San Juan 10
10
O̧vȩja̧stö̧rö̧ tta̧huä̧rä̧cuä̧huä̧ huȩnȩ
1Jesús huo̧juȩti̧nö̧do:
—Iso päi'önä pä'ösä ucuturu, ya̧tȩ o̧vȩja̧stö̧ dodettatenä doächoca'a, kara'anätä do'ächömä, ja̧u̧ nä̧u̧cuä̧rö̧ i̧sa̧. 2Ja̧'hua̧nö̧ ja̧'a̧nä̧ chutä o̧vȩja̧stö̧ dodettatenä do'ächömä, ja̧u̧ o̧vȩja̧stö̧ tta̧huä̧rä̧cuä̧huä̧ i̧sa̧. 3Chutä o̧vȩja̧stö̧ tta̧huä̧rä̧cuä̧huä̧ i̧sa̧ ichomenä, äpate tta̧'ä̧rö̧mä̧ äpate ba'epö doächa pä'ö. Ja̧'hua̧ta̧nö̧ o̧vȩja̧stö̧ i̧huȩnȩ huo̧juä̧tö̧. Äji̧mö̧ o̧vȩja̧stö̧ tti̧mi̧ huopö o'ipö, i̧so̧ca̧ u̧mi̧ cuettächa pä'ö rä'epödo. 4U̧mi̧ cuettächomenä, chutä ä̧ji̧mö̧ ttä'canä 'chö̧. Ja̧u̧ o'ca'anä cue'ächätö, i̧huȩnȩ ttu̧huo̧jua̧'a̧ttö̧. 5Ja̧'hua̧nö̧ ja̧'a̧nä̧ ka̧ra̧ ttieruhuäcu o'ca'anä yoröiso cue'ächocotö. Ja̧u̧ ö̧jo̧mȩttö̧ tö'ipächätö, i̧huȩnȩ ttieruhua'attö.
6Jesús pi̧yȩ koro juäi jä̧'i̧nö̧'a̧nö̧ jö̧ huȩnȩ u̧huo̧juȩto̧mȩnä̧, 'cucuächi'oca'a ä̧ju̧cui̧nä̧tö̧do.
Jesús, adihuä tta̧huä̧rä̧cuä̧huä̧ i̧sa̧ päi'önä kö̧do
7Ja̧u̧nu̧ o'ca'a Jesús pä'äji ta'anö jahuätörö huo̧juȩti̧nö̧do:
—Iso päi'önä pä'ösä ucuturu, ttötäsä äpate, o̧vȩja̧stö̧ dodettatemä. 8O'ca toi'önä ttö chä'canä ichinätömä, suronä jȩpö̧, nä̧u̧cuä̧rä̧tö̧ isotö pi̧nä̧tö̧. Ja̧'hua̧nö̧ ja̧'a̧nä̧ o̧vȩja̧stö̧ jahuätörö ä̧ju̧cuo̧co̧tö̧ pi̧nä̧tö̧. 9Ttötäsä äpate. Ttörö esetö do'ächömä, adiunä ö̧ji̧pä̧cua̧. Ja̧u̧, ya̧tȩ oveja i̧so̧ca̧ttö̧ rä'opächö, ucuome adihuome po̧cui̧pö̧ ö̧jö̧'a̧nö̧, ö̧jä̧cua̧.
10“Nä̧u̧cuä̧rö̧ i̧sa̧, nä̧u̧cuä̧rö̧ cuä'ö icua pä'ö ichö bettipächönä. Ttömä ichinösä o'ca juiyönä eseunu adiunätä ttö̧ja̧cua̧ pä'ö. 11Ttötäsä adihuä tta̧huä̧rä̧cuä̧huä̧ i̧sa̧mä̧. Chutä adihuä tta̧huä̧rä̧cuä̧huä̧ i̧sa̧, ä̧ji̧mö̧rö̧ tta̧'ä̧rö̧ 'corupäi'ö'a̧nö̧ hua̧. 12Ja̧'hua̧nö̧ ja̧'a̧nä̧ ya̧tȩ aditähuä micuätä a̧mö̧cuä̧rö̧ aditömä, yähui icha'a tomenä, o̧vȩja̧stö̧rö̧ jaropi'ö, tö'ipächö. Ja̧u̧ adihuä tta̧huä̧rä̧cuä̧huä̧ i̧sa̧cö̧. Ja̧'hua̧ta̧nö̧ o̧vȩja̧stö̧, chutä ä̧ji̧mö̧ huocotö. Ja̧'hua̧nö̧ töipächomenä, yähui o̧vȩja̧stö̧rö̧ 'chu'ädö ya'opö icu döttecuächönä. 13Ja̧u̧ ubomä aditähuä micuätä a̧mö̧cuä̧ra̧'a̧ttö̧, tö'ipächö. O̧vȩja̧stö̧rö̧ yoröiso tta̧huä̧ra̧ pä'ö amöcuädocö.
14-15“Ttötäsä adihuä tta̧huä̧rä̧cuä̧huä̧ i̧sa̧mä̧. Chä'o ttörö u̧huo̧ju̧'a̧nö̧, ja̧u̧ru̧'i̧nä̧ huo̧jua̧sä̧ ttömä. Ja̧'hua̧ta̧nö̧ chä̧ji̧mö̧ o̧vȩja̧stö̧rö̧ chu̧huo̧ju̧'a̧nö̧, ttörö'inä huo̧juä̧tö̧. Ttömä chä̧ji̧mö̧ o̧vȩja̧stö̧rö̧ ppä'ädö 'co̧ru̧pä̧di̧'ä̧cua̧sä̧. 16Ja̧'hua̧ta̧nö̧ korotö chä̧ji̧mö̧ o̧vȩja̧stö̧ i̧so̧ca̧nä̧ ka̧cuo̧co̧tö̧do. Jahuätörö ȩmö̧ chi̧'chä̧cua̧sä̧. Ttö pädömä jȩttä̧cuo̧tö̧. Ja̧'hua̧nö̧ ja̧'a̧nä̧ o'ca toi'önä o̧vȩja̧stö̧ ji̧nä̧ yo̧mȩtȩ ttö̧ja̧cuä̧cuo̧tö̧. Ja̧'hua̧ta̧nö̧ ya̧tȩtä̧ adihuä tta̧huä̧rä̧cuä̧huä̧ i̧sa̧ ö̧jä̧cua̧.
17“Ttö cha̧'cua̧rö̧ iyö, pä'äji ta'anö chö̧ja̧ pä'ö 'corupädi'a'attö, ttörö pä̧huä̧ rö̧jä̧cu̧ Chä'omä. 18Yoröiso cha̧'cua̧rö̧ jȩpö̧ icuocotö. Ttörötä pä̧huä̧ rö̧jo̧mȩnä̧ iyösä cha̧'cua̧rö̧. Ttö 'corupädi'a'anä'inä pä'äji ta'anö ttörötä pä̧huä̧ rö̧jo̧mȩnä̧, tto'ächi'ö'ca̧ chö̧jä̧cua̧sä̧. Ja̧'hua̧nö̧ hueinäcusä Chä'omä, —pä'inödo Jesús.
19Judíos ttö̧ja̧ ja̧u̧ huȩnȩ ttä̧ju̧cuo̧mȩnä̧, ji̧nä̧ yo̧mȩtȩnä̧ amöcuädocotö pi̧nä̧tö̧do. 20Jahuätöttö recuätö pä'inätödo:
Ja̧u̧ espíritu su̧ro̧pa̧rö̧ u̧ju̧nä̧ra̧'a̧ttö̧ suripächö ucuocumä, ¿dä̧bö̧ cuä̧ju̧cuä̧rä̧tu̧cuä̧rö̧ttö̧ ja̧u̧ päömä?
21Korotö pä'inätödo:
—Ya̧tȩ espíritu su̧ro̧pa̧rö̧ ku̧nä̧rö̧mä̧, ja̧'hua̧nö̧ ucuocuocö yoröiso. ¿Ya̧tȩ espíritu su̧ro̧pa̧mä̧ ä̧to̧cä̧tö̧rö̧ aditö icu tä̧ji̧?
Judíos ttö̧ja̧ Jesúsru esetocotö pi̧nä̧tö̧do
22Ja̧u̧nu̧ pä̧nä̧, a̧'ȩ kä'conä ji̧na̧'a̧do. Ja̧u̧nu̧ Diosrö ucuocuäcuähuode ttaditinö o'ca'a fiesta jȩtti̧nö̧mä̧ jȩpi̧nä̧tö̧do Jerusalén ötahuiyära̧'a̧ttö̧. 23Jesús Diosrö ucuocuäcuähuodenä, Salomón i̧so̧ca̧ pättino̧ca̧nä̧ cue'ächinödo. 24Judíos ttö̧ja̧ ja̧u̧ru̧ ichi'ö pä'inätödo:
—Ucuru adiunä tu̧huo̧jua̧ pä'ö, ¿ti̧yȩnö̧ jicuhuähuäcua'ajä̧ttö̧? Iso päi'önä Cristo cu'uttumä, jueönätä ji'ähuitö.
