San Juan 8

Yajute suronä jȩji̧nö̧ huȩnȩ

1Jesús Olivos inähuära̧'a̧ 'chi̧nö̧do. 2Ja̧u̧nu̧ o'ca'a mo̧ro̧, mo̧ro̧ juomenä, Diosrö ucuocuäcuähuodera̧'a̧ ppa̧'ä̧chi̧nö̧do. O'ca toi'önä ttö̧ja̧ ja̧u̧ru̧ tö'cönänö ichi'inätödo. Ja̧u̧ pä̧mä̧dö̧, huo̧juȩti̧nö̧do jahuätörö. 3Ja̧'hua̧ ja̧'a̧ hueähuä huȩnȩ huo̧juȩtä̧tö̧'i̧nä̧, fariseos huotö'ina yajute isaju ka̧ra̧cu̧ suronä jȩpä̧jä̧ju̧ru̧ i'cächinätödo. Jesús ippeyänä pȩjä̧tö̧ ttö̧'quȩtȩnä̧ i'cächö ku̧ni̧nä̧tö̧do. 4Jahuätö pä'inätödo Jesúsru:

—Huo̧juȩcuä̧ I̧sa̧, paju isaju ka̧ra̧cu̧ suronä jȩja̧'a̧ topäjätöjä. 5Moisés hueähuä huȩnȩ ujuturu päa'a, pa̧'a̧nö̧ huotörö ido'quinä icu cuä'ö tticuatö pä'ö. Ucutä ¿tta̧'a̧nö̧ päcuhuättö?

6Jahuätö ja̧'hua̧nö̧ jä'epinätödo ädäta'a ä̧ju̧cu̧, suronä ttucuocuarö pä'ö. Ja̧'hua̧ ja̧'a̧ Jesús rȩjȩcu̧ topö, udo'chenä huȩyu̧ti̧nö̧do rȩjȩ. 7Ja̧'hua̧nö̧ jȩo̧mȩnä̧, ji̧nä̧ isocu jä'epinätödo. Ja̧'hua̧ ja̧'a̧ jahuätö jättepäcu, ä̧rä̧mi̧'ö̧ pä'inödo:

—Ucututtu ya̧tȩ suronä jȩpo̧cö̧mä̧, jahuäjuru äcuomenä ido'qui icui.

8Ja̧'hua̧nö̧ päji o'ca'a pä'äji ta'anö rȩjȩcu̧ topö, huȩyu̧ti̧nö̧do rȩjȩ. 9Ja̧'hua̧nö̧ ja̧'a̧nä̧ ja̧u̧ juäi ä̧ju̧cu̧, jitötä ttamönä suronä ttamöcuädäja'attö, rä'opinätödo. Äcuomenä böäcuächätö rättopö o'ca'a, möäyotö'inä rä'opinätödo. Jahuätö o'ca toi'önä rättopäji o'ca'a, Jesús jahuäju isajucutä ki̧nö̧do. 10Ja̧'hua̧ ja̧'a̧ttö̧ Jesús jueönä pä̧nö̧, yajutä isaju katä kö̧ja̧'a̧ topö päinäcuado:

—Isaju, ucuru suronä ucuocuäjätömä ¿to tti̧'chä̧jä̧ttö̧? ¿Ucuru tä̧bo̧to̧co̧tö̧ päjätö tä̧ji̧?

11Jahuäju pä'inäjudo:

—Tta̧'a̧huä̧jä̧, Chu̧ru̧hua̧. Tä̧bo̧to̧co̧tö̧ päjätö.

Ja̧'hua̧ ja̧'a̧ Jesús pä'inödo:

—Ttö'inä ucuru tä̧bo̧to̧cö̧sä̧. Jitätä täi. Pä'äji ta'anö suronämä jȩcu̧'ä̧', —pä'inödo.

Jesús pi̧jä̧ tȩa̧u̧ huȩnȩ

12Jesús pä'äji ta'anö ttö̧ja̧rö̧ ucuocu huo̧juȩti̧nö̧do:

—Ttötäsä pi̧jä̧ tȩa̧u̧mä̧. Ttöcu cue'ächömä kä̧cuä̧huä̧ i'co tȩa̧u̧ u̧ju̧nä̧rä̧cua̧. Ja̧u̧mä̧ yo̧ö̧nä̧ cue'ächocö jä̧cua̧.

