icuäjitä huo̧jua̧sä̧. Pä'äjimä chä̧to̧cä̧'i̧ja̧'a̧, jitä topösä.

26Ji̧nä̧ juhua'a yabonö jä'epinätödo:

—Ja̧'hua̧nö̧ jȩpö̧mä̧, ¿däje jȩä̧jä̧ttö̧ ucuru? ¿Tta̧'a̧nö̧ jȩpö̧ aditö icuäjättö ucurumä?

27Ja̧u̧ ädätinödo:

—Täcö ji'ähuäjisä. Ucututä ttörö ä̧ju̧cu̧, esetocotöjä. Jitä ya'ute jidähua pä'ö, ¿dä̧bö̧ jä̧cu̧huȩ'ä̧rä̧tu̧cuä̧ttö̧? ¿Ucutu'inä ja̧u̧ru̧ cuesetätucua pä'ätöjä tä̧ji̧?

28Ja̧'hua̧ ja̧'a̧ttö̧ ja̧u̧ru̧ ra̧huä̧rö̧nä̧nö̧ ucuocu pä'inätödo:

—Ucumä ja̧u̧ uborö esetöjä. Ujutumä Moisésrö esetätöjä. 29Dios Moisésrö ucuocuinö huo̧juä̧tö̧jä̧. Ja̧u̧ uborömä, ichina'attö'inä jerupätöjä.

30Ja̧'hua̧nö̧ pättomenä, ja̧u̧ ä̧to̧qui̧nö̧mä̧ pä'inödo:

—¿Tta̧'a̧nö̧ jo? Ucutumä ichina'attö cuieruhuätucuomenä, ttö chö'äre tocha pä'ö aditö icuäji. 31Iso päi'önä Diosmä suronä jȩpä̧tö̧rö̧ ä̧ju̧cuo̧cö̧ huo̧juä̧tö̧jä̧. Ja̧u̧ i̧huȩnȩ ä̧ju̧cu̧, ja̧u̧ru̧tä̧ tta̧'cua̧ huȩnä̧rä̧tö̧rö̧tä̧ ä̧ju̧cu̧ Diosmä. 32Ya̧tȩ uhuäpächina'anätä ä̧to̧ca̧rö̧ aditö icuinö huȩnȩ yoröiso ä̧ju̧cuä̧cuä̧huo̧ca̧'a̧ pi̧jä̧nä̧. 33Ja̧u̧ ubomä Diosttö ichinö juiyöttömä, ja̧'hua̧nö̧ yoröiso jȩpo̧cö̧ paji, —pä'inödo.

34Ja̧'hua̧nö̧ pä'äji'ca̧, ja̧u̧ru̧ pä'inätödo:

—Ucumä, cuhuäpächina'attö suronä jȩpö̧ kä̧nö̧, ¿ujuturu cu̧huo̧juȩta̧ pä'öjä tä̧ji̧?

Ja̧'hua̧nö̧ pättomenä, 'quȩ'ȩpö̧ tticuinäcudo judíos ttu̧huo̧jui̧'i̧nodettö.

Diosrö esetocotömä, ä̧to̧cä̧tö̧ jä̧'i̧nö̧'a̧nö̧ huotödo

35Ja̧u̧ ä̧to̧qui̧nö̧rö̧ 'quȩ'ȩpö̧ tticuäja'a huo̧jui̧'i̧nö̧do Jesús. Ja̧u̧ru̧ tomenä pä'inödo:

—Ucumä, ¿Dios I̧tti̧rö̧ esetöjä tä̧ji̧?

36Ja̧u̧ ubo ädätinödo:

—Cha̧hua̧ru̧hua̧, ja̧u̧ru̧ ji'ähuittö chesetarö pä'ö.

37Ja̧'hua̧ ja̧'a̧ttö̧ Jesús päinäcudo:

—Täcö tocu'äcu. Ja̧u̧cu̧ ucuocujä. Ttötäsä.

38Ja̧'hua̧nö̧ päomenä, ja̧u̧ ubo ihue'quiyunä kä̧mä̧dö̧, Jesús ä'ca jo̧mȩ pä'inödo:

—Chu̧ru̧hua̧, esetösä.

39Ja̧u̧nu̧ o'ca'a Jesús pä'inödo:

—Ttömä pi̧jä̧ra̧'a̧, adihuä juäi jȩcha̧ pä'ö ichinösä. Ä̧to̧cä̧tö̧ totta pä'ö ichinösä. Ja̧'hua̧ta̧nö̧ topätömä, ttä̧to̧cä̧cha̧ pä'ö ichinösä.

40Ja̧'hua̧ ja̧'a̧ttö̧ korotö fariseos huotö, ja̧u̧cu̧ ka̧cuä̧tö̧mä̧, ja̧'hua̧nö̧ päa'a ä̧ju̧cu̧ jättepinäcudo:

—¿Ujutu'inä ä̧to̧cä̧tö̧jä̧ tä̧ji̧?

41Jesús jahuätörö ädätinödo:

—Ucutumä cuä̧to̧cä̧tu̧cu̧ttu̧mä̧, suronä amöcuädocotö pajatöjä. Ja̧'hua̧nö̧ ja̧'a̧nä̧ “Ujutu topätöjä” päcuhuätucua'attö, suronä amöcuädö jȩpä̧tö̧jä̧, —pä'inödo Jesús.

Actualmente seleccionado:

San Juan 9: PIDNT86

Destacar

Copiar