Mateus 13

Ca pijim' joc mam' mi' caparut con wari' co wixicaracao' nain tocwi trigo pain totacon

Marcos 4.1-9; Lucas 8.4-8

1Pain xec nein ca hwet cocon Jeju jicon cocon xurucun ma', hwet ca' ac cain na xirim, mao ac cain na cacarain cote ne com, xao pe ac ca na quem. 2Mija nana wari' co coco' coco' mam' nonon ma'. Om ca paric camain' caca. Je ca piton pe tain mam' horoho wa ta ca ma'. Xao pe ac ca na, coco' to ac cacain na namaji pain cacarain com oro wari' ma' quem. 3Mija na ca pijim' cocon oro wari' Jeju quem, pijim' joc mam' mi' tata pain oro carawa. Ca' na ca pijim' tococwa ma':

Taraju wet je. Wixicaracao' tain tocwi trigo pain tota ta ac ca na wari' ma'. 4Wixicaracao' wixicaracao', ma' ac ne na tocwi trigo ca camara' to nain cacarain wana. Maqui' ac ne na oro wijimain me, itac pin ac nein na quem. 5Ma' ac ne na tocwi trigo ca camara' to nain pacun ca ma' wijimain macan' ma' quem. Orot hap na i ma', xi mija ne macan' ta. 6Hwet iri na xina ne, nonoc ac cain na, cono' pin ac ne na quem, xi mama' nein pira caximain ta. 7Camara' to ac nein na pi wirain tocwi trigo ma' quem. Hwara' ac ne na pi ma', mo' ac nein na quem. 8Oro wirain tocwi trigo ca camara' to nain macan' ca awi ma' iri na ne, mi xo' tamana ac ne na. Pain xijein arain ma', mi 100 na. Pain xijein arain ma', mi 60 na. Pain xijein arain ma', mi 30 na quem. 9Mo ta taraju pa' xixi' na hwe ma', je ta taraju wet qui' hwe ta na pain ca pijim' joc mam' mi' tococwa con wari' co wixicaracao' nain tocwi trigo pain totacon pane.

Ca tomi' querec urut con pain ca pijim' joc mam' mi' nucun

Marcos 4.10-12; Lucas 8.9-10

10Tomi' querec xun e' ac urut na pain ca taxipa' urut con ca', mo hwet ac urut con na. Para pijim' joc mam' mi' momon pain oro carawa pain ca ca' na momon oro wari' pain capijacon Iri' Jam ma' quem urut con.

11Tomi' ac caparut na: Wara coromicat xo' na Iri' Jam pane. Main taramaxicon pe ho' toton oro wari' co howa nanapa' ta na, ac i ma' paxi' na ca coromicat xo' nucun pane. Ane om tomi' hwet tococwa pain oro wari' ne. Wahu' pain ca taxipa' mahu' ca', an hwet mi' nuhu' pain ca coromicat xo' nucun. Mi' nuhu' pain ca taraju pa' wa. Oro xucucun wari' co om howa nanapa' ma' iri nana ne, om ca mi' tococwa pain ca taraju pa' wa quem. 12Wari' co taraju wet ma', co taraju pa' xo' nain ca taraju nucun ma', mi' hwara' mami' ac tocwa tara pain ca taraju pa' wa. Wari' co om taraju pa' nain ca taraju nucun ma' iri na ne, pain ca om taraju wet xo' ca ma', an ca' ac tocwa pain tara wijimain ca taraju pa' nucun ma' quem. 13Je ca pijim' joc mam' mi' toton pain oro carawa pain ca ca' na toton pain capijacon Iri' Jam ca'.

Querec paxi' nanapa' pain oro ca ara ta' ca',

ane om querec pin' caca ne.

Taraju paxi' nana,

ane om taraju wet caca ne.

Om ca taraju pa' camain' caca.

14Hwet pin na ca xirao' pe nucun profeta Isaías cara pane, pain ca xirao' pe cain capijacon Iri' Jam pane, hwet pin na cocon oro wari' co om taraju pa' je na nana cwa'. Ca' na ca xirao' pe cain ca tomi' nucun Iri' Jam pane:

Taraju wet ho' taraju wet ho' paxi' hwein capija ca',

ane om taraju pa' hwein ne.