13Ja̧'hua̧nö̧ päomenä, fariseos huotö ja̧u̧ru̧ pä'inätödo:

—Ucutä cuamönätä adiunä ucuocuäcuäujä. Ja̧'hua̧nö̧ cucuocumä micuähuoca'a.

14Jesús jahuätörö ädätinödo:

—Ttötä chamönä chucuocu'inä, iso päi'önä huȩnȩ ucuocusä. Ttö chichäja'a'inä, chi̧'chä̧cua̧'a̧'i̧nä̧ huo̧jua̧sä̧. Ucutumä chichäja'a'inä, chi̧'chä̧cua̧'a̧'i̧nä̧ jerupätöjä. 15Ücutumä pi̧jä̧ jähuä amöcuädö, ttö̧ja̧rö̧ pä'ätöjä. Ttö yoröiso pä'ocösä. 16Ja̧'hua̧nö̧ ja̧'a̧nä̧ pädöttömä, adiu amöcuädö pä'ajisä. Ttötä katä pä'ocö pajisä. Chä'o, ttörö hue'inöcu pä'ajisä. 17Ucutu huëähuä huȩnȩ päa'a: “Korotö ta̧ju̧nu̧ ji̧nä̧ yo̧mȩtȩ pättomenä, jahuätörö ttesetäcua'a̧nö̧”, päa'a. 18Ja̧'hua̧nö̧ ja̧'a̧ttö̧ ttötä chamönä ucuocusä. Chä'o'inä ttörö hue'inömä adiu ucuocuomenä, ta̧ju̧ pä'i'ätöjä ttörö ucuocuätömä, —pä'inödo Jesús.

19Ja̧'hua̧ ja̧'a̧ttö̧ ja̧u̧ru̧ jä'epinätödo:

—Ucu Cuä'o, ¿to ö̧jä̧ttö̧?

Jesús jahuätörö ädätinödo:

—Ucutumä ttörö jerupätöjä. Chä'orö'inä jerupätöjä. Ttörö cu̧huo̧juä̧tu̧cu̧ttu̧mä̧, Chä'orö'inä huo̧jua̧ja̧tö̧jä̧.

20Jesús ja̧'hua̧nö̧ huo̧juȩti̧nö̧do Diosrö ucuocuäcuähuodenä, ofrenda ȩnä̧huä̧ca̧ jäyänä kä̧nö̧. Ja̧u̧ru̧ 'chu'ädocotö pi̧nä̧tö̧do cärenä ttötarö pä'ö, ja̧u̧ru̧ jo̧mȩ päi'oca'attö.

“Ttö chi̧'chä̧cua̧'a̧ 'cho̧co̧tö̧jä̧” pä'ö huo̧juȩti̧nö̧do

21Jesús pä'äji ta'anö ucuocu pä'inödo:

—Ttö chi̧'chä̧cua̧sä̧. Ucutumä ttörö cusätucuomenä, suronä jȩcu̧'ä̧tu̧cua̧'a̧ttö̧ hua'ö cuicuäcuotöjä. Ttö chi̧'chä̧cua̧'a̧, 'cho̧co̧tö̧jä̧.

22Ja̧'hua̧nö̧ ja̧'a̧ judíos ttö̧ja̧ pä'inätödo:

—¿Chutä amönä cuä'äu i̧cuä̧cua̧ tä̧ji̧? ¿Ja̧'hua̧nö̧ jȩpö̧, i̧'chä̧cua̧'a̧ 'cho̧co̧tö̧jä̧ pä'ö tä̧ji̧?

23Ja̧'hua̧nö̧ pättomenä, Jesús päinä̧u̧do:

—Ucutumä potä ttö̧ja̧jä̧. Ttömä ju'toju ru̧hua̧sä̧. Ucutumä pi̧jä̧ ttö̧ja̧jä̧. Ttömä pi̧jä̧ ttö̧ja̧ i̧sa̧mä̧cö̧sä̧. 24Ja̧'hua̧nö̧ ja̧'a̧ttö̧ ucutu suronä jȩcu̧'ä̧tu̧cua̧'a̧ttö̧, hua'ö cuicuäcuotöjä pä'äjisä. Ttötä chamönä ucuocuäcuäu jidähuäjimä, cuesetätucu juiyöttömä, suronä jȩcu̧'ä̧tu̧cua̧'a̧ttö̧, hua'ö cuicuäcuotöjä.

25Ja̧'hua̧ ja̧'a̧ttö̧ ja̧u̧ru̧ pä'inätödo:

—Ucumä, ¿di cu'ättö?

Jesús jahuätörö ädätinödo:

—Ucuturu äcuomenä ucuocu ji'ähuinösä. 26Ucuturu rö̧ȩnä̧ ji'äu pädö'a̧nö̧ ja̧'a̧. Ja̧'hua̧nö̧ ja̧'a̧nä̧ ttörö hue'inömä iso päi'önä pä'ö. Ja̧'hua̧ta̧nö̧ ucuturu, pi̧jä̧nä̧ ka̧cuä̧tö̧rö̧ pädömä, ja̧u̧tä̧ päa'a ä̧ju̧cu̧, pä'ösä.

27Jahuätömä Jä'orö ucuocua'a jerupö, ä̧ju̧cuo̧co̧tö̧ pi̧nä̧tö̧do. 28Ja̧'hua̧nö̧ ja̧'a̧ttö̧ jahuätörö pä'inödo:

—Ucutumä, Ubo I̧tti̧rö̧ ju'tojunänö cäcuhue'ätucuomenä, ja̧u̧nu̧ ttörö cu̧huo̧jui̧'ä̧cuo̧tö̧jä̧. Ja̧'hua̧ta̧nö̧ ttötä chamönä amöcuädäu jȩpo̧cö̧sä̧ pä'ö, cu̧huo̧jui̧'ä̧cuo̧tö̧jä̧. Ttömä Chä'o ttörö u̧huo̧juȩti̧nö̧tä̧ ji'äusä. 29Chutä, ttörö hue'inömä, ttöcu kö̧. Katä chö̧ja̧ pä'ö jaropi'ocö ttörö, 'cuäopönä churutä pä̧huä̧ rö̧jö̧tä̧ jȩcha̧'a̧ttö̧, —pä'inödo.

30Jesús ja̧'hua̧nö̧ päomenä, recuätö ttö̧ja̧ esetinätödo ja̧u̧ru̧.

Dios i̧tti̧mö̧ ttö̧jö̧ huȩnȩ

31Ja̧u̧nu̧ o'ca'a, judíos ttö̧ja̧ ja̧u̧ru̧ esetäjätörö pä'inödo:

—Ttö pädömä adiu cuesetätucuttumä, iso päi'önä chu̧huo̧juȩtä̧u̧jä̧. 32Iso päi'önä huȩnȩ cu̧huo̧jui̧'ä̧cuo̧tö̧jä̧. Ja̧'hua̧ta̧nö̧ ja̧u̧ huȩnȩ ucuturu ppädäcua'a surojöttö cuejächi'ätucua pä'ö.

33Ja̧'hua̧ ja̧'a̧ttö̧ jahuätö ädätinätödo:

—Ujutumä Abraham ahuaruhuä o'cotöjä. Korotö ttumöhuäyotö päi'önä ka̧cuo̧co̧tö̧ pi̧nä̧tö̧jä̧. ¿Tta̧'a̧nö̧ pä'ö päcuhuäjättö, surojöttö tejächi'a pä'ö?

34Ja̧'hua̧nö̧ jättepomenä, Jesús pä'inödo jahuätörö:

—Iso päi'önä pä'ösä ucuturu, o'ca toi'önä suronä jȩpä̧tö̧mä̧, suronä jȩä̧cuä̧huä̧ isotödo. 35Ya̧tȩ adicuä i̧sa̧mä̧, ru̧hua̧ ahuaruhuä i̧sa̧ päi'önä ko̧cö̧. Ja̧'hua̧nö̧ ja̧'a̧nä̧ ya̧tȩ i̧tti̧mä̧, ihueye jä'o ahuaruhuä i̧sa̧do. 36Ja̧'hua̧nö̧ ja̧'a̧ttö̧ Dios I̧tti̧ ucuturu suronä jȩä̧cuä̧huä̧ttö̧ ejädö icua'attö, iso päi'önä ädiunätä cu̧ja̧cuä̧cuo̧tö̧jä̧. 37Ucutumä Abraham ahuaruhuä o'cotöjä täcö huo̧jua̧sä̧. Ja̧'hua̧nö̧ ja̧'a̧nä̧ ttö pädömä cuesetätucuoca'attö, ttörö cuä'ö cuicuätucua pä'ätöjä. 38Ttö Chä'o ttörö i̧jȩpi̧nö̧tä̧ ucuocusä ttömä. Ucutu cuä'otucu päötä jȩpä̧tö̧jä̧ ucutumä, —pä'inödo Jesús.

39Jahuätö ja̧u̧ru̧ ädätinätödo:

—Ujutu tä'omä Abraham pi̧nö̧do.

Ja̧'hua̧nö̧ pättomenä, Jesús päinä̧u̧do:

—Iso päi'önä Abraham i̧tti̧mö̧ cu'ätucuttumä, ja̧u̧ jȩi̧nö̧'a̧nö̧ jȩpa̧ja̧tö̧jä̧. 40Ja̧'hua̧ ja̧'a̧nä̧, iso päi'önä huȩnȩ, Dios ttörö u̧huo̧juȩti̧nö̧ huȩnȩ, ucuturu jidähuomenä, ttörö cuä'ö cuicuätucua pä'ätöjä. Abrahammä, ja̧'hua̧nö̧mä̧ yoröiso jȩpo̧cö̧ pi̧nö̧do. 41Ucutu cuä'otucu jȩö̧'a̧nö̧ jȩpä̧tö̧jä̧.

Ja̧'hua̧ ja̧'a̧ Jesúsru pä'inätödo:

—Ujutu ka̧ra̧ i̧tti̧mö̧ huocotöjä. Ujutu ya̧tȩtä̧ tä'o ku̧nä̧rä̧tö̧jä̧. Ja̧u̧mä̧ Dios.

42Ja̧'hua̧nö̧ pättomenä, Jesús päinä̧u̧do:

—Iso päi'önä Dios i̧tti̧mö̧ cu'ätucuttumä, ttörö repe'ajatöjä. Ttömä Diosttö ichösä. Cuä'catucu jo̧mȩ kö̧sä̧. Ttötä chamönä amöcuädäu ichocö pi̧nö̧sä̧. Diostä hueinäcusä. 43Ttö jidäumä, ¿tta̧'a̧nö̧ pä'ö cuä̧ju̧cuä̧tu̧cuo̧ca̧'a̧jä̧ttö̧? Ucutu ttö jidäumä cuä̧ju̧cuä̧tu̧cua̧ pä'ocotöjä. 44Ucutu cuä'otucumä, ähuettä ja̧'a̧. Ja̧u̧ i̧tti̧mö̧jä̧ ucutumä. Ja̧u̧ru̧ pä̧huä̧ rö̧jö̧tä̧ jȩcu̧'ä̧tu̧cua̧ pä'ätöjä. Ähuettä ihueye ttö̧ja̧rö̧ cuä̧'ä̧hua̧ pi̧nö̧do. Iso päi'önä jähuä yoröiso jȩpo̧cö̧ pi̧nö̧do. Ja̧'hua̧ta̧nö̧ iso päi'önä huȩnȩ'i̧nä̧ ucuocuocö pi̧nö̧do. Yapareu jiähuomenä, chutä jö̧ ta'anö ji'äu. Ja̧u̧mä̧ ihueye ya̧pa̧rȩhua̧. Ja̧'hua̧ta̧nö̧ ja̧u̧mä̧ yapareu huȩnȩ kada'cado. 45Ja̧'hua̧nö̧ ja̧'a̧nä̧ ttömä, iso päi'önä huȩnȩ jidähuomenä, ttörö esetocotöjä. 46Ttö suronä jȩcha̧'a̧ ucututtu topäjimä, ¿tidejä̧ttö̧? Iso päi'önä huȩnȩ jidähua'a, ¿dä̧bö̧ cuesetätucuoca'ajä̧ttö̧ ttörö? 47Dios i̧tti̧mö̧mä̧, Dios i̧huȩnȩ ä̧ju̧cuä̧tö̧do. Ja̧'hua̧nö̧ ja̧'a̧nä̧ Dios i̧tti̧mö̧ huocotöjä. Ja̧'hua̧nö̧ ja̧'a̧ttö̧ ucutumä cuä̧ju̧cuä̧tu̧cua̧ pä'ocotöjä, —pä'inödo Jesús.

Cristo Abrahamttö'inä ä'canä ki̧nö̧do

48Ja̧u̧nu̧ o'ca'a judíos ttö̧ja̧ pä'inätödo Jesúsru:

—Ucumä Samaria ttö̧ja̧ i̧sa̧jä̧. Ja̧'hua̧ta̧nö̧ “espíritu su̧ro̧pa̧rö̧ ku̧nä̧rö̧jä̧” pätomenä, adiu pä'ätöjä.

49Jesús ädätinödo:

—Ttömä espíritu su̧ro̧pa̧rö̧ ku̧nä̧ro̧cö̧sä̧. Ttö Chä'orö chucuota'anä, ucututä ttörö ucuotocotöjä. 50Ttörötä cucuotätucua pä'ocösä. Juhuorö'inä ya̧tȩ kö̧do, ttörö cucuotätucuattö pä̧huä̧ rö̧jä̧cu̧. Ja̧'hua̧ta̧nö̧ ja̧u̧ ttö̧ja̧rö̧: “Ucu adiu jȩpö̧jä̧”, “Ucu suronä jȩpö̧jä̧” pä̧cua̧do. 51Iso päi'önä pä'ösä ucuturu, ttö jidäu esetömä, yoröiso hua'ö icuocö jä̧cua̧.

52Ja̧'hua̧ ja̧'a̧ttö̧ judíos ttö̧ja̧ ädätinätödo:

—Jitämä iso päi'önä espíritu su̧ro̧pa̧rö̧ ku̧nä̧rö̧jä̧ huo̧juä̧tö̧jä̧. Abraham'inä, o'ca toi'önä Dios i̧huȩnȩ jiäcuähuä isotö'inä hua'ö icuinätödo. Ucutä pä'öjä: “Ttö jidäu esetömä, yoröiso hua'ö icuocö jä̧cua̧do.” 53¿Ucumä tä'o Abraham mi̧nä̧ttö̧'i̧nä̧ abonänö adihuä i̧sa̧jä̧ tä̧ji̧? Ja̧u̧'i̧nä̧, Dios i̧huȩnȩ jiäcuähuä isotö'inä hua'ö icuinätödo. Ucumä, ¿di cu'ättö?

54Jesús jahuätörö ädätinödo:

—Ttörötä chamönä chucuotäcuäuttumä, yoröiso micuähuoca'a. Ja̧'hua̧nö̧ ja̧'a̧nä̧ ttö Chä'o ttörö ucuotö. Ucutu'inä pä'ätöjä: “Ja̧u̧mä̧ Tä̧do̧ ä̧cua̧ Dios.” 55Ja̧'hua̧nö̧ päcuhuätucuomenä, ja̧u̧ru̧ yoröiso jerupätöjä. Ttötä chu̧huo̧juä̧cu̧. “Ja̧u̧ru̧ jȩru̧pa̧sä̧” pädöttömä, ucutu ta'anö yapareu pä'ajisä. Ja̧'hua̧ ja̧'a̧nä̧ ja̧u̧ru̧ huo̧jua̧sä̧. Ja̧'hua̧ta̧nö̧ ja̧u̧ päömä jȩpö̧sä̧. 56Abraham, ucutu cuä̧do̧tu̧cu̧ mi̧nä̧, ttö chichäcua'a mo̧ro̧ toa pä'ö esehuinödo. Iso päi'önä topö, juiyo esehuinödo.

57Ja̧'hua̧ ja̧'a̧ judíos ttö̧ja̧ pä'inätödo Jesúsru:

—Ucumä, cincuenta a̧'ȩ jo̧mȩnä̧ jui̧'a̧jä̧. Ja̧'hua̧ ja̧'a̧ “Abrahamrö topinösä” ¿pä'äjijä tä̧ji̧?

58Jesús jahuätörö ädätö pä'inödo:

—Iso päi'önä pä'ösä ucuturu, Abraham ö̧jä̧cua̧'a̧ ä'canä, ki̧nö̧sä̧ ttömä.

59Ja̧'hua̧nö̧ päomenä, ido'qui ȩmo̧po̧'ö̧ tticua pä'inätödo Jesúsru. Ja̧'hua̧nö̧ ja̧'a̧nä̧ chutä dajahuächinödo. Jahuätö ttö̧'quȩtȩnä̧ 'cuä'opö, Diosrö ucuocuäcuähuodettö rä'opö 'chi̧nö̧do.

Actualmente seleccionado:

San Juan 8: PIDNT86

Destacar

Copiar