Mateus 14

Ca ton tapit pin xine winacon João co ja' taxipa' com pane

Marcos 6.14-29; Lucas 9.7-9

1Om ca pain homa ne, taraju ac ca na taramaxicon Herodes ma', taraju nain oro ca tomi' hwet nucucun oro wari' con Jeju. 2Tomi' ac tococwa na oro wari' nucun co taramaja mi' e' nonon ma'. João co ja' taxipa' com pane ta. Wirico tara, e' mami' tara João co ja' taxipa' com pane! Je tara ca ha' con pain ca ara cain ca om ara taxi' ne ca wari' wa ta na ca tomi' nucun Herodes ma'.

3-4Coromicat ac i ma' paxi' non Jeju Herodes ma', ane wara mi' pin ca João ne. Ca' na ca mi' pin nucun João pane. Herodes ma', an pin nam manacon coxa' ca ma', Filipe ma'. Herodias na wixicam. Je ca tomi' ho' tomi' ho' con Herodes João ma' quem. Tomi' caho' nem pain ca an wa manacon coxa' ma Iri' Jam ta non pain ca pan to' cain taraxicon. Quep jun ta ac tococwa na oro soldado nucun ma' quem. Quep jun, pao' pe jun, tao' pe jun pain xirinain ca tao' to tao' to to wa ta tata. 5To' pa' pin ton paxi' na, ane jin' tococwa oro wari' ne. Mo ta to' pa' pin ton, mana' tatarapa' ta tata. Xi om ne ca profeta na ta ara cocon João pane.

6Aram aram maqui' ac ne na xec nein ca mam' pe wet cacain ca pan' qui' nucun Herodes pane. Cut in ac xucucun na, wirico Herodes, wiricoco oro win ma' ca quem. Tomi' querec te xi' e' ac xucucun na, corom ac cama na cainacam Herodias ma'. Pi' xirao' in pi' xirao' in pe ac camain na ca xao to morojam' to caca ma'. Tomi' querec te tamana nam Herodes ma'. 7Tomi' ac cam na: Ma' carawa ca param ma quem? Carawa ca mi' ne pain mapa' ma', mi' ac xim pain tara. Tomi' iri'o' inem, om ca mixein ta'. Taraju napa' Iri' Jam pain ca tomi' an pe mi' xim pain ca tomi' ne ca'. Mo ta om mi' xim pain, wap ma' tarapa' Iri' Jam ne. Ac i ma' na ca tomi' cam ma'.

8Cain' cain' xiton quem ac cam na jicam ma' quem.

Om na, ton tapit mi' ho' ne pain winacon João co ja' taxipa' com ta ron ta ac cam na.

Ma'e, mo in hwet ac con na, ton tapit mi' ho' ne pain winacon João co ja' taxipa' com ma'. An pe tatarain pain too ta. Param ho' inain ta na ca tomi' con ma'.

9Cain' cain' xira pata' ne ta ac ca na Herodes. Om xi tomi' an pe mi' tam pain ca tomi' ne cara ne ta ca' xucun. Ane na e' ne pain ca tomi' ha' cam ne, xi om ne ca tomi' an pe mi' ara cam pain ca tomi' nucun ta. Wixipa' tata oro win ma' ca co taraju nonon pain ca tomi' nucun quem. Je ca tomi' tococwa oro wari' co taramaja mi' e' nonon ma'. Tomi' ha' jein ca tomi' nequem ta tata. 10Mo hwet jun João pain xirinain ca tao' to tao' to to wa cain, ton tapit pin ac hwein tara winacon ta tata. Ton tapit pin ac cacain na winacon. 11An qui' ac cacain na pain too. Mi' ac cacam pain na, mi' tiquin' mi' ac cam na pain jicam ma' quem. 12Maqui' ac caca na co taxipa' ca João ma', an mao ac cacain na curucun, an corom pe ac cacain na pain manain pacun. Tomi' hwet ac cocon na Jeju quem.

Ca tomi' hwara' pin cain capam' con hwam Jeju

Marcos 6.30-44; Lucas 9.10-17; João 6.1-15

13Taraju iri na Jeju ne, pain ca ton tapit pin xine winacon João co ja' taxipa' com ma', maji ta ac caparut na pain ca taxipa' urut con ca', piton to ac urut pain na mam' horoho wa, pan horoho mama' ac urut na. Xica' to urut, mama' urut pain ca om pe ca wari'. Ane taxi' pin cacaparut oro wari' ma' ne, taxi' nanaparut pain ca mama' nuxut. Je ca maqui' cacain oro xijein cidade ma', ja' ja' ac cacaparut na pain macan'. 14An tac iri urut pain mam' horoho nuxut ne, piri' ac ca na Jeju. Querec ac tococwa na oro wari' quem. Mija nana wari' ta. Om ca paric camain' caca. Xiram pa' tata, quep xio quep xio ac tococwa na co caxi nana ma'.

15Irawin pin iri na ne, mo tomi' xun Jeju ta ac urut na pain ca taxipa' urut con ca', xuruxut hwet ac urut con na. Irawin pin na ta Jeju. Om nain i ca' xirim ca cut pe xine carawa ca cao' wa quem urut con. Mama' je ximomon oro wari' cwa'. Ma' ta mama' cacain oro ca paric to ne xirim ma', cut pan ac cacain tara carawa ca cao' wa ta na ca tomi' urut con.

16Om na, hohot na pain ca mon to wet to cacain i ca'. Mi' pan jujun pain carawa ca cao' wa ta ac caparut na.

17Cain' cain' xuxut quem ac urut con na. Ma' 5 e' naparut wijimain capam' ca'. Ma' 2 e' naparut hwam cwa' quem urut con.

18Cut mi' xine pain ta ac caparut na.

19Xao to jein tononoin ma' ac tococwa na oro wari' ma'. Cut ac cain na capam' ca ma' 5 ma', wirico hwam co ma' 2 ma' quem. Cut iri nain ne, noro pawin ac ca na, tomi' ac con na Iri' Jam. Tomi' querec te urut pum pain ca mi' maparut pain capam' con hwam cwa' quem Te non, jicaracat ac cain na capam', cut mi' ac caparut pain na. Cut mi' ac caparut na con hwam quem. Maxiram' mi' ac urut cocon pain na oro wari'. 20Cao' cao' xam' ac caca na. Ma'am ca' nanain, ma'am ma'am pi' pin nana. Pan cut xin pawirinain ta ac urut na, cut ho' cut ho' ac urut pain na pain coco. Moin' 12 na cotain parut. 21Ac ca ma' 5.000 caca na ca tarama' nucucun co cao' nana. Ma' paxi' nana oro narima' cocon oro hwijima' quem, ane om tomi' tacacama ne.

Ca xut cain quimain com Jeju

Marcos 6.45-52; João 6.16-21

22Pan cut pin iri urut pain pawirinain capam' con hwam ne, tomi' ac caparut na Jeju, tomi' naparut pain ca taxipa' urut con ca'. Piton to jein mam' horoho wa ma'. Wara pan horoho mama' jein xijein cacarain cain ta naparut. Querec querec mama' toton oro wari' pa'ao', aram aram hwet ac xuhu' tara quem naparut.

23Querec querec mama' iri nonon oro wari' Jeju ne, piri' mao xica' pe ac cain na pacun. Tomi' ton Te ta na. Aram aram xo' um pin na con. Xica' pe na pain i cain.

24Wara pan horoho pan horoho hwet pin urut pain ximijain com ma', wara to pira ca' urut pain cacarain com. Wap tamana na com ma' quem, wap mip nain mam' horoho nuxut, xi nuru cam' ara caparut hotowa ta. 25Iri' ximijain xim naparut, om ca hwet querec ca xina, xut hwet ac caparut na Jeju. Xut hwet naparut pain quimain com.

26Querec iri urut con pain ca xut cain quimain com ma' ne, jin' tamana ac urut na, merem ac urut na: Jima ta, jima ta ac urut na pain ca merem nuxut.

27Ane tomi' hap caparut Jeju ne. Om na, ta jin' mahu' me ta, wata' ta. Quereme je ta naparut.

28Wum ra ac con na Pedro. Mo ta wum ne, hap ra ne, xut hwet ne pain quimain com ca' ne e'. Ac i ma' na ca tomi' con ma'.

29Hap ra ta ac con na.

Quiji' ca' ac cain na mam' horoho wa ma', xut mao ac cain na quimain com. Xut hwet ton paxi' na ira. 30Querec iri nain ca wap tamana ne com pain ca nuru tamana ne hotowa ma' ne, jin' pin ac ca na quem. Pan corom mao ta' na ira. Quep xiho' ne ta Taramaxicon ne ac con na.

31Coc matam hwet hap ac con na Jeju pain micon, quep xat ac con na. Para tara con ta'a mapa' quem? Je xi howa mip mapa' quem? Ac i ma' na ca tomi' con ma'.

32Piri' to ac cacain na mam' horoho wa ma', nuru nuru om pin ac ne na hotowa quem. 33In ac ac cocon na, pe torotop mi' ac cocon na. Panxica Iri' Jam ma ma' ira ac cocon na quem.

Ca quep xio pin tococwa oro wari' pain Genesaré

Marcos 6.53-56

34Horoho horoho tiquin' ac urut na. Wirico Jeju, warut pain ca taxipa' urut con ca', horoho mama' ac urut na pain xijein cacarain cote ne com. Tan' mama' ac urut na pain macarain Genesaré ma'. 35Querec pin' iri nonon Jeju oro wari' co to nanain i cain ne, jein mama' ac cacain na oro xijein cidade. Maqui' na Jeju, maqui' na Jeju ta xucucun, tomi' hwet tomi' hwet xam' ac xucucun na con. Mija ac caca na oro wari' co cut mi' nonon cocon co caxi nana ma'. 36Jain jain nonon, ta narain ho' maparut pain ca quep urut pum ca', quep e' xut con cacaracon womum ma' nonon. Xio xio pi' pin ac caca na co quep nonon cacaracon womicon ma' quem.

Actualmente seleccionado:

Mateus 14: TBPN

Destacar

Copiar