Om ta taraju pa' camain' hwein quem.

Querec ho' querec ho' paxi' hwein oro ca ara ta' ca',

ane om querec pin' hwein ne.

Om ta querec pin' camain' hwein quem.

15Xi coromicat xo' je na hwe ta.

Ac ca tatep pa' hwein na tarajuhu'.

Ac ca pi'am to hwe na quem.

Xi miri'om ara mahu' ta.

Mo xi om ac i ma' hwe,

ha' ac cuhu' xira pain ca querec pin' mahu'.

Ha' ac cuhu' xira pain ca taraju wet mahu'.

Ha' ac cuhu' xira pain ca taraju pa' hwe pain iri' xumuhu'.

In hwet ac mahu' xira,

to' witan ac xuhu' xira quem.

Ac i ma' na ca tomi' ca Iri' Jam pane, pain ca xirao' pe cain ca tomi' nucun profeta Isaías cara pane ta naparut.

16Ane tomi' pan xuhu' pain i ca' ne ac caparut na. Param mi' nuhu' pain ca awi wa Iri' Jam ma', xi querec pin' ara mahu' ta. Taraju pa' mahu' quem. 17Je ca tomi' xuhu' ca', tomi' iri'o' inuhu' ta ac caparut na: Mija nana oro profeta cocon oro wari' nucun Iri' Jam cara pane, co querec xixin na nanain oro ca querec hwe pain xocori ca'. Ane om querec cacain ne. Mija nana co taraju xixin na nanain oro ca taraju hwe pain xocori ca'. Ane om taraju cacain ne na ca tomi' caparut pane.

Ca tomi' xo' caparut pain ca pijim' joc mam' mi' nucun con wari' co wixicaracao' nain tocwi trigo

Marcos 4.13-20; Lucas 8.11-15

18Tomi' ac caparut na: Taraju wet je, tomi' xo' xuhu' pain ca tomi' mao ne ca pijim' ne ca', pain ca pijim' joc mam' mi' xuhu' con wari' co wixicaracao' nain tocwi trigo pain totacon ta naparut. 19Oro wari' co tomi' joc mam' mi' nanain cacarain wana ca wixicaracao' to xine tocwi trigo ma', taraju paxi' nanain capijacon Iri' Jam pain ca taramaxicon pin nucun ma', ane om taraju pa' cacain ne. Maqui' ac ca na Caxicon Jam, cut ca' ac tococwa pain na oro ca wixicaracao' mi' wa pain ximicocon. 20Oro wari' co tomi' joc mam' mi' nanain pacun ca ma' wijimain macan' ma' iri na ne, taraju paxi' nanain capijacon Iri' Jam. Tomi' querec te hap paxi' nanain, howa pin paxi' nanain quem. 21Ane om tomi' querec te cara cacain ne. Om ca corom mao nein ximicocon capijacon Iri' Jam ca taraju caca. Maqui' iri na carawa ca to' i'ina nonon ne, ja' tequi' quep em' iri tata oro wari' pain ca howa cacain capijacon Iri' Jam ma' ne, an to hap ac cacain na ca howa wa. 22Oro xucucun ma' iri nana ne, co tomi' joc mam' mi' nanain macan' ca ma' pi ma', taraju paxi' nanain capijacon Iri' Jam. Aram aram coromicat ni ca' ac cacain na. Toron ximama' ac ne na ximicocon pain oro ca to' i'ina nonon, caramaju xixi' na nana quem. Mo xi quep xiho' cocon oro caramaji macan' ca', ane om quep xiho' cocon ne, mixein e' nonon. Ac ca mo' nein pi na capijacon Iri' Jam pain ximicocon. Ac ca om wina ne na, xi to' xucun wari' tococwa pain ta. 23Oro wari' co tomi' joc mam' mi' nanain macan' ca awi ma' iri nana ne, taraju nanain capijacon Iri' Jam. Taraju pa' nanain quem. Horon tiquin' ac caca na, win ne ca mi ne tocwi trigo ma'. Pain xijein arain ma', mi 100 na. Pain xijein arain ma', mi 60 na. Pain xijein arain ma', mi 30 na quem. Ac i ma' na ca horon tiquin' caca pain ca howa nucucun quem. Ac i ma' na ca tomi' xo' caparut pain ca pijim' joc mam' mi' nucun con wari' co wixicaracao' tocwi trigo pain totacon pane.

Ca pijim' joc mam' mi' tococwa con wari' co wixicaracao' mi' nain tocwi caji tononoin pain totain trigo

24Pijim' mami' xuhu' ta ac tococwa na oro wari' ma'. Pijim' joc mam' mi' xuhu' con Iri' Jam ma', pain ca taramaxicon pe ho' cocon oro wari' ma'. Carawa ca ara ne pain ca taramaxicon pe ho' tococwa ma', an xiho' nain carawa ca ara ne con wari' ma', co wixicaracao' tain nain tocwi trigo pain totacon. Awi na tocwi trigo ca wixicaracao' ca. 25Om om, maqui' towa ac ca na wari' co noc non waximain xitot. Pi'am pi'am pi' pin ca' nonon oro wari', maqui' towa ac ca na, wixicaracao' mi' ac ca pain trigo na tocwi caji tononoin ma'. Mao ac ca na quem. 26Tarama' pin iri na tocwi trigo ma' ne, taparapa' pin iri na xirinain ne, hwet qui' ac ne na caji tononoin quem.

27He ac caca na caram ma' co taramaja mi' nonon waximain xitot ma', hwet ac cocon na, tomi' ac cocon na quem. Oin' paxi' main tocwi trigo ca awi pain totam pane taramaxicon. Para tarama' wi nein caji tononoin ma' quem na ca tomi' cocon ma'.

28Om na, wari' co noc napa' ta, wirico tara co wixicaracao' mi' na pain tota tocwi caji tononoin ma' ac ca na.

Param maparut pain ca horohot pi' pin xut pain oro caji tononoin quem ra ac cocon na.

29Om na ta ac ca na. Mo ta horohot pin xin hwein oro caji tononoin ma', horohot mapi' ac hwein tara trigo ma' quem. 30Miri'om jein, horon wi ma' tara ne jein. Maqui' pan tara xec nein ca caracat xine e'. Maqui' iri tara xec nein ne, tomi' ac toton tara co caracat jein ta ta' ma'. Horohot cain' jein caji tononoin ma'. Tucu jein arain, ma' ta tom pin xine ta ac toton tara. Caracat ac hwein tara trigo, an toco' xo' ac hwein tara pain xirinain ta ac toton tara quem#13.30 Pain ca pijim' ac i ma' ca Jeju ma', to' querec pin' napari' pain ca querec wet xo' taxipa' capari' Iri' Jam. Om ca mana' hap capari' pain ca ara xin carawa ca om hohot non. Winim' napari', querec wet cara napari'.. Ac i ma' na ca pijim' joc mam' mi' tococwa con wari' co wixicaracao' mi' nain tocwi caji tononoin pain totain trigo pane.

Ca pijim' joc mam' mi' tococwa pain wijimain tocwi mostarda

Marcos 4.30-32; Lucas 13.18-19

31Pijim' mami' xuhu' ta ac tococwa na, pijim' joc mam' mi' xuhu' con Iri' Jam ma', pain ca taramaxicon pe ho' cocon oro wari' ma'. Carawa ca ara ne pain ca taramaxicon pe ho' cocon oro wari' ma', an xiho' nain carawa ca ara nain wijimain tocwi mostarda ma', ca oin' pe cain totacon wari' ma'. 32Ma' paxi' na oro wirain tocwi memem ca wijimain, ane iri' wijimain pan ne tocwi mostarda ne. Hwara' pin iri na ne, hwara' tiquin' ca' ac nein na oro wirain ca oin' ximama' wa pain xitot quem. Cote ne pana pin na. Maqui' ac ne na oro wijimain me, quep pe ac nein na xirinain pain oro taparain quem#13.32 Pain ca pijim' ac i ma' ca Jeju ma', tomi' mi' tata co taxipa' ca cocon oro wari' co howa nonon pane, pain ca paric to caca pane. Pijim' pijim' tiquin' ac tococwa na oro xucucun wari' ma', aram aram mija pin ac caca na oro wari' co howa nonon Jeju pain oro xijein macan'. . Ac i ma' na ca pijim' joc mam' mi' tococwa pain wijimain tocwi mostarda pane.

Ca pijim' joc mam' mi' tococwa pain ca to' memerem nein capam'

Lucas 13.20-21

33Pijim' mami' xuhu' ta ac tococwa na, pijim' joc mam' mi' xuhu' con Iri' Jam ma', pain ca taramaxicon pe ho' cocon oro wari' ma'. Carawa ca ara ne pain ca taramaxicon pe ho' cocon oro wari' Iri' Jam ma', an xiho' nain carawa ca ara ne pain ca an camain ca to' memerem nein capam' narima' ma'. Maxoc hwara' iri nain trigo ne, joc wanan ac camain na ca to' memerem nein capam'. Ara pi' pin iri nain oro ca ara nein ne, an pe ac camain na, memerem pin ac ne na quem#13.33 To' jimao pin nain trigo ca to' memerem nein capam'. Ac i ma' na ca to' jimama' tococwa oro wari' co taramaxicon pe ho' ca Iri' Jam quem.. Ac i ma' na ca pijim' joc mam' mi' tococwa pain ca to' memerem nein capam' pane.

Para pijim' joc mam' mi' e' tococwa pain oro ca pijim' wa Jeju pane quem

Marcos 4.33-34

34Oro ca pijim' nucun Jeju pane, pain ca pijim' mi' tococwa pain capijacon Iri' Jam oro wari' pane, pijim' joc mam' mi' tata pain oro carawa. Oro ca pijim' nucun pane, pijim' joc mam' mi' e' tata pain oro carawa. 35Ma' ta hwet pin ne ca wara tomi' pe ca profeta pane, pain ca wara an hwet pe cain ca tomi' nucun Jeju pain cara pane. Ca' na ca tomi' ca pane:

Pijim' toton oro wari' iri ta' ne,

pijim' joc mam' mi' ac toton tara pain oro ca pijim' ne pain ca ca' na toton pain capijacon Iri' Jam.

Tomi' hwet ac toton tara pain oro carawa ca om an hwet querec ca Iri' Jam ira,

ca om taraju camain' caca oro wari' pain cara pane,

pain ca xo' tomi' ma' pin cain macan' pane.

Ac i ma' na ca wara an hwet pe cain ca tomi' nucun Jeju profeta pane.

Ca tomi' xo' caparut pain ca pijim' nucun pain tocwi caji tononoin

36Mao ta' ta ac ca na Jeju ma', paca' ac tococwa na oro wari' ma', in hwet ac cain na xiricon. Tomi' querec xun e' ac urut na pain ca taxipa' urut con ca', mo hwet ac urut con na. Tomi' xo' mi' xut pain ca tomi' mao ne ca pijim' nem pain ca pijim' joc mam' mi' main caji tononoin ne urut con.

37Tomi' xo' ac caparut na: Wari' co wixicaracao' nain tocwi trigo ca awi ma', tomi' joc mam' mi' napa' pain ca Iri' Wari' ta' ca'. 38Totacon ma' iri na ne, an xiho' nain macan' ca to pan caca oro wari'. Trigo ca awi tocwi ma', an xiho' nonon oro wari' co taramaxicon pe ho' ca Iri' Jam. Caji tononoin ma' iri na ne, an xiho' nonon oro wari' nucun Caxicon Jam quem. 39Wari' co wixicaracao' nain tocwi caji tononoin ma', co noc non waximain xitot ma', an xiho' non Caxicon Jam. Xec nein ca caracat xine trigo ma', an xiho' nain oro xec nein ca win pi' pin ta' ne macan'. Oro wari' co caracat nanain trigo ma' iri nana ne, an xiho' nonon oro jam co taramaja mi' nonon Iri' Jam quem.

40Je ca tomi' xuhu' ca' ac caparut na. Win ne ca horohot xine caji tononoin ma', win ne ca tom pin xine ma' quem, ac i ma' tara pain oro xec nein ca win pi' pin ta' ne macan' quem. 41Tomi' ac toton tara oro jam co taramaja mi' nanapa' ma', wata' pain ca Iri' Wari' ta' ca', tomi' pan ac toton tara: Cut in jujun oro caracat ta, cut in ca' jujun pain ximijacocon oro wari' co taramaxicon ne nonon Iri' Jam ma' ac toton tara, cut in ac tococwa tara co to' caracat nonon oro win ma' nucucun cocon oro wari' co pan teretem taxipa' nana ma'. 42Wixicaracao' mi' ac tococwa tara pain cote ne xe. Oro wari' co jain jain to nanain i cain, awaran tamana ac caca tara, cacacao' ac cacain tara xicocon pain ca jain jain tamana nucucun. 43Oro wari' co iri' wari' nana pain ca tomi' ha' cocon Iri' Jam ma' iri nana ne, ac ca toha tamana caca tara. Win ne ca toha ca xina ma', ac i ma' tara ca toha to cacain ca taramaxicon pe ca Cotere' Iri' Jam. Mo ta taraju pa' xixi' na hwe ma', je ta taraju wet qui' hwe ta na ca tomi' caparut Jeju pain ca tomi' xo' caparut pain ca pijim' nucun pain tocwi caji tononoin pane.

Ca pijim' joc mam' mi' tococwa pain carawa ca awi tamana ca tequi' pa' pe wa pain xitot

44Pijim' ac caparut na: Carawa ca ara ne pain ca taramaxicon pe ho' xirapa' na tocwa Iri' Jam ma', an xiho' nain carawa ca ara nain iri' carawa ca awi tamana ca tequi' pa' pe xine pain xitot. Ma' na wari' ma', co mam' nain ma', tequi' pa' mami' ac cain na quem. Tomi' querec te tamana nain. Mo vender pi' pin tain oro caramaju e' ac ca na, mao ac ca na, vender pi' pin ac cain na oro caramaxicon. In hwet mami' ac cain na xitot ma', an pin ac cain na quem#13.44 Wari' co tomi' querec te tamana nain carawa ca awi ca mam' pe cain xitot ma', pain ca jain jain cain ma', na e' na pain ca jain jain ac i ma' xun Iri' Jam pain ca taramaxicon pe ho' xim capari' quem. . Ac i ma' na ca pijim' joc mam' mi' caparut pain carawa ca awi ca mam' pe xine pain xitot pane.

Ca pijim' joc mam' mi' tococwa pain wijimain pacun ca awi tamana

45Pijim' ac caparut na: Carawa ca ara ne pain ca taramaxicon pe ho' xirapa' na tocwa Iri' Jam ma', an xiho' nain carawa ca ara ne con wari' co cut taxipa' nain oro carawa, vender tiquin' ac cain na quem. Pirao' taxipa' nain wijimain pacun ca awi tamana ma', pérola na wixinain. 46Mam' iri nain ca awi tamana nein ne, mo vender pi' pin tain oro caramaju e' ac ca na, mao ac ca na, vender pi' pin ac cain na oro caramaxicon. In hwet mami' ac cain na, an pin ac cain na quem#13.46 Ca pijim' nucun Jeju con wari' co an nain pérola ma', an xiho' nain ca pijim' nucun con wari' co jain jain nain carawa ca awi ca mam' pe cain xitot. Na e' na pain ca jain jain ac i ma' xun Iri' Jam pain ca taramaxicon pe ho' xim capari' quem.. Ac i ma' na ca pijim' joc mam' mi' caparut con wari' co an nain wijimain pacun ca awi tamana pane.

Ca pijim' joc mam' mi' caparut pain caji wi ca mam' quep wa hwam

47Pijim' ac caparut na: Carawa ca ara ne pain ca taramaxicon pe ho' toton cocon oro wari' Iri' Jam ma', an xiho' nain carawa ca ara ne cocon oro co xin nanain cote ne caji wi ca mam' pa' wa hwam. Mija na oro xucun hwam co quep caca. 48Moin' pin iri na hwam cocon ne, cuc in qui' ac cocon na pain namaji. Xao to ac caca na, an to ni xun co awi, an to ni xun co om awi quem ta ac xucucun na. Co awi ma', an ho' pa' mi' ac tocwa na pain coco. Co om awi ma' iri na ne, wixicaracao' hwerehwet pin ac tocwa na quem.

49Je ca tomi' xuhu' ca' ac caparut na. Maqui' iri tara xec nein ca pi' pin ta' ne macan' ne, ac i ca' tara, maqui' ac caca tara oro jam co taramaja mi' nonon Iri' Jam ma'. An to ni ac tococwa tara co iri' wari' nana pain ca tomi' ha' cocon Iri' Jam, an to ni ac tococwa tara oro wari' co caracat nana ma' quem. 50Co pan teretem nana ma', wixicaracao' mi' ac tococwa tara pain cote ne xe. Oro wari' co jain jain to nanain i cain, awaran tamana ac caca tara, cacacao' ac cacain tara xicocon pain ca jain jain tamana nucucun. Ac i ma' na ca pijim' joc mam' mi' caparut pain caji wi ca mam' quep wa hwam pane.

Capijacon Iri' Jam ca an xiho' nain xocorinain carawa je wara carawa quem

51Tomi' querec ac caparut na pain ca taxipa' urut con ca'. Taraju pa' hwein ca tomi' mao nein oro ca pijim' joc mam' mi' xuhu' cara ne naparut.

Taraju pa' urut pain ta ac urut con na.

52Je ca tomi' xuhu' ca' ac caparut na. Taxi' pin hwein ca ca' na wa capijacon Iri' Jam. Xi ca' na xo' ara xuhu' ta. Ha' nuhu' pain ca ca' na huhun pain capijacon Iri' Jam, ha' nuhu' pain ca ca' na huhun pain xocori capija ca' quem, pain ca ca' na xuhu' pain ca taramaxicon pin nucun Iri' Jam quem. Ca' na iri hwein capijacon Iri' Jam je xocori capija ca' ne, an xiho' ac hun na waximain xirim co an hwet qui' nain oro xocori caramaxicon je oro wara caramaxicon ma' quem. Mi' tiquin' ac tococwa na pain oro win ma' ca ma'. Ac i ma' na ca tomi' caparut ma'.

Ca in mao cain Nazaré Jeju

Marcos 6.1-6; Lucas 4.16-30

53Pijim' pijim' xam' iri naparut pain oro ca pijim' nucun Jeju ma' ne, mao ac ca na. 54Wa' mao iri nain macaracon ma' ne#13.54 Nazaré na wixinain macaracon Jeju. Je ca pe pan ca pain ca xo' hwara' nucun. , pijim' pe ac cain na xirim ca cut in to xucucun ma'.

He, cain' cain' ca co cwa' ne ta? Ma' co mi' non pain ca coromicat xo' nucun pain ca taxi' tamana nucun ma' quem ac xucucun na oro wari' co taraju nonon ma'. Ma' co mi' non pain ca ara an hwet pe cain ca hwara' opa nucun pain ca ara cain oro ca om ara taxi' ne ca wari' wa ma' quem nana. 55Om ca panxica co pacara pane ca ra, co ara taxipa' nain pana cara pane ca ra? Om ca cawiji con Maria ra? Om ca aji' con José con Tiago con Simão con Judas cwa' quem? 56Om ca to ho' cacapari' oro mon xojam' co aji' nonon cwa' ra? Om ca to ho' cacapari' pain Nazaré ca' ra? Cain' cain' xira ne? Ma' co mi' non pain oro ca ara taxi' nucun ma' quem ne na ca tomi' nucucun ma'. 57Cain' cain' xira con ne nana, miri'om ac cocon na quem. Om ca howa camain' cocon.

Ane tomi' pan cocon Jeju ne: Tomi' querec te paxi' ta profeta pain oro xijein cidade ma'. Pain iri' macaracon ma' iri na ne, om ca tomi' querec te tocwa. Iri' ca nari nucun ma', noc pan nonon ta na ca tomi' tococwa ma'.

58Je ca om ha' con pain ca ara tamana pe cain Nazaré oro ca om ara taxi' ne ca wari' wa pane. Xi howa cocon ta.

Actualmente seleccionado:

Mateus 13: TBPN

Destacar

Copiar