25Jesús jahuätörö ädätö pä'inödo:
—Täcö ji'ähuinösä. Ucututä esetocotöjä. O'ca juiyönä Chä'o u̧ju̧ru̧nä̧ jȩchö̧mä̧, ja̧u̧ Cristo cha'a i̧jȩcua̧'a̧. 26Ja̧'hua̧nö̧ ja̧'a̧nä̧ ucutu esetocotöjä. Ucuturu pädäji ta'anö, ucutu chä̧ji̧mö̧ o̧vȩja̧stö̧ huocotöjä ucutumä. 27Chä̧ji̧mö̧ o̧vȩja̧stö̧ chi̧huȩnȩ huo̧juä̧tö̧. Ttö'inä jahuätörö huo̧jua̧sä̧. Ttö cho'ca'anä cue'ächätö. 28Jahuätörö kä̧cuä̧huä̧ i'co iyösä. Yoröiso 'corupä'i'ocotö ttäcuotö. Ja̧'hua̧ta̧nö̧ chu̧mö̧ttö̧, ka̧ra̧ yoröiso 'cho'ipocö jahuätörö. 29Chä'omä, korotöttö'inä abonänö ju̧ru̧hua̧mä̧, ttörö iyinä̧u̧. Ja̧'hua̧ta̧nö̧ chutä u̧mö̧ttö̧, ka̧ra̧mä̧ yoröiso 'cho'ipocö jahuätörö. 30Ttöcu, Chä'ocu, ji̧nä̧ ya̧tȩnä̧tä̧ ja̧'a̧.
31Ja̧'hua̧nö̧ päomenä, judíos ttö̧ja̧ pä'äji ta'anö ido'qui ȩmo̧po̧'ö̧, Jesúsru tticua pä'inätödo. 32Ja̧'hua̧ ja̧'a̧ Jesús pä'inödo jahuätörö:
—Ucutu cuä'catucu jo̧mȩttö̧, Chä'o ujurunä, rö̧ȩnä̧ adihuä juäi jȩpi̧'ä̧nö̧sä̧. Ja̧u̧ jȩchi̧nö̧ ¿ti̧yȩttö̧ amöcuädö cuä'ö cuicuätucua päcuhuätucua'ajä̧ttö̧ ttörö?
33Judíos ttö̧ja̧ ja̧u̧ru̧ ädätinätödo:
—Adihuä juäi jȩcu̧'i̧na̧'a̧, ido'qui icu, cuä'ö icuocotöjä. Diosrö suronä cucuocua'attö cuä'ö ticuäcuotöjä. Ucutä pi̧jä̧ ttö̧ja̧ i̧sa̧ cu'a'anä: “Ttötäsä Dios” pä'öjä, —pä'inätödo.
34Ja̧'hua̧ ja̧'a̧ Jesús päinä̧u̧do:
—Ucutu hueähuä huȩnȩnä̧ Dios päinö huȩyu̧cua̧'a̧. Pa̧'a̧nö̧ päa'a: “Ucutumä pi̧jä̧ttö̧ dioses huotöjä.” 35Iso päi'önä Huȩyu̧cuä̧ Huȩnȩ päömä yoröiso ä̧ppö̧tä̧rä̧cuä̧huo̧cö̧ huo̧juä̧tö̧jä̧. Dios, pi̧jä̧ ttö̧ja̧rö̧, chutä i̧huȩnȩ jiähuinä̧u̧ru̧ dioses huotöjä pä'inödo. 36Ja̧'hua̧nö̧ ja̧'a̧ttö̧ iso päi'önä Dios ttörö 'quȩ'ȩpö̧, pi̧jä̧ra̧'a̧ hueinöttömä, “Dios I̧tti̧sä̧” pädomenä, ¿tta̧'a̧nö̧ päcuhuätucua'ajä̧ttö̧ Diosrö suronä pä'öjä pä'ö? 37Chä'o jȩö̧'a̧nö̧ jȩchö̧ juiyöttömä, ttörö cuesetätucuä'. 38Ja̧'hua̧ta̧nö̧ ja̧u̧ jȩchö̧ttö̧'i̧nä̧ ttörö cuesetätucu juiyöttömä, jȩchö̧tä̧ esetätucui, Chä'o ttöcu kö̧ cu̧huo̧juä̧tu̧cua̧ pä'ö. Ja̧'hua̧ta̧nö̧ ttö'inä Chä'ocu kö̧sä̧ cu̧huo̧juä̧tu̧cua̧ pä'ö, —pä'inödo Jesús.
39Ja̧'hua̧nö̧ päomenä, pä'äji ta'anö cärenä ttötarö pä'inätödo. Ja̧'hua̧nö̧ ja̧'a̧nä̧ Jesús jahuätöttö rä'opächö, tö'ipächinödo.
40Ja̧'hua̧ ja̧'a̧ Jesús Jordán aje ji̧jȩcu̧nä̧ 'chi̧nö̧do. Juan pä'äji bautizando jȩi̧no̧mȩ ki̧nö̧do. 41Recuätö ttö̧ja̧ ja̧u̧ru̧ topö 'chi̧nä̧tö̧do. Pä'inätödo:
—Iso päi'önä, Juan ttö̧ja̧ ttieru juäi jȩo̧ca̧'a̧nä̧, piderö o'ca juiyönä päinömä iso päi'önä pä'inö, —pä'inätödo.
42Juhua'attö recuätö ttö̧ja̧ Jesúsru esetinätödo.
Actualmente seleccionado:
San Juan 10: PIDNT86
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Nuevo Testamento en Piaroa © Sociedades Biblicas Unidas, 1986